Если чтения отсутствуют - значит, по данному дню еще не были добавлены тексты.
По третьей песни:
Чтутся седальны по обычаю.Отъ са́мыхъ веще́й ви́дѣсте, возлю́бленніи, по́стную добро́ту и ю́же отъ нея́ по́льзу. Иже бо кто́ искуси́лся е́сть пе́рвую сію́ недѣ́лю свята́го великаго поста́, то́й больма́ разумѣ́етъ свое́ къ Бо́гу приближе́ніе, и на про́чія недѣ́ли бо́дрѣе бу́детъ. Аще ли кто́ сію́ недѣ́лю въ лѣ́ности пребы́сть, то́й не вѣ́сть, ка́я отъ поста́ по́льза е́сть: сла́ждьши бо ме́да, и семида́льнаго бра́шна е́сть. О се́мъ Дави́дъ проро́къ рече́: вкуси́те и ви́дите, я́ко бла́гъ Госпо́дь. И са́ми бо вѣ́сте по́стную добро́ту, я́ко ни сва́ра, ни доса́ды нѣ́сть: не я́коже въ пія́нствѣ, но вся́кое здѣ́ молча́ніе и тишина́, зло́му обы́чаю посто́мъ преста́вшу. Тѣ́мъ молю́ вы́, вѣ́рніи, не отложи́мъ нача́тка по́стнаго: се́ бо пе́рвая недѣ́ля поста́ премину́ла е́сть, да на про́чія недѣ́ли бодрѣ́йши бу́демъ, я́коже досто́итъ преспѣва́ти на благо́е, я́коже апо́столъ Па́велъ рече́: за́дняя забыва́юще, на пре́дняя простира́йтеся. Послу́шайте, вѣ́рніи, съ любо́вію: се́дмь недѣ́ль е́сть свята́го и вели́каго поста́, отъ ни́хъ же всѣ́хъ честнѣ́е седма́я недѣ́ля, я́же Вели́кая имену́ется. Не часы́ бо мно́гими инѣ́хъ бо́льши, но зане́же въ не́й бы́ша вели́кія та́йны Госпо́днихъ Страсте́й. Та́ко и сія́ преъиду́щая недѣ́ля бо́льши пе́рвыя е́сть. Якоже ца́рь бо́лѣе кня́зя е́сть, а кня́зь бо́лѣе е́сть боля́рина; а боля́ринъ бо́лѣе воево́ды; а воево́да бо́лѣе со́тника; а со́тникъ деся́тника. Се́ же разу́мно да вѣ́сте, а́ще кто́ о каковѣ́ дѣ́лѣ ити́ хо́щетъ къ ца́рю, пе́рвіе ми́лъ ся дѣ́етъ ме́ньшимъ, да́же и до вельмо́жъ, кто́ бы о не́мъ возвѣсти́лъ царю́. Аще ли же зло́ сотвори́лъ е́сть вельми́, то́ бо́лѣе пече́тся, ка́ко бы оправда́тися. Но и мы́, бра́тіе, не то́кмо яви́тися хо́щемъ Небе́сному Царю́, но и въ сердца́ на́ша прія́ти Та́инъ Причаще́ніе, сія́ бо недѣ́ли на очище́ніе грѣхо́мъ на́шимъ даны́ су́ть, а́ще я́ до́брѣ соверши́мъ. Хощу́ у́бо ва́мъ при́тчу повѣ́дати. Бѣ́ въ нѣ́коей странѣ́ ца́рь вельми́ бла́гъ, вся́ бо я́ко своя́ дѣ́ти любля́ше, и о всѣ́хъ ра́вно печа́ловашеся, не то́кмо о тѣлесѣ́хъ, но и о душа́хъ и́хъ, и не бѣ́ никто́ же убо́гъ въ странѣ́ то́й. Бѣ́ бо земля́ та́ испо́лнена вся́каго оби́лія, я́коже проро́къ Дави́дъ глаго́лаше: отъ плода́ пшени́цы, вина́ и еле́я умно́жишася. И царе́ви тому́ бя́ше все́ раче́ніе, е́же бы подава́ти бѣ́днымъ и неиму́щимъ. И за́повѣдь положи́, да бога́тіи подаю́тъ ни́щимъ. Та́ко бо и апо́столъ въ Дѣя́ніихъ рече́: бѣ́ мно́жество люде́й я́ко еди́на душа́, раздава́юще, кто́ чего́ хотя́ше, или́ тре́боваше. Такова́ бѣ́ та́ страна́, и тако́въ бѣ́ то́й ца́рь. Имѣ́яше же благíй то́й ца́рь у себе́ се́дмь дще́рей вельми́ красны́, и заповѣ́да всѣ́мъ лю́демъ, да прише́дше почтя́тъ его́, и дще́ри его́. И посади́ и́хъ по еди́ной: ме́ньшую пода́лѣе, а бо́льшую бли́зъ себе́ посади́. Нѣ́ціи же всѣ́хъ ра́вно почти́ша, и угоди́ша царе́ви. Нѣ́ціи же ме́ньшую почти́ша, а про́чихъ мимоходя́ще, не цѣлу́я минова́ху. И се́ ви́дѣвъ благíй о́нъ ца́рь, милосе́рдіе свое́ на гнѣ́въ преложи́, и повелѣ́ слуга́мъ отгна́ти я́ отъ себе́, и мучи́телемъ преда́ти на истяза́ніе. По непра́вдѣ ли у́бо се́ сотвори́ благíй о́нъ ца́рь? Аще хо́щете разумѣ́ти, что́ е́сть ца́рь о́нъ? Да реку́ ва́мъ. Ца́рь благíй е́сть Творе́цъ и Содѣ́тель всѣ́хъ, и Влады́ка, Христо́съ и́стинный Бо́гъ на́шъ. А земля́ испо́лненная благи́хъ, е́сть Це́рковь Бо́жія, въ не́й бо ве́сь мíръ душе́внѣ спаса́ется покая́ніемъ. Зако́нъ бо, и проро́цы ту́ проповѣ́даютъ о Христѣ́, и извѣству́ютъ, ка́ко сни́де на зе́млю, и бы́сть человѣ́къ подо́бенъ на́мъ, кромѣ́ грѣха́, распя́тся и погребе́нъ бы́сть, и въ тре́тій де́нь воскре́се. И пото́мъ апо́столы посла́, тѣ́ми призыва́я на́съ въ Ца́рство небе́сное, и по вся́ дни́ уча́ не преста́етъ, вопія́ и глаго́ля: пріиди́те, обремене́ніи, и Азъ поко́ю вы́. И па́ки: гряду́щаго ко Мнѣ́ не изжену́ во́нъ. Что́ сея́ благода́ти бо́лѣе е́сть? Дще́ри же царе́вы сказу́ются — се́дмь недѣ́ль свята́го и вели́каго поста́, я́же на́мъ повелѣ́но чти́ти па́че всего́ лѣ́та днíй, посто́мъ, и моли́твами, и ми́лостынею. Да а́ще, бра́тіе, пе́рвую сію́ недѣ́лю почти́хомъ до́брѣ, си́рѣчь ме́ньшую дщи́ царе́ву, да́лѣе отъ отца́ сѣдя́щую, то почти́мъ и другíя. Аще ли же пе́рвую почти́вше, а и́ны съ небреже́ніемъ мине́мъ, о бра́тіе, что́ и́мамы отвѣща́ти въ стра́шный де́нь пра́веднаго суда́ Бо́жія? Ка́ко ли ся оправда́емъ, я́ко ни тѣ́хъ по́стныхъ дне́й хо́щемъ чи́сто сохрани́ти? Но молю́ вы, не вѣща́емъ сего́, я́ко не мо́жемъ та́ко всѣ́хъ по́стныхъ дне́й преити́, я́коже пе́рвую сію́ недѣ́лю. Се́ зла́ вина́ е́сть, и недо́бръ извѣ́тъ испо́лненъ вины́. Аще бо отъ толи́каго объяде́нія и пія́нства пе́рвую сію́ недѣ́лю преидо́хомъ, то кольми́ па́че навы́кше возмо́жемъ та́ко ве́сь по́стъ преити́. Не понужда́ю бо никого́ же па́че си́лы пости́тися, но я́коже ели́ко кто́ мо́жетъ, то́кмо жите́йскихъ отве́ржемся нече́стій, пія́нства, блуда́, хулы́, осужде́нія, злопомнѣ́нія, за́висти, лжи́, клеветы́, гнѣ́ва, оби́ды, татьбы́, лихоима́нія, грабле́нія и про́чихъ зло́бъ. Ми́лостыню твори́те па́че ины́хъ дне́й, да чи́стою со́вѣстію Честно́му Кресту́ поклони́мся, и Христо́выхъ Страсте́й до́йдемъ, и досто́йни бу́демъ Тѣ́ло и Кро́вь Госпо́дню прія́ти. Убо́гимъ же и бѣ́днымъ сирота́мъ, и вдови́цамъ благотвори́те: тíи бо о всѣ́хъ на́съ всегда́ мо́лятся Бо́гу, и тѣ́хъ ра́ди ли́шшее дарова́лъ е́сть на́мъ Бо́гъ. Ничто́ же бо принесо́хомъ въ мíръ се́й, и ниже́ па́ки взе́млюще что́ отхо́димъ. Тѣ́мъ же, бра́тіе, потщи́мся, посто́мъ и моли́твами, и колѣ́ннымъ поклоне́ніемъ, и ми́лостынею душа́ и тѣлеса́ очи́стити, да съ любо́вію Воскресе́нія Христо́ва дости́гнемъ. Нѣ́сть бо тя́жко, а́ще хо́щемъ добро́ твори́ти: то́кмо да не ослабѣ́емъ, ни облѣни́мся, и не впаде́мъ въ сла́сти тѣле́сныя, да не погуби́мъ труда́ своего́, и́же въ пе́рвую недѣ́лю подъя́хомъ. Бо́гу на́шему сла́ва, ны́нѣ и при́сно и во́ вѣки вѣко́мъ. [Ами́нь.]
По шестой песни:
И поется кондак и икос (или мученичен, аще несть).Стихи́:
Нелѣ́потно измета́емы ико́ны,
Ра́дуюся, лѣ́потно покланя́емы ви́дя.
Въ сíй де́нь, въ недѣ́лю пе́рвую святы́хъ посто́въ Правосла́вія, си́рѣчь возставле́ніе святы́хъ и честны́хъ ико́нъ Це́рковь Христо́ва пра́здновати прія́тъ, бы́вшее отъ Михаи́ла и Ѳеодо́ры, святы́я и блаже́ннѣйшія цари́цы, и свята́го Меѳо́дія, патріа́рха Константино́польскаго. Бы́сть же си́це:
Льву́ Иса́вру, изъ ослятогоне́нія и свинопа́ственнаго житія́ ски́птры ца́рствія удержа́вшу, по Бо́жію попуще́нію. Во святы́хъ Ге́рманъ тогда́ корми́ла церко́вная объе́мъ, а́біе призыва́ется отъ о́наго и слы́шитъ: «я́ко мнѣ́ мни́тся, влады́ко, святы́мъ ико́намъ ничто́же ра́знствовати отъ и́доловъ. Повѣли́ у́бо ели́ко ско́ро извести́ сія́ отъ среды́. Аще и́стинніи су́ть святы́хъ зра́цы, но вы́шше да повѣ́сятся, да не со грѣхи́ валя́ющеся, сія́ всегда́ оскверня́емъ, цѣлу́юще». Патріа́рхъ же толи́кія ме́рзости царя́ отвраща́ше: «не ты́ ли, — глаго́ля, — о царю́, бѣснова́ти у́бо нѣ́коему нѣ́когда на святы́я ико́ны слы́шимъ, Ко́нону же бы́ти его́ проименова́нію?» Онъ же: «но а́зъ, — глаго́летъ, — еще́ младе́нецъ сы́й нарица́хся». Не повину́ющуся же у́бо послу́шати его́ патріа́рху, изгна́ его́ и единому́дренна себѣ́ возпоставля́етъ Анаста́сія, и та́ко тогда́ со святы́ми ико́нами бра́нь нача́ явля́ти. Глаго́лется же, евре́емъ пре́жде такову́ю не́нависть ему́ подложи́ти, отъ нѣ́коего волше́бства предре́кшимъ на ца́рство возведе́ніе, внегда́ убо́гъ сы́й, съ ни́ми ослятогоне́ніемъ жи́ти веществова́ше. Оному же злѣ́ житіе́ отто́ргшу, изъ о́наго суровѣ́йшій ски́менъ, Копрони́мъ Константи́нъ, нача́льства, наипа́че же на святы́я ико́ны бѣснова́нія прее́мникъ быва́етъ. И что́ подоба́етъ глаго́лати, ели́ка и якова́ и се́й беззако́нный содѣ́ла, но оба́че и о́ному сту́днѣйше сконча́вшуся. Отъ хаза́ры сы́нъ о́наго на ца́рство поставля́ется, поне́же и то́й е́же жи́ти злѣ́ измѣ́ри.
Ири́на и Константи́нъ нача́льства наслѣ́дницы быва́ютъ. Сíи отъ Тара́сія, святѣ́йшаго патріа́рха, наставля́еми, седьмы́й Собо́ръ собира́ютъ и святы́я ико́ны па́ки Христо́ва Це́рковь пріе́млетъ. Си́мъ же ца́рство отло́жшимъ, отъ Ге́ника Ники́форъ возво́дится. Та́же Ставри́кій, по се́мъ Михаи́лъ Рагкаве́й, боже́ственныя ико́ны чту́ще. Михаи́ла звѣрови́дный Ле́въ Армени́нъ прее́млетъ, и́же отъ мона́ха нѣ́коего затво́рника и злочести́ваго, ле́стію растлѣ́вся, второ́е иконобо́рство воздвиза́етъ, и па́ки безлѣ́потна Бо́жія Це́рковь показу́ется. Сего́ аморре́й прее́млетъ Михаи́лъ, того́же па́ки сы́нъ Ѳео́филъ, на ико́ны неи́стовство про́чія во вторы́хъ полага́юще. Се́й у́бо Ѳео́филъ, мно́гія отъ святы́хъ оте́цъ томле́ніемъ и му́камъ разли́чнымъ преда́въ о ико́нахъ честны́хъ, пра́вду тогда́ наипа́че усвоя́ше, я́ко взыска́ше: а́ще кто́ е́сть во гра́дѣ, крамоло́ю друго́му быва́емь; ни еди́наго на мно́ги дни́, я́ко глаго́лютъ, обрѣсти́. И двана́десяте лѣ́тъ самодово́льствовавъ, и чре́внымъ неду́гомъ объя́тъ бы́въ, расто́ргнутися хотя́ше отъ живота́: уста́ его́ презѣ́льно отверзо́шася, я́коже и самѣ́мъ утро́бамъ вну́треннимъ яви́тися. Цари́ца же Ѳеодо́ра болѣ́зненна о приключи́вшемся бы́вши, едва́ ко сну́ обраща́ется, и во снѣ́ ви́дѣ Пречи́стую Богоро́дицу, Младе́нца объе́мшу Превѣ́чнаго, обстои́му пресвѣ́тлыми а́нгелы, Ѳео́фила же, сея́ му́жа, отъ тѣ́хъ біе́ма и уничижа́ема. Яко у́бо оты́де отъ нея́ со́нъ, и Ѳео́филъ ма́ло въ себе́ прише́дъ, возопи́: «увы́ мнѣ́ окая́нному, святы́хъ ра́ди ико́нъ біе́нъ е́смь!» Абіе полага́етъ верху́ его́ цари́ца Богоро́дичный о́бразъ, моля́щися Се́й со слеза́ми. Ѳео́филъ у́бо си́це имы́й, ви́дѣвъ нѣ́коего отъ предстоя́щихъ нося́ща енко́лпій [нанѣ́дренникъ], похи́тивъ отъ него́, облобыза́ше. И а́біе на ико́ны шата́вшаяся уста́ и безсту́дно зи́нувый горта́нь, въ пе́рвый чи́нъ устроя́шеся, и отъ содержа́щія бѣды́ и ну́жды преста́ и усну́, бы́ти исповѣ́давъ добро́ святы́я ико́ны почита́ти. Изне́сши у́бо цари́ца отъ свои́хъ ковче́жцовъ святы́я и честны́я о́бразы лобыза́ти и все́ю душе́ю почита́ти Ѳео́фила устроя́ше. По ма́лѣ у́бо исчеза́етъ отъ житія́ сего́ Ѳео́филъ.
Ѳеодо́ра же, су́щихъ во изгна́ніихъ и въ темни́цахъ всѣ́хъ воззва́вши, свобо́днѣ пребыва́ти повелѣ́. И низверга́ется у́бо отъ патріа́ршескаго престо́ла Іоа́ннъ, и́же и Анни́съ, волхвонача́льникъ и бѣсонача́льникъ наипа́че, не́жели патріа́рхъ. Христо́въ же исповѣ́дникъ Меѳо́дій восхо́дитъ на престо́лъ, мно́га пострада́въ пре́жде и во гро́бѣ жи́въ затворе́нъ бы́сть.
Си́мъ же та́ко иму́щимъ, посѣще́ніе нѣ́кое быва́етъ Боже́ственное Іоанни́кію Вели́кому, во Оли́мбовѣхъ гора́хъ обучева́ющемуся. Вели́кій у́бо по́стникъ Арсаа́кій, прише́дъ къ нему́, глаго́ла: «Бо́гъ мя́ къ тебѣ́ посла́, я́ко да къ преподо́бному му́жу Иса́іи затво́рнику въ Никомидíю прише́дше, отъ него́ научи́мся, ели́ка су́ть любо́вна Бо́гу и прикла́дна его́ Це́ркви». И у́бо къ преподо́бному Иса́іи прише́дше, слы́шатъ отъ него́: «та́ко глаго́летъ Госпо́дь: се́ прибли́жися коне́цъ враго́мъ Моего́ изображе́нія. Вы́ у́бо къ цари́цѣ Ѳеодо́рѣ, но и къ патріа́рху Меѳо́дію ше́дше, рцы́те си́це: оста́ви вся́ не свяще́нныя, и та́ко со а́нгелы же́ртву Мнѣ́ принесе́ши, зра́ка Моего́ о́бразъ и Креста́ почита́й». Сія́ услы́шавше, въ Константи́нь гра́дъ а́біе достига́ютъ, и рече́нная Меѳо́дію патріа́рху и избра́ннымъ всѣ́мъ Бо́жіимъ возвѣща́ютъ. Собра́вшеся же, къ цари́цѣ прихо́дятъ и поко́рну сію́ во всѣ́хъ обрѣта́ютъ, отъ оте́цъ бо бя́ше благочести́ва и боголюби́ва. Абіе у́бо цари́ца Богоро́дичный о́бразъ на вы́и обвѣ́шаемый изне́сши, всѣ́мъ зря́щимъ, лобза́ше, глаго́лющи: «а́ще кто́ си́мъ не покланя́ется и не цѣлу́етъ любе́знѣ, не служе́бнѣ, не я́ко бо́ги, но я́ко о́бразы, Первообра́зныхъ ра́ди любве́: бу́ди про́клятъ». Они́ же ве́ліею ра́достію возра́довашася. Проти́ву же про́ситъ и сія́ отъ ни́хъ, я́ко дабы́ моле́ніе о му́жѣ ея́ Ѳео́филѣ сотвори́ли. Они́ же, вѣ́ру ея́ ви́дѣвше, а́ще и отрица́ющеся, оба́че же повину́ются. Ибо во святы́хъ Меѳо́дій патріа́рхъ лю́ди вся́ собра́въ, и приче́тъ ве́сь, и архіере́и въ вели́кую Бо́жію це́рковь, та́мо прихо́дятъ. Въ ни́хже бя́ху избра́нніи сíи: изъ Оли́мба вели́кій Іоанни́кій, и Арсаа́кій, Навкра́тій же, и ученицы́ Ѳео́дора Студи́та, и вели́каго села́ Ѳеофа́нъ, и Ѳео́доръ пи́санніи, и исповѣ́дницы Михаи́лъ Святогра́децъ и Синге́лъ, и инíи мно́жайшіи. Моле́ніе всено́щное къ Бо́гу сотворя́ютъ о Ѳео́филѣ, всѣ́мъ моля́щимся со слеза́ми и протяже́ннымъ моле́ніемъ. И сіе́ во всю́ пе́рвую седми́цу посто́въ соверша́шеся, и само́й цари́цѣ Ѳеодо́рѣ, подо́бнѣ съ жена́ми и про́чими людьми́ содѣва́ющи. Си́мъ же, си́це иму́щимъ, Ѳеодо́ра цари́ца о у́трѣ озаря́ющимъ пятка́ на со́нъ обра́щшися, возмнѣ́ обрѣсти́ся у столпа́ кре́стнаго, и нѣ́которыя съ шу́момъ проходи́ти пу́ть, разли́чная мучи́тельная ору́дія нося́щія ви́дѣ, посредѣ́ же си́хъ ведо́ма свя́зана и царя́ Ѳео́фила, созади́ свя́заныма рука́ма. Сего́ же позна́вши, послѣ́доваше и та́ съ веду́щими. Егда́ же до Мѣ́дяныхъ вра́тъ достиго́ша, ви́дѣ преесте́ственнымъ видѣ́ніемъ Му́жа нѣ́коего, сѣдя́ща предъ о́бразомъ Христо́вымъ, его́же проти́ву Ѳео́фила поста́виша. Сего́ же нога́мъ прикосну́вшися цари́ца, о царѣ́ моля́шеся. Онъ же едва́ отве́рзлъ уста́: «ве́лія твоя́ вѣ́ра, же́но! — глаго́летъ, — разумѣ́й у́бо, я́ко сле́зъ ра́ди твои́хъ и вѣ́ры, еще́ же и ра́ди проше́нія и моле́нія рабо́въ Мои́хъ и свяще́нниковъ Мои́хъ, проще́ніе даю́ му́жу твоему́ Ѳео́филу». Та́же глаго́летъ веду́щимъ: «разрѣши́те его́ и предади́те женѣ́ его́». Она́ же, взе́мши сего́, отступи́, веселя́щися и ра́дующися, и а́біе ю́ со́нъ оста́ви. Сія́ у́бо Ѳеодо́ра цари́ца ви́дѣ.
Патріа́рхъ же Меѳо́дій, моли́твамъ и моле́ніемъ быва́емымъ о не́мъ, хартію́ но́ву взе́мъ, написа́ въ не́й всѣ́хъ еретико́въ царе́й имена́, вчини́въ и того́ Ѳео́фила, и подъ свято́ю трапе́зою, взе́мъ вся́, положи́. О пятцѣ́ же ви́дитъ и то́й нѣ́коего а́нгела стра́шна вели́каго, входя́ща во хра́мъ, и къ нему́ прише́дша рещи́, глаго́лется: «услы́шася моле́ніе твое́, епи́скопе, и проще́ніе получи́ ца́рь Ѳео́филъ; не ктому́ у́бо про́чее о се́мъ стужа́й Божеству́». Онъ же, искуша́я, а́ще и́стинно е́сть ви́димое, отъ мѣ́ста своего́ сше́дъ, и ха́ртію взе́мъ, и разви́въ, обрѣ́те, — о Бо́жіихъ суде́бъ! — загла́жено отъ Бо́га вся́чески Ѳео́филово и́мя.
Сіе́ увѣ́дѣвши цари́ца, преобра́довася зѣло́, и къ патріа́рху посыла́етъ, вся́ лю́ди собра́ти съ честны́ми кресты́ и со святы́ми о́бразы въ вели́кую це́рковь, я́ко да у́тварь святы́хъ образо́въ се́й отда́стся и но́вое Бо́жіе чу́до всѣ́мъ позна́но бу́детъ. И у́бо всѣ́мъ вско́рѣ въ це́рковь собра́вшимся со свѣща́ми, и цари́ца съ сы́номъ пріи́де. И литíи та́мо бы́вшей, со святы́ми ико́нами, и боже́ственными и честны́ми древесы́ Кре́стными, и свяще́ннымъ и боже́ственнымъ Ева́нгеліемъ, да́же и до глаго́лемаго по́прища изыдо́ша, «Го́споди поми́луй» взыва́юще. И та́ко па́ки въ це́рковь возврати́вшеся, Боже́ственную Литургíю соверши́ша. Возста́вленнымъ святы́мъ и честны́мъ ико́намъ отъ предрече́нныхъ святы́хъ муже́й, проповѣ́даннымъ у́бо благочести́вымъ и правосла́вящимъ; проти́внымъ же и нече́ствующимъ, и святы́хъ ико́нъ че́сти не пріе́млющимъ, отреченнымъ и преда́ннымъ прокля́тію. И отто́лѣ опредѣли́ша сíи святíи исповѣ́дницы, лѣ́тному си́це сему́ свяще́нному торжеству́ быва́ти, да не когда́ и па́ки въ то́жде злоче́стіе впаде́мъ.
Неизмѣ́нный Образе Отчій, моли́твами святы́хъ Твои́хъ исповѣ́дниковъ, поми́луй на́съ. Ами́нь.