Услы́шите у́бо, бра́тіе, мно́зи су́ть христіа́не, то́кмо зва́ніемъ имену́ются христіа́не, а обы́чаемъ и дѣ́лы, а́ки невѣ́рніи, навыко́ша е́ллинская дѣ́яти. На на́съ бо испо́лнися проро́чество. Ка́ко есте́ вѣ́рніи, обы́кше кощу́ны, и срамосло́вія, и глумле́нія, на у́лицахъ и на бесѣ́дахъ, во градѣ́хъ же — ча́ры, и волхвова́нія, кровояде́ніе, и уда́вленины, и ина́я, и́хъ же на́мъ, христіа́номъ, не подоба́етъ твори́ти? И ка́ко Святы́я Та́йны смѣ́ете пріима́ти? Го́рше бо е́ллинъ навыко́сте пога́нская дѣ́яти, пляса́нія, и плеска́нія рука́ма на пиру́, и сатанины́ пѣ́сни; пія́нство, блу́дъ, гнѣ́въ, за́висть и и́на мно́га неподо́бная дѣ́ла творите́. Ка́ко есте́ вѣ́рніи нарица́етеся, а го́рѣе невѣ́рныхъ творите́? О, бра́тіе, а́ще вѣ́рніи есте́, не смѣша́йтеся со дѣ́лающими законопреступле́ніе. Апо́столъ Па́велъ въ посла́ніихъ свои́хъ, пиша́, глаго́летъ: съ тацѣ́ми ни я́сти, ни пи́ти, да не соо́бщницы и́мъ бу́дете: мно́зи бо су́ть уча́щіи злу́, и еще́ бо́лѣе умножа́ются. Но блюди́теся, я́ко днíе зли́ су́ть, и вре́мя слуги́ си́ собира́етъ, ни сему́ чуди́теся, а́ще и па́стыри во́лцы бу́дутъ. Къ епи́скопомъ бо апо́столъ Па́велъ глаго́лаше: «я́ко отъ ва́съ бу́дутъ нѣ́ціи на поги́бель уча́ше». И Госпо́дь глаго́ла: «блюди́теся, да никто́ же ва́съ прельсти́тъ», и «не послѣ́дуйте злы́мъ», мно́зи бо вѣ́рніи творя́тся, а не вѣ́дятъ что́ е́сть христіа́нство, и ка́ко жи́ти въ вѣ́рѣ зако́нно? Ви́жу бо не ю́ныя то́кмо неи́стовы и неразу́мны, но и ста́рыя, о ни́хъ же вельми́ тужу́. Егда́ у́бо на у́лицахъ, и на бесѣ́дахъ, ви́жу му́жа отъ сѣди́нъ че́стна, зла́я же и неподо́бная глаго́люща, или́ на позо́ры, и на пиры́ дѣ́ти своя́ влеку́ща съ собо́ю. О, вѣ́рніи, ка́ко си́ поги́бель душа́мъ дѣ́ете? Скве́рно бо се́ и зло́, егда́ оте́цъ своя́ дѣ́ти на поги́бель веде́тъ. Подоба́етъ у́бо христіа́номъ дѣ́ти своя́ зако́ну Бо́жію учи́ти и спасе́нію души́, а не поги́бели. Аще же кто́ вопро́ситъ безсту́дныхъ тѣ́хъ: «ка́ко апо́столи и проро́цы жи́ли, и что́ твори́ли?» «И коли́ко апо́столъ и проро́къ?» Не вѣ́дятъ о то́мъ, и не умѣ́ютъ, что́ рещи́. Аще ли о коне́хъ, или́ о пти́цахъ, или́ о и́номъ че́мъ, то́ филосо́фи и хитрецы́ творя́тся, и глаго́лютъ: «въ глумле́ніи нѣ́сть зла́». О, человѣ́че, да́лъ ти́ Бо́гъ пожи́ти вре́мя, да во́лю Его́ сотвори́ши и, пра́вду дѣ́я, Ему́ угоди́ши; ты́ же на пія́нство, и на блу́дъ, и на вся́ зла́я вда́лся еси́, я́же ненави́стна Бо́гу. О, вѣ́рніи, рече́тъ ва́мъ Госпо́дь: «почто́ вре́мя свое́ въ пусто́ши изжи́сте, и уче́нія Моего́ не внима́сте?» Не се́ ли е́сть въ ва́съ обы́чай? Аще уче́нія сло́во продолжа́ется, то мно́зи а́ки у нѣ́коего зла́ съ ну́ждею стоя́тъ. Аще ли бу́дете на у́лицѣ, или́ на бесѣ́дѣ и на игри́щи, то ту́ пребу́дете и до полу́дне и да́лѣе; или́ бу́дете въ питіи́, то и въ нощи́ не спя́, па́губная дѣ́ла дѣ́лающе. Ка́ко христіа́не нарече́теся, сія́ творя́ще? Го́рѣе пога́ныхъ. Сатанина́ дѣ́ла замышля́юще: то́й бо позо́ры дѣ́яти научи́лъ, и смѣхотво́рцы, и кощу́нники, и скомра́хи, и игрецы́, да тѣ́хъ злы́ми дѣ́лы и зря́щая и́хъ погуби́тъ. Позо́рующіи бо сему́, не то́же ли творя́тъ? Аще пусто́шникъ, глумя́ся, что́ изрече́тъ, тогда́ сíи бо́лѣе смѣю́тся. Его́ же бы злосло́внаго кощу́нника, бію́ще, отгна́ти, но еще́ зря́ще, чудя́тся и на зло́ поуча́ются. Друзíи же мзду́ даю́тъ игреце́мъ, и тѣ́мъ бо́лѣе о́гнь возжиза́ютъ на своя́ главы́. Аще бы не зрѣ́ли, ни диви́лися и́мъ, то и они́ оста́ли бы́ша пусто́шныхъ и́гръ и слове́съ; но не то́кмо дивя́тся, зря́, но и богоме́рзскихъ слове́съ и́хъ навыка́ютъ. И егда́ соберу́тся на пи́ръ, или́ и́ндѣ гдѣ́, то подоба́ло бы христіа́номъ глаго́лати о проро́чествѣ, и о уче́ніи святы́хъ и богоно́сныхъ оте́цъ, но сíи въ того́ мѣ́сто вѣща́ютъ и глаго́лютъ: «се́й о́нсица скомра́хъ, или́ о́нсица игре́цъ и кощу́нникъ, си́це рече́...», и тѣ́мъ мно́ги пути́ себѣ́ гото́вятъ, веду́щія въ му́ку вѣ́чную. Се́ бо нѣ́сть христіа́нско, но пога́нско дѣ́ло, а́ще и́гры, и бесѣ́ды, и кощу́ны дѣ́емъ, и злы́й смѣ́хъ, и упива́емся, и блу́дъ твори́мъ, непра́вдъ и про́чихъ зло́бъ не остаю́щеся. Сія́ бо дѣ́ла тѣ́хъ, и́же діа́волу уго́дницы, и и́мъ же нѣ́сть ча́янія бу́дущихъ бла́гъ, ни надѣ́янія вѣ́чныя жи́зни. Того́ ра́ди, бра́тіе, потщи́мся не твори́ти таковы́хъ зо́лъ, да не съ бѣсы́ осужде́ни бу́демъ въ негаси́мый о́гнь. Бо́гу на́шему сла́ва.