Если чтения отсутствуют - значит, по данному дню еще не были добавлены тексты.
На третьем часе:
СЛО́ВО И҃I. Ѡ҆ нечꙋ́вствѣ, си́рѣчь ѹ҆мерщвле́нїи дꙋшѝ, и҆ сме́рти ѹ҆ма̀, пре́жде сме́рти тѣ̑ла.
Нечꙋ́вство и҆ на тѣлесѣ̑хъ и҆ на дꙋ́сѣхъ є҆́сть, ѹ҆мерщвле́но чꙋ́вство: ѿ многовре́менна недꙋ́га и҆ нерадѣ̑нїѧ въ нечꙋ́вство ѡ҆конча́вшеесѧ.
в҃. Безболѣ̑знїе є҆́сть ѹ҆ка́чествовано нерадѣ̑нїе, ѹ҆терпа́юща мы́сль: предпрїѧ́тїѧ поро́дъ, ѹ҆се́рдїю сѣ̑ть, мꙋ́жествꙋ сило̀: ѹ҆миле́нїѧ невѣ̑дѣнїе: ѿча́ѧнїѧ две́рь, забве́нїѧ ма́ти, и҆ по рождествѣ̀ (то̀) ма́тере своеѧ̀ быва́етъ ма́ти, ѿраже́нїе стра́ха.
г҃. Безпоболѣ̑нъ є҆́сть, безꙋ́менъ любомꙋдре́цъ: самоѡсꙋжде́нъ сказа́тель: самосопроти́венъ любосло́вецъ: слѣ̑пъ ѹ҆чи́тель сегѡ̀ є҆́же ви́дѣти: ѡ҆ здра́вїи ꙗ҆́звы бесѣ̑дꙋетъ, и҆ тꙋ̀ чеша̀ не престае́тъ: проти́вꙋ стра́сти вѣща́етъ, а҆ вредѧ̑щаѧ ꙗ҆ды́й не престае́тъ: на ню̀ мо́литсѧ, и҆ а҆́бїе на дѣ̑ланїе тоѧ̀ и҆́детъ: ѡ҆ дѣ̑ланїи тоѧ̀ на себѐ гнѣ̑ваетсѧ: и҆ свои́хъ слове́съ не срамлѧ́етсѧ ѡ҆каѧ́нный: ѕлѣ̀ творю̀, вопїе́тъ, и҆ ѹ҆се́рднѡ прилѣжи́тъ: ѹ҆сты̀ на ню̀ мо́литсѧ, а҆ тѣ̑ломъ ѡ҆ не́й подвиза́етсѧ: ѡ҆ сме́рти любомꙋ́дрствꙋетъ, а҆ ꙗ҆́кѡ безсме́ртенъ пребыва́етъ: ѡ҆ разлꙋче́нїи воздыха́етъ, а҆ ꙗ҆́кѡ вѣ̑ченъ дре́млетъ: ѡ҆ воздержа́нїи бесѣ̑дꙋетъ, а҆ ѡ҆ чревоѡб̾ѧде́нїи подвиза́етсѧ: ѡ҆ сꙋдѣ̀ чте́тъ, и҆ ѡ҆склаблѧ́тисѧ начина́етъ: ѡ҆ тщесла́вїи чте́тъ, и҆ ѡ҆ са́момъ то́мъ чте́нїи тщесла́витсѧ: ѡ҆ бдѣ̑нїи провѣщава́етъ, и҆ сно́мъ а҆́бїе себѐ погрꙋжа́етъ: мл҃и́твꙋ похвалѧ́етъ, и҆ ꙗ҆́кѡ ѿ би́ча ѿ тоѧ̀ бѣ̑гаетъ: послꙋша́нїе бл҃жи́тъ, и҆ пе́рвый то́й преслꙋ́шаетъ: безпристра́стныхъ похвалѧ́етъ, и҆ рꙋ́бища ра́ди ѕлопо́мнѧ и҆ ра́тꙋѧсѧ не срамлѧ́етсѧ: гнѣ̑ваѧсѧ ѡ҆горчава́етсѧ, и҆ за ѡ҆горче́нїе то̀ па́ки гнѣ̑ваетсѧ, и҆ къ побѣжде́нїю побѣжде́нїе прилага́ѧ не ѡ҆щꙋща́етъ: насы́тивсѧ, раскаѧва́етсѧ: и҆ ма́лѡ покоснѣ̑въ, па́ки къ насыще́нїю приложѝ: молча́нїе бл҃жи́тъ, и҆ многосло́вїемъ то̀ похвалѧ́етъ: ѡ҆ кро́тости ѹ҆чи́тъ, и҆ въ са́момъ то́мъ ѹ҆чи́телствѣ мно́жицею гнѣ̑ваетсѧ: воспрѧнꙋ́въ, воздохнꙋ̀: и҆ главо́ю покива́въ, па́ки стра́сти тоѧ̀ держи́тсѧ. Смѣ̑хъ ѹ҆корѧ́етъ, и҆ ѡ҆склаблѧ́ѧсѧ ѡ҆ пла́чи ѹ҆чи́тъ. Са́мъ себѐ ꙗ҆́кѡ тщесла́вна пред̾ нѣ̑кими ѹ҆корѧ́етъ, и҆ ѹ҆ко́ромъ тѣ̑мъ сла́вꙋ себѣ̀ сотворѧ́ти покꙋша́етсѧ. встра́ственнѣ на лицѣ̀ зри́тъ, и҆ ѡ҆ цѣломꙋ́дрїи бесѣ̑дꙋетъ. Безмо́лвствꙋющихъ въ мі́рѣ пребыва́ѧ похвалѧ́етъ, и҆ себѐ посрамлѧ́ѧ не разꙋмѣва́етъ. Ми́лостивыхъ сла́витъ, а҆ ни́щымъ поноша́етъ. Всегда̀ са́мъ себѣ̀ ѡ҆глаго́лникъ быва́етъ и҆ въ соѡщꙋще́нїе (самагѡ̀ себѐ) прїитѝ не хо́щетъ.
д҃. Ви́дѣхъ а҆́зъ мно́гихъ таковы́хъ ѡ҆ и҆схо́дѣ и҆ стра́шныхъ сꙋди́щахъ слы́шавшихъ и҆ слезѧ́щихъ: и҆ є҆щѐ слеза́мъ во ѻ҆чесѣ̑хъ сꙋ́щымъ со тща́нїемъ на трапе́зꙋ и҆дѧ́хꙋ: и҆ почꙋди́хсѧ, ка́кѡ и҆ пла́чь влады́чица сїѧ̀ и҆ смрадополо́жница побѣди́ти возмо́же, ѿ мно́га непоболѣ̑нїѧ ѹ҆крѣплѧ́ема.
є҃. По си́лѣ немощнѣ̑й сꙋ́щей во мнѣ̀, камени́стагѡ сегѡ̀ и҆ жестокосѣко́магѡ неи́стова и҆ бꙋ́ѧ, лє́сти и҆ стрꙋ́пы ѡ҆б̾ѧви́хъ: на мно́зѣ бо любосло́вити къ немꙋ̀ не терплю̀: могі́й же ѡ҆ гдⷭ҇ѣ ѿ и҆скꙋ́са положи́ти на стрꙋ́пы сїѧ̑ лѣ́чбы, да не ѡ҆блѣни́тсѧ: не бо срамлѧ́юсѧ ѡ҆ си́хъ не́мощь предлага́ѧ, ꙗ҆́кѡ ѿ негѡ̀ крѣ̑пкѡ содержи́мь: ниже́ бо лє́сти тогѡ̀ и҆ кѡ́зни, ѿ себѐ пости́гнꙋти возмого́хъ: а҆́ще не бы́хъ то̀ нѣ̑гдѣ пости́гъ нꙋ́ждею ѹ҆держа́лъ, и҆ предглагѡ́ланнаѧ мꙋ́чивъ то̀ и҆сповѣ̑дати сотвори́лъ: биче́мъ стра́ха гдⷭ҇нѧ, и҆ непреста́нною мл҃и́твою, би́въ то̀: тѣ̑мже и҆ глаго́лаше мꙋчи́тель се́й и҆ ѕлодѣ̑й. Спобѡ́рницы моѝ, ме́ртвыхъ зрѧ́ще смѣю́тсѧ: на мл҃и́твѣ предстоѧ́ще, каменнова́ти всѝ и҆ же́стоцы и҆ те́мни быва́ютъ: пред̾ сщ҃е́нною трапе́зою предстоѧ́ще, не чꙋ́вствꙋютъ: да́ра ѻ҆́нагѡ причаща́ющесѧ, ꙗ҆́кѡ ѡ҆ вкꙋ́сѣ про́ста хлѣ̑ба быва́ютъ. А҆́зъ ѹ҆милѧ́ющихсѧ зрѧ́що, рꙋга́юсѧ. Всѧ̑ ражда́ємаѧ ѿ мꙋ́жества и҆ любвѐ бл҃га̑ѧ а҆́зъ ѹ҆бива́ти ѿ менѐ ро́ждшагѡ ѻ҆тца̀ наꙋчи́хсѧ. А҆́зъ є҆́смь смѣ̑ха ма́ти: а҆́зъ сна̀ пита́тель: а҆́зъ насыще́нїѧ дрꙋ́гъ: а҆́зъ со лжеговѣ̑инствомъ сплета́юсѧ: а҆́зъ ѡ҆блича́емо не болю̀.
ѕ҃. А҆́зъ ѹ҆̀бо ѡ҆каѧ́нный ѡ҆ словесѝ неи́стовагѡ сегѡ̀ ѹ҆жа́ссѧ, вопроша́хъ ро́ждшагѡ то̀ и҆́мѧ ѹ҆разꙋмѣ̑ти хотѧ̀. Ѻ҆но́ же, рожде́нїе є҆ди́но не и҆́мамъ: смѣ̑сно же нѣ̑какѡ и҆ непостоѧ́нно моѐ є҆́сть зача́тїе. Менѐ ѹ҆крѣплѧ́етъ насыще́нїе, менѐ возрасти́ло є҆́сть вре́мѧ, менѐ ѹ҆тверди́лъ є҆́сть ѻ҆бы́чай лꙋка́въ, ѻ҆́наго содержа́й, не свободи́тсѧ менѐ. Пребыва́й размышлѧ́ѧ со мно́гимъ бдѣ̑нїемъ сꙋ́дъ вѣ̑ченъ, то̀ не́гли ма́лѡ посла́блю тебѣ̀. Смотрѝ мою̀ винꙋ̀ ѿкꙋ́дꙋ въ тебѣ̀ ражда́юсѧ, и҆ на мою̀ подвиза́йсѧ ма́терь: не бо є҆ди́нꙋ во всѣ̑хъ и҆́мамъ. Во гро́бищахъ моли́сѧ ча́стѡ: ѻ҆́бразъ си́хъ неизглажда́емь живописꙋ́ѧ въ се́рдцѣ твое́мъ: томꙋ́ бо не напи́санꙋ бы́вшꙋ писа́ломъ поста̀, не побѣди́ши менѐ во вѣ̑къ.
На шестом часе:
СЛО́ВО Ѳ҃I. Ѡ҆ снѣ̀ и҆ мл҃и́твѣ, и҆ є҆́же во дрꙋжи́нѣ ѱалмопѣ̑нїю.
Со́нъ є҆́сть, є҆стества̀ ѿ ча́сти составле́нїе, ѻ҆́бразъ сме́рти, чꙋ́вствъ пра́здность: є҆ди́нъ ѹ҆́бѡ є҆́сть со́нъ, мно́жайшы же и҆́мать вины̑, ꙗ҆́коже и҆ по́хоть и҆́мать: гл҃ю же, ѿ є҆стества̀, ѿ бра́шенъ, ѿ бѣсѡ́въ, и҆лѝ не́гли и҆ ѿ кра́йнѧ и҆ протѧже́на поста̀: ѿ негѡ́же и҆знемога́ющи пло́ть, сно́мъ про́чее себѐ ѹ҆тѣша́ти хо́щетъ.
в҃. Ꙗ҆коже многопи́тїе на ѻ҆бы́чаи зави́ситъ, та́кѡ и҆ многоспа́нїе: тѣ̑мже въ нача́лѣхъ наипа́че повинове́нїѧ на то́й подвиза́имсѧ: лю́то бо є҆́сть ѻ҆бы́чай до́лгъ и҆сцѣли́ти.
г҃. Наблюда́имъ и҆ ѡ҆брѧ́щемъ дх҃о́внѣй трꙋбѣ̀ назна́менающей, ви́димѡ ѹ҆́бѡ собира́ющихсѧ бра́тїй, неви́димѡ же собира́ющихсѧ врагѡ́въ: тѣ̑мже ѻ҆́ви ѹ҆́бѡ ко ѻ҆дрꙋ̀ пристꙋ́плше по воста́нїи, па́ки на́съ на то́мъ восклони́тисѧ под̾ꙋща́ютъ, пождѝ глаго́люще да́же до сконча́нїѧ нача́лныхъ пѣ̑сней, та́же въ цр҃ковь по́йдеши: ѻ҆́ви же на мл҃твѣ предстоѧ́щихъ сно́мъ погрꙋжа́ютъ. И҆́ни, чре́во па́че ѻ҆бы́чаѧ протѧже́ннѣ понꙋжда́ютъ: и҆́ни, бесѣ́ды твори́ти въ цр҃кви побꙋжда́ютъ: и҆́ни, ѹ҆́мъ въ по́мыслы скве́рны ѿвлека́ютъ: и҆́ни, на стѣ̑нꙋ на́съ, ꙗ҆́кѡ и҆знемо́гшихъ, восклонѧ́ютъ: ѻ҆вогда́ же, и҆ прозїѧва́нми мно́гшими ѡ҆блага́ютъ. Нѣ̑цыи ѹ҆́бѡ и҆з̾ ни́хъ, смѣ̑хꙋ мно́жицею во вре́мѧ мл҃и́твы бы́ти сотвори́ша: да ѻ҆́нѣмъ бг҃а на ны̀ въ негодова́нїе возставлѧ́ютъ: и҆́ни, спѣши́тисѧ на́съ въ стїхосло́вїи, ѿ лѣ̑ности, ѹ҆бѣжда́ютъ: и҆́ни ко́снѣе пѣ̑ти ѿ сластолю́бїѧ побꙋжда́ютъ: ѻ҆вогда́ же и҆ ѹ҆стѡ́мъ присѣдѧ́ще затворє́на та̑ и҆ неꙋдо́бь ѿверза́єма содѣ̑ловаютъ.
д҃. И҆́же бг҃ꙋ предстоѧ́ти помышлѧ́ѧй въ чꙋ́вствѣ се́рдца, въ мл҃и́твѣ сто́лпъ неподви́жимь ѡ҆брѧ́щетсѧ, ничи́мже и҆з̾ предрече́нныхъ порꙋгава́емь.
є҃. И҆́стинный послꙋ́шникъ, мно́жицею внеза́пꙋ на мл҃и́твѣ (предста́въ) ве́сь свѣ̑телъ и҆ ра́достенъ быва́етъ: пред̾ꙋгото́вленъ бо бѣ̀ неле́ностною слꙋ́жбою и҆ пред̾искꙋше́нъ подви́жникъ се́й.
ѕ҃. Всѣ́мъ ѹ҆́бѡ возмо́жно є҆́сть, со мно́жествомъ моли́тисѧ: мнѡ́зѣмъ же прили́чно є҆́сть съ є҆динодꙋ́шнымъ є҆ди́нѣмъ: ма́лѣхъ бо є҆́сть ѹ҆едине́ннаѧ мл҃и́тва.
з҃. Со мно́жествомъ поѧ̀, не возмо́жеши невеще́ственнѣ помоли́тисѧ. Да бꙋ́детъ же тебѣ̀ на дѣ̑ланїе ѹ҆ма̀, пѣва́емыхъ слове́съ разꙋмѣва́нїе, и҆лѝ па́ки ѡ҆предѣле́на мл҃и́тва, въ пожда́нїи стїха̀ бли́жнѧгѡ.
и҃. Ниеди́номꙋ подоба́телно є҆́сть въ мл҃и́твѣ (держа́ти) рꙋкодѣ̑лїе, па́че же дѣ̑ло: семꙋ́ бо ꙗ҆́вѣ наꙋчи́лъ є҆́сть ѻ҆́нъ по вели́комꙋ а҆нтѡ́нїю а҆́гг҃лъ.
ѳ҃. занѐ, и҆скꙋша́етъ ѹ҆́бѡ пе́щь зла́то, мл҃и́твы же предстоѧ́нїе, тща́нїе и҆ любо́вь ко бг҃ꙋ, мона́хѡвъ.
Похва́лно дѣ̑ло стѧжа́вый, и҆ къ бг҃ꙋ приближа́етсѧ, и҆ бѣсѡ́въ бѣ̑гаетъ.
На девятом часе:
СЛО́ВО К҃. Ѡ҆ бдѣ̑нїи тѣле́снѣмъ, ка́кѡ тѣ̑мъ быва́етъ дх҃о́вное, и҆ ка́кѡ подоба́етъ то̀ проходи́ти.
И҆̀же на землѝ цр҃є́мъ, ѻ҆́ви ѹ҆́бѡ без̾ѻрꙋ́жни нѣ̑какови и҆ на́зи: ѻ҆́ви же, жезлы̀: ѻ҆́ви же, щиты̀: ѻ҆́ви же, мечѝ держа́ще, предстоѧ́тъ. Мно́го же нѣ̑кое разли́чїе є҆́сть пе́рвенствꙋющихъ па́че послѣ̑днихъ и҆ без̾ сравне́нїѧ: сі́и бо и҆ срѡ́дницы сво́йственнѣ, и҆ сво́йствєнницы цр҃е́ви бы́ти є҆сте́ственнѣ и҆́мꙋтъ. и҆ сїѧ̑ ѹ҆́бѡ ѡ҆ си́хъ.
в҃. Грѧди́ же про́чее и҆ мы̀ ѹ҆ви́димъ, ка́кѡ пред̾ бг҃омъ и҆ цр҃е́мъ предстоѧ́нїе на́ше твори́мъ, въ вече́рнихъ и҆ дневны́хъ и҆ нощны́хъ предстоѧ́нїихъ и҆ мл҃и́твахъ. занѐ нѣ̑цыи ѹ҆́бѡ въ вече́рнемъ ѡ҆бнощева́нїи, невеще́ственни и҆ на́зи всѧ́кагѡ попече́нїѧ, на мл҃и́твꙋ рꙋ́ки воздѣва́ютъ: и҆́ни же, съ ѱалмопѣ̑нїемъ, въ тѣ̑хъ предстоѧ́тъ: и҆́ни же, въ чте́нїи па́че претерпѣва́ютъ: нѣ̑цыи же, дѣ̑ломъ рꙋ́къ ѿ не́мощи, мꙋ́жественнѣ со сно́мъ ра́тꙋютсѧ: и҆́ни въ помышле́нїи сме́рти ѹ҆пражнѧ́ющесѧ, си́мъ ѹ҆миле́нїе прїѧ́ти хотѧ́тъ. И҆з̾ си́хъ всѣ̑хъ пе́рвїи и҆ послѣ̑днїи, въ бг҃олюби́момъ претерпѣва́ютъ ѡ҆бнощева́нїи: вторі́и же, въ мона́шестѣмъ: тре́тїи же, послѣ̑дншимъ ше́ствꙋютъ пꙋте́мъ: ѻ҆ба́че по по́мыслꙋ и҆ си́лѣ, бг҃ъ да́ры прїе́млетъ и҆ вмѣнѧ́етъ.
г҃. Бо́дро ѻ҆́ко, ѡ҆чи́сти ѹ҆́мъ: мно́жество же сна̀, ѡ҆жесточѝ дꙋ́шꙋ.
д҃. Бо́дръ и҆́нокъ, блꙋдꙋ̀ вра́гъ: сонли́вый же, томꙋ̀ сꙋпрꙋ́жникъ.
є҃. Бдѣ̑нїе є҆́сть, раждиза́нїй пораже́нїе: приснѣ̑нїй и҆збавле́нїе: мо́кренно ѻ҆́ко, ѹ҆мѧгче́но се́рдце, помыслѡ́въ хране́нїе, бра́шенъ горни́ло, страсте́й ѹ҆толи́телство, ѧ҆зы́кꙋ мꙋчи́лище, мечта́нїй прогони́телство.
ѕ҃. Мона́хъ бо́дръ, лове́цъ є҆́сть помыслѡ́въ, въ тишинѣ̀ но́щи ѹ҆до́бь ты̑ѧ разꙋмѣва́ти и҆ лови́ти могі́й.
з҃. Мона́хъ бг҃олюби́въ, трꙋбѣ̀ моли́твеннѣй зна́менающей, гл҃етъ: бл҃гоже, бл҃гоже: лѣни́вый же гл҃етъ, ѹ҆вы̀ мнѣ̀, ѹ҆вы̀ мнѣ̀.
и҃. Трапе́зы ѹ҆гото́ванїе, и҆скꙋсѝ чревоѡб̾ѧ́стливыхъ: а҆ мл҃и́твы дѣ̑ланїе, и҆скꙋсѝ бг҃олюби́выхъ: пе́рвшїй ѹ҆́бѡ ѹ҆ви́дѣвъ ѻ҆́нꙋ, взыграва́етсѧ: вторы́й же дрѧ́хлꙋетъ.
ѳ҃. забве́нїѧ вино́венъ є҆́сть со́нъ мно́гъ: бдѣ̑нїе же па́мѧть ѡ҆чища́етъ.
і҃. Бога́тство земледѣ̑лцємъ на гꙋмнѣ̀ и҆ точи́лѣ собира́етсѧ: бога́тство же и҆ ра́зꙋмъ мона́хѡмъ въ вече́рнихъ и҆ нощны́хъ предстоѧ́нїихъ, и҆ дѣ̑ланїихъ ѹ҆ма̀.
а҃і. Со́нъ мно́гъ, сожи́тель є҆́сть непра́веденъ: по́лъ жи́зни лѣни́выхъ восхища́ѧ ѿ ни́хъ, и҆лѝ и҆ мно́жае.
в҃і. Неискꙋ́сенъ мона́хъ, въ бесѣ̑дахъ бо́дръ є҆́сть: и҆ ча́сꙋ мл҃и́твы приспѣ̑вшꙋ, ѻ҆чи́ма ѡ҆тѧгчи́сѧ.
г҃і. Мона́хъ сла́бъ, во многосло́вїихъ и҆скꙋ́сенъ є҆́сть: и҆ чте́нїю принесе́нꙋ бы́вшꙋ, взира́ти ѿ сна̀ не мо́жетъ. послѣ̑дней трꙋбѣ̀ возглаша́ющей, ме́ртвыхъ бꙋ́детъ воскресе́нїе: и҆ праздносло́вїю пости́гшꙋ, спѧ́щихъ (быва́етъ) возбнове́нїе.
д҃і. Ле́стенъ дрꙋ́гъ є҆́сть, со́нный мꙋчи́тель: насы́тившымсѧ на́мъ мно́жицею ѿхо́дитъ, а҆ во а҆́лчбѣ и҆ жа́ждѣ сꙋ́щихъ, крѣ̑пцѣ ра́тꙋетъ.
є҃і. Рꙋкодѣ̑лїе во вре́мѧ моли́твъ держа́ти под̾ꙋща́етъ: и҆́накѡ бо мл҃и́твꙋ бдѧ́щихъ потреблѧ́ти не мо́жетъ.
ѕ҃і. Под̾ новонача́лныхъ пре́жде на бра́нь сїю̀ вхо́дитъ, да разлѣни́тисѧ (тѣ̑хъ) ѿ нача̑лъ сотвори́тъ, и҆лѝ бѣ̑сови блꙋда̀ пред̾ꙋгото́витъ.
з҃і. До́ндеже ѿ сегѡ̀ не свободи́мсѧ, со мно́жествомъ пѣ̑ти да не ѿрече́мсѧ: мно́жицею бо и҆ стыдѧ́щесѧ не дре́млемъ. Враждꙋ́етъ на за́ѧцы пе́съ, а҆ на со́нъ тщесла́вїѧ бѣ̑съ.
и҃і. По днѝ ѹ҆́бѡ, прода́вецъ: по ѱалмопѣ̑нїи же дѣ̑латель сѣ̑дъ, прибы́токъ счита́етъ.
ѳ҃і. Пождѝ на мл҃и́твѣ тре́звеннѣ, и҆ тогда̀ ѹ҆́зриши тѡлпы̀ бѣсѡ́въ ꙗ҆́кѡ пора́тѡваны бы́вшѧ ѿ на́съ, по мл҃и́твѣ къ безмѣ́стнымъ на́съ мечта́нїємъ пригвожда́ти покꙋша́ющѧсѧ: сѣ̑дъ, блюдѝ, и҆ ѹ҆́зриши ѡ҆бы́кшихъ нача́тки восхища́ти дꙋшє́вныѧ.
к҃. Мо́щно ѹ҆́бѡ є҆́сть во снѣ̑хъ ѿ ча́стости размышлѧ́ти словеса̀ ѱалмѡ́въ: ѻ҆вогда́ же бѣ̑сове на́мъ та̑ подме́щꙋтъ, да къ горды́ни возвы́сѧтъ: тре́тїѧгѡ же, гл҃ати не хотѣ̑хъ, ѻ҆ба́че нѣ̑кто мѧ̀ гл҃ати ѹ҆бѣди́лъ є҆́сть: дꙋша̀ сло́вꙋ гдⷭ҇ню непреста́ннѡ во днѝ поꙋча́ющисѧ, и҆ во снѣ̀ въ то́мъ ѹ҆пражнѧ́тисѧ ѡ҆бы́че: возме́здїе бо сво́йственнѣ є҆́сть пе́рвшагѡ второ́е на ѿвраще́нїе дꙋхѡ́въ и҆ мечта́нїй.
Степе́нь є҆́сть двадесѧ́тый: прїе́мый є҆го̀, свѣ̑тъ прїѧ́лъ є҆́сть въ се́рдцѣ свое́мъ.