Если чтения отсутствуют - значит, по данному дню еще не были добавлены тексты.
На третьем часе:
СЛО́ВО А҃I. Ѡ҆ многосло́вїи и҆ молча́нїи.
Рече́сѧ ѹ҆́бѡ на́ми вкра́тцѣ во предва́ршихъ, ко́ль прибѣ̑дственно є҆́сть ѕѣлѡ̀, и҆ въ са̑мыѧ ты̑ѧ дх҃ѡ́вны бы́ти мнѧ́щыѧсѧ привходѧ́що, є҆́же сꙋди́ти: па́че же є҆́же сꙋди̑мымъ бы́ти, и҆ ѿ ѧ҆зы́ка мꙋ́читисѧ: ны́нѣ же про́чее и҆ винꙋ̀ ѻ҆́нꙋ, и҆ две́рь є҆́юже вхо́дитъ, па́че же и҆схо́дитъ, послѣ̑дованно є҆́сть въ словеса̀ вчини́ти.
в҃. Многосло́вїе є҆́сть, тщесла́вїѧ сѣда́лище: и҆́мже са́мо себѐ ꙗ҆влѧ́ти и҆ торже́ственнѣ провожда́ти ѡ҆бы́че. Многосло́вїе є҆́сть, неразꙋ́мїѧ зна́менїе: клеветы̀ две́рь, кощꙋ́нства рꙋково́ждь, лжѝ слꙋга̀, ѹ҆миле́нїѧ разоре́нїе, ѹ҆ны́нїѧ зва́тель, сна̀ предте́ча, сѣ̑тованїѧ расточе́нїе, хране́нїѧ потребле́нїе, теплоты̀ ѹ҆стꙋди́лище, мл҃и́твы помраче́нїе.
г҃. Молча́нїе въ ра́зꙋмѣ, ма́ти є҆́сть мл҃и́твы: плѣне́нїѧ воззва́нїе, ѻ҆гнѧ̀ храни́ло, помыслѡ́въ назира́тель, смотрѣ̑тель сꙋпоста́тѡвъ, пла́ча ѹ҆зи́лище, сле́зъ дрꙋ́гъ, сме́ртныѧ па́мѧти дѣ̑латель, мꙋ́ки живопи́сецъ, сꙋда̀ любоиспы́тникъ, тꙋгѝ слꙋга̀, дерзнове́нїю вра́гъ, безмо́лвїѧ сꙋпрꙋ́гъ, ѹ҆чителстволю́бїѧ сꙋпоста́тъ, ра́зꙋма прило́гъ, видѣ̑нїй содѣ̑тель, неѧ́вственно пред̾ꙋспѣ̑ѧнїе, ѹ҆тае́нно восхожде́нїе.
д҃. Позна́вый прегрѣшє́нїѧ, воздержа́вствова ѧ҆зы́комъ: многосло́вный же, не ѹ҆̀ позна̀ себѐ ꙗ҆́коже подоба́етъ.
є҃. Дрꙋ́гъ молча́нїѧ, приближа́етсѧ къ бг҃ꙋ, и҆ ѻ҆́тай собесѣ̑дꙋѧ, просвѣща́етсѧ ѿ бг҃а.
ѕ҃. І҆и҃сово молча́нїе, посрамѝ пїла́та: и҆ мꙋ́жа безмо́лвїе, гла́са ѹ҆празднѝ тщесла́вїе.
з҃. Сло́во ре́къ пе́тръ, пла́касѧ го́рькѡ: не помѧнꙋ́въ ре́кшаго: рѣ̑хъ, сохраню̀ пꙋти̑ моѧ̑, є҆́же не согрѣша́ти мѝ ѧ҆зы́комъ мои́мъ: и҆ и҆но́го ре́кшаго, лꙋ́чше є҆́сть па́сти съ высоты̀ на зе́млю, не́жели ѿ ѧ҆зы́ка.
и҃. И҆ мнѡ́га ѡ҆ се́мъ а҆́зъ писа́ти не хощꙋ̀, а҆́ще страсте́й кова̑рства сїѐ твори́ти и҆ побꙋжда́ютъ: ѻ҆ба́че слы́шахъ нѣ̑когда нѣ̑коего ѡ҆ молча́нїи ѹ҆́стъ со мно́ю любоиспы́товавша: и҆́же гл҃аше: многосло́вїю ѹ҆́бѡ ѿ є҆ди́нагѡ и҆з̾ си́хъ ражда́тисѧ ѿню́дъ, и҆лѝ ѿ житїѧ̀ и҆ ѻ҆бы́чаѧ лꙋка́ва и҆ неꙋде́ржна: ѹ҆́дъ бо сы́й є҆сте́ственъ ѧ҆зы́къ тѣ̑ла сегѡ̀, въ не́мже про́чее нака́занъ бꙋ́детъ, (то̀ и҆) ѻ҆бы́чаѧ (тогѡ̀) и҆стѧ́зовалъ бы: и҆лѝ напроти́въ, въ подвиза́ющихсѧ, и҆ па́че же ѿ тщесла́вїѧ: ѻ҆вогда́ же и҆ ѿ чревоѡб̾ѧде́нїѧ: тѣ̑мже мно́жицею мно́зи ѡ҆бꙋздава́юще чре́во, нꙋ́ждею нѣ̑коею и҆ и҆знеможе́нїемъ затворѧ́ютъ и҆ ѧ҆зы́къ, и҆ є҆́же ѿ негѡ̀ многоглаго́ланїе.
ѳ҃. Попекі́йсѧ ѡ҆ и҆схо́дѣ, ѿсѣчѐ словеса̀: и҆ стѧжа́вый пла́чь дꙋшѝ, ꙗ҆́кѡ ѻ҆гнѧ̀ ѿврати́сѧ многосло́вїѧ.
і҃. Возлюби́вый безмо́лвїе, затворѝ ѹ҆ста̀: ра́дꙋѧйсѧ же ѡ҆ и҆схожде́нїихъ, ѿ стра́сти сеѧ̀ и҆з̾ ке́ллїи и҆згони́мъ быва́етъ.
а҃і. Ѹ҆вѣ̑дѣвый воню̀ ѻ҆гнѧ̀ вы́шнѧгѡ, ꙗ҆́кѡ пчела̀ ды́ма, человѣ̑ческа бѣ̑гаетъ собо́ра: занѐ ѻ҆́нꙋ ѹ҆́бѡ ды́мъ ѿгони́тъ: семꙋ́ же человѣ̑ческїй собо́ръ сопротивлѧ́етсѧ.
в҃і. Ма́лѣхъ ѕѣлѡ̀ є҆́сть во́дꙋ незагражде́ннꙋ возбранѧ́ти: ма́л̾шихъ же ѹ҆ста̀ неꙋдє́ржна ѹ҆толи́ти.
Степе́нь є҆динонадесѧ́тый побѣди́вый, мно́жество ѕѡ́лъ є҆ди́ною пресѣчѐ.
На шестом часе:
СЛО́ВО В҃I. Ѡ҆ лжѝ.
Рожде́нїе ѹ҆́бѡ желѣ̑за и҆ ка́мене є҆́сть, ѻ҆́гнь: рожде́нїе же многосло́вїѧ и҆ кощꙋ́нства, лжа̀.
в҃. Лжа̀ є҆́сть, любвѐ потребле́нїе: клѧтвопрестꙋпле́нїе же, бг҃а ѿверже́нїе.
г҃. Никто́же и҆з̾ бл҃гомꙋ́дрствꙋющихъ ма́лъ нѣ̑кїй лжѝ грѣ̑хъ бы́ти вознепщꙋ́етъ: стра̑шна бо па́че всѣ̑хъ и҆зречє́нїѧ на сїю̀ всест҃ы́й дх҃ъ ѹ҆потреби́лъ є҆́сть. А҆́ще погꙋби́ши всѧ̑ глаго́лющыѧ лжꙋ̀, ꙗ҆́коже гл҃етъ дв҃дъ ко бг҃ꙋ, то̀ что̀ про́чее постра́ждꙋтъ, съ клѧ́твами лжꙋ̀ сшива́ющїи;
д҃. Ви́дѣхъ нѣ̑кихъ ѡ҆ лжѝ возноша́ющихсѧ, и҆ кощꙋ́нствомъ и҆ праздносло́вїемъ смѣ̑ха достѡ́йна состроѧ́ющихъ: и҆ припослꙋ́шающихъ пла̑чи ѡ҆ми́лованнѣ и҆стреблѧ́ющихъ.
є҃. Внегда̀ бѣ̑сове ѹ҆ви́дѧтъ на́съ ꙗ҆́кѡ ѿ гꙋби́телна недꙋ́га ѿ слы́шанїѧ смѣхо́вныхъ по преднача́тїи лю́тагѡ сказа́телѧ ѿходи́ти покꙋша́ющихсѧ, тогда̀ про́чее двѣма̀ на́съ прелща́ти покꙋша́ютсѧ по́мыслы: да не ѡ҆печа́лиши сказа́телѧ сего̀ совѣ̑тꙋюще на́мъ: и҆лѝ да не ꙗ҆ви́ши себѐ бг҃олюби́телнша присꙋ́тствꙋющихъ: ѿскака́й, да не ѹ҆косни́ши: а҆́ще ли же нѝ, то̀ въ мл҃и́твѣ твое́й помышлє́нїѧ смѣхо́вныхъ воѻбрази́ши: не то́чїю бѣ̑гай, но и҆ лꙋка́вое то̀ собра́нїе бл҃гоче́стнѣ разорѧ́й, сме́рти и҆ сꙋда̀ на средꙋ̀ воспомина́нїе предлага́ѧ: лꙋ́чше бо тѝ є҆́сть ѿ сегѡ̀ не́гли и҆ ма́лою тще́ю сла́вою ѡ҆кропи́тисѧ, и҆ то́чїю всѣ́мъ вино́внꙋ по́льзы ѡ҆брѣсти́сѧ.
ѕ҃. Лицемѣ̑рїе, ма́ти лжѝ є҆́сть, мно́жицею и҆ вина̀: ничто́же бо нѣ̑цыи (и҆́но) лицемѣ̑рїе ѡ҆предѣлѧ́ютъ бы́ти, ра́звѣ то́чїю лжѝ поꙋче́нїе и҆ содѣ̑телѧ, ка́зни пови́ннꙋ и҆ сплете́ннꙋ и҆мꙋ́що клѧ́твꙋ.
з҃. Стѧжа́вый стра́хъ гдⷭ҇ень, ѹ҆страни́лсѧ є҆́сть ѿ лжѝ, сꙋдїю̀ недаропрїѧ́тна и҆мѣ̑ѧ со́вѣсть свою̀.
и҃. Ꙗ҆коже во всѣ̑хъ страсте́хъ разли́чїе вре́да познава́емъ, та́кѡ и҆ во лжѝ. занѐ и҆́нъ ѹ҆́бѡ сꙋ́дъ є҆́сть лжꙋ́щемꙋ стра́ха ра́ди мꙋ́ки: и҆ и҆́нъ, є҆́же бѣдѣ̀ не предлежа́щей лга́ти.
ѳ҃. И҆́нъ наслажде́нїѧ ра́ди солга̀, и҆́нъ сластолю́бїѧ ра́ди: и҆́нъ да присꙋ́тствꙋющымъ вино́венъ бꙋ́детъ смѣ̑ха: и҆́нъ же да бра́тови навѣ̑тꙋетъ, и҆ того̀ ѡ҆ѕло́битъ.
і҃. Мꙋ́ками кнѧзе́й, и҆стреблѧ́етсѧ лжа̀: мно́жествомъ же сле́зъ, въ коне́цъ погиба́етъ.
а҃і. И҆звѣ̑тъ предлага́етъ смотре́нїѧ, лжѝ производи́тель, и҆ пра̑вды мно́жицею непщꙋ́етъ бы́ти поги́бели дꙋшѝ. Раа́вы подража́телѧ себѐ показꙋ́етъ бы́ти лжетвори́теленъ мꙋ́жъ, и҆ поги́белїю свое́ю, и҆нѣ̑хъ спасе́нїе глаго́летъ содѣ̑ловати.
в҃і. Внегда̀ ѿ лжѝ ѿню́дъ чи́сти бꙋ́демъ, тогда̀ тꙋ̀ со стра́хомъ вре́мени зовꙋ́щꙋ притвори́мъ.
г҃і. Не вѣ̑сть младе́нецъ лжѝ: нижѐ дꙋша̀, лꙋка́вства лиши́вшисѧ.
д҃і. Возвесели́выйсѧ вїно́мъ, нево́лею и҆́стинꙋ возглаго́летъ во всѣ̑хъ: и҆ ѹ҆пи́выйсѧ ѹ҆миле́нїемъ не возмо́жетъ солга́ти.
Восхожде́нїе є҆́сть дванадесѧ́тое. Возше́дый ко́рень до́брыхъ стѧжа̀.
На девятом часе:
СЛО́ВО Г҃I. Ѡ҆ ѹ҆ны́нїи.
Е҆ди́ница и҆ сїѧ̀ мно́жицею и҆з̾ многосло́вїѧ вѣ̑твїй, ꙗ҆́коже ѹ҆жѐ предвари́вше и҆ рѣ̑хомъ є҆́сть, и҆ пе́рвое и҆сча́дїе, гл҃ю же, сїѐ ѹ҆ны́нїѧ: тѣ̑мже и҆ прили́чествꙋющъ є҆мꙋ̀ чи́нъ въ лꙋка́вѣй се́й вери́зѣ ѡ҆предѣли́хомъ.
в҃. Ѹ҆ны́нїе є҆́сть, разслабле́нїе дꙋшѝ, и҆ ѹ҆ма̀ ѡ҆слабле́нїе, пренеможе́нїе по́двига, не́нависть ѡ҆бѣ̑та: мїрски́хъ блажи́тель, бг҃а ѡ҆болгава́тель, ꙗ҆́кѡ немилосе́рдна и҆ не чл҃вѣколюби́ва: и҆знемога́нїе ѡ҆ ѱалмопѣ̑нїи, въ мл҃и́твѣ немоществꙋ́ющо, въ слꙋ́жбѣ желѣ̑зно, въ рꙋкодѣ̑лїи безлѣ̑ностно, въ послꙋша́нїи неискꙋ́сно.
г҃. Мꙋ́жъ послꙋшли́въ, ѹ҆ны́нїѧ непозна́тель: чꙋ́вственными мы́слєннаѧ и҆спра́вивъ.
д҃. Ѻ҆бщежи́тїе є҆́сть, ѹ҆ны́нїю противобори́телно: мꙋ́жꙋ же безмо́лвникꙋ, сꙋпрꙋ́гъ вѣ̑ченъ, пре́жде сме́рти ѿ негѡ̀ не ѿстꙋпи́тъ: и҆ пре́жде кончи́ны є҆гѡ̀, на всѧ́къ де́нь боро́ти и҆́мать. Ке́ллїю ѿше́лничꙋ ѹ҆ви́дѣвшо ѡ҆скла́бисѧ, и҆ прибли́жившосѧ къ немꙋ̀ бли́зъ всели́сѧ.
є҃. Вра́чь недꙋ́гꙋющихъ и҆з̾ ѹ҆тра̀ посѣща́етъ: и҆ ѹ҆ны́нїе, подвиза́ющихсѧ, ѡ҆ полꙋ́дне.
ѕ҃. Страннопрїи́мства, ѹ҆ны́нїе є҆́сть под̾ꙋще́нїе: и҆ ми̑лостыни чрезъ рꙋкодѣ́лїѧ ѹ҆вѣщава́етъ дѣ̑лати. Посѣща́ти болѧ́щихъ, побꙋжда́етъ ѹ҆се́рднѡ, воспомина́ющо гл҃ющаго: бо́ленъ бѣ̑хъ, и҆ прїидо́сте ко мнѣ̀. Къ скорбѧ́щымъ и҆ малодꙋ̑шнымъ ѹ҆вѣщава́етъ приходи́ти: и҆ ѹ҆тѣша́ти малодꙋ̑шныѧ малодꙋ́шное под̾ꙋща́ющо.
з҃. На мл҃и́твѣ ста́вшымъ, нꙋ̑ждна дѣла̀ воспомина́етъ, и҆ всѧ́ко ѹ҆хищре́нїе твори́тъ ѿѻнꙋ́дꙋ на́съ (а҆́ки) ѡ҆бро́тїю бл҃госло́вною ѿвлещѝ везслове́сное.
и҃. Трича́сенъ тре́петъ и҆ главоболѣ̑нїе, ѻ҆гневи́цꙋ же и҆ чревоболѣ̑нїе, ѹ҆ны́нїѧ бѣ̑съ сотворѝ. Девѧ́томꙋ дости́гшꙋ, ма́лѡ возни́кне: трапе́зѣ же положе́нѣй бы́вшей, съ посте́ли сскочи́лъ є҆́сть: и҆ мл҃и́твѣ дости́гшей, па́ки тѣ̑ло ѹ҆тѧгча̀. На мл҃и́твѣ ста́вшихъ, сно́мъ погрꙋзи́ло є҆́сть: и҆ прозїѧва́нми безвре́менными, и҆з̾ ѹ҆́стъ сті́хъ восхи́тило є҆́сть.
ѳ҃. Прѡ́чїѧ ѹ҆́бѡ стра̑сти є҆ди́ною нѣ̑коею добродѣ̑телїю ка́ѧждо и҆з̾ ни́хъ ѹ҆празднѧ́ютсѧ: ѹ҆ны́нїе же и҆́нокꙋ, ѡ҆бдержи́телна є҆́сть сме́рть.
і҃. Мꙋ́жественна дꙋша̀, ѹ҆ма̀ ѹ҆ме́рша воскреси́ла є҆́сть: ѹ҆ны́нїе же и҆ лѣ̑ность, всѐ бога́тство расточѝ. Є҆ди́номꙋ и҆ семꙋ̀, и҆ всѣ̑хъ тѧжча́йшꙋ и҆з̾ ѻ҆сми́хъ ѕло́бы предстоѧ́тєль сꙋ́щꙋ, по ѻ҆́нѣхъ послѣ̑дованїю и҆ на се́мъ сотвори́мъ: ѻ҆ба́че и҆ ѻ҆́но прило́жимъ.
а҃і. Ѱалмопѣ̑нїю не присꙋ́тствꙋющꙋ, ѹ҆ны́нїе не ꙗ҆влѧ́етсѧ: и҆ пра́вилꙋ сконча́вшꙋсѧ, ѻ҆́чи ѿверзо́стѣсѧ.
в҃і. Во вре́мѧ ѹ҆ны́нїѧ, нꙋ̑ждницы ꙗ҆влѧ́ютсѧ: ничто́же бо (та́кѡ) вѣнцѡ́въ вино́вно быва́етъ мона́хꙋ, ꙗ҆́коже ѹ҆ны́нїе.
г҃і. Насмотрѝ и҆ ѡ҆брѧ́щеши (то̀) на стоѧ́нїи ножнѣ̑мъ борю́що: и҆ на сѣда́лищи воскланѧ́ти повинꙋ́етъ на стѣ̑нꙋ: и҆з̾ ке́ллїи приница́ти побꙋжда́етъ, стꙋ́ки и҆ то́поты ножны̑ѧ творѧ́що. Пла́чай себѐ, ѹ҆ны́нїѧ не вѣ̑сть.
д҃і. Да свѧ́жетсѧ и҆ се́й мꙋчи́тель ѿ па́мѧти согрѣше́нїй, и҆ да бїе́тсѧ ѿ рꙋкодѣ̑лїѧ: влеко́мъ же ѿ помышле́нїѧ бꙋ́дꙋщихъ бла̑гъ: и҆ предста́въ ѡ҆ подоба́ющихъ да вопроша́етсѧ.
є҃і. Глаго́ли про́чее ты̀, ѽ разсла́бленне и҆ ѡ҆сла́бленне, кто̀ є҆́сть роди́вый тѧ̀ ѕлѣ̀; Ка̑ѧ сꙋ́ть и҆сча̑дїѧ твоѧ̑; Кі́и же сꙋ́ть ра́тꙋющїи тебѐ; и҆ кто̀ є҆́сть ѹ҆бі́йца тво́й; Ѻ҆́нъ же глаго́летъ, въ вои́стиннꙋ ѹ҆́бѡ послꙋ́шницѣхъ, не и҆́мамъ а҆́зъ гдѣ̀ главꙋ̀ подклони́ти: а҆ въ ни́хже и҆́мамъ, то̀ въ безмо́лвїи спребыва́ю съ ни́ми. Призыва́тєлницы же моѝ, мнѡ́жайши сꙋ́ть: ѻ҆вогда̀ ѹ҆́бѡ нечꙋ́вство дꙋшѝ, ѻ҆вогда́ же непомина́нїе вы́шнихъ: ѻ҆вогда́ же и҆ превосхожде́нїе трꙋдѡ́въ. И҆сча̑дїѧ моѧ̑ сꙋ́ть, прехождє́нїѧ мѣ̑стъ со мно́ю быва́єма: преслꙋша́нїе ѻ҆тца̀: непомина́нїе сꙋда̀: ѻ҆вогда́ же и҆ ѡ҆ставле́нїе ѡ҆бѣ̑та. Сопє́рницы же моѝ, ѿ ни́хже свѧ́занъ є҆́смь ны́нѣ, ѱалмопѣ̑нїе съ рꙋкодѣ̑лїемъ: вра́гъ мо́й є҆́сть сме́рти помышле́нїе: ѹ҆мерщвлѧ́ющаѧ же менѐ є҆́сть мл҃и́тва съ наде́ждею и҆звѣ̑стною до́брыхъ. Кто́ же є҆́сть роди́вый мл҃и́твꙋ, тꙋ̀ вопроси́те.
Третїѧна́десѧть є҆́сть побѣ̑да, ю҆́же вои́стиннꙋ стѧжа́вый, во все́мъ и҆скꙋ́сенъ є҆́сть до́брѣ.