Если чтения отсутствуют - значит, по данному дню еще не были добавлены тексты.
На третьем часе:
СЛО́ВО Д҃I. Ѡ҆ всѣ́мъ любе́зномъ и҆ влады́цѣ лꙋка́вомъ чре́вѣ.
И҆мꙋ́ще ѡ҆ чре́вѣ гл҃ати, ꙗ҆́коже во всѣ̑хъ, ны́нѣ мно́жае на себѐ любомꙋ́дрствовати предложи́хомъ: чꙋждꙋ́сѧ бо, а҆́ще кто̀ во гро́бъ не всели́всѧ, бы́сть ѿ сегѡ̀ свобо́денъ.
в҃. Чревоѡб̾ѧде́нїе є҆́сть, чре́ва лицемѣ̑рїе: насыще́но бо сꙋ́що, а҆́лчбꙋ вопїе́тъ: и҆ насыще́но и҆ разсѣда́ющосѧ а҆лка́ти взыва́етъ.
г҃. Чревоѡб̾ѧде́нїе є҆́сть, заслажде́нїѧ содѣ̑тель, сла́достей и҆сто́чникъ: ѹ҆праздни́лъ є҆сѝ жи́лꙋ сїю̀, и҆ ѿинꙋ́дꙋ и҆зни́кнꙋла є҆́сть: и҆ сїю̀ загради́лъ є҆сѝ, и҆но́ю побѣди́лсѧ є҆сѝ.
д҃. Чревоѡб̾ѧде́нїе є҆́сть, ѻ҆́чїю пре́лесть: ѹ҆мѣ̑рєнна прїе́млющо, вкꙋ́пѣ же всѧ̑ пожира́ти є҆ди́ною под̾ꙋща́ющо.
є҃. Насыще́нїе бра́шенъ, є҆́сть блꙋда̀ ѻ҆те́цъ: ѹ҆тѣсне́нїе же чре́ва, є҆́сть чистоты̀ вино́вно.
ѕ҃. Льва̀ ѹ҆ласка́вый, мно́жицею ѹ҆кроти́лъ є҆́сть: тѣ̑ло же ѹ҆поко́ивый, наипа́че возсвирѣпи́лъ є҆́сть.
з҃. Ра́дꙋетсѧ жидови́нъ ѡ҆ сꙋббѡ́тѣ и҆ пра́здницѣ: и҆ мона́хъ чревоѡб̾ѧ́стливъ ѡ҆ сꙋббѡ́тѣ и҆ нд҃ѣ̑ли: пре́жде вре́мене па́схꙋ счита́етъ, и҆ пре́жде дне́й снѣ́ди ѹ҆готовлѧ́етъ. Счита́етъ чре́ва ра́бъ, кі́ими бра́шны пра́здновати и҆́мать: бж҃їй же ра́бъ, кі́ими дарова́нми ѡ҆богати́сѧ.
и҃. Стра́ннꙋ прише́дшꙋ, на любо́вь ве́сь ѿ чревоѡб̾ѧде́нїѧ подви́жетсѧ: и҆ ѹ҆тѣше́нїе бра́та, разрѣше́нїе своѐ непщꙋ́етъ бы́ти. Прише́ствїѧ ра́ди нѣ̑кихъ, на вїно̀ разрѣша́ти ѹ҆смотрѣ̑лъ є҆́сть: и҆ добродѣ̑тель мнѧ́сѧ сокрыва́ти, стра́сти ра́бъ бы́сть.
ѳ҃. Враждꙋ́етъ мно́жицею тщесла́вїе на чревоѡб̾ѧде́нїе, и҆ ꙗ҆́кѡ ѡ҆ кꙋ́пленнѣ рабѣ̀ ѡ҆каѧ́ннѣмъ мона́сѣ сварѧ́тсѧ: ѻ҆́но ѹ҆́бѡ разрѣша́ти понꙋжда́етъ: сїе́ же, добродѣ̑тель свою̀ ѡ҆б̾ѧвлѧ́ти под̾ꙋща́етъ: премꙋ́дръ мона́хъ ѻ҆бою̀ и҆збѣжи́тъ, во своѐ вре́мѧ дрꙋги́мъ дрꙋго́е ѿрѣва́ѧ.
і҃. Пло́ти ѹ҆́бѡ крѣ̑пкой сꙋ́щей во всѧ́комъ вре́мени и҆ мѣ̑стѣ тꙋ̀ да ѹ҆мꙋ́чимъ: тѣ̑й же ти́хой сꙋ́щей, ѡ҆ не́мже пре́жде гро́ба не ѹ҆вѣрѧ́юсѧ, дѣ̑ланїе своѐ сокры́имъ.
а҃і. Ви́дѣхъ ста́рыхъ сщ҃є́нникъ ѿ бѣсѡ́въ рꙋга́емыхъ, и҆ не повинꙋ́ющыѧсѧ тѣ́мъ ю҆́ныѧ на пи́рѣхъ, на вїно̀ и҆ прѡ́чаѧ съ бл҃гослове́нїемъ разрѣша́ющихъ. А҆́ще ѹ҆́бѡ ѡ҆ гдⷭ҇ѣ свидѣ̑телствовани сꙋ́ть, то̀ ѹ҆мѣ̑реннѡ разрѣши́мъ: а҆́ще ли же неради́ви сꙋ́ть, то̀ ничто́же ѡ҆ свое́мъ и҆́хъ благослове́нїи попецы́мсѧ: и҆ па́че же а҆́ще со ѻ҆гне́мъ ра́тꙋющесѧ є҆смы̀.
в҃і. Возмнѣ̑сѧ бг҃оѿри́нꙋтый є҆ѵа́грїй премꙋ́дрыхъ премꙋ́дршъ и҆ произноше́нїемъ и҆ разꙋмѣ́нїи бы́ти: но прелсти́лсѧ є҆́сть ѻ҆каѧ́нный, безꙋ́мныхъ ꙗ҆́влсѧ безꙋ́мншъ: во мно́гихъ ѹ҆́бѡ, ѻ҆ба́че и҆ въ се́мъ: глаго́летъ бо, внегда̀ разли́чныхъ бра́шенъ жела́етъ дꙋша̀ на́ша, хлѣ̑бомъ ѹ҆тѣснѧ́ема да быва́етъ и҆ водо́ю, подо́бно же нѣ̑что повелѣ̑лъ є҆́сть ре́кшемꙋ ко ѻ҆́трокꙋ є҆ди́нѣмъ стꙋпе́немъ на всю̀ взы́ти лѣ̑ствицꙋ. Ѿвраща́юще ѹ҆̀бо се́й є҆гѡ̀ предѣ̑лъ, мы̀ возгл҃емъ: внегда̀ разли́чныхъ бра́шенъ жела́етъ дꙋша̀ на́ша, є҆стества̀ сво́йственно (нѣ̑что) взыскꙋ́етъ: тѣ̑мже ѹ҆хищре́нїѧ проти́вꙋ всехи́тромꙋ (чре́вꙋ) семꙋ̀ ѹ҆потреби́мъ: (и҆) а҆́ще не тѧжча́йша настои́тъ бра́нь, и҆лѝ паде́нїѧ ѡ҆бвинє́нїѧ, то̀ ѿсѣцы́мъ пе́рвѣе, ѹ҆тꙋчнѧ̑ющаѧ: та́же, разжиза̑ющаѧ: пото́мъ (и҆) ѹ҆слажда̑ющаѧ: (и҆) а҆́ще мо́щно є҆́сть, дава́й чре́вꙋ твоемꙋ̀ пи́щꙋ наполнѧ́ющꙋ и҆ ѹ҆добоизварѧ́емꙋ: да насыще́нїемъ ѹ҆́бѡ, ненасы́тный є҆гѡ̀ нра́въ ѿста́вимъ: ско́рымъ же и҆здыха́нїемъ, ѿ раждиза́нїѧ, ꙗ҆́кѡ ѿ бича̀ и҆зба́вимсѧ. Присмотри́мсѧ, и҆ мнѡ́жайшаѧ и҆з̾ надꙋва́ющихъ, и҆ подви̑жꙋща ѡ҆брѧ́щемъ.
г҃і. Смѣ̑йсѧ съ бѣ̑са, по ве́чери прелага́телна (времена̀) твори́ти тѧ̀ под̾ꙋща́ющагѡ: девѧ́томꙋ бо въ слѣ̑дꙋющїй приспѣ̑вшꙋ, ѿве́ржесѧ завѣща́нїѧ, предва́ршагѡ днѐ.
д҃і. И҆́но є҆́сть непови̑ннымъ, и҆ и҆́но пови̑ннымъ прили́чествꙋющее воздержа́нїе: занѐ ті́и ѹ҆́бѡ тѣ̑ла сегѡ̀ движе́нїе, въ зна́менїе и҆́мꙋтъ: сі́и же, да́же до сме́рти и҆ кончи́ны къ немꙋ̀ без̾ ѹ҆тѣше́нїѧ и҆ без̾ примире́нїѧ зало́гъ и҆́мꙋтъ: (и҆) пе́рвшїи ѹ҆́бѡ, срастворе́нїе ѹ҆ма̀ при́снѡ храни́ти хотѧ́тъ: вторі́и же, дꙋше́внымъ сѣ̑тованїемъ и҆ и҆ста́ѧнїемъ, бг҃а ѹ҆милостивлѧ́ютъ.
є҃і. Вре́мѧ весе́лїѧ и҆ ѹ҆тѣше́нїѧ, соверше́нномꙋ ѹ҆́бѡ, безпопече́нїе є҆́сть ѿ всѣ̑хъ: подви́жникꙋ же, вре́мѧ є҆́сть борбы̀: встра́стномꙋ же, пра́здникъ пра́здникѡвъ, и҆ торжество̀ є҆́сть торже́ствъ.
ѕ҃і. Сѡ́нїѧ пи́щей и҆ бра́шенъ, въ се́рдцѣ чревоѡб̾ѧ́стливыхъ: сѡ́нїѧ же мꙋ́къ и҆ сꙋда̀, сꙋ́ть въ се́рдцѣ пла́чꙋщихъ.
з҃і. Ѡ҆блада́й чре́вомъ, пре́жде не́же то̀ тебѐ поѡблада́етъ: и҆ тогда̀ и҆́маши со сра́момъ воздержава́тисѧ: вѣ̑дѧтъ рече́нное, въ неизглаго́ланный впа́дшїи ро́въ: скопцы́ же мꙋ́жїе, неискꙋ́сни сꙋ́ть сегѡ̀.
и҃і. Чре́во ѹ҆держи́мъ помышле́нїемъ ѻ҆гнѧ̀: семꙋ́ бо повинꙋ́вшесѧ нѣ̑цыи, наконе́цъ ѹ҆́ды своѧ̑ ѿрѣ̑заша: и҆ сꙋгꙋ́бою ѹ҆мро́ша сме́ртїю. Взы́щимъ, и҆ всѧ́кѡ ѡ҆брѧ́щемъ ꙗ҆̀же въ на́съ и҆стоплє́нїѧ то̀ є҆ди́но дѣ̑лающо.
На шестом часе:
ѳ҃і. Ѹ҆́мъ по́стника мо́литсѧ тре́звеннѣ: невозде́ржника же, мечта́нїй нечи́стыхъ и҆спо́лненъ є҆́сть. Чре́ва насыще́нїе, и҆зсꙋшѝ и҆сто́чники: то́ же и҆зсꙋши́вшосѧ, породи́ло є҆́сть во́ды.
к҃. И҆́же своѐ ѹ҆покоева́ѧй чре́во, и҆ дꙋ́ха блꙋда̀ побѣди́ти хотѧ́й, подо́бенъ є҆́сть съ є҆ле́емъ ѹ҆гаша́ющемꙋ пожа́ръ.
к҃а. Ѹ҆тѣснѧ́емꙋ чре́вꙋ, смирѧ́етсѧ се́рдце: ѹ҆покоѧва́емꙋ же томꙋ̀, возноша́етсѧ по́мыслъ.
к҃в. И҆спытꙋ́й себѐ ѡ҆ пе́рвомъ часѣ̀ днѐ, и҆ ѡ҆ сре́днемъ, и҆ ѡ҆ послѣ̑днемъ пре́жде ꙗ҆де́нїѧ: и҆ ѹ҆разꙋмѣ̑еши ѿ сегѡ̀ по́льзꙋ поста̀. Взыграва́етсѧ и҆з̾ ѹ҆́тра и҆ скита́етсѧ по́мыслъ: шесто́мꙋ приспѣ̑вшꙋ, ма́лѡ послабѣ̀: за́падꙋ же со́лнца, вконе́цъ смири́сѧ.
к҃г. Ѹ҆тѣснѧ́й чре́во, и҆ всѧ́кѡ затвори́ши ѹ҆ста̀: ѹ҆крѣплѧ́етсѧ бо ѧ҆зы́къ мно́жествомъ снѣ̑дей. Подвиза́ѧсѧ подвиза́йсѧ проти́вꙋ томꙋ̀, и҆ трезвѧ́сѧ трезви́сѧ ѡ҆ то́мъ: а҆́ще бо ма́лѡ потрꙋди́шисѧ, а҆́бїе и҆ гдⷭ҇ь помо́жетъ.
к҃д. Ѹ҆мѧгчава́еми мѣ̑си, придаю́тъ ко вмѣще́нїю: презира́еми, не толи́кѡ прїе́млютъ. Понꙋжда́ѧй чре́во своѐ, разшири́лъ є҆́сть кишки̑: подвиза́ѧйсѧ же проти́вꙋ томꙋ̀, стѧгнꙋ́лъ є҆́сть ты́ѧ: си̑мъ же стѧгнꙋ̑тымъ бы́вшымъ, не мно́гѡ прїи́мꙋтъ: и҆ тогда̀ про́чее бꙋ́демъ є҆сте́ственнѣ постѧ́щесѧ.
к҃є. Жа́жда жа́ждꙋ мно́жицею ѹ҆толи́ла є҆́сть: а҆́лчбою же а҆́лчбꙋ ѿсѣщѝ, лю́то є҆́сть и҆ невозмо́жно. Внегда̀ побѣди́тъ тебѐ, трꙋды̀ ѹ҆толѧ́й то̀: а҆́ще ли же и҆ невозмо́жно є҆́сть сїѐ не́мощи ра́ди, то̀ бдѣ̑нїемъ бори́сѧ съ ни́мъ. Ѻ҆чи́ма ѡ҆тѧгчава́ющимасѧ, и҆ми́сѧ за рꙋкодѣ̑лїе: снꙋ́ же не сꙋ́щꙋ, да не ко́снешисѧ за то̀: невозмо́жно бо є҆́сть бг҃ꙋ и҆ мамѡ́нѣ, то̀ є҆́сть бг҃ꙋ и҆ рꙋкодѣ̑лїю предста́вити ѹ҆́мъ.
к҃ѕ. Вѣ̑ждь, ꙗ҆́кѡ мно́жицею бѣ̑съ стома́хꙋ присѣди́тъ, и҆ не насыща́тисѧ человѣ̑кꙋ сотворѧ́етъ, а҆́ще бы и҆ ве́сь є҆гѵ́петъ снѣ̑лъ, и҆ ні́лъ рѣкꙋ̀ и҆спи́лъ.
к҃з. По пи́щи ѿхо́дитъ непреподо́бный се́й: и҆ (дꙋ́ха) блꙋда̀ на ны̀ посыла́етъ, возвѣсти́въ є҆мꙋ̀ бы́вшее: пойдѝ глаго́лѧ, возмꙋтѝ того̀: чре́вꙋ бо насыще́нꙋ, (не мно́гѡ) трꙋди́тисѧ и҆́маши. Прише́дъ ѡ҆скла́бисѧ, и҆ сно́мъ свѧза́въ рꙋ́ки на́шѧ и҆ но́ги, всѧ̑ про́чее є҆ли̑ка восхотѣ̑лъ є҆́сть, сотворѝ: дꙋ́шꙋ (и҆) тѣ̑ло скве́рнами и҆ мечта́нми и҆ и҆стече́нми ѡ҆скверни́въ.
к҃и. Чꙋ́до є҆́сть ѹ҆ви́дѣти ѹ҆́мъ безтѣле́сенъ ѿ тѣ̑ла ѡ҆сквернѧ́емь и҆ ѡ҆мрача́емь: и҆ напроти́въ, бре́нїемъ невеще́ственное ѡ҆чища́емо и҆ ѡ҆тончава́емо.
к҃ѳ. А҆́ще ѹ҆́зкимъ и҆ тѣ̑снымъ пꙋте́мъ ходи́ти хрⷭ҇то́ви ѡ҆бѣща́лсѧ є҆сѝ, то̀ ѹ҆тѣснѝ ѹ҆тро́бꙋ (твою̀): тѣ̑й бо ѹ҆покоева́емѣй и҆ разширѧ́емѣй, ѡ҆бѣ̑ты сїѧ̑ ѿве́рглъ є҆сѝ. Присмотри́сѧ, и҆ ѹ҆слы́шиши гл҃ющаго: простра́ненъ и҆ широ́къ пꙋ́ть чре́ва, в̾водѧ́й въ па́гꙋбꙋ блꙋда̀, и҆ мно́зи сꙋ́ть входѧ́щїи и҆́мъ. Что̀ ѹ҆́зкаѧ врата̀ и҆ тѣ̑сенъ пꙋ́ть поста̀, вводѧ́й въ живо́тъ чистоты̀ и҆ ма́ли сꙋ́ть входѧ́щїи и҆́мъ.
л҃. Нача́лникъ бѣсѡ́въ є҆́сть, пады́й денни́ца: и҆ нача́лникъ страсте́й є҆́сть, ѡ҆б̾ѧде́нїе чре́ва.
л҃а. На трапе́зѣ снѣ̑дей возлега́ѧ, па́мѧть сме́рти и҆ сꙋда̀ на средꙋ̀ приводѝ: є҆два́ бо понѐ та́кѡ ма́лѡ стра́сть (сїю̀) возбрани́ши. Питїѐ пїѧ̀, ѻ҆́цетъ и҆ же́лчь влⷣки твоегѡ̀ да не преста́неши помина́ѧ: и҆ всѧ́кѡ, и҆лѝ возде́ржишисѧ, и҆лѝ возстене́ши, и҆лѝ и҆ смире́нше сотвори́ши мꙋдрова́нїе.
л҃в. Не прелща́йсѧ, не свободи́шисѧ ѿ фараѡ́на сегѡ̀, нижѐ па́схꙋ вы́шнюю ѹ҆́зриши, а҆́ще го́ркагѡ ѕе́лїѧ и҆ ѻ҆прѣснѡ́къ не и҆́маши ꙗ҆́сти вы́нꙋ. Го́ркое ѕе́лїе, є҆́сть нꙋ́жда по́стнаѧ и҆ трꙋ́дъ: ѻ҆прѣсно́ки же, мꙋдрова́нїе не напыщава́емое. Съ дыха́нїемъ твои́мъ да сприлпне́тъ сло́во гл҃ющагѡ: а҆́зъ же внегда̀ бѣ̑сове стꙋжа́хꙋ мѝ, ѡ҆блача́хсѧ во вре́тище, и҆ смирѧ́хъ посто́мъ дꙋ́шꙋ мою̀, и҆ мл҃и́тва моѧ̀ въ нѣ̑дро дꙋшѝ моеѧ̀ прилпѐ.
л҃г. По́стъ є҆́сть наси́лїе є҆стества̀, и҆ ѡ҆брѣ̑занїе сла́дости горта́нныѧ, раждиза́нїѧ ѿсѣче́нїе, лꙋка́выхъ помышле́нїй и҆зсѣче́нїе, приснѣ̑дїй свобо́да, мл҃и́твы чистота̀, дꙋшѝ свѣти́ло, ѹ҆ма̀ хране́нїе: ѡ҆жесточе́нїѧ разоре́нїе, ѹ҆миле́нїѧ две́рь, воздыха́нїе смире́нно, сокрꙋше́нїе ра́достно, многосло́вїѧ недѣ̑йство, безмо́лвїѧ вина̀, послꙋша́нїѧ храни́тель, сна̀ ѡ҆блегче́нїе, здра́вїе тѣ̑ла, безстра́стїѧ вино́венъ, грѣхѡ́въ ѿпꙋще́нїе: раѧ̀ две́рь и҆ наслажде́нїе.
л҃д. И҆стѧжи́мъ и҆ сего̀ па́че же пре́жде всѣ̑хъ, сего̀ предстоѧ́телѧ ѕлы́хъ на́шихъ сꙋпѡста́тъ, две́рь страсте́й, паде́нїе а҆да́мово: и҆са́вовꙋ поги́бель: і҆сра̑илтѧнъ гꙋби́телство: нѡ́ево без̾ѻбразновидѣ̑нїе: гомѡ́ррѧнъ преда́телѧ: лѡ́тово порече́нїе: сынѡ́въ и҆лі́а сщ҃е́нника и҆стребле́нїе: сквє́рнъ рꙋковожда̀. Ѿкꙋ́дꙋ же ражда́етсѧ; и҆ ка̑ѧ сꙋ́ть сегѡ̀ (чревоѡб̾ѧде́нїѧ) и҆сча̑дїѧ; кто́ же є҆́сть сокрꙋша́ѧй то̀; и҆ кто̀ є҆́сть погꙋблѧ́ѧй то̀ вконе́цъ;
л҃є. Глаго́ли на́мъ, ѽ всѣ̑хъ человѣ́къ мꙋчи́телю: всѣ̑хъ кꙋпи́вшее зла́томъ ненасы́тства ѿкꙋ́до вхо́дъ въ на́съ стѧжа́ло є҆сѝ; и҆ что̀ по вхо́дѣ се́мъ ражда́ти ѡ҆бы́кло є҆сѝ; и҆ кі́й є҆́сть тво́й ѿ на́съ и҆схо́дъ;
л҃ѕ. Ѻ҆но́ же ѡ҆ доса́дахъ си́хъ поболѣ̑вшо, къ на́мъ мꙋчи́телнѣ неи́стовѧщеесѧ и҆ свирѣ̑пое ѿвѣща̀: почто̀ мѧ̀ досаждє́нїи бїе́те, пови̑нницы мнѣ̀ сꙋ́ще; ка́кѡ же ѿ менѐ разлꙋчи́тисѧ тщите́сѧ; а҆ а҆́зъ съ є҆стество́мъ свѧ́зано є҆́смь: моѧ̀ две́рь є҆́сть, є҆стество̀ бра́шенъ: моегѡ́ же ненасы́тства, ѻ҆бы́чай є҆́сть вино́венъ: моеѧ́ же стра́сти вина̀ є҆́сть, ѻ҆бы́чай предвари́вшъ, и҆ непоболѣ̑нїе дꙋшѝ, и҆ непомина́нїе сме́рти. Ка́кѡ же и҆мена̀ мои́хъ и҆сча́дїй и҆́щете ѹ҆разꙋмѣ̑ти; и҆зочтꙋ̀ ѧ҆̀, и҆ па́че песка̀ ѹ҆мно́жатсѧ: ѻ҆ба́че пе́рвенцєвъ мои́хъ и҆ возлю́бленныхъ ѹ҆слы́шите, кі́и нарица́ютсѧ: сы́нъ перворо́денъ мо́й є҆́сть, блꙋда̀ послꙋгова́тель: по ѻ҆́номъ же вторы́й, жесто́чество се́рдца: тре́тїй є҆́сть, со́нъ: мо́ре пѡ́мыслъ, вѡ́лны сквє́рнъ, глꙋбина̀ невѣ̑домыхъ и҆ неизрече́нныхъ нечисто́тъ, ѿ менѐ и҆схо́дѧтъ.
Дщє́ри моѧ̑ сꙋ́ть, лѣ̑ность, многосло́вїе, дерзнове́нїе, смѣхотво́рство, кощꙋ́нство, прекосло́вїе, жестоковы́йность, непослꙋша́нїе, нечꙋ́вство, плѣне́нїе, велехвале́нїе, де́рзость, мїролю́бїе, є҆́же прее́мствꙋетъ моли́тва скве́рна, и҆ парє́нїѧ пѡ́мыслъ, мно́жицею же и҆ ѕлоключє́нїѧ ненадє́ждна и҆ неча̑ѧнна, къ ни́мже присочета́сѧ безнаде́ждїе, є҆́же є҆́сть всѣ̑хъ лю́тшее. Менѐ ра́тꙋетъ ѹ҆́бѡ, но не побѣжда́етъ, па́мѧть согрѣше́нїй: враждꙋ́етъ на мѧ̀ всѧ́чески помышле́нїе сме́рти. Ѹ҆празднѧ́ющее же менѐ соверше́ннѣ въ человѣ̑цѣхъ ничто́же є҆́сть. Стѧжа́вый ѹ҆тѣ̑шителѧ, томꙋ̀ мо́литсѧ на мѧ̀: и҆ ѻ҆́нъ ѹ҆моле́нъ бы́въ, встра́ственнѣ не ѡ҆ставлѧ́етъ мѧ̀ дѣ̑йствовати: невкꙋ́снїи бо ѻ҆́нагѡ, сла́достїю мое́ю всѧ́кѡ ѹ҆слажда́тисѧ и҆́щꙋтъ.
Мꙋ́жество є҆́сть побѣ̑да. возмогі́й, ꙗ҆́вственъ є҆́сть къ безстра́стїю и҆ цѣломꙋ́дрїю кра́йнѣйшемꙋ спѣша́сѧ.
На девятом часе:
Предисло́вїе є҆́же ѡ҆ тѣлесѣ̑хъ, и҆ безтѣле́сныхъ человѣ̑цѣхъ сло́ва.
Слы́шахомъ неи́стово чревоѡб̾ѧде́нїе ны́нѣ ре́кшо тогѡ̀ бы́ти и҆сча́дїе ю҆́же къ тѣлесє́мъ бра́нь, и҆ не чꙋ́до: ѹ҆чи́тъ бо ѡ҆ се́мъ и҆ дре́внїй на́шъ ѻ҆́нъ пра́ѻтецъ а҆да́мъ: занѐ а҆́ще бы чре́вомъ побѣжде́нъ не бы́лъ, то̀ не бы̀ сꙋпрꙋ́жницꙋ что̀ бѣ̀ познава́лъ. Тѣ̑мже пе́рвꙋю за́повѣдь блюдꙋ́щїи, вторы́мъ престꙋпле́нїемъ не па́даютъ: но пребыва́ютъ сы́ни а҆да́мови, не зна́юще что̀ бѣ̀ а҆да́мъ: но ма́лымъ чи́мъ ѹ҆ма́лени ѿ а҆́гг҃лъ: и҆ сїѐ, да не безсме́ртно пребꙋ́детъ ѕло́е, ꙗ҆́коже гл҃етъ бг҃осло́вїѧ тезоимени́тый.
СЛО́ВО Е҃I. Ѡ҆ нетлѣ̑ннѣй въ тлѣ̑нныхъ ѿ трꙋдѡ́въ и҆ по́тѡвъ чистотѣ̀ и҆ цѣломꙋ́дрїи.
Чистота̀ є҆́сть, безтѣле́сна є҆стества̀ ѹ҆свое́нїе. Чистота̀ є҆́сть, до́мъ хрⷭ҇то́въ вожделѣ̑ненъ, и҆ нб҃о се́рдца назе́мно.
в҃. Чистота̀ є҆́сть, є҆стества̀ па́че є҆стества̀ преесте́ственно ѿрече́нїе: и҆ съ безтѣле́сными тѣ̑ла ме́ртвенна и҆ тлѣ̑нна пресла́вно вои́стиннꙋ ретѣ̑нїе.
г҃. Чи́стъ є҆́сть, и҆́же раче́нїемъ раче́нїе ѿрази́вый, и҆ ѻ҆́гнь ѻ҆гне́мъ невеще́ственнымъ ѹ҆гаси́вый.
д҃. Цѣломꙋ́дрїе є҆́сть, собо́рное всѣ̑хъ добродѣ̑телей наименова́нїе.
є҃. Цѣломꙋ́дрїе є҆́сть, чистота̀ дꙋши́ же и҆ тѣ̑ла.
ѕ҃. Цѣломꙋ́дръ є҆́сть, и҆́же (и҆) въ са́михъ тѣ̑хъ снѣ̑хъ, ниеди́нагѡ движе́нїѧ ѿ сꙋ́щагѡ въ себѣ̀ ѹ҆строе́нїѧ ѡ҆щꙋща́ѧй.
з҃. Цѣломꙋ́дръ є҆́сть, и҆́же соверше́нно нечꙋ́вствїе ѡ҆ разли́чїи тѣле́съ вы́нꙋ стѧжа́вый.
и҃. Сїѐ пра́вило и҆ предѣ̑лъ є҆́сть соверше́нныѧ и҆ всечи́стыѧ чистоты̀: є҆́же та́кожде ѡ҆ ѡ҆дꙋшевле́нныхъ же и҆ бездꙋ́шныхъ, слове́сныхъ же и҆ безслове́сныхъ зало́гъ и҆мѣ̑ти.
ѳ҃. Никто́же и҆з̾ чистотѣ̀ ѡ҆бꙋчи́вшихсѧ, себѣ̀ стѧжа́нїе тоѧ̀ да вмѣни́тъ: є҆стество́ бо сїѐ побѣди́ти, не ѿ возмо́жныхъ бы́ти є҆́сть: и҆дѣ̑же є҆стества̀ побѣжде́нїе бы́сть, та́мѡ превышеесте́ственнагѡ прише́ствїе позна́сѧ: без̾ всѧ́кагѡ бо прекосло́вїѧ ме́ншее ѿ бо́лшагѡ ѹ҆празднѧ́етсѧ.
і҃. Нача́ло ѹ҆́бѡ чистоты̀, несослага́ющсѧ по́мыслъ, и҆ безмечта̑нна вре́менми и҆стица̑нїѧ. Среда̀ чистоты̀, є҆сте́ствєнна движє́нїѧ мно́жества ра́ди бра́шенъ то́чїю, безмечта́ннѣ составлѧ́єма, и҆ ѿ и҆стица́нїѧ свобѡ́дна. Коне́цъ же, ѹ҆мерщвле́нїе тѣ̑ла, пред̾ꙋме́ршымъ помыслѡ́мъ.
а҃і. Бл҃же́нъ вои́стиннꙋ є҆́сть, и҆́же ѡ҆ всѧ́комъ тѣ̑лѣ, и҆ ша́рѣ, и҆ красотѣ̀, соверше́нно нечꙋ́вствїе стѧжа́лъ є҆́сть.
в҃і. Не и҆́же бре́нїе сїѐ нескве́рно сохрани́вый, то́й чи́стъ є҆́сть: но и҆́же ѹ҆́ды сегѡ̀ дꙋшѝ повинꙋ́вый соверше́ннѣ.
г҃і. Вели́къ ѹ҆́бѡ є҆́сть, и҆́же ѡ҆ ѡ҆сѧза́нїи пребыва́ѧй безстра́стенъ, бо́лїй же є҆́сть и҆́же ѿ видѣ̑нїѧ пребы́вый неꙋѧзвлѧ́емь, и҆ побѣди́вый видѣ̑нїе ѻ҆́гненно, добро́тою вы́шнихъ. И҆́же ѹ҆́бѡ мл҃и́твою пса̀ сего̀ ѿрѣва́ѧй, приꙋподо́билсѧ є҆́сть ра́тꙋющемꙋсѧ со льво́мъ: а҆ и҆́же сопротиворе́чїемъ сего̀ низвраща́ѧй, то̀ гонѧ́щемꙋ є҆щѐ врага̀ своего̀: а҆ и҆́же прило́гъ є҆гѡ̀ ѿню́дъ ѹ҆ничижи́вый, то̀ а҆́ще и҆ во пло́ти є҆́сть, но ѹ҆́бѡ и҆з̾ гро́ба воскре́се.
А҆́ще сїѐ и҆́стинны чистоты̀ зна́менїе є҆́сть, є҆́же без̾ движе́нїѧ бы́ти въ сꙋ́щихъ во снѣ̀ мечта́нїихъ: то̀ сїѐ всѧ́кѡ предѣ̑лъ є҆́сть блꙋда̀, є҆́же и҆стица̑нїѧ терпѣ̑ти бо́дрствꙋющꙋ помышлє́нїи.
д҃і. И҆́же ѹ҆́бѡ по́ты и҆ трꙋды̀ бра́нь творѧ́й съ сопе́рникомъ си́мъ, свѧза́вшемꙋ ѹ҆́жемъ врага̀ своего̀ подо́бенъ є҆́сть. А҆ и҆́же воздержа́нїемъ и҆ бдѣ̑нїемъ, то̀ ѹ҆́зами желѣ̑зными сего̀ ѡ҆бложи́вшемꙋ. А҆ и҆́же смиренномꙋ́дрїемъ и҆ безгнѣ̑вїемъ и҆ жа́ждою, то̀ ѹ҆би́вшемꙋ сꙋпоста́та, и҆ въ песцѣ̀ скры́вшемꙋ: песо́къ разꙋмѣ̑ти и҆́маши смире́нїе, не пита́етъ бо страсте́й па́жить, но є҆́сть землѧ̀ и҆ пе́пелъ.
є҃і. И҆́нъ є҆́сть и҆́же по́двигами, и҆ и҆́нъ, и҆́же смире́нїемъ: и҆ и҆́нъ и҆́же бж҃їимъ ѿкрове́нїемъ мꙋчи́телѧ сего̀ свѧ́зана и҆мѣ̑ѧй. (И҆) ѻ҆́въ ѹ҆́бѡ, денни́цѣ: ѻ҆́въ же, вели́цѣй лꙋнѣ̀: ѻ҆́въ же, свѣ̑тломꙋ со́лнцꙋ приꙋподо́бишасѧ: всѝ трѝ, на нб҃сѣ̑хъ жи́телство и҆́мꙋтъ: ѿ зарѝ ѹ҆́бѡ, свѣ̑тъ: ѿ свѣ̑та же, возсїѧ̀ со́лнце: ꙗ҆́коже и҆ ѡ҆ рече́нныхъ мо́щно є҆́сть ѹ҆разꙋмѣ̑ти и҆ ѡ҆брѣстѝ.
ѕ҃і. Притворѧ́етъ ѹ҆́бѡ ли́съ, со́нъ, бѣ̑съ же цѣломꙋ́дрїе: но ѻ҆́нъ ѹ҆́бѡ, да ко́кошъ прелсти́тъ: се́й же, да дꙋ́шꙋ погꙋби́тъ.
з҃і. Да не и҆́меши вѣ̑ры бре́нїю семꙋ̀ въ животѣ̀ твое́мъ: и҆ да не ѹ҆пова́еши на нѐ до́ндеже хрⷭ҇та̀ ѹ҆срѧ́щеши.
и҃і. Не дерза́й воздержа́нїѧ ра́ди не па́даѧ: ничто́же бо ꙗ҆ды́й нѣ̑кто съ нб҃сѐ све́рженъ бы́сть.