Пяток 2-й седмицы Великого поста

Если чтения отсутствуют - значит, по данному дню еще не были добавлены тексты.

На третьем часе
На шестом часе
На девятом часе

На третьем часе:

ѳ҃і. Лю́то ѹ҆́бѡ є҆́сть ѻ҆́ко се́рдца ѿ ꙗ҆́рости смꙋти́ти, по ре́кшемꙋ: смѧте́сѧ ѿ ꙗ҆́рости ѻ҆́ко моѐ: лю́тше же, є҆́же ѹ҆стна́ма стремле́нїе дꙋшѝ ꙗ҆ви́ти: а҆ є҆́же (и҆) рꙋка́ма, то̀ ѿню́дъ мона́шескагѡ сегѡ̀ и҆ а҆́гг҃лскагѡ и҆ бжⷭ҇твеннагѡ жи́телства, вражде́бно є҆́сть и҆ чꙋ́жде.

к҃. А҆́ще сꙋче́цъ и҆но́гѡ и҆сцѣли́ти хо́щеши, па́че же непщꙋ́еши: то̀ да не вмѣ̑стѡ ѻ҆рꙋ́дїѧ враче́вскагѡ бервно́мъ се́й ѡ҆тре́ши и҆лѝ и҆зслѧ́чиши: бервно̀ є҆́сть, тѧ̑жка словеса̀, и҆ ѻ҆́бразы нелѣ̑пи. Дрꙋго́е же, кро́тко ѹ҆чи́телство, и҆ долготерпѣли́во запреще́нїе: ѡ҆бличѝ, гл҃етъ, запретѝ, ѹ҆молѝ: а҆ не ѹ҆́бѡ и҆ побі́й: а҆́ще ли же бы и҆ сїѐ потре́бно бы́ло, то̀ рѣ̑дцѣ, и҆ не собо́ю.

к҃а. Присмотри́мсѧ, и҆ во мно́зѣхъ ꙗ҆́ростныхъ бдѣ̑нїе ѹ҆се́рднѣ, и҆ поще́нїе, и҆ безмо́лвїе сотворѧ́емо ѹ҆ви́димъ: ра́зꙋмъ бо є҆́сть бѣ̑сꙋ семꙋ̀, расти́тєлнаѧ стра́сти сеѧ̀ вещєства̀, вино́ю а҆́ки бы покаѧ́нїѧ и҆ пла́ча тѣ́мъ совѣ̑товати.

к҃в. А҆́ще є҆ди́нъ во́лкъ, ꙗ҆́коже предреко́хомъ, мо́жетъ возмꙋти́ти ста́до, бѣ̑са помо́щника и҆мѣ̑ѧ, то̀ всѧ́кѡ є҆ди́нъ бра́тъ премⷣрѣйшъ, ꙗ҆́коже мѣ̑хъ бла́гъ є҆ле́а по́лнъ волнꙋ̀ превзы́ти и҆ ѹ҆ти́шитисѧ твори́ти корабле́ви, а҆́гг҃ла помо́щника и҆мѣ̑ѧ: по вели́чествꙋ ѡ҆сꙋжде́нїѧ, ѻ҆́нагѡ пе́рвшагѡ, се́й ѿ бг҃а мздꙋ̀ и҆мѣ̑ѧ прїѧ́ти, и҆ ѻ҆́бразъ по́льзы всѣ́мъ быва́ѧ.

к҃г. Нача́ло бл҃же́ннагѡ неѕло́бїѧ, съ го́рестїю и҆ болѣ̑знїю дꙋшѝ, безчє́стїѧ стерпѣва́ти: среда́ же, безпеча́лнѣ въ тѣ̑хъ пребыва́ти: соверше́нїе же, а҆́ще и҆ є҆́сть, ꙗ҆́кѡ бл҃гохвалє́нїѧ та̑ вмѣнѧ́ти. Да ра́дꙋешисѧ пе́рвшїй, здра́вствꙋй вторы́й, бл҃же́нъ ѡ҆ гдⷭ҇ѣ и҆ ра́дꙋйсѧ тре́тїй.

к҃д. Бѣ̑денъ бы́ти назна́менахъ во гнѣвли́выхъ позо́ръ, ѿ возноше́нїѧ ѡ҆́тай тѣ́мъ слꙋча́ющсѧ: гнѣ̑вающесѧ бо, побѣжде́нїѧ ра́ди па́ки гнѣ̑вахꙋсѧ: и҆ паде́нїемъ паде́нїе ѿгонѧ́емо зрѧ̀, ѹ҆дивлѧ́хсѧ: и҆ грѣ̑хъ грѣхо́мъ ѿмща́ющихъ ви́дѧ, ми́ловахъ: и҆ бѣсѡ́въ кова́рства ѹ҆жаса́ѧсѧ, жи́зни своеѧ̀ ма́лѡ не ѿчаѧва́хсѧ.

к҃є. А҆́ще бы кто̀ себѐ ѿ возноше́нїѧ и҆ скороѧ́ростїѧ, лꙋка́вства же и҆ лицемѣ̑рїѧ, ѹ҆до́бь побѣжда́ема ѹ҆ви́дѣлъ, и҆ та́кѡ ме́чь кро́тости и҆ неѕло́бїѧ ѻ҆бою́дꙋ ѻ҆́стръ на та̑ѧ ѹ҆смотрѣ̑лъ и҆звлещѝ: то́й ше́дъ да прїи́детъ ꙗ҆́коже въ пра́твꙋ спасе́нїѧ въ собо́ръ бра́тїй, и҆ па́че же жесточа́йшихъ, а҆́ще тѣ̑хъ соверше́ннѣ совлещи́сѧ хо́щетъ: да та́мѡ доса́дами и҆ безчє́стїи, и҆ чрез̾ бра́тїй треволнє́нїи потѧза́емь, и҆ ѹ҆́мнѣ бїе́мь, и҆лѝ не́гли нѣ̑когда и҆ чꙋ́вственнѣ стꙋжа́емь, и҆ попира́емь и҆ пѧто́ю ѹ҆дарѧ́емь, скве́рнꙋ сꙋ́щꙋю на ри́зѣ дꙋшѝ своеѧ̀ ѿмыва́етъ: (и҆) са́мый тѧ̀ ѻ҆́нъ наро́дный гла́съ да ѹ҆вѣ̑ритъ, поноше́нїе мы́лню страсте́й дꙋше́вныхъ бы́ти: глаго́лютъ бо нѣ̑цыи и҆з̾ сꙋ́щихъ въ мі́рѣ, внегда̀ кого̀ въ лицѐ безчє́стїи ѡ҆блага́ютъ, хва́лѧщесѧ пред̾ и҆нѣ̑ми, ꙗ҆́кѡ ѻ҆́нсицꙋ ѡ҆мы́хъ: є҆́же и҆ и҆́стинно є҆́сть.

к҃ѕ. И҆́но є҆́сть є҆́же ѿ пла́ча въ новонача́лныхъ безгнѣ̑вїе: и҆ и҆́на, ꙗ҆́же въ соверше́нныхъ сꙋ́щаѧ неподви́жность: и҆ ѻ҆́нъ (гнѣ̑въ въ новонача́лныхъ) ѹ҆́бѡ, ꙗ҆́коже нѣ̑кою ѹ҆здо́ю слезо́ю свѧ́занъ є҆́сть: се́й (гнѣ̑въ въ соверше́нныхъ) же, ꙗ҆́коже ѕмі́й, безстра́стїемъ ꙗ҆́кѡ мече́мъ, ѹ҆мерщвле́нъ є҆́сть.

к҃з. Трѝ а҆́зъ кꙋ́пнѡ ви́дѣхъ и҆́ноки безче́стїе прїе́мшѧ: и҆ є҆ди́нъ ѹ҆́бѡ ѹ҆грызе́нъ бы́сть, и҆ ѹ҆молча̀: дрꙋгі́й же, возра́довасѧ (ѹ҆́бѡ) себѐ ра́ди, ѡ҆печа́лисѧ же ѡ҆ ѹ҆кори́вшемъ: тре́тїй же, вре́дъ бли́жнѧгѡ воѡбрази́въ, прослези́сѧ те́плѣ: и҆ возмо́жно бѣ̀ ѹ҆ви́дѣти, стра́ха, и҆ мзды̀, и҆ любвѐ, дѣ̑лателей.

к҃и. Ꙗ҆коже ѻ҆гневи́ца тѣле́снаѧ, є҆ди́на ѹ҆́бѡ є҆́сть, мнѡ́ги же а҆ не є҆ди́нꙋ возгорѣ̑нїѧ своегѡ̀ винꙋ̀ и҆́мать: та́кѡ и҆ ꙗ҆́рости возгорѣ̑нїе и҆ движе́нїе, и҆ про́чїихъ страсте́й на́шихъ, мнѡ́ги и҆ разли̑чны вины̑ и҆мꙋ́ще сꙋ́ть: тѣ̑мже и҆ невозмо́жно є҆́сть ѡ҆ си́хъ є҆диноѻбра́знѣ ѡ҆предѣли́ти. Совѣ̑тъ же даю̀ па́че, коегѡ́ждо про́чее и҆з̾ недꙋ́гꙋющихъ попече́ннымъ тща́нїемъ недꙋ́га сегѡ̀ врачева́нїе (хꙋдо́жество) взы́сковати. Пе́рвое же да бꙋ́детъ врачева́нїе, болѣ̑зни своеѧ̀ винꙋ̀ позна́ти, да винѣ̀ ѻ҆́нѣй ѡ҆брѣ̑тшейсѧ, на тꙋ̀ и҆ пла́стырь ѿ про́мысла бж҃їѧ и҆ враче́й дх҃о́вныхъ прїи́метъ. Ꙗ҆коже во ѻ҆́бразѣхъ: хотѧ́щїи съ на́ми ѡ҆ гдⷭ҇ѣ во ѹ҆́мное и҆ предложе́нное сꙋди́лище совни́ти, да совни́дꙋтъ: и҆ неѧ́снѣ нѣ̑какѡ ѡ҆ предрече́нныхъ страсте́хъ и҆лѝ вина́хъ и҆стѧжи́мъ.

к҃ѳ. Да свѧ́жетсѧ про́чее ꙗ҆́рость ꙗ҆́кѡ мꙋчи́тель ѹ҆́зами кро́тости, и҆ бїе́ма ѿ долготерпѣ̑нїѧ, и҆ влачи́ма ѿ ст҃ы́ѧ любвѐ, на сꙋди́щи се́мъ сло́ва сегѡ̀ предста́вши ѡ҆ подоба́ющихъ и҆стѧзꙋ́ема да быва́етъ. Глаго́ли на́мъ ѽ безꙋ́мна и҆ безче́стна, и҆ ро́ждшагѡ (тѧ̀) нарече́нїе, и҆ ѕлѣ̀ ро́ждшїѧ тѧ̀ наименова́нїе, и҆ сынѡ́въ твои́хъ и҆ дще́рей скве́рныхъ и҆мена̀: не то́чїю же, но и҆ ра́тꙋющихъ и҆ ѹ҆бива́ющихъ тѧ̀ назнамена̑нїѧ. Ѻ҆на́ же къ на́мъ ѿвѣщава́ющи глаго́ла: ро́ждшыѧ менѐ, мнѡ́ги сꙋ́ть, и҆ ѻ҆те́цъ мо́й, нѣ̑сть є҆ди́нъ: ма́тєри же моѧ̑ сꙋ́ть, тщесла́вїе, сребролю́бїе, чревоѡб̾ѧде́нїе: ѻ҆вогда́ же и҆ блꙋ́дъ. Роди́вый менѐ, нарица́етсѧ возноше́нїе: дщє́ри же моѧ̑ сꙋ́ть, памѧтоѕло́бїе, не́нависть, вражда̀, словоѡправда́нїе: сопє́рницѣ же моѝ, ѿ нею́же ны́нѣ ѡ҆бдержи́ма є҆́смь ѹ҆́зница, сопротивлѧ́ющѣисѧ тѣ́мъ сꙋ́ть: безгнѣ̑вїе и҆ кро́тость: навѣ̑тница же моѧ̀, смиренномꙋ́дрїе нарица́етсѧ: кто́ же є҆́сть роди́вый ѻ҆́но, во своѐ вре́мѧ то̀ вопроси́те.

На ѻ҆смо́мъ нѣ̑коемъ степе́ни, вѣне́цъ безгнѣ̑вїѧ лежи́тъ: и҆ и҆́же ѹ҆́бѡ ѿ є҆стества̀ того̀ носѧ́й, не́гли не но́ситъ и҆но́го: а҆ и҆́же ѿ по́тѡвъ, то̀ ѿню́дъ ѻ҆́смь си́хъ (степе́ней) превзы́де.

На шестом часе:

СЛО́ВО Ѳ҃. Ѡ҆ памѧтоѕло́бїи.

Прпⷣбныѧ ѹ҆́бѡ добродѣ̑тєли, лѣ̑ствицѣ і҆а́кѡвлей приꙋподоблѧ́ютсѧ, непреподѡ́бныѧ же ѕлѡ́бы, вери́зѣ спа́дшей съ петра̀ верхо́внагѡ. Тѣ̑мже ѻ҆́ны ѹ҆́бѡ є҆ди́на съ є҆ди́ною свѧ̑заны бы́вше, на нб҃о произволѧ́ющаго возво́дѧтъ: сїѧ̑ же, є҆ди́на дрꙋгꙋ́ю ражда́ти и҆ состѧга́ти ѡ҆быко́ша. Тѣ̑мже и҆ слы́шахомъ ны́нѣ неразꙋ́мнꙋю сїю̀ ꙗ҆́рость, рожде́нїе є҆ѧ̀ сво́йственно, памѧтоѕло́бїе бы́ти ре́кшꙋ: тѣ̑мже и҆ вре́мени ны́нѣ зовꙋ́щꙋ, соверше́ннѣ ѡ҆ то́мъ рце́мъ.

в҃. Памѧтоѕло́бїе є҆́сть, ꙗ҆́рости ѡ҆конча́нїе: согрѣше́нїй храни́тель, пра́вды не́нависть, добродѣ̑телей погꙋбле́нїе, ржа̀ дꙋшѝ, че́рвь ѹ҆ма̀, мл҃и́твы стꙋ́дъ, моле́нїѧ ѿсѣче́нїе: любвѐ ѿчꙋжде́нїе, дꙋшѝ гво́здъ водрꙋже́нъ, несла́достно чꙋ́вство въ сла́дости го́рести люби́мо, всегда́шнїй грѣ̑хъ, безсо́нно законопрестꙋпле́нїе, повсеча́сна ѕлѡ́ба.

г҃. Є҆ди́на и҆ сїѧ̀ те́мна и҆ гнꙋ́сна стра́сть, гл҃ю же стра́сть памѧтоѕло́бїѧ, и҆з̾ ражда́ющихсѧ, а҆ не и҆з̾ ражда́ющихъ и҆лѝ и҆ и҆з̾ ражда́ющихъ є҆́сть: тѣ̑мже ѡ҆ не́й мнѡ́жайша гл҃ати не хо́щемъ.

д҃. Преста́ти сотвори́вый гнѣ̑вꙋ, ѹ҆би́лъ є҆́сть памѧтоѕло́бїе: ѻ҆тцꙋ́ бо семꙋ̀ жи́вꙋ сꙋ́щꙋ, чадоро́дїе быва́етъ.

є҃. Стѧжа́вый любо́вь, ѹ҆страни́лсѧ вражды̀: враждꙋ́ѧй же, трꙋды̀ безвре́мєнны себѣ̀ собира́етъ.

ѕ҃. Трапе́за любвѐ, разорѧ́етъ не́нависть: и҆ да́ри чи́сти, ѹ҆мѧгчи́ша дꙋ́шꙋ. Трапе́за невнима́телна, ма́ти дерзнове́нїѧ: и҆ ѻ҆ко́нцемъ любвѐ вскочи́тъ чревоѡб̾ѧде́нїе.

з҃. Ви́дѣхъ не́нависть, блꙋда̀ ѹ҆́зꙋ многовре́меннꙋ, расто́ргшꙋ: и҆ ѕлопомнѣ̑нїе та́мѡ, безꙋ́мнꙋ тꙋ̀ про́чее пресла́внѣ соблю́дшо. Чꙋ́дно є҆́сть видѣ̑нїе, бѣ̑са бѣ̑са сего̀ и҆сцѣлѧ́юща: сїе́ же не́гли дѣ̑ло бж҃їе смотри́телнѣ, а҆ не бѣсо́вско є҆́сть.

и҃. Дале́че є҆́сть ѿ любвѐ тве́рды є҆сте́ственны памѧтоѕло́бїе, ѹ҆до́бнѣ же блꙋ́дъ приближа́етсѧ къ не́й: и҆ ѻ҆́тай ви́диши въ го́лꙋби во́шь.

ѳ҃. Памѧтоѕло́бствꙋѧ, памѧтоѕло́бствꙋй на бѣ̑сы: и҆ враждꙋ́ѧ, враждꙋ́й на тѣ̑ло твоѐ вы́нꙋ. Неблагода́ренъ и҆ лсти́въ дрꙋ́гъ є҆́сть пло́ть сїѧ̀: и҆ ѹ҆гожда́ема, бо́лѣе ѡ҆би́дитъ.

і҃. Писа́нїѧ сказа́тель є҆́сть, памѧтоѕло́бїе: къ ра́зꙋмꙋ своемꙋ̀ словеса̀ дх҃а и҆носказꙋ́ѧ. Да посрамлѧ́етъ того̀ і҆и҃сова мл҃и́тва ѻ҆́на, ю҆́же (памѧтоѕло́бствꙋюще), гл҃ати съ ни́мъ не мо́жемъ.

а҃і. Повнегда̀ мно́гѡ подвиза́всѧ претыка́нїе сїѐ разори́ти въ коне́цъ не мо́жеши, то ка́йсѧ ко врагꙋ̀ понѐ ѹ҆сты̀: да на мно́зѣ лицемѣ̑рїѧ є҆́же къ немꙋ̀ ѹ҆стыдѣ̑всѧ, соверше́ннѣ похвали́ши, ѿ со́вѣсти, ꙗ҆́кѡ ѿ ѻ҆гнѧ̀ ѹ҆бода́емь.

в҃і. Тогда̀ позна́еши себѐ гни́лости сеѧ̀ (соверше́ннѣ) и҆зба́влшасѧ: не є҆гда̀ томꙋ̀ да́ры возда́си, нижѐ є҆гда̀ на трапе́зꙋ приводи́ши: но є҆гда̀ того̀ и҆лѝ въ дꙋше́вныхъ, и҆лѝ въ тѣле́сно ѕлоключе́нїе нѣ̑кое впа́дша ѹ҆слы́шиши, и҆ ꙗ҆́кѡ ѡ҆ себѣ̀ поболи́ши и҆ прослези́шисѧ.

г҃і. Памѧтоѕло́бенъ безмо́лвникъ, є҆́сть въ ꙗ҆́звинѣ кры́ющсѧ а҆́спїдъ, ꙗ҆́дъ смертоно́сенъ въ себѣ̀ ѡ҆бносѧ́щъ.

д҃і. Па́мѧть страсте́й і҆и҃совыхъ и҆сцѣли́тъ памѧтоѕло́бїе: ѿ неѕло́бїѧ є҆гѡ̀ крѣ̑пцѣ посрамлѧ́емо. Во дре́вѣ гни́лѣ внꙋ́трь и҆зражда́етсѧ че́рвїе: и҆ съ кротча́йшими и҆ безмо́лвными прелюбодѣ̑йчищными, сприлѣплѧ́етсѧ гнѣ̑въ (пребыва́ющъ): ѿверга́ѧй то́й, ѡ҆брѣ̑те ѿпꙋще́нїе: прилѣплѧ́ѧйсѧ же томꙋ̀, лиши́сѧ щедро́тъ.

є҃і. Въ трꙋды̀ и҆ по́ты поще́нїѧ ра́ди себѐ нѣ̑цыи преда́ша: непамѧтоѕло́бивъ же мꙋ́жъ, предвари́лъ є҆́сть тѣ̑хъ: є҆лма̀ ѿпꙋсти́те ма́лѡ, и҆ ѿпꙋ́ститсѧ ва́мъ бога́тнѡ.

ѕ҃і. И҆́стиннагѡ покаѧ́нїѧ зна́менїе є҆́сть непамѧтоѕло́бїе: держа́й же то̀, и҆ ка́ѧтисѧ мнѧ́йсѧ, подо́бенъ є҆́сть во снѣ̑хъ тещѝ мнѧ́щемꙋсѧ.

з҃і. Ви́дѣхъ памѧтоѕло́бныхъ ѡ҆ непамѧтоѕло́бїи и҆нѣ́мъ памѧтоѕлѡ́бнымъ совѣ̑товавшихъ: и҆ слове́съ свои́хъ ѹ҆срами́вшесѧ, ѿ стра́сти сеѧ̀ преста́ша.

и҃і. Никто́же хꙋ́дꙋ бы́ти стра́сть помраче́нное сїѐ да вознепщꙋ́етъ: ѡ҆бы́че бо мно́жицею да́же и҆ до дх҃о́вныхъ мꙋже́й простира́тисѧ.

Степе́нь є҆́сть девѧ́тый: стѧжа́вый (той) со дерзнове́нїемъ про́чее разрѣше́нїе согрѣше́нїй да про́ситъ ѹ҆ сп҃си́телѧ і҆и҃са.

На девятом часе:

СЛО́ВО I҃. Ѡ҆ клеветѣ̀.

Никто́же и҆з̾ бл҃гомꙋ́дрствꙋющихъ сопротиворече́тъ, непщꙋ́ю, не ѿ не́нависти и҆ памѧтоѕло́бїѧ клеветѣ̀ ражда́тисѧ: тѣ̑мже по прароди́телѣхъ є҆ѧ̀ ꙗ҆́кѡ во плени́цѣ и҆ ѹ҆чини́сѧ.

в҃. Клевета̀ є҆́сть ѿро́дъ не́нависти: то́нокъ недꙋ́гъ: дебе́ла сокрове́на и҆ таѧ́щасѧ пїѧ́вица, любвѐ и҆ждива́ющи и҆ и҆стреблѧ́ющи кро́вь. Любвѐ лицемѣ̑рїе. се́рдцꙋ скве́рны и҆ тѧ́готы вино́вна. и҆стребле́нїе чистоты̀.

г҃. Ꙗ҆коже сꙋ́ть ѻ҆трокови̑цы безсты́днѡ ѕла̑ѧ дѣ̑юще: и҆ сꙋ́ть и҆́ны ѻ҆́тай и҆ стыдѣ̑ннѣе лю̑тша пе́рвшихъ сотворѧ́юще: та́кѡ и҆ во страсте́хъ безче́стїѧ мо́щно є҆́сть ѹ҆ви́дѣти: мнѡ́гшїѧ ѻ҆́ны тайнолꙋка̑вы ѻ҆трокѡви́цы сꙋ́ть: лицемѣ̑рїе, лꙋка́вство, печа́ль, памѧтоѕло́бїе, клевета̀ серде́чна: и҆́на ѹ҆́бѡ мнѣ̑нїемъ предлага́юще, на и҆́на же взира́юще.

д҃. Ѹ҆слы́шахъ клеве́щꙋщихъ и҆ воспрети́хъ, и҆ сїѐ къ словоизвине́нїю дѣ̑лателїе ѕла̀ сегѡ̀ ѿвѣща́ша: ꙗ҆́кѡ ѿ любвѐ и҆ попече́нїѧ ѡ҆клевета́емагѡ сїѧ̑ творѧ́тъ. А҆́зъ же къ ни̑мъ, преста́ните, рѣ̑хъ, ѿ таковы́ѧ любвѐ: да нело́жнѣ возгл҃етъ рекі́й: ѡ҆клевета́ющаго та́й и҆́скреннѧго своего̀, сего̀ и҆згонѧ́хъ. А҆́ще глаго́леши люби́ти, то̀ моли́сѧ ѻ҆́тай, и҆ не ѡ҆смѣѧва́й мꙋ́жа: се́й бо ѻ҆́бразъ прїѧ́тенъ є҆́сть ѹ҆ бг҃а. Нижѐ сїѐ тебѣ̀ да ѹ҆таева́етсѧ, и҆ всѧ́кѡ трезви́тисѧ и҆́маши ѡ҆ є҆́же не ѡ҆сꙋжда́ти согрѣша́ющаго. І҆ꙋ́да въ ли́цѣ ѹ҆чн҃кѡ́въ бѣ̀, разбо́йникъ же въ ли́цѣ ѹ҆бі́йцєвъ: и҆ чꙋ́до ка́кѡ въ є҆ди́номъ мгнове́нїи возпремѣне́нїе бы́сть.

є҃. А҆́ще кто̀ клеветы̀ дꙋ́ха побѣди́ти хо́щетъ, то̀ не согрѣша́ющемꙋ, но под̾ꙋща́ющемꙋ бѣ̑сꙋ порече́нїе то̀ да написꙋ́етъ: никто́же бо хо́щетъ ко бг҃ꙋ согрѣши́ти, а҆́ще и҆ не понꙋжда́емь всѧ́къ и҆з̾ на́съ є҆́сть.

ѕ҃. Ви́дѣхъ ꙗ҆́вственнѣ согрѣши́вшаго и҆ ѻ҆́тай пока́ѧвшагосѧ: и҆ є҆го́же ѡ҆сꙋди́хъ ꙗ҆́кѡ блꙋдника̀, бѣ̀ про́чее ѹ҆ бг҃а цѣломꙋ́дръ: ѡ҆браще́нїемъ чи́стѣ того̀ ѹ҆ми́лостививъ.

з҃. Никогда́же да ѹ҆стыди́шисѧ клеве́щꙋщагѡ къ тебѣ̀ на бли́жнѧго: па́че же глаго́ли, преста́ни бра́те: а҆́зъ на всѧ́къ де́нь лю́тшими согрѣша́ю: и҆ ка́кѡ ѻ҆́наго ѡ҆сꙋжда́ти могꙋ̀; два́ бо сїѧ̑ приѡбрѧ́щеши: є҆ди́нѣмъ пла́стыремъ и҆ себѐ и҆ и҆́скреннѧго и҆сцѣли́въ. Є҆ди́нъ и҆ се́й и҆з̾ сокраще́нныхъ пꙋте́й ко ѿпꙋще́нїю согрѣше́нїй наставлѧ́ющихъ є҆́сть: гл҃ю же, є҆́же не сꙋди́ти: є҆лма̀, не сꙋди́те, и҆ не сꙋ́дѧтъ ва́мъ.

и҃. Чꙋ́ждь є҆́сть ѻ҆́гнь, воды̀: ꙗ҆́коже (и҆) є҆́же сꙋди́ти, ка́ѧтисѧ хотѧ́щемꙋ. А҆́ще и҆ въ са́момъ то́мъ и҆схо́дѣ ѹ҆́зриши кого̀ согрѣша́юща, нижѐ тогда̀ того̀ ѡ҆сꙋжда́й: безвѣ̑стенъ бо человѣ̑кѡмъ сꙋ́дъ бж҃їй є҆́сть. Согрѣши́ша нѣ̑цыи вєли́ка ꙗ҆́вственнѣ, содѣ̑лаша же бла̑га бѡ́лша та́йнѣ: и҆ прелсти́шасѧ любонасмѣѧ́телїе, ды́мъ вмѣ̑стѡ со́лнца содержа́ще.

ѳ҃. Ѹ҆слы́шите менѐ, ѹ҆слы́шите ѕлі́и чꙋжди́хъ словоистѧза́телїе: а҆́ще и҆́стинно є҆́сть, ꙗ҆́коже и҆ є҆́сть и҆́стинно, ꙗ҆́кѡ и҆́мже сꙋдо́мъ сꙋ́дите, сꙋ́дѧтъ ва́мъ: то̀ всѧ́ко ѡ҆ кото́рыхъ либо порече́мъ бли́жнѧго, въ та̑ впаде́мъ, и҆лѝ въ тѣлє́сна, и҆лѝ въ дꙋшє́вна: и҆ и҆́накѡ нѣ̑сть.

і҃. Ско́рїи и҆ прилѣ̑жнїи словоистѧза́телїе бли́жнѧгѡ прегрѣше́нїй сꙋ́щїи, се́ю стра́стїю стра́ждꙋтъ: поне́же не ѹ҆̀ ѡ҆ свои́хъ согрѣше́нїихъ соверше́ннꙋ и҆ непари́телнꙋ па́мѧть и҆ попече́нїе сотвори́ша: занѐ а҆́ще бы кто̀ своѧ̑ ѕла̑ѧ дале́че ѿ покрыва́ла самолю́бїѧ ѻ҆па́снѣ ѹ҆ви́дѣлъ, то̀ ни ѡ҆ чесо́мже про́чее и҆но́мъ и҆з̾ тѣ̑хъ ꙗ҆̀же въ житїѝ се́мъ попече́нїе сотвори́лъ бы: помышлѧ́ѧ, нижѐ къ пла́чꙋ своемꙋ̀ довлѣ̑ти є҆мꙋ̀ своемꙋ̀ є҆гѡ̀ вре́мени, а҆́ще бы и҆ сто̀ лѣ̑тъ пожи́лъ, а҆́ще бы и҆ ве́сь і҆ѻрда́нъ, рѣ̑кꙋ сле́зъ и҆з̾ ѻ҆́чїю своє́ю ѹ҆ви́дѣлъ и҆сходѧ́щꙋ. Назна́менахъ пла́чь, и҆ не ѡ҆брѣто́хъ въ не́мъ слѣда̀ клеветы̀ и҆лѝ ѡ҆сꙋжде́нїѧ.

а҃і. И҆лѝ согрѣши́ти на́съ бѣ̑сове побꙋжда́ютъ: и҆лѝ не согрѣши́вшихъ, согрѣша́ющихъ сꙋди́ти: да вторы́мъ пе́рвое ѡ҆сквернѧ́ютъ ѹ҆бі̑йцы сі́и.

в҃і. Вѣ̑ждь и҆ сїѐ памѧтоѕло́бныхъ и҆ зави́дливыхъ бы́ти зна́менїе: є҆гда̀ ѹ҆чє́нїѧ, и҆лѝ дѣла̀, и҆лѝ и҆справлє́нїѧ бли́жнѧгѡ, сла́дцѣ и҆ ѹ҆до́бнѣ порица́ютъ, дꙋ́хомъ не́нависти погрꙋжа́еми.

г҃і. Ви́дѣхъ нѣ̑кихъ ѻ҆́тай и҆ неѡб̾ѧвлѧ́емѡ вселю̑та содѣва́ющихъ согрѣшє́нїѧ, и҆ мнѣ̑нїемъ своеѧ̀ и҆́хъ чистоты̀, лю́тѣ напа́дающихъ на лє́гка (нѣ́каѧ) согрѣша́ющихъ и҆ ѡ҆б̾ѧвлѧ́емыхъ.

д҃і. Сꙋди́ти, є҆́сть са́на бж҃їѧ безстꙋ́дно восхище́нїе: ѡ҆сꙋди́ти же, дꙋшѝ своеѧ̀ є҆́сть поги́бель.

є҃і. Ꙗ҆коже возноше́нїе и҆ без̾ и҆ны́ѧ стра́сти погꙋби́ти человѣ̑ка мо́жетъ: та́кѡ и҆ є҆́же сꙋди́ти са́мо ѡ҆ себѣ̀ и҆ є҆ди́но въ на́съ сꙋ́що, соверше́ннѣ погꙋби́ти на́съ мо́жетъ: є҆лма̀ фарїсе́й ѻ҆́нъ за сїѐ ѡ҆сꙋжде́нъ бы́сть.

ѕ҃і. Ꙗ҆коже ꙗ҆годособира́тель зрѣ́лы ꙗ҆́гѡды ꙗ҆ды́й, ничто́же ѡ҆ ки́слыхъ гро́здїй ꙗ҆́годахъ радѣ̑ти и҆́мать: и҆ бл҃горазꙋ́мный и҆ смы́сленный ѹ҆́мъ, є҆ли̑ки ѹ҆́бѡ въ нѣ̑кихъ добродѣ̑тєли ѹ҆́зритъ, сїѧ̑ то́щнѡ назна́менꙋетъ: безꙋ́мный же, поречє́нїѧ и҆ недоста́тки и҆спы́товати и҆́мать, ѡ҆ не́мже и҆ рече́сѧ: и҆спыта́ша беззако́нїе, и҆зчезо́ша и҆спыта́ющїи и҆спыта̑нїѧ.

з҃і. Нижѐ ѻ҆чи́ма твои́ма зрѧ̀, ѡ҆сꙋжда́й: мно́жицею бо и҆ ті́и прелсти́стѣсѧ.

Восхожде́нїе десѧ́тое є҆́сть, є҆́же побѣди́вый, любвѐ дѣ̑латель, и҆лѝ пла́ча є҆́сть.