Пяток 1-й седмицы Великого поста

И о вре́мени не пренемога́й. В твое́ бо похоте́ние вложи́т враг о́браз безвре́менне, я́ко да не терпя́ брат гла́дскаго похоте́ния бежи́т по́прище, ты же возлю́блене я́ко Бо́гу тща́ся угоди́ти терпи́. И апо́стол глаго́лет: «А́ще мо́жеши свобо́дь бы́ти, па́че подоба́ет ти де́лати». Возри́ же на пе́рвыя ро́ды и виждь, я́ко вси святи́и долготерпе́ния ра́ди и любве́ улучи́ша обетова́ния. Терпи́м, и уте́шимся са́ми по вся дни, я́ко да и насле́дницы обря́щемся Ему́ в Ца́рствии небе́снем.

Не пе́рвее ли патриа́рх Иа́ков, четырена́десять лет рабо́та Рахи́ли ра́ди, Ла́ве сиряни́ну в Междуре́чии, во дни зно́йныя и в но́щи ледо́вныя. Та́кожде Ио́сиф возлю́бленный, несть ли лет недоволе́н рабо́тати в земли́ чужде́й, я́коже пи́шет: «И бе Ио́сиф седмина́десять лет, егда́ пасы́й овца́ бра́тии своея́». И па́ки Ио́сиф лет три́десять, егда́ ста пред фарао́ном. Та́кожде и Моисе́й уго́дник Госпо́день четы́редесяти лет сый всели́ся в зе́млю Мадиа́мску. И сы́нове Изра́илеви четы́редесяти лет снидо́ша в зе́млю обетова́ния. Та́кожде и Дании́л уго́дный со треми́ о́троки претерпе́ша скорбь и поноше́ние на земли́ чужде́й, те́мже и ти́и спасе́ни бы́ша.

Мы же ни ма́ла пострада́вше не мо́жем терпе́ти. Неве́рствия же ра́ди на́шего терпе́ние удаля́ется от нас. Се бо печа́ли сам ся еси́ пре́дал, я́ко погуби́в ме́дницу чужду́ и я́ко в плене́ние и́де. Даждь себе́ единоду́шие о Го́споде и мужа́йся я́ко ве́рен, еда́ когда́ от мно́гия печа́ли погуби́ши не́мощь души́ своея́ и по́следь раска́ешися. Поразуме́й же возлюбленне су́щая во изгна́нии, с вери́гами и лю́тыми ра́нами истяза́емыми, и повини́ся предстоя́щему ти о Го́споде, ли па́че по челове́честву воспомяни́ рабо́ту, ю́же терпи́ши Го́спода ра́ди. Кто у́бо быв безче́ствован царе́м и не испове́дает па́че досажде́ния хвалы́. Но мно́жицею хо́щеши глаго́лати, я́ко труд и́мать вещь. Го́ре мне гре́шному и неключи́мому ра́бу! А́ще труда́ пре́жде не во́змем и терпи́м Го́спода ра́ди, то почто́ изыдо́хом от ми́ра сего́? Кто досто́ин возлю́блене, умре́ти за Уме́ршаго нас ра́ди? Ма́лая подае́ши возлю́блене, а вели́кая восприи́меши. Терпе́ния же да и́мам[ы] потре́бу, да во́лю Бо́жию сотво́рше, получи́м обетова́ние Его́. Претерпе́вый же до ко́нца, той спасе́тся.

Возлю́блене, не укланя́йся от лица́ находя́щим помысло́м: нача́ло бо подвиза́нию есть. Уве́ждь ку́пно от дожде́внаго ро́ва, я́ко где дождь бу́дет, и собе́рется наводне́ние дожде́вное в ров, в нача́ле смуще́на есть вода́, и ели́ко пребыв́ает, чисте́йши быва́ет. Те́мже возлю́блене, стой и не укланя́йся. Пи́шет бо: «И пото́цы беззако́ния смути́ша мя». И па́ки: «Я́ко испо́лнися зол душа́ моя́, и живо́т мой а́де прибли́жися». Те́мже глаго́лет: «Госпо́дь мне Помо́щник, и не убою́ся, что сотвори́т мне челове́к». Егда́ у́бо прии́дет по́мысл лука́в во ум твой, возопи́й ко Го́споду со слеза́ми, глаго́ля: «Го́споди, очи́сти мя гре́шнаго и прости́ мя, Человеколю́бче. Отжени́ лука́ваго от мене́». Сердцеве́дец бо есть Бог и зло обы́чныя мы́сли, раждеза́емыя сове́ты и от лю́таго бе́са нам приноси́мая вся свесть. Се веждь, я́ко ели́ко терпи́ши и подвиза́ешися, Бо́гу рабо́тая, толи́ко же очища́ет ти ся ум и по́мысл. Рече́ бо Госпо́дь: «Вся́ку лозу́ принося́щую плод очища́ю, да мно́жайшая плоды́ принесе́т», то́кмо восхощи́ спасти́ся, я́ко лю́бит Госпо́дь и помога́ет веду́щимся на спасе́ние.

Послу́шай же при́тчу зло́му по́мыслу: Грездо́вие егда́ объе́млятся от виногра́да, и высы́пано бу́дет в точи́ло, и испра́но ‐ источи́т вино́ свое́ и влия́но бу́дет в сосу́ды. Та́ко возври́т вино́, я́коже мно́жицею не могу́ще сосу́ди терпе́ти ну́жду, разседа́ются от кипе́ния. Та́ко и по́мыслы челове́честии: егда́ бо прии́дет кто от су́етнаго жития́ и печа́ль его́ к небе́сному смы́слу, не терпя́ще бе́си зави́стию, разли́чно возмутя́т ум челове́ку, хотя́ще измене́ние му́тное расчерпа́ти ему́, да обря́щут и сосу́д пови́нен и прельстя́т и́, е́же есть душа́ неве́рна и дре́млющи. Прииду́т бо бе́си, а́ки во́лцы и хи́щницы, обходя́ще ке́лия мни́хом, и́щущи дверца́ отве́рсты себе́, я́ко да вскочи́вше растля́т в ней е́же есть душа́ повину́ющися им. А́ще ли же обря́щут дверь затворе́ну пред лице́м их, стужи́вше си отъи́дут, глаго́лю же, ду́шу осно́вану ве́рою. Не ужаса́йся у́бо, ни убо́йся от злокова́рствия их ‐ вреди́ти бо тебе́ не мо́гут. Христа́ име́й себе́ Помо́щника. Глаго́лет бо апо́стол: «Не бо даст им дух пристра́шия, но си́ле и любви́ и целому́дрию». И па́ки Го́споду ре́кшу: «Ви́дех сатану́ а́ки мо́лнию с небесе́ спа́дша. Се дах вам власть наступа́ти на зми́я и скорпи́ю, и на всю си́лу вра́жию и ничто́же вас не вреди́т».

Те́мже возлю́блене, мужа́йся и возмога́й о Го́споде Бо́зе твое́м, я́ко в век ми́лость Его́. А́ще ли же и па́мять нам наво́дят роди́тель на́ших, рцем к ним: «Мы Бо́га на́шего Отца́ неразлучи́ма и́мамы с собо́ю». А́ще ли же и па́мять земны́х веще́й наведу́т на ны, рцем к ним мы: «Собира́ет, и не весть кому́ собира́ет я́». И па́ки: «Вку́пе безу́мен и несмы́слен поги́бнета. И во́змут чужди́и бога́тство ею́». Да мне ли у́бо бу́дут греси́, а ине́м име́ния? То не беда́ ли се есть мне? Есть бо, и зло́ба вели́ка. Те́мже не учи́мся сокрыва́ти на земли́, иде́же тля тлит, и червь погубля́ет, иде́же бо есть сокро́вище твое́, ту и се́рдце твое́. Благослове́н еси́ Бо́же, Да́вый нам кре́пость на неви́димаго врага́. Тому́ сла́ва во ве́ки. Ами́нь.