Вторник 2-й седмицы Великого поста

Если чтения отсутствуют - значит, по данному дню еще не были добавлены тексты.

На паремиях вечерни по прокимне
На третьем часе
На шестом часе
На девятом часе

На паремиях вечерни по прокимне:

Быт. 4:8–15

⁸ И҆ речѐ ка́їнъ ко а҆́велю бра́тꙋ своемꙋ̀: по́йдемъ на по́ле. И҆ бы́сть внегда̀ бы́ти и҆̀мъ на по́ли, воста̀ ка́їнъ на а҆́велѧ бра́та своего̀ и҆ ᲂу҆бѝ є҆го̀. ⁹ И҆ речѐ гдⷭ҇ь бг҃ъ ко ка́їнꙋ: гдѣ̀ є҆́сть а҆́вель бра́тъ тво́й; И҆ речѐ: не вѣ́мъ: є҆да̀ стра́жъ бра́тꙋ моемꙋ̀ є҆́смь а҆́зъ; ¹⁰ И҆ речѐ гдⷭ҇ь: что̀ сотвори́лъ є҆сѝ сїѐ; гла́съ кро́ве бра́та твоегѡ̀ вопїе́тъ ко мнѣ̀ ѿ землѝ: ¹¹ и҆ нн҃ѣ про́клѧтъ ты̀ на землѝ, ꙗ҆́же разве́рзе ᲂу҆ста̀ своѧ̑ прїѧ́ти кро́вь бра́та твоегѡ̀ ѿ рꙋкѝ твоеѧ̀: ¹² є҆гда̀ дѣ́лаеши зе́млю, и҆ не приложи́тъ си́лы своеѧ̀ да́ти тебѣ̀: стенѧ̀ и҆ трѧсы́йсѧ бꙋ́деши на землѝ. ¹³ И҆ речѐ ка́їнъ ко гдⷭ҇ꙋ бг҃ꙋ: вѧ́щшаѧ вина̀ моѧ̀, є҆́же ѡ҆ста́витисѧ мѝ: ¹⁴ а҆́ще и҆зго́ниши мѧ̀ дне́сь ѿ лица̀ землѝ, и҆ ѿ лица̀ твоегѡ̀ скры́юсѧ, и҆ бꙋ́дꙋ стенѧ̀ и҆ трѧсы́йсѧ на землѝ, и҆ бꙋ́детъ, всѧ́къ ѡ҆брѣта́ѧй мѧ̀ ᲂу҆бїе́тъ мѧ̀. ¹⁵ И҆ речѐ є҆мꙋ̀ гдⷭ҇ь бг҃ъ: не та́кѡ: всѧ́къ ᲂу҆би́вый ка́їна седми́жды ѿмсти́тсѧ. И҆ положѝ гдⷭ҇ь бг҃ъ зна́менїе на ка́їнѣ, є҆́же не ᲂу҆би́ти є҆гѡ̀ всѧ́комꙋ ѡ҆брѣта́ющемꙋ є҆го̀.

Притч. 5:1–15

¹ Сы́не, мое́й премꙋ́дрости внима́й, къ мои̑мъ же словесє́мъ прилага́й ᲂу҆́хо твоѐ, ² да сохрани́ши мы́сль бл҃гꙋ́ю: чꙋ́вство же мои́хъ ᲂу҆сте́нъ заповѣ́даетъ тебѣ̀. ³ Не внима́й ѕлѣ́й женѣ̀: ме́дъ бо ка́плетъ ѿ ᲂу҆сте́нъ жены̀ блꙋдни́цы, ꙗ҆́же на вре́мѧ наслажда́етъ тво́й горта́нь: ⁴ послѣди́ же горча́е же́лчи ѡ҆брѧ́щеши, и҆ и҆з̾ѡщре́ннꙋ па́че меча̀ ѻ҆бою́дꙋ ѻ҆́стра: ⁵ безꙋ́мїѧ бо но́зѣ низво́дѧтъ ᲂу҆потреблѧ́ющихъ ю҆̀ со сме́ртїю во а҆́дъ, стѡпы́ же є҆ѧ̀ не ᲂу҆твержда́ютсѧ: ⁶ на пꙋти̑ бо живѡ́тныѧ не нахо́дитъ, заблꙋждє́нна же течє́нїѧ є҆ѧ̀ и҆ неблагоразꙋ̑мна. ⁷ Нн҃ѣ ᲂу҆̀бо, сы́не, послꙋ́шай менѐ и҆ не ѿриновє́нна сотворѝ моѧ̑ словеса̀: ⁸ дале́че ѿ неѧ̀ сотворѝ пꙋ́ть тво́й и҆ не прибли́жисѧ ко две́ремъ домѡ́въ є҆ѧ̀, ⁹ да не преда́стъ и҆ны̑мъ живота̀ твоегѡ̀, и҆ твоегѡ̀ житїѧ̀ неми́лѡстивымъ, ¹⁰ да не насы́тѧтсѧ и҆ні́и твоеѧ̀ крѣ́пости, твои́ же трꙋды̀ въ до́мы чꙋжды̑ѧ вни́дꙋтъ, ¹¹ и҆ раска́ешисѧ на послѣ́докъ тво́й, є҆гда̀ и҆стрꙋ́тсѧ плѡ́ти тѣ́ла твоегѡ̀, и҆ рече́ши: ¹² ка́кѡ возненави́дѣхъ наказа́нїе, и҆ ѿ ѡ҆бличе́нїй ᲂу҆клони́сѧ се́рдце моѐ; ¹³ не послꙋ́шахъ гла́са наказꙋ́ющагѡ мѧ̀, и҆ ко ᲂу҆ча́щемꙋ мѧ̀ не прилага́хъ ᲂу҆́ха моегѡ̀: ¹⁴ вма́лѣ бѣ́хъ во всѧ́цѣмъ ѕлѣ̀ посредѣ̀ цр҃кве и҆ со́нмища. ¹⁵ Сы́не, пі́й во́ды ѿ свои́хъ сосꙋ́дѡвъ и҆ ѿ твои́хъ кладенцє́въ и҆сто́чника:

На третьем часе:

СЛО́ВО Ѕ҃. Ѡ҆ па́мѧти сме́рти.

Всѧ́кагѡ сло́ва, предварѧ́етъ помышле́нїе: па́мѧть же сме́рти и҆ согрѣше́нїй, предварѧ́етъ рыда́нїѧ и҆ пла́ча: тѣ̑мже по чи́нꙋ своемꙋ̀ и҆ въ сло́вѣ се́мъ положи́шасѧ.

в҃. Па́мѧть сме́рти є҆́сть, повседне́вна сме́рть. Па́мѧть же и҆схо́да, повсеча́сно стена́нїе.

г҃. Боѧ́знь ѹ҆́бѡ сме́рти є҆́сть сво́йство є҆стества̀, ѿ преслꙋша́нїѧ прибы́вшо. Тре́петъ же сме́рти є҆́сть, непокаѧ́нныхъ согрѣше́нїй зна́менїе. Бои́тсѧ хрⷭ҇то́съ сме́рти, (а҆) не трепе́щетъ, да двою̀ є҆стествꙋ̑ свѡ́йства ꙗ҆́снѣ ꙗ҆ви́тъ.

д҃. Ꙗ҆коже всѣ̑хъ пи́щей хлѣ̑бъ є҆́сть нꙋ́ждншъ, та́кѡ всѣ̑хъ дѣ̑ланїй помышле́нїе сме́рти. Па́мѧть сме́рти ражда́етъ въ сꙋ́щихъ ѹ҆́бѡ посредѣ̀, трꙋды̀ и҆ при̑сна є҃. Ꙗ҆коже ꙗ҆́вно є҆́сть бѣлое ѻ҆́лово ѿ сребра̀, а҆́ще и҆ видѣ̑нїемъ подо́бенъ є҆́сть: та́кѡ (и҆) ѹ҆разсꙋди́телныхъ ꙗ҆́вна и҆ и҆звѣ̑стна є҆́сть є҆сте́ственнаѧ и҆ чрез̾есте́ственнаѧ боѧ́знь и҆схо́да.

ѕ҃. Сїѐ и҆́стинное зна́менїе є҆́сть, въ чꙋ́вствѣ се́рдца помина́ющихъ сме́рть, є҆́же ко всѧ́комꙋ созда́нїю во́льное безпристра́стїе, и҆ своеѧ̀ во́ли всесоверше́нное ѡ҆ставле́нїе.

з҃. И҆скꙋ́сенъ ѹ҆́бѡ є҆́сть ѿню́дъ, и҆́же сеѧ̀ на всѧ́къ де́нь ѡ҆жида́ѧй: ст҃ъ же, и҆́же сеѧ̀ на всѧ́къ де́нь жела́ѧй.

и҃. Не всѧ́ко жела́нїе сме́рти, бла́го є҆́сть: сꙋ́ть и҆́же вы́нꙋ нꙋ́ждею навыкнове́нїѧ согрѣша́ющїи, и҆ сеѧ̀ жела́ющїи со смире́нїемъ: и҆ сꙋ́ть (па́ки) и҆́же пока́ѧтисѧ не хотѧ́щїи, и҆ сме́рть ѿ ѿча́ѧнїѧ призыва́ющїи: и҆ сꙋ́ть (є҆щѐ) и҆́же ѿ возноше́нїѧ безстра́стныхъ бы́ти себѐ и҆мꙋ́щїи, и҆ тоѧ̀ не боѧ́щїисѧ: и҆ сꙋ́ть, а҆́ще и҆ ны́нѣ ѹ҆́бѡ сꙋ́ть, и҆́же дѣ̑йствомъ дх҃а ст҃а и҆схожде́нїѧ жела́ющїи своегѡ̀.

На шестом часе:

Ис. 5:7–16

⁷ Вїногра́дъ бо гдⷭ҇а саваѡ́ѳа, до́мъ і҆и҃левъ є҆́сть, и҆ человѣ́къ і҆ꙋ́динъ но́вый са́дъ возлю́бленный: жда́хъ, да сотвори́тъ сꙋ́дъ, сотвори́ же беззако́нїе, и҆ не пра́вдꙋ, но во́пль. ⁸ Го́ре совокꙋплѧ́ющымъ до́мъ къ до́мꙋ и҆ село̀ къ селꙋ̀ приближа́ющымъ, да бли́жнемꙋ ѿи́мꙋтъ что̀: є҆да̀ вселите́сѧ є҆ди́ни на землѝ; ⁹ Оу҆слы́шашасѧ бо во ᲂу҆шесѣ́хъ гдⷭ҇а саваѡ́ѳа сїѧ̑: а҆́ще бо бꙋ́дꙋтъ до́мове мно́зи, въ запꙋстѣ́нїе бꙋ́дꙋтъ вели́цыи и҆ до́брїи, и҆ не бꙋ́дꙋтъ живꙋ́щїи въ ни́хъ: ¹⁰ и҆дѣ́же бо воз̾ѡрю́тъ де́сѧть сꙋпрꙋ̑гъ волѡ́въ, сотвори́тъ корча́гъ є҆ди́нъ, и҆ сѣ́ѧй а҆ртава̑съ ше́сть сотвори́тъ мѣ̑ры трѝ. ¹¹ Го́ре востаю́щымъ заꙋ́тра и҆ сїке́ръ гонѧ́щымъ, ждꙋ́щымъ ве́чера: вїно́ бо сожже́тъ ѧ҆̀: ¹² со гꙋ́сльми бо и҆ пѣвни́цами, и҆ тѷмпа̑ны и҆ свирѣ́льми вїно̀ пїю́тъ, на дѣла́ же гдⷭ҇нѧ не взира́ютъ и҆ дѣ́лъ рꙋкꙋ̀ є҆гѡ̀ не помышлѧ́ютъ. ¹³ Оу҆̀бо плѣне́ни бы́ша лю́дїе моѝ, за є҆́же не вѣ́дѣти и҆̀мъ гдⷭ҇а, и҆ мно́жество бы́сть ме́ртвыхъ гла́да ра́ди и҆ жа́жди водны́ѧ. ¹⁴ И҆ разширѝ а҆́дъ дꙋ́шꙋ свою̀ и҆ разве́рзе ᲂу҆ста̀ своѧ̑, є҆́же не преста́ти: и҆ сни́дꙋтъ сла́внїи и҆ вели́цыи и҆ бога́тїи и҆ гꙋби́телїе и҆́хъ и҆ веселѧ́йсѧ въ не́мъ: ¹⁵ и҆ смири́тсѧ человѣ́къ, и҆ ѡ҆безче́ститсѧ мꙋ́жъ, и҆ ѻ҆́чи высокоглѧ́дающїи смирѧ́тсѧ. ¹⁶ И҆ вознесе́тсѧ гдⷭ҇ь саваѡ́ѳъ въ сꙋдѣ̀, и҆ бг҃ъ ст҃ы́й просла́витсѧ въ пра́вдѣ:

Слово 6. О памяти смерти

ѳ҃. И҆спытꙋ́ютъ нѣ̑цыи и҆ недоꙋмѣва́ютъ, чесогѡ̀ ра́ди та́кѡ бл҃годѣ̑тельствꙋющей на́съ па́мѧти сме́рти, пред̾ꙋвѣ̑дѣнїе тоѧ̀ бг҃ъ ѿ на́съ ѹ҆таѝ: не вѣ̑дѧще, ꙗ҆́кѡ спасе́нїе на́ше бг҃ъ чрез̾ сїѐ содѣ̑ла чꙋ́днѣ: никто́же бо сме́рть свою̀ пред̾ꙋвѣ̑дѣвъ пре́жде мно́га вре́мене, ко кр҃ще́нїю, и҆лѝ къ мона́шескомꙋ жи́телствꙋ притека́лъ бы, но всѧ̑ дни̑ своѧ̑ въ беззако́нїихъ пребыва́лъ бы, и҆ на са́момъ то́мъ и҆схо́дѣ ко кр҃ще́нїю, и҆ къ покаѧ́нїю приходи́лъ бы. (Ѹ҆сво́йствовавсѧ же ѕло́бою про́чее, ѻ҆бы́чаѧ ра́ди и҆́же ѿ вре́мене, пребы́лъ бы всесоверше́ннѣ без̾ и҆справле́нїѧ.)

і҃. Никогда́же, пла́ча, да прїи́меши пса̀ ѻ҆́наго предлага́ющаго тебѣ̀, бг҃а чл҃вѣколюби́ва бы́ти: намѣ̑ренїе бо є҆мꙋ̀ є҆́сть, є҆́же пла́чь, и҆ стра́хъ ѻ҆́нъ безстра́шный ѿ тебѐ ѿри́нꙋти: ра́звѣ а҆́ще бы во глꙋбо́ко ѿча́ѧнїе ѹ҆ви́дѣлъ є҆сѝ себѐ низвлека́ема.

а҃і. И҆́же ѿ па́мѧти сме́рти и҆ сꙋда̀ бж҃їѧ въ себѣ̀ вы́нꙋ содержа́ти хотѧ́й, и҆ попече́нїємъ и҆ молва́мъ жите́йскимъ себѐ предаѧ́й, подо́бенъ є҆́сть пла́вающемꙋ, и҆ рꙋка́ма свои́ма плеска́ти хотѧ́щемꙋ.

в҃і. Па́мѧть сме́рти ꙗ҆́вственна, ѿсѣчѐ бра̑шна: бра́шнѡмъ же со смире́нїемъ ѿсѣчє́нымъ бы́вшымъ, соѿсѣко́шасѧ (и҆) стра̑сти.

г҃і. Безболѣ̑знїе се́рдца, ѡ҆слѣпи́ло є҆́сть ѹ҆́мъ: бра́шенъ же мно́жество, и҆зсꙋшѝ и҆сто́чники. Жа́жда и҆ бдѣ̑нїе, согнѣто́ша се́рдце: се́рдцꙋ же ѹ҆гнѣте́нꙋ бы́вшꙋ, и҆зскочи́ша во́ды. Жестѡ́ка ѹ҆́бѡ сꙋ́ть чревобѣ̑сникѡмъ: невѣ́рна же лѣни̑вымъ речє́ннаѧ: мꙋ́жъ же дѣ̑ѧтеленъ, и҆скꙋ́ситъ ѹ҆се́рднѡ. Ѡ҆брѣты́й и҆скꙋ́сомъ, ѡ҆склаби́тсѧ ѡ҆ си́хъ: є҆ще́ же и҆ща́й, печа́лншъ бꙋ́детъ.

д҃і. Ꙗ҆коже соверше́ннꙋю любо́вь ѻ҆ц҃ы̀ непа́дателнꙋ бы́ти ѹ҆ставлѧ́ютъ, та́кѡ (и҆) а҆́зъ соверше́нно чꙋ́вство сме́рти, без̾ стра́ха бы́ти со и҆зрече́нїемъ гл҃ю.

є҃і. Мнѡ́га ѹ҆́бѡ сꙋ́ть ѹ҆ма̀ дѣ̑ѧтелнагѡ дѣ́ланїѧ: гл҃ю же, помышле́нїе любвѐ, ꙗ҆́же ко бг҃ꙋ: па́мѧти сме́рти, па́мѧти бж҃їѧ, па́мѧти црⷭ҇тва, ре́вности ст҃ы́хъ мч҃єникъ, па́мѧти са́магѡ бг҃а тꙋ̀ сꙋ́ща, по ре́кшемꙋ, предзрѣ̑хъ гдⷭ҇а (предо мно́ю вы́нꙋ) (ѱал. є҃і, и҃). Па́мѧти ст҃ы́хъ ѹ҆́мныхъ си́лъ: па́мѧти и҆схо́да, срѣ̑тенїѧ, мꙋ́ки, и҆зрече́нїѧ: ѡ҆ вели́кихъ ѹ҆́бѡ нача́хомъ, непа́дателными же ѡ҆ко́нчихомъ.

На девятом часе:

ѕ҃і. Повѣ̑да мѝ нѣ̑когда нѣ̑кїй є҆гѵ́птѧнинъ и҆́нокъ, ꙗ҆́кѡ по въ чꙋ́вствѣ се́рдца па́мѧти сме́ртныѧ ѹ҆тверж-де́нїи, восхотѣ̑вшꙋ мѝ потре́бѣ приспѣ̑вшей, ма́лѡ бре́нїе сїѐ ѹ҆тѣ̑шити, ѿ па́мѧти сеѧ̀, ꙗ҆́кѡ ѿ сꙋдїѝ возбране́нъ бы́хъ: и҆ є҆́же чꙋ́дно є҆́сть: ꙗ҆́кѡ и҆ восхотѣ̑въ, не возмого́хъ (сїю̀) ѿри́нꙋти.

з҃і. И҆́нъ нѣ̑кїй живы́й здѣ̀ въ мѣ̑стѣ гл҃емѣмъ ѳѡ́лѣ, мно́жицею ѿ такова́гѡ помышле́нїѧ и҆зстꙋпа́ше, и҆ ꙗ҆́кѡ возмалодꙋ́шествовавъ, и҆лѝ и҆ вознеи́стовивсѧ, ѿ ѡ҆брѣта́ющихсѧ бра́тїй, ма́лѡ не без̾ дыха́нїѧ носи́мь быва́ше.

и҃і. Не ѹ҆молчꙋ̀ тѝ и҆ ѻ҆́нꙋ и҆сѵ́хїа хѡриві́та сказа́ти по́вѣсть: се́й при́снѡ во всѧ́цѣмъ нерадѣ̑нїи пребыва́ше, ѡ҆ дꙋшѝ свое́й ѿню́дъ не творѧ̀ попече́нїѧ: вознедꙋ́говавъ ѹ҆̀бо послѣ̑днѣ, и҆з̾ тѣ̑ла ꙗ҆́кѡ на ча́съ є҆ди́нъ ѻ҆па́снѣ и҆зы́де: и҆ въ себѐ возврати́всѧ, ѹ҆молѧ́етъ ѹ҆́бѡ на́съ всѣ̑хъ а҆́бїе ѿитѝ: и҆ две́рь ке́ллїи (своеѧ̀) зазда́въ, пребы́сть внꙋ́трь лѣ̑тъ двана́десѧть, ни съ ки́мже ѿню́дъ бесѣ̑довавъ, ни ма́ло, ни вели́ко сло́во: ни и҆но́гѡ чесогѡ̀, ра́звѣ то́чїю ѿ хлѣ̑ба и҆ воды̀ вкꙋша́ѧ: но то́чїю сѣдѧ̀, и҆ ѡ҆ тѣ̑хъ ꙗ҆̀же ви́дѣ во и҆зстꙋпле́нїи ѻ҆́нѣмъ ѹ҆жа́ссѧ сѣ̑тованенъ та́кѡ, ꙗ҆́кѡ пред̾ гдⷭ҇емъ, никогда́же нра́въ сво́й и҆змѣни́въ, но и҆зꙋмле́нъ при́снѡ, и҆ сле́зы тє́плы ти́хѡ вы́нꙋ пролива́ѧ. Є҆гда́ же и҆мѣ̑ѧше ѹ҆мира́ти, разгради́вше две́рь ѻ҆́нꙋ внидо́хомъ, и҆ мно́гѡ помоли́вше, сїѐ и҆ є҆ди́но ѿ негѡ̀ слы́шахомъ: прости́те: никто́же па́мѧть сме́рти ѹ҆вѣ̑дѣвъ, возмо́жетъ согрѣши́ти когда̀: мы́ же ѹ҆жаса́хомсѧ та́кѡ пре́жде неради́ва того̀ зрѧ́ще, та́кѡ внеза́пꙋ преѡбрази́вшасѧ бл҃же́ннымъ си́мъ и҆змѣне́нїемъ и҆ преѡбраже́нїемъ: погре́бше же того̀ прпⷣбнѣ во гробни́цѣ сꙋ́щей бли́зъ ѡ҆гра́ды: по (нѣ̑коемъ) днѝ взыска́вше ст҃ы́хъ є҆гѡ̀ моще́й, не ѡ҆брѣто́хомъ: гдⷭ҇ви и҆ въ се́мъ за попече́нное є҆гѡ̀ и҆ достохва́лное покаѧ́нїе, и҆звѣ̑стныхъ сотвори́вшꙋ всѣ̑хъ хотѧ́щихъ, и҆ по мно́зѣмъ нерадѣ̑нїи и҆спра́витисѧ.

ѳ҃і. Ꙗ҆коже бе́зднꙋ, безконе́чнꙋ нѣ̑цыи бы́ти ѡ҆предѣлѧ́ютъ: мѣ̑сто бо тꙋ̀ нарица́ютъ бы́ти бездо́нно: та́кѡ (и҆) помышле́нїе сме́рти, недости́жнꙋ и҆ чистотꙋ̀ и҆ дѣ̑ланїе и҆́мать: ѹ҆твержда́етъ же рече́нное, предрече́нный прпⷣбный. Стра́хомъ стра́хъ вы́нꙋ такові́и прїе́млюще не престаю́тъ, до́ндеже и҆ са́маѧ та̀ косте́й и҆ждиве́на бꙋ́детъ си́ла.

к҃. Да́ръ бж҃їй и҆ сїѐ со всѣ̑ми бл҃ги́ми бы́ти са́мѣхъ себѐ и҆звѣсти́мъ: поне́же ка́кѡ мно́жицею и҆ къ са̑мимъ гробѡ́мъ прише́дше безсле́зни нѣ̑цыи и҆ жесто́цы пребыва́емъ: кромѣ̑ же такова́гѡ видѣ̑нїѧ, мно́жайше ѹ҆милѧ́емсѧ.

к҃а. Ѹ҆мертви́выйсѧ ѿ всѣ̑хъ, се́й сме́рть помѧнꙋ́лъ є҆́сть: а҆ и҆́же є҆щѐ ѹ҆свои́теленъ є҆́сть, то̀ не и҆́мать ѹ҆праздни́тисѧ, са́мъ проти́вꙋ себѣ̀ навѣ̑тникъ сы́й.

к҃в. Не хощѝ всѣ̑хъ словесы̀ и҆звѣствова́ти за любо́вь твою̀ ꙗ҆́же къ ни́мъ: па́че же бг҃а просѝ тꙋ̀ тѣ́мъ неизрече́ннѡ ꙗ҆ви́ти: а҆́ще ли же нѝ, то̀ не и҆́мать довлѣ̑ти тебѣ̀ вре́мѧ сїѐ ко ѹ҆свое́нїємъ, и҆ ѹ҆миле́нїю.

к҃г. Не прелща́йсѧ безꙋ́мне дѣ̑лателю, вре́менемъ вре́мѧ наполнѧ́ѧ: не бо довлѣ̑етъ де́нь се́й, ни сво́й є҆гѡ̀ до́лгъ влⷣцѣ соверше́ннѣ ѹ҆плати́ти.

к҃д. Ѹ҆ человѣ́къ невозмо́жно є҆́сть, гл҃етъ, невозмо́жно є҆́сть настоѧ́щїй де́нь бл҃гоче́стнѣ преитѝ, а҆́ще не то́й послѣ̑днїй бы́ти всегѡ̀ житїѧ̀ (на́шегѡ) вознепщꙋ́емъ: и҆ чꙋ́до є҆́сть вои́стиннꙋ, ка́кѡ и҆ є҆́ллини таково̀ нѣ̑что провѣща́ша, поне́же и҆ любомꙋ́дрїе сїѐ бы́ти ѹ҆ставлѧ́ютъ, размышле́нїе сме́рти.

Шесто́е є҆́сть восхожде́нїе, возше́дый, никогда́же про́чее согрѣши́тъ. Помина́й послѣ́днѧѧ твоѧ̑, и҆ во вѣ̑къ не согрѣши́ши.