Пяток сырный

Чте́тся же сло́во сие́ натро́е: две по кафи́смех, тре́тия же по тре́тией пе́сни кано́на:

По седа́льнах пе́рваго стихосло́вия: И́же во святы́х отца́ на́шего архиепи́скопа Кесари́и Каппадоки́йския Васи́лия Вели́каго, сло́во о посте́.

«Воструби́те, рече́, на нов ме́сяц трубо́ю, во благознамени́тый день пра́здника ва́шего» . Сие повеле́ние есть проро́ческое. Нам же вся́коя трубы́ велегла́снейше, и вся́коя цевни́цы благозна́меннейше, приводи́мый днем пра́здник назна́менуют чте́ния. Позна́хом бо по́стную благода́ть от Иса́ии проро́ка, иуде́йский у́бо поста́ нрав отри́нувшу, и́стинный же пост нам показа́вшу: «Не в суды́ и сва́ры пости́теся, рече́, но разреша́й всяк соу́з непра́вды» . И Госпо́дь: «Не быва́йте, рече́, се́тующе, но умы́й лице́ сво́е» . Быва́ем у́бо я́коже науче́ни бы́хом: не се́тующе о прише́дших днех, но све́тле к тем я́коже подоба́ет святы́м устрая́ющеся. Никто́же не усе́рдствуя венчава́ется. Никто́ дряхлу́я, одоле́ние поставля́ет. Не сету́й, врачу́емь. Безме́стно бо есть не ра́доватися о здра́вии душы́, но печа́лити о сне́дей премене́нии и вя́щшую благода́ть явля́тися даю́щим сла́сти пло́тстей, не́жели прилежа́нию души́: сы́тость у́бо к утро́бе благода́ть поставля́ет, пост же к души́ возво́дит прибы́ток. Благоду́шствуй, я́ко дана́ бысть тебе́ лечба́ от Врача́, греха́ уби́йствена. Я́коже бо и́же во утро́бах дете́м оживля́еми че́рвие, лечба́ми не́кими люте́йшими погубля́еми быва́ют, та́ко и грех, живу́щий в глубине́, убива́ет вшед в ду́шу пост, и́же [яко] вои́стину нарече́ния сего́ досто́йный.

«Пома́жи свою́ главу́ и лице́ свое́ умы́й». На та́инства тя призыва́ет сло́во. Пома́завыйся, пома́зася. Умы́выйся, умы́тся. Внутрь прие́мли удово́м законоположе́ние, отмы́й ду́шу от согреше́ний, пома́жи гла́ву пома́занием святы́м, я́ко да прича́стник бу́деши Христу́, и та́ко приступи́ к посту́.

Не просмражда́й лице́ свое́ я́коже лицеме́ри . Просмражда́ют ли́ца своя́, егда́ вну́тренее устрое́ние, притворе́нем о́бразом вне́шним помрача́ется, я́коже под заве́сом лже́ю покрыва́емь, погубля́ется. Лицеме́р есть, и́же на позо́рищи чу́жде лице́ прие́мый, раб сый мно́жицею я́же влады́ки, и неве́жда сый я́же царе́ва: та́ко и в житии́ сем я́коже на и́грищи свое́й жи́зни мно́зи позо́рствуют, и́на у́бо в се́рдцы нося́ще, и́на же во явле́нии челове́ком показу́ющеся. Не просмража́й у́бо лице́ свое́. Яко́в же еси́, тако́в явля́йся. Не вообража́й себе́ к се́тованию, от е́же мне́тися воздержа́тель бы́ти сла́ву улавля́я. Ни во благотворе́нии труби́мом есть по́льза, ниже́ поста́ объявля́ема прибы́ток. Я́же показа́тельне быва́емая, ни к веку бу́дущему плод простира́ют, но во челове́ческой похвале́ разсы́пуются. Притецы́ у́бо све́тле к да́ру по́стному.

Дре́вний дар есть пост. Не обетшава́я, ни старе́я, но обновля́яся при́сно и во ю́ность процвета́я. Мни́ши ли мя нача́ло бытия́ его́ от зако́на полага́ти? И зако́на старе́йши есть пост: а́ще ма́ло по́ждеши, обря́щеши слов́а и́стинну. Не мни день очище́ния завеща́нный Изра́илю в седмо́м ме́сяцы в деся́тый ме́сяца , то бы́ти поста́ нача́ло. Гряди́ же повествова́нию ступа́я, испыта́й нача́ло бытия́ его́. Не но́вейше бо есть изобре́тение, оте́ческо есть преда́ние. Все же е́же дре́вностию ра́знствующее, че́стно. Устыди́ся седи́н по́стных, сове́рстник бо есть челове́честву пост. В раи́ законоположе́н есть, пе́рвую за́поведь прие́м Ада́м: «От дре́ва е́же ви́дети добро́ и зло, не сне́си» . А е́же не сне́си, поста́ и воздержа́ния есть законоположе́ние. А́ще бы пости́лася от дре́ва Е́ва, не бы́хом сего́ ны́не тре́бовали поста́. «Не тре́буют бо здра́вствующии врача́, но боля́щии» . Разболе́хомся ра́ди греха́, исцеле́ем ра́ди поста́. Пост же кроме́ покая́ния пра́зден есть. «Проклята́ земля́ в де́лех твои́х, те́рние и волче́ц да прозя́бнет ти» . Скорбе́ти повеле́н еси́, еда́ бо пита́тися? Посто́м отвеща́й Бо́гу.

Но и е́же в раи́ пребыва́ние, поста́ есть о́браз. Не то́чию зане́же а́нгелом единопи́щен сый челове́к, ра́ди ма́ла дово́льства, е́же к ним уподобле́ние исправля́ше, но я́ко и ели́ка по́слежде умышле́ние челове́ческое изобре́те: не у́ и́же в раи́ пита́ющимся умышле́но бе, не у́ винопи́тия, не у́ живожре́ния, ни ели́ка ум возмуща́ют челове́чь.

Поне́же у́бо не пости́хомся, испадо́хом из рая́. Пости́мся ны́не, я́ко да к нему́ возврати́мся. Не ви́диши ли Ла́заря, я́ко ра́ди поста́ вни́де в рай?

Не подража́й Е́вы преслуша́ние, не прие́мли сове́тника зми́я, щаде́нием пло́ти снедь подвлага́юща. Не непщу́й боле́знь теле́сную и не́мощь. Не мне бо непщева́ния, но Ве́дящему глаго́леши. Пости́ти ли ся не мо́жеши, рцы ми? Насыща́тижеся в житии́ и сокруша́ти си те́ло тя́жестию снеда́емых бра́шен мо́жеши. И боля́щим у́бо не сне́ди разли́чны, но неяде́ние и ску́дость вем врача́ запове́дающа. Ка́ко у́бо и́же сия́ могу́, и о́на непщу́еши не мощи́? Что удо́бнейше чре́ву, ску́достию пи́щною препроводи́ти нощь, или́ оби́лием бра́шенным отягче́ну лежа́ти? Па́че же ниже́ лежа́ти, но ча́сто преобраща́тися растерза́ему и стеню́щу. А́ще не и ко́рмчию, – рече́ши, отягчева́емь бре́меньми кора́бль удо́бнейше спаса́ти, па́че же удо́бь дви́жимаго и ле́гкаго? Отягчева́емаго бо мно́жеством, ма́ло волны́ воста́ние ни́зу погрузи́. А и́же умере́но бре́мя име́яй, удо́бь носи́мь есть волна́ми, ничесо́муже возбраня́ющу его́ вы́шшу быва́ти. И челове́ческая у́бо телеса́, ча́стою у́бо сы́тостию отягчава́ема, удо́бь погружа́ема в боле́знех быва́ют. Худо́ю же и ле́гкою пи́щею пита́ема, и ча́емое от неду́га зло я́коже бу́рное востая́ние избега́ет , и е́же уже́ настоя́щее стуже́ние я́коже не́кое волны́ наше́ствие отража́ет . А́ще у́бо и е́же безмо́лствовати по тебе́ от е́же тещи́ боле́знейше, и е́же бори́тися от е́же почива́ти. А́ще у́бо и е́же упива́тися от е́же про́сте пита́тися, боля́щим рече́ши бы́ти успе́шно. Стро́ящия бо живо́тное си́ла, дово́льство у́бо и про́сту снедь удо́бь отсла́ну соде́ловает и вселя́ется в пита́ющагося. Многоце́нная же и разли́чная бра́шна прие́мши, та́же проти́ву возмощи́ до конца́ не довле́ющи, разли́чныя ро́ды неду́гованием сотворя́ет .

[Коне́ц пе́рвой трети́ны]

По седа́льнах втора́го стихосло́вия:

Но к по́вести да ше́ствует сло́во, нача́льное поста́ изглаго́луя, и ка́ко вси святи́и я́коже не́кий жре́бий оте́ч прие́мше, той сохрани́ша, оте́ц ча́ду предаю́ще, отню́дуже и до нас после́дование прия́тия дости́же стяжа́ние.

Не бе в раи́ вино́, не у́ живо́тным закала́ние, не у́ мясояде́ние. По пото́пе вино́, по пото́пе, сне́сте вся я́ко зе́лие травно́е . Егда́ отча́яся соверше́ние, тогда́ прощено́ бысть восприя́тие. Указа́ние же ви́ннаго неиску́сства – Но́е, не ве́дый вина́ потре́бу. Не у́бо в житие́ приведено́ бе, ниже́ истопта́н бе нога́ма грозд обы́чаем челове́ческим, ни у́бо ино́го ви́дев, ниже́ той в неиску́се быв, во свою́ па́кость впаде́ без сохране́ния: «Насади́ бо Но́е виногра́д, и пит от плода́ его́ и упи́тся» - не от е́же винопи́йцу быти, но за е́же неиску́сну бы́ти ме́рам восприя́тия. Си́це нове́йше рая́ тече́ние вино́внаго пития́, и сиц́е древне́е поста́ честно́е!

Но и Моисе́я поста́ ра́ди позна́хом присту́пльшаго к горе́. Ни бо смел бы дымя́щуся верху́, ниже́ дерзну́л бы вни́ти в мрак, а́ще не бы посто́м вооружи́лся. Посто́м за́поведь на скрижа́лех прия́т, персто́м Бо́жиим напи́саны. И горе́ у́бо пост законоположе́ния хода́тай бе, до́ле же чревообъяде́ние на идолослуже́ние возбеси́. «Седо́ша бо, рече́, лю́дие я́сти и пи́ти, и воста́ша игра́ти» . Четы́редесятих дней приседе́ние, постя́щуся и моля́щу уго́днику Бо́жию, непотре́бно показа́ вина́ пия́нство еди́но. Я́же бо поста́ прия́т скрижа́ли персто́м Бо́жиим напи́саны, сия́ пия́нство сокруши́: недосто́йны суди́вшу проро́ку, пия́ныя лю́ди взако́неватися от Бо́га. Во еди́ном вре́мени часе́ ра́ди чревообъяде́ния лю́дие они́, и́же Бо́гу ра́ди вели́ких чуде́с научен́и, во Еги́петское идолонеи́стовство обрати́шася. Пря́мо друг дру́гу положи́ обоя́, ка́ко пост Бо́гови приво́дит, и каќо пи́ща спасе́ние преда́тельствует.

Сни́ди путе́м, иды́й на до́льныя. Что Иса́ва оскверни́ и раба́ сотвори́ бра́ту, не снедь ли еди́на ея́же ра́ди отда́ше си пе́рвенечество? Саму́ила же, не пост ли и моли́тва дарова́ла есть ма́тери? Что вели́каго хра́браго Сампсо́на непобежда́ема соде́ла, не пост ли? С ним же во чре́ве ма́терни зача́т бысть, пост его́ породи́, пост его́ воздои́, пост его́ вмужи́, его́же а́нгел запове́да ма́тери: «ели́ка исхо́дят от виногра́да [да] не снесть, и вина́ и секе́ра ни [да] пие́т» .

Пост проро́ки ражда́ет, си́льныя укрепля́ет. Пост законополо́жники упремудря́ет. Души́ благохрани́тельство, те́лу сожи́тель тверд, ору́жие хра́брствующим, страда́льцем обуче́ние. От искуше́ния отража́ет, показу́ет к благоче́стию. Той трезве́нию сожи́тель, целому́дрию соде́тель. Во бране́х му́жествует, в ми́ре безмо́лвию учи́т. Назаре́я освяща́ет, свяще́нника соверша́ет, немо́щно бо кроме́ поста́ священноде́йствовати, не то́чию в Таи́нней и и́стинней слу́жбе, но и во обра́зней по зако́ну приноси́мей.

Той зри́теля сотвори́ вели́каго чудесе́ Илию́: четы́редесятих бо дний посто́м ду́шу очи́стив, си́це в пеще́ре и́же в Хори́ве ви́дети сподо́бися, я́коже мо́щно есть челове́ку ви́дети Го́спода. Постя́жеся, отда́сть о́трока вдови́цы жи́ва, кре́пок я́влься на смерть поста́ ра́ди. От постя́щагося уст глас исше́д, затвори́ зако́н престу́пным лю́дем не́бо, не одожди́ти три ле́та и м́есяц шесть. Я́ко бо да умягчи́т неутомле́но се́рдце жестоковы́х о́нех, изво́ли и себе́ злострада́нию соосуди́ти. Сего́ ра́ди «жив Госпо́дь, рече́, а́ще бу́дет на земли́ вода́ ра́зве усты́ мои́ми» . И наведе́ всем лю́дем пост гла́да ра́ди, я́ко да ю́же от пи́щи и от осла́бленнаго жития́ зло́бу испра́вит.

Елисе́ю же каково́ житие́? Ка́ко у́бо у сумантяны́ни гоще́ния наслади́ся? Ка́ко же ли и той проро́ки учрежда́яше ? Не зе́лия ли ди́вия и муки́ ма́ло гоще́ние наполня́ше, егда́ и печа́ли прия́те бы́вши, беду́ прия́ти хотя́ху косну́вшиися, а́ще не моли́твою по́стника возбрани́лося бы сме́ртное? И еди́ною про́сто обря́щеши пост, вся святы́я во е́же по Бо́зе жи́тельство руководи́вшии.

Есть не́кое естество́ телесе́, е́же нари́чут амианто́н, не е́млемо огне́м. Е́же в пла́мени лежа́, я́ко угль бы́ти мни́тся, изъя́то же бы́вше от огня́ и водо́ю измове́но, чисте́йше быва́ет. Такова́ бя́ху святы́х трие́х о́трок о́нех телеса́ в Вавило́нстем пла́мени, от поста́ иму́ще нескве́рненое. В пещи́ бо я́ко зла́ти естество́м су́ще, лу́чшия же от огня́ пребыва́ху па́кости. Но и зла́та сильне́йши показа́хуся, не бо слия́ тех огнь, но сохрани́ це́лы. Та́же и ничто́же у́бо он пла́мень претерпе́ло бы, его́же на́фта и смо́ла и лози́ние возвыша́яше я́ко на четы́редесят и де́вять ла́ктий разлива́тися, и окре́стная ея́ пояда́ющу, мно́гих от халде́й попали́ти . Во о́но у́бо огня́ горе́ние, с посто́м вше́дши, попира́ху о́троцы, то́нок возду́х и ороше́н, вси зе́льне огни́ отдыха́юще. Ни бо к власо́м их огнь сме́я косну́тися, за е́же от поста́ тем возвраще́ным бы́ти.

Дании́л же муж жела́ний, и́же трие́ седми́цы хле́ба не яд и воды́ не пив, львы́ пости́тися научи́, сшед в ров. Я́коже бо ка́меню или ме́ди, или́ ине́й не́цей тверде́йшей ве́щи сгуще́ну, вложи́ти не можа́ху зу́бы льво́ве. Си́це я́коже кали́ло желе́зу, те́ло му́жа пост обостри́в, несне́дно творя́ше львом, ни бо отверза́ху уста́ на свята́го. Пост угаси́ с́илу о́гненую, загради́ уста́ львом.

Моли́тву на не́бо возсыла́ет, я́коже кри́ло ей быва́я к го́рнему ше́ствию. [Домо́м возвраще́ние, здра́вию] ма́ти, ю́ности каза́тель, красота́ ста́рцем, благосше́ственик пу́тником, тверд единокров́ник сожи́телем. Не зазира́ет бра́ком наве́т мужь, в посте́х зря жену́ живу́щу. Не тае́т ревнообра́зием жена́, му́жа зря́щи пост прие́млюща. Кто свой дом ума́ли в посте́? Изочти́ днесь я́же внутрь, и изочти́ пото́м: ничто́же ра́ди поста́ оскуде́ет от и́же в до́му. Нико́е же живо́тное пла́чется сме́рти, ника́коже кровь, ника́коже отвеща́ние от неотрече́ннаго чре́ва износи́мо на живо́тная. Препочи́ сока́чный ножь, трапе́за дово́льна есть самосо́бными.

Суббо́та дана́ бысть иуде́ом, «я́ко да препоко́ится, рече́, подъяре́мник и о́трок твой» . Да бу́дет пост препокое́ние от ча́стых их трудо́в, и́же чрез всего́ ле́та слугу́ющим рабо́м. Упоко́й си по́вара, даждь свобо́ду трапезотво́рцу. Соста́ви ру́ку виноче́рпчию, да преста́нет не́когда и́же разли́чная пону́дам ухрища́яй. Да умо́лкнет не́когда и дом от тма́ми пли́щев и ды́ма и сква́ры, и и́же горе́ до́лу обти́чущих, и я́коже неотрече́ней влады́чице чре́ву служа́щих. Вся́ко не́когда и то́ржницы подру́чным свободи́тися [ма́ло] повелева́ют. Да даст не́кую отра́ду [усто́м], и утро́ба да даст, да уве́щает нам пятодне́вныя тре́бы, я́же при́сно прося́щия и никогда́же престаю́щи; прие́млющи днесь, и зау́тра забыва́ющи; егда́ насы́титися, о воздержа́нии любому́дрствуют, и егда́ издыха́ется, забыва́ет уста́вленых.

Пост заимова́ния естество́ не весть: не смерди́т ли́хвами трапе́за постя́щагося, не да́вят си́раго о́трока по́стникова ли́хвы о́тча, я́коже змия́ оплета́ющися.

[Коне́ц второ́й трети́ны.]

По седа́льнах тре́тией пе́сни:

И и́накоже, вина́ в весе́лии есть е́же пости́тися. Я́коже бо жа́жда сладкопи́тие уготовля́ет, и глад предвари́в сла́достную устрая́ет трапе́зу, та́ко и бра́шном восприя́тие пост светли́т. Посреде́ бо себе́ предложи́в и ча́стое пи́щи пресе́к, любе́зно ти восприя́тие пост сотвори́т, я́коже отходя́. Те́мже а́ще хо́щеши себе́ вожделе́ную сотвори́ти трапе́зу, приими́ е́же от поста́ преложе́ние. Ты же от е́же зело́ пи́щею содержа́тися, забы́л еси́ себе́ возбраня́я пи́щу, и от сластолю́бия сласть обезчеща́я. Ничто́же бо та́ко вожделе́нно: я́коже не ча́стостию восприя́ти удо́бь преоби́димо бу́дет, а и́хже ску́дно стяжа́ние сих – потща́но восприя́тие. Си́це и Созда́вый нас ра́ди е́же в житии́ измене́ния пребыва́ти нам благода́ти да́нных ухитри́. Не зри́ши ли, я́ко и со́лнце светле́йше есть по но́щи, и бо́дрость сла́достна по сне, и здра́вие любе́знейше по иску́се сопроти́вных, и трапе́за у́бо ра́достнейша по посте́. Подо́бне у́бо бога́тым и благотрапе́зным, подо́бне же просты́м и самоуготовле́ным пи́щею.

Убо́йся при́тчи бога́таго . О́ного преда́сть огню, я́же в житии́ пи́ща: не бо о непра́вде, но о оби́лии пи́щи осужде́н быв, пряжа́шеся в пла́мени пе́щнем. Я́ко да у́бо угаси́м он огнь, воды́ потре́ба. И не к бу́дущим то́чию поле́зен есть пост, но и са́мой пло́ти поле́знейше. Я́же бо до конца́ здра́вия, возвраще́ния и́мут и препа́дания, обленя́ющуся естеству́ и возноси́ти тяготу́ здра́вия не могу́щу. Зри, да не ны́не оплева́я во́ду, по́слежде ка́пли вожделе́еши, я́коже и бога́тый. Никто́же шу́мен бысть от воды́, никого́же гла́ва поболе́ когда́, водо́ю отяготе́вши, никто́же чужа́я но́ги потре́бова, свобо́дным питие́м живы́й, никому́же связа́шася нозе, никому́же ру́це непотре́бствовашася, водо́ю напая́емы. Е́же бо от сла́ний немо́щное е́же от пита́ющагося ну́жне после́дует, се зе́льная неду́гования телесе́м соде́ловает. Постя́щагося че́стен вид: не в червле́нь безсту́дную процвета́я, но бле́достию целому́дрия укра́шен. Очи́ма кро́ток, сопря́тано ступа́ние, лице́ суме́нно , неуде́ржным сме́хом не досажда́емо, умере́ние сло́ву, чистота́ се́рдцу.

Помяни́ и́же от ве́ка святы́х, «и́мже не бе досто́ин весь мир, и́же ходи́ша в ми́лотех и в ко́зиях ко́жах, лиша́еми, озлобля́еми» , о́нех подража́й житие́. А́ще взыску́еши тех честь, что Ла́заря упоко́и в не́дрех Авраа́млих, не пост ли? Иоа́нново же житие́ еди́н пост бя́ше, и́же ни одра́ имя́ше, ни трапе́зу, ни зе́млю оро́му, ни о́рнаго вола́, ни жи́та, ни житотво́рца, ни и́но что от и́же в житии́. Сего́ ра́ди «бо́лий в рожде́ных жена́ми не воста́ Иоа́нна Крести́теля» . Па́вла со ине́ми , и пост, его́же в ско́рбных похвале́ниих восприя́т, на не́бо возведе́ трети́цею .

Глава́ же о глаго́лемых , Госпо́дь наш посто́м плоть ю́же о нас восприя́т утверди́, си́це с тем диа́вольняя прило́ги подъя́т, нас наказу́я в посте́х пома́зовати и обуча́ти себе́ ко и́же во искуше́ниих подвиго́м, и сопоста́ту ра́ди ску́дости я́коже вину́ дав: непресту́пен бо бе ему́ ра́ди высоты́ Божества́, а́ще не бы ску́дости ра́ди приступи́л к челове́ческому.

Восходя́ у́бо на небеса́, пи́щи косну́ся, естество́ телесе́ воскре́сшаго уверя́я. Ты же претучнева́я у́бо себе́ и уплотева́я не преста́еши, иста́я же ум в непита́нии животво́рных уче́ний, ни еди́но же сло́во твори́ши. Или́ не ве́си, зане́ я́коже во ополче́нии, еди́наго посо́бство побежде́ние твори́т друго́му? Си́це и́же пло́ти прилага́яйся, дух побежда́ет, ниже́ к ду́ху счини́выйся, порабоща́ет плоть. Сия́ бо друг дру́гу супроти́витася. Те́мже а́ще хо́щеши кре́пок сотвори́ти ум, утоми́ плоть посто́м. Се бо есть е́же рече́ апо́стол: «Ели́ко вне́шний наш челове́к растлева́ется, толи́ко вну́трений обновля́ется» . И егда́ немощну́ю, тогда́ си́лен есмь. Не вознебреже́ши ли тле́ющих бра́шен? Не прие́млеши ли жела́ние я́же в Ца́рствии трапе́зе, я́же всяк зде́шний пост предугото́вит? Не ве́си ли безме́рием сы́тости де́бела себе́ му́чнаго устрая́яй че́рвия? Кто бо в пи́щи оби́льне и пита́нии всегда́шнем прия́т не́кое приобще́ние дарова́ния духо́внаго? Моисе́й второ́е прие́мля законоположе́ние, втора́го поста́ потре́бова. Ниневи́тяном, а́ще не бы́ша и безслове́сная спости́лася, не бы́ша убе́гнули преще́ния разоре́нию. Кото́рым падо́ша ко́сти в пусты́ни ? Не и́же ли мясояде́ния взыску́ющим? Они́ до́ндеже у́бо дово́льни бя́ху ма́нною и я́же из ка́мене водо́ю, еги́птяны побежда́ху, сквозе́ мо́ре прохожда́ху, «не бе в племенех их боляй» . Егда́ же воспомяну́ша мя́са и леви́ты, и обрати́шася похотьми́ во Еги́пет, не ви́деша зе́млю обетова́нную. Не бои́шилися при́тчи? Не трепе́щеши ли мно́гаго яде́ния? Да не ка́ко тя от упова́емых благ затвори́т. Но ниже́ прему́дрый Дании́л виде́ния ви́дел бы, а́ще не бы посто́м светле́йшую сотвори́л си ду́шу. От де́белыя бо пи́щи я́ко же ды́мная воскажде́ния возсыла́ема, о́блаку подо́бно ча́сту я́же от Свята́го Духа быва́ющая осия́ния на ум пресеца́ют. А́ще ли а́нгельскаго не́кая есть пи́ща, хлеб есть, я́коже рече́ проро́к: «Хлеб а́нгельский яде́ челове́к» . Не мя́са, ниже́ вино́, ниже́ ели́ка рабо́м чре́вным потща́на суть. Пост, ору́жие есть ко е́же на бе́сы удержа́нию. «Сей бо род, рече́, не исхо́дит ничи́мже, ра́зве моли́твою и посто́м». И я́же у́бо от поста́ блага́я толи́ка!

Сы́тость же – досажде́ния нача́ло. А́бие бо совпа́дает пи́щи и та́инству и вся́ческим ко́рмлям, и всяк вид блуже́ния пия́нственаго: отсю́ду «ко́не женонеи́стовни» челове́цы, ра́ди е́же от пи́щи раждеже́ния быва́ющаго в души́. От упива́ющихся у́бо естеству́ премене́ния: в му́жеском у́бо по́лу же́нский, в же́нском же му́жеский взыску́ющим. Пост же и бра́чных дел препознава́ет, и и́же от зако́на проще́нных безме́рием уча́: согла́сно упражне́ние в них сотворя́ет, «я́ко да пребу́дут в моли́тве» .

Не у́бо во оша́янии бра́шен еди́ном, е́же от поста́ благо́е уставля́й: пост бо и́стинный, злым отужде́ние . «Разреша́й всяк соу́з непра́вды» , оставля́й и́скренему печа́ль, оста́ви ему́ до́лги, «не в суды́ и сва́ры пости́теся» . Мяс не я́си, но снеда́еши брата. Вина́ оша́ешися, но доса́ды не удержава́еши. Ве́чера ожида́еши восприя́тие пи́щи, но день иждива́еши в суди́щах.

Го́ре упива́ющеися не от вина́. Я́рость, пия́нство есть души́: изумле́ну ту творя́ я́коже вино́. Печа́ль, пия́нство есть и та, погружа́ющи мысль. Страх, друго́е пия́нство: егда́ о ни́хже не досто́ит быва́ет: «от стра́ха бо, рече́, вра́жия изми́ ду́шу мою́» . И отну́дь ка́яждо от страсте́й, изступи́тельна мы́сли су́щи, пия́н в пра́вду да нари́чется. Помы́сли бо ми гне́вающагося, ка́ко упива́ется стра́стию. Несть сам себе́ госпо́дь, не весть себе́, не весть ту су́щих, яќо в нощебо́рствии всем каса́ется, всех напа́дает, несохра́нне веща́ет, неудержи́мь есть, укаря́ет, бие́т, прети́т, заклина́ется, вопие́т, растерза́ет.

Бе́гай сего пия́нства, и ниже́ от вина́ прие́мли. Да не предвари́ши винопи́тием водно́е питие́. Да не тайново́дит тя на пост пия́нство. Несть с пия́нством вни́ти в пост, ниже́ с лихои́мством в пра́вду, ниже́ с блуже́нием в целому́дрие, ниже́ совоку́пленне рещи́, со злобо́ю в доброде́тель. Но дверь есть на пост дово́льство. Подвиза́яйся, предобруча́ется. Постя́йся, предвоздержа́ется. Не я́ко отмща́я дни, не я́ко ухищря́я Законополо́жника. Пяти́х дней объяде́ние отлага́й. И́бо без успе́ха тру́дишися: те́ло у́бо сокруша́я, не утеша́я же ску́дость. Неве́рно есть сокро́вище, во у́тлу де́льву влива́еши. Вино́ бо протече́т свои́м путе́м, истека́я, грех же в тебе́ оста́ет. Раб бе́гает влады́ки бию́ща: ты же пребыва́еши в вине́, на ко́ждо день бию́щему главу́ твою́. Ме́ра изря́дна ви́ннаго прия́тия, потре́ба теле́сная. А́ще ли же вне преде́л бу́деши, зау́тра прии́деши главо́ю тя́жек, прозия́ваяся, вертогла́в, согни́вшим вино́м смердя́, вся обно́сят ти ся, вся мясти́ся мнят ти ся. Пия́нство сон у́бо наво́дит, бра́та сме́ртнаго, бо́дрость же, сном уподо́блену.

У́бо ве́си ли, Кто есть, Его́же прия́ти хо́щеши? Обетова́вый нам, я́ко Аз и Оте́ц «прии́деве и оби́тель в нем сотвори́ве» . Что у́бо предваря́еши пия́нством и затворя́еши Влады́це вход? Что повелева́еши врагу́ предудержава́ти твоя́ тве́рдости? Пия́нство Го́спода не подъе́млет, Ду́ха Свята́го отго́нит. Дым у́бо прого́нит пче́лы, дарова́ния же духо́вная отганя́ет пресыще́ние.

Пост – гра́ду благообра́зие, то́ржищу благостоя́ние, домово́м мир, спасе́ние име́ниом. Хо́щеши ли ви́дети того́ честно́е? Соточни́ ми дне́шний ве́чер ко у́трешнему, и у́зриши град от мяте́жа и бу́ри, в тишину́ глубоку́ преложи́вшуся. Молю́ же ся и дне́шнему у́трешнему уподо́битися по честно́му, и у́тренему ничи́мже све́тлостию от дне́шняго оскудева́ти.

Приведы́й же нас обхожде́ние ле́та Госпо́дь, да пода́ст нам я́коже подви́жником и́же к подвиго́м сим тве́рдое и кре́пкое терпе́ния показа́вшим, дости́гнути и в Госпо́дьский венце́м день: ны́не у́бо спасе́ныя стра́сти воспомина́ния, в бу́дущем же ве́це воздая́ния о пожи́тых нам в правдосу́дии Христа́ Его́, я́ко Тому́ подоба́ет сла́ва и держа́ва, ны́не и при́сно, и во ве́ки веко́в. Ами́нь.

Навы́кнемъ у́бо, бра́тіе, ч́то е́сть и́же скверни́тъ человѣ́ка, да разсмотрѣ́вше зла́я, отбѣ́гнемъ и́хъ. Ибо всегда́ въ це́ркви ви́димъ тако́въ обы́чай отъ мно́гихъ обдержи́мъ, я́ко да бы то́чію въ чи́стыхъ ри́захъ къ це́ркви ити́, и ру́цѣ бы и́мъ умы́ти, и уста́ измы́ти водо́ю, а о то́мъ ника́коже пеку́тся, ка́ко бы ду́шу чи́сту предпоста́вити предъ Бо́гомъ, кромѣ́ вся́кой зло́бы. Се́ же у́бо глаго́лю не возбраня́я умыва́ти ру́къ и у́стъ, я́ко же подоба́етъ. Не водо́ю же то́чію умыва́ти ру́цѣ и уста́, но до́брыми дѣ́лы. Нечистота́ бо е́сть ручна́я, не то́кмо искаля́ніе, но и го́рши того́ е́сть сія́ нечистота́: /л. 15/ грабле́ніе, наси́лованіе, злодѣя́ніе, татьба́, душегу́бство, бо́й. Скве́рна же усто́мъ, не къ зубо́мъ, ни къ десна́мъ прилѣ́пльшаяся нечистота́, или́ хра́къ го́рекъ, или́ сли́на у́тхлая, но сія́ го́рши того́ е́сть: лжа́, клевета́, хула́, оба́да, срамосло́віе, кощу́ны, пустосмѣ́шіе, глу́мное грохота́ніе, смѣ́хъ, сва́ръ, оби́да, пусто́шныя бесѣ́ды, осужде́ніе, бѣсо́вскія пѣ́сни, ба́сни е́ллинскія. Да а́ще у́бо свѣ́си себе́ ничто́же отъ злы́хъ си́хъ дѣ́лъ творя́ща, ни бесѣ́дующа ни оскверня́ющася нечистота́ми и́хъ, то́ иди́ къ це́ркви, и приступи́ со упова́ніемъ къ Пречи́стымъ Та́йнамъ. Аще ли еси́ въ таково́й нечистотѣ́ мно́го пребыва́еши, почто́ся труди́ши безъ ума́: водо́ю у́бо омыва́я ру́ки и язы́къ, па́губную же и вре́дную вну́трь у́ду нося́ нечистоту́. Повѣ́ждь ми́, а́ще бы моты́ло или́ ка́лъ держа́ въ руку́ своею́, то смѣ́лъ ли бы моли́тву твори́ти? И то́ у́бо вели́къ вре́дъ е́сть ручна́я нечистота́. А нечистота́ душе́вная, сме́рть у́бо и поги́бель е́сть въ не́й пребыва́ющимъ. И ты́ ка́ко у́бо въ тѣле́сныхъ нечистота́хъ сумня́ешися, /л. 15 об./ въ душе́вныхъ же всегда́ Бо́га преоби́дя не стыди́шися? Что́ у́бо и ка́ко лзѣ́ моли́тися? Досто́итъ у́бо душе́внаго гну́са не имѣ́ти. Аще и въ преступле́ніе впаде́ши, и ты́ вско́рѣ очи́стися. А ка́ко и кíимъ о́бразомъ, а́зъ возвѣщу́ ти. Пла́чи и стони́ съ покая́ніемъ и́стиннымъ, и исповѣ́ждься отъ всего́ се́рдца своего́; да́й ми́лостыню по си́лѣ, и отвѣщава́й ко всѣ́мъ ми́рно; не осужда́й и гнѣ́ва не имѣ́й ни на кого́ же, ни зла́ дру́гу не сотвори́; не зави́ди, не укра́ди, не наси́луй никого́ же. Со всѣ́ми же любо́вь нелицемѣ́рну имѣ́й: то́ тѣ́мъ язы́къ, и уста́, и ру́цѣ умы́еши. Да не па́че Бо́га прогнѣ́ваеши, е́же моли́тися зло́бу имы́й. Рцы́ ми: а́ще бы кто́ моты́льными рука́ми держа́лъ тя́ по́ нозѣ моля́, не то́чію бы еси́ его́ не послу́шалъ, но и отри́нулъ бы его́. Да ка́ко у́бо ны́нѣ ты́ дерза́еши тако́въ сы́й приступи́ти къ Бо́гу не очи́стився? Са́мъ бо Госпо́дь рече́, а́ще не очи́стивъ со́вѣсти душе́вныя и тѣле́сныя, и мно́гу моли́тву сотвори́ши, не послу́шаю тебе́: не плотьска́я бо нечистота́, но душе́вная скве́рна сме́рть и па́губа. И па́ки рече́ /л. 16/ Госпо́дь: отъ слове́съ свои́хъ оправди́шися, и словесы́ свои́ми осу́дишися. Слы́шалъ ли еси́ апо́стола Па́вла глаго́люща? Хощу́ у́бо на вся́комъ мѣ́стѣ муже́мъ моли́тися преподо́бнѣи воздѣва́юще ру́цѣ свои́, кромѣ́ вся́каго гнѣ́ва и помышле́ній злы́хъ. Та́ко же и жены́ не во украше́ніи ри́зъ блу́дныхъ, ни во умышле́ніи умыва́ній лица́, но во служе́ніи мно́зѣ, со смире́ніемъ и покоре́ніемъ ка́ющеся, моли́тися Бо́гу. Вся́ прежерече́нная дѣ́ла до́брая творя́ще безъ гнѣ́ва и безъ по́мысла зла́, во устрое́ніи лѣ́помъ, съ говѣ́ніемъ, и цѣлому́дріемъ, да украша́ются дѣ́лы благи́ми: а не зла́томъ, ни сребро́мъ, ни многоцѣ́нными ри́зами, ни би́серомъ. Но я́коже подоба́етъ жена́мъ бы́ти, обѣщава́ющимся благоче́стію, и дѣ́лы благи́ми безмо́лвію да уча́тся съ покоре́ніемъ. Бо́гу на́шему сла́ва, ны́нѣ и при́сно и во вѣ́ки вѣко́мъ, ами́нь.