Суббота 1-й седмицы Великого поста

Пріиди́те и услы́шите, вѣ́рніи, ка́ко благíй Христо́съ Бо́гъ на́шъ, не оста́ви на́съ во уловле́ніе лука́ваго зубо́въ свирѣ́пѣющихъ, но, спасе́нія на́шего ра́ди, воплоти́ся отъ Пречи́стыя Дѣ́вы, и распя́ся, и погребе́ся во́лею, безстра́стенъ сы́й Божество́мъ, и воскре́съ изъ ме́ртвыхъ, и вознесе́ся во сла́вѣ. Кто́ бо ми́лостивѣе и человѣколюби́вѣе Бо́га на́шего? И оте́цъ бо свое́ ча́до за ослуша́ніе, не я́звы то́кмо дае́тъ, но и отъ себе́ отверга́етъ. И господи́нъ та́кожде раба́ своего́ ка́зньми, и у́зами, и гла́домъ наказу́етъ. А е́же о на́съ: ка́ко созда́ ны́ Бо́гъ и почти́, а мы́ у́бо что́ и́мамы къ Бо́гу благо́е? Безче́ствовахомъ, за́вистію и гнѣ́вомъ, клевето́ю, и про́чими злы́ми дѣ́лы и непра́вдами. Онъ же не презира́етъ, но проща́я всѣ́хъ на́съ на покая́ніе жде́тъ. Но что́ мно́го глаго́лю? Начну́ повѣствова́ти сла́вная и вели́кая чудеса́ Госпо́дня, я́же святы́ми Его́ дѣ́ема, я́коже и се́ ди́вное чу́до сотвори́ Госпо́дь Бо́гъ на́шъ, святы́мъ Свои́мъ му́ченикомъ Ѳео́доромъ Ти́рономъ. Не оста́ви бо на́съ Христо́съ Бо́гъ на́шъ, пови́ннымъ на́мъ бы́ти врагу́, и не возмо́же мучи́тель злы́й соверши́ти своего́ хотѣ́нія. Ны́нѣ же да увѣ́сте благода́ть Го́спода на́шего Іису́са Христа́: егда́ бѣ́ разгнѣ́ваніе Іуліа́на богоотме́тника на святу́ю и честну́ю на́шу христіа́нскую вѣ́ру. Се́й бо богопроти́вникъ мно́гое имя́ше тща́ніе, е́же христіа́ны погубля́ти, и Бо́гу небрего́му бы́ти. Оле бѣда́ зла́я! Бо́га оста́вль, а и́доломъ че́сть воздая́ти веля́ше. О се́мъ бо беззако́нный ника́коже размышля́ше, ка́ко бы проти́вныя побѣди́ти, но о се́мъ всегда́ дѣ́ло имя́ше, ка́ко бы христіа́ны побѣжда́ти. Мно́га вѣ́рнымъ томле́нія бѣ́ша отъ прокля́таго: пресѣка́нія утро́бамъ, отсѣче́нія па́зухомъ, и біе́нія ча́стая, очесе́мъ извертѣ́нія, зубо́въ изкорене́нія, язы́ковъ урѣ́занія, ру́къ усѣче́нія, го́ленемъ пребіе́нія, огне́мъ опале́нія, и многозамы́сленныя злы́я му́ки, сква́ры, котлы́, рожны́, сковрады́, о се́мъ прокля́тый во мно́зѣ бѣ́ по́двизѣ. Си́мъ же быва́ющимъ, христіа́нстѣй вѣ́рѣ не ги́бнущи: се́рдце же его́ зло́е бѣ́ кипя́ зло́бою. Діа́волъ въ мы́сль вложи́ ему́ никого́ не уязви́ти, или́ умори́ти, но вся́ лю́ди во́ градѣ су́щія оскверни́ти. Честны́мъ у́бо и Боже́ственнымъ свята́го поста́ дне́мъ приспѣ́вшимъ, въ ня́ же вѣ́рніи о грѣсѣ́хъ свои́хъ ка́ющеся очища́ются, призва́ окая́нный Іуліа́нъ епа́рха единомы́сленнаго ему́, и рече́ къ нему́: поне́же мно́го искуси́вся, не мого́хъ христіа́нъ къ свое́й вѣ́рѣ прину́дити, и о се́мъ мнѣ́ лю́та печа́ль зѣло́. Ны́нѣ же бо́зи добру́ мы́сль въ се́рдце мое́ вложи́ша: сію́ бо пе́рвую недѣ́лю свята́го поста́ христіа́не че́стнѣ творя́тъ, а́зъ же повелѣва́ю, на то́ргъ изнесе́нная, я́же на я́дь христіа́не угото́ваша взя́ти, и та́ изнести́ я́же съ тре́бами бого́въ на́шихъ смѣ́шенная: ну́жда бо христіа́номъ бу́детъ купи́въ я́сти сія́, а не купи́въ гла́домъ поги́бнути. Се́ же епа́рхъ злы́й слы́шавъ отъ безбо́жныхъ у́стъ царя́ беззако́ннаго, нача́тъ глаго́лати: ны́нѣ ви́жду, я́ко се́рдце твое́, царю́, въ руку́ бого́въ; ско́ро отше́дъ, сотворю́ вся́ повелѣ́нная тобо́ю. Созда́вый же на́съ Бо́гъ, не оста́ви на́съ оскверни́тися, но предупреди́ о лю́томъ то́мъ совѣща́ніи беззако́ннаго. Патріа́рху Евдоксíю я́вѣ сотвори́ безбо́жный совѣ́тъ, посла́въ къ нему́ великому́ченика Ѳео́дора. Тоя́ у́бо но́щи му́ченикъ предста́ патріа́рху, и рече́ ему́: О, патріа́рше! Ско́ро совокупи́ Христо́во ста́до, и повѣ́ждь всѣ́мъ, да не вку́сятъ отъ торгу́, ни пи́щи, ни питія́: Іуліа́нъ бо законопресту́пникъ оскверне́нная тре́бами и́доловъ повелѣ́ изнести́. Патріа́рхъ же рече́ ко свято́му: ка́ко же, го́споди, мо́щно сему́ бы́ти? Бога́тымъ бо возмо́жно и не исходя́ на то́ргъ бы́ти недѣ́лю сію́, а ни́щимъ и сирота́мъ ну́жда е́сть купова́ти на кíйждо де́нь я́ди. Святы́й же рече́ ему́: ко́ливо на я́дь сотвори́, и раздава́й и́мъ ко́ливо. И рече́ святи́тель, что́ е́сть ко́ливо? Му́ченикъ же рече́: пшени́цу варе́ную разда́й. Святи́тель же рече́, ты́ кто́ еси́, го́споди? Глаго́ла ему́: а́зъ е́смь му́ченикъ Ѳео́доръ Ти́ронъ, о́тъ Бога по́сланный на избавле́ніе ва́мъ. И се́ ре́къ святы́й неви́димъ бы́сть отъ него́. Патріа́рхъ же слы́шавъ сія́, у́жаса и ра́дости испо́лнися, и вско́рѣ тоя́ но́щи повелѣ́ созва́ти епи́скопы, и игу́мены, попы́ и діа́коны, и мно́жество наро́да, и всѣ́мъ повѣ́да бы́вшее чу́до, е́же я́вѣ глаго́лаше ему́ святы́й му́ченикъ Христо́въ Ѳео́доръ Ти́ронъ. И заповѣ́да епи́скопомъ, и попо́мъ, да въ ту́ же но́щь возвѣстя́тъ о то́мъ всему́ наро́ду. Они́ же вѣ́рнымъ тоя́ но́щи возвѣсти́ша. Исходя́щи же недѣ́ли то́й, ви́дѣвъ богоотме́тникъ неуспѣ́шно зломы́сліе свое́, повелѣ́ оскверне́ная своя́ взя́ти съ торгу́. Суббо́тѣ же приспѣ́вши свята́го и вели́каго поста́, правовѣ́рніи лука́ваго за́мыслы прокля́ша, и похва́льную пѣ́снь му́ченику Христо́ву Ѳео́дору воспѣ́ша, и пра́здникъ че́стенъ ему́ сотвори́ша. Тѣ́мъ же на вся́ко лѣ́то уста́виша пра́здновати пра́здникъ сла́внаго великому́ченика Христо́ва Ѳео́дора Ти́рона, въ суббо́ту пе́рвую поста́, бы́вшаго ра́ди чудесе́, и отто́лѣ прослы́ Ѳео́дорова недѣ́ля, а до того́ пе́рвая недѣ́ля именова́шеся. Но кто́ дово́ленъ пои́стинѣ досто́йно исповѣ́дати благода́ть Го́спода на́шего Іису́са Христа́, Иже отъ рабо́ты діа́воли и отъ прокля́таго Іуліа́нова зломы́слія, ско́рымъ хода́тайствомъ изба́вилъ ны́ е́сть? Мы́ же, правовѣ́рніи, хвала́ми просла́вимъ Христо́ва му́ченика глаго́люще: О, му́ченикомъ свѣти́ло! О, Бо́жій да́ръ вои́стину! О, храни́телю и побо́рниче вѣ́рнымъ, на́шея не забу́ди нищеты́ и ху́дости, но при́сно за ны́ моля́ся не преста́й! Якоже изба́вилъ еси́ иногда́ вѣ́рныя отъ злоко́зненнаго умышле́нія Іуліа́нова, та́ко и на́съ ны́нѣ изба́ви отъ па́губы душе́вныя. Бо́гу на́шему сла́ва, ны́нѣ и при́сно и во́ вѣки вѣко́мъ, ами́нь.

Стихи́:

Пи́щею ко́лив пита́ет Ти́рон град:

Пи́щу оскверне́ную учини́в непотре́бну.

В сий день в субботу первую постов, еже коливами преславное чудо святаго и славнаго великомученика Феодора Тирона празднуем, еже име начало быти сице:

Иулиану преступнику, по Константии Великаго Константина сыне скиптры царствия удержавшу, и от Христа во идолослужение преложшуся, гонение на христианы воздвизается превелие, яве же вкупе и не явленне. Отрекл убо злочестивый, еже мучити сурове, вкупе же и объявленно безчеловечне, тако искушати христианы: стыдяся же и обзирая, да не прилагаются множайшии, сокровенне некако осквернити сия льстивый и скверный умысли: отонудуже и соблюд, якоже наш язык Христов, первую святых постов седмицу наипаче очищается, и внимает Богу: епарха града призвав, повеле продаемыя обычне снеди от среды отнести, другия же снеди предложити торжищу, сиречь хлебы и пития, от жертв его кровьми сия прежде смесивша, и в смешении осквернивша: яко да убо от поста сия купующии паче в чистоте осквернилися быша. Абие убо епарх на дело веде повеленое, и предлагает яже от жертв и кровей оскверненная брашна и пития во всем торжищи.

Но всевидящее Божие око, запинающее премудрыя в коварстве их, и о нас рабех Своих присно промышляющее, и гнусная преступника на нас коварства разруши. Градскому бо архиерею Евдоксию, аще и неправому и неправославному бывающу, посылает великаго Своего страстотерпца Феодора, от Тиронскаго чина, Тирона25 именуема. И убо яве, а не во сне тому представ, сице некако рече: елико скоро востав Христово собери стадо, и повелевай тверде, никомуже ничтоже на торжище предложенных купити: жертв бо кровьми сия осквернишася от нечестиваго царя. Сему же недоумевающуся, и вопрошающу, и како бы удобно было сие, недостаток в дому имущим, не от предложенных в торжище купити? Святый, колива дав, глаголет им, недостаток утеши. Сему же недоумевающу, и неразумевающу, и что была бы сия колива, вопрошающу, великий Феодор глаголет: вареную пшеницу: сице бо мы во Евхаитех глаголати обыкохом. Испытая же патриарх: кто убо есть сей о христоименитых людех промышляяй? Святый же паки, Христов мученик Феодор, рече: от Него помощник вам ныне послан есмь. Востав убо абие патриарх, и множеству возвестив виденая, и тако содеяв, Христово стадо соблюде невредимо от врага и преступника коварства. Он же свое ловительство узрев обличено бывшо, и ничтоже совершившо, и довольне постыдився, предложитися и паки обычным на торжище продажным повеле.

Христовы убо людие, седмице уже совершившейся благодарение отдающе Благодетелю и мученику, в сию субботу коливами ему память радующеся сотвориша. Оттоле убо вернии даже и до ныне чудо обновляюще, да не забвено толикое дело мученика временем будет, великаго Феодора коливами почитаем.

Сего же великаго злочестивый Вринга при Максимиане умучи, изнурена прежде: таже храм богини оных сжегша, и убогим красоту ея разделивша. Неким же и в словеса ему пришедшим, и преложитися хотящим ему, и совет творящим не претерпе. Много убо пострадав, последи пещи велицей разжене бывши, в ню вметается, ничтоже от нея пострадав, посреде ея дух Богу предаде.

Того молитвами Христе Боже помилуй и спаси нас, аминь.