Четверток 3-й седмицы Великого поста

ѯ҃ѳ. Ви́дѣхъ нечести́ваго превозносѧ́щасѧ, и҆ вы́сѧщасѧ, и҆ мѧтꙋ́щасѧ, и҆ неи́стовѧщасѧ на мѧ̀, ꙗ҆́кѡ ке́дры лїва̑нскїѧ, и҆ ми́мѡ и҆до́хъ воздержа́нїемъ, и҆ сѐ не бѣ̀ ꙗ҆́коже пре́жде ꙗ҆́рость є҆гѡ̀, и҆ взыска́хъ є҆го̀, смири́въ по́мыслъ мо́й, и҆ не ѡ҆брѣ̑тесѧ во мнѣ̀ мѣ̑сто є҆гѡ̀, и҆лѝ слѣ̑дъ є҆гѡ̀.

ѻ҃. И҆́же тѣ̑ло побѣди́лъ є҆́сть, се́й є҆стество̀ побѣди́лъ є҆́сть: є҆стество́ же сїѐ побѣди́вый, всѧ́кѡ вы́ше є҆стества̀ бы́сть: сїе́ же бы́вый, ѹ҆ма́лисѧ ма́лымъ чи́мъ ѿ а҆́гг҃лъ, да не рекꙋ̀, ничи́мже.

ѻ҃а. Нѣ̑сть чꙋ́до съ невеще́ственнымъ невеще́ственномꙋ ра́товатисѧ: чꙋ́до же вои́стиннꙋ чꙋ́до, є҆́же веще́ственномꙋ съ вражде́бнымъ си́мъ и҆ ра́тꙋющꙋсѧ вещество́мъ невеще́ствєнныѧ врагѝ побѣди́ти.

ѻ҃в. Мно́го ѡ҆ на́съ бл҃гі́й гдⷭ҇ь творѧ̀ и҆ въ се́мъ попече́нїе, же́нска по́ла безстꙋ́дїе, ꙗ҆́коже ѹ҆здо́ю нѣ̑коею стыдѣ̑нїемъ возбрани́лъ є҆́сть: занѐ а҆́ще бы ѻ҆́нъ на мꙋ́жескъ по́лъ са́мъ ѡ҆ себѣ̀ притека́лъ, то̀ не бы спасла́сѧ всѧ́ка пло́ть.

ѻ҃г. И҆́но прило́гъ, и҆ и҆́но сочета́нїе, и҆ и҆́но сослꙋже́нїе, и҆ и҆́но плѣне́нїе, и҆ и҆́но борьба̀. А҆ и҆́на глаго́лемаѧ стра́сть въ дꙋшѝ, ѿ разсꙋди́телныхъ ѻ҆тє́цъ бы́ти ѡ҆предѣлѧ́етсѧ: занѐ прило́гъ ѹ҆́бѡ бл҃же́ннїи ті́и бы́ти ѡ҆предѣлѧ́ютъ сло́во про́сто, и҆лѝ ѻ҆́бразъ приклю́чшїѧсѧ ве́щи новоѧвле́ннѣ въ се́рдце вноси́мь. Сочета́нїе же, є҆́же свозглаго́лати съ ꙗ҆́влшеюсѧ ве́щїю, по стра́сти и҆лѝ безстра́стнѣ. Сосложе́нїе же, преклоне́нїе всла́ственно дꙋшѝ ко ѹ҆ви́дѣнной ве́щи быва́ющо. Плѣне́нїе же, нꙋ́ждно и҆ нево́л̾но се́рдца ѿведе́нїе, и҆лѝ пребыва́телно и҆ и҆зрѧ́днѣйшагѡ ѹ҆строе́нїѧ на́шегѡ потреби́телно совокꙋпле́нїе къ приклю́чшейсѧ ве́щи. Борбꙋ́ же ѡ҆предѣлѧ́ютъ бы́ти равномо́щнꙋ на ра́тꙋемаго си́лꙋ, во́лею и҆лѝ побѣжда́ющꙋ, и҆лѝ побѣжде́нїе под̾е́млющꙋ. Стра́сть же, сво́йственнѣ бы́ти гл҃ютъ ѻ҆́но вре́менемъ до́лгимъ въ дꙋшѝ встра́ственнѡ возгнѣздѧ́ющеесѧ, и҆ ꙗ҆́коже во и҆́мство тꙋ̀ про́чее сꙋ́щимъ къ себѣ̀ ѻ҆бы́чаемъ приве́дшее, (ꙗ҆́кѡ) самоизво́лнѣ про́чее къ немꙋ̀ и҆ сво́йственнѣ са́мꙋ ѡ҆ себѣ̀ притека́ющꙋ. И҆з̾ си́хъ всѣ̑хъ, пе́рвшее ѹ҆́бѡ, безгрѣ̑шно є҆́сть: второ́е же, не всѧ́кѡ: тре́тїе же, по ѹ҆строе́нїю подвиза́ющагѡсѧ: борба́ же, и҆лѝ вѣнє́цъ и҆лѝ мꙋче́нїй вино́вна быва́етъ. Плѣне́нїе бо, и҆́накѡ во вре́мѧ мл҃и́твы, и҆ и҆́накѡ во и҆́но вре́мѧ, и҆ и҆́накѡ ѡ҆ сре́днихъ, и҆ и҆́накѡ ѡ҆ лꙋка́выхъ помышле́нїихъ сꙋ́дитсѧ: стра́сть же, без̾ сꙋмнѣ̑нїѧ во всѣ̑хъ, и҆лѝ равнова́жнꙋ покаѧ́нїю, и҆лѝ бꙋ́дꙋщей мꙋ́цѣ подлежи́тъ. И҆́же ѹ҆́бѡ пе́рвое безстра́стнѣ помышлѧ́ѧй, всѧ̑ послѣ́днѧѧ є҆ди́ною ѿсѣчѐ.

ѻ҃д. Є҆́сть ѹ҆ ѻ҆па́снѣйшихъ и҆з̾ разꙋмѣва́телныхъ ѻ҆тє́цъ, и҆ и҆́но нѣ̑кое ѿ си́хъ то́нше помышле́нїе, ю҆́же ве́щь превѣва́нїе ѹ҆ма̀ нѣ̑цыи и҆менова́тисѧ гл҃ютъ, є҆́же без̾ вре́мене и҆ сло́ва и҆ ѻ҆́браза, скорѣ̑е стра́сть стра́ждꙋщемꙋ назна́меновати ѻ҆бы́че. Скорѣ̑е ни є҆ди́нъ ѿ сегѡ̀ и҆́же є҆́сть тѣле́съ, бы́стршъ, и҆лѝ неѧ́вствен̾шъ въ дꙋ́сѣхъ бы́ти ѻ҆бы́че: па́мѧтїю то́нкою и҆ без̾ сочета́нїѧ, безвре́менною же и҆ несказа́нною, ѹ҆ нѣ̑кихъ же и҆ невѣ̑домою своѐ въ дꙋ́шꙋ прише́ствїе ꙗ҆влѧ́ющъ. А҆́ще ѹ҆̀бо кто̀ таковꙋ́ю тогѡ̀ то́нкость пла́чемъ пости́гнꙋти возмо́же, се́й на́съ наꙋчи́ти мо́жетъ, ка́кѡ мо́щно є҆́сть и҆ ѻ҆́комъ є҆ди́нѣмъ, и҆ просты́мъ видѣ̑нїемъ, и҆ ѡ҆сѧза́нїемъ рꙋкѝ, и҆ пѣ̑сни слы́шанїемъ, кромѣ̀ всѧ́кїѧ мы́сли и҆ по́мысла, блꙋди́ти дꙋшѝ встра́ственнѣ.

ѻ҃є. Нѣ̑цыи гл҃ютъ ѿ помыслѡ́въ се́рдца тѣ̑лꙋ на стра̑сти приходи́ти: нѣ̑цыи же па́ки напроти́вное, ѿ тѣле́сныхъ чꙋ́вствъ лꙋка̑вымъ ражда́тисѧ помыслѡ́мъ: и҆ пе́рвшїи ѹ҆́бѡ гл҃ютъ, а҆́ще не бы предте́клъ ѹ҆́мъ, то̀ не бы привозпослѣ̑дствовало тѣ̑ло: вторі́и же, ѕлодѣ̑йствїе тѣле́сныѧ стра́сти, къ своемꙋ̀ словозащище́нїю приво́дѧтъ гл҃юще: мно́жицею ѿ сладча́йша взо́ра, и҆лѝ рꙋ́чна ѡ҆сѧза́нїѧ, и҆лѝ благово́нна ѡ҆бонѧ́нїѧ, и҆лѝ слꙋ́ха сладкогла́сїѧ, и҆лѝ ꙗ҆́же во вкꙋ́сѣ сла́дости, по́мысли ті́и въ се́рдце вхо́дъ прїе́млютъ: ѡ҆ си́хъ, могі́й ѡ҆ гдⷭ҇ѣ, наꙋчи́тъ: ѕѣлѡ́ бо такѡва́ѧ ра́зꙋмомъ дѣ̑ѧтелство проходѧ́щымъ нꙋ̑ждна сꙋ́ть и҆ полє́зна: сꙋ́щымъ бо въ простотѣ̀ се́рдца дѣ̑лателємъ ѡ҆ си́хъ сло́во ниеди́но є҆́сть: не всѣ̑хъ бо є҆́сть ра́зꙋмъ се́й, нижѐ всѣ̑хъ є҆́сть бл҃же́ннаѧ ѻ҆́на простота̀ бронѧ̀ ѻ҆́на проти́вꙋ лꙋка́выхъ си́хъ ле́стемъ.

ѻ҃ѕ. Нѣ́кїѧ ѹ҆́бѡ и҆з̾ страсте́й, ѿ тѣ̑хъ ꙗ҆̀же внꙋ́трь на тѣ̑ло и҆схо́дѧтъ: нѣ́кїѧ же па́ки, напроти́внымъ ѻ҆́бразомъ: и҆ въ сꙋ́щихъ ѹ҆́бѡ въ мі́рѣ, второ́е: въ мона́шеское же житїѐ проходѧ́щихъ, пе́рвшее, ра́ди веще́ствъ ѻ҆́нѣхъ неимѣ̑нїѧ: а҆́зъ же ѡ҆ се́мъ ѻ҆́но гл҃ю: взы́щеши ѹ҆ ѕлы́хъ ра́зꙋма и҆ не ѡ҆брѧ́щеши.

ѻ҃з. Є҆гда̀ мно́гѡ проти́вꙋ бре́нїѧ сегѡ̀ сопрꙋ́жномꙋ бѣ̑сꙋ подвиза́вшесѧ, сего̀ ѿ се́рдца на́шегѡ ка́менїемъ поста̀, и҆ мече́мъ смире́нїѧ ѹ҆мꙋ́чивше, и҆зжене́мъ: тогда̀ про́чее въ тѣлесѝ (на́шемъ) ꙗ҆́коже че́рвь нѣ̑кїй внꙋ́трь сѣдѧ̀, на безсловє́сна нѣ́каѧ движє́нїѧ и҆ безвре́мєнна, скокта́ѧ на́съ ѡ҆каѧ́нный се́й ѡ҆сквернѧ́ти понꙋжда́етсѧ.

ѻ҃и. Сїе́ же наипа́че страда́ти ѡ҆быко́ша, бѣ̑сови тщесла́вїѧ покарѧ́ющїисѧ: зане́же въ се́рдцѣ не ктомꙋ̀ по́мыслы блꙋ̑дны ча́стѣ помышлѧ́юще, къ тщесла́вїю прибли́жишасѧ. А҆ ꙗ҆́кѡ рече́нное нело́жно є҆́сть: внегда̀ безмо́лвїѧ нѣ̑коегѡ сі́и и҆мꙋ́тсѧ, то̀ разꙋ́мнѡ себѐ да и҆стѧ́жꙋтъ и҆ всѧ́кѡ ѡ҆брѧ́щꙋтъ по́мыслъ нѣ̑кїй во глꙋбинѣ̀ се́рдца своегѡ̀, ꙗ҆́кѡ нѣ̑коего ѕмі́ѧ во гно́ищи кры́ющасѧ, и҆ ꙗ҆́кѡ ѿ своегѡ̀ тща́нїѧ и҆ ѹ҆се́рдїѧ и҆справле́нїе ѻ҆́но серде́чныѧ нѣколи́кѡ чистоты̀ и҆спра́виша подме́щꙋща: не помышлѧ́юще ѡ҆каѧ́ннїи ѻ҆́нагѡ: что́ бо и҆́маши, є҆гѡ́же нѣ̑си прїѧ́лъ тꙋ́не, и҆лѝ ѿ бг҃а, и҆лѝ ѿ и҆ны́хъ содѣ̑йства и҆ мл҃и́твы; Да смо́трѧтъ ѹ҆̀бо, и҆ всѧ́цѣмъ тща́нїемъ предрече́ннаго ѕмі́ѧ и҆з̾ се́рдца своегѡ̀ мно́гимъ смиренномꙋ́дрїемъ ѹ҆мертви́вше, да и҆зверга́ютъ: ꙗ҆́кѡ да ѿ негѡ̀ ѿчꙋжди́вшесѧ, не́гли возмо́гꙋтъ нѣ̑когда и҆ сі́и ко́жаныхъ ри́зъ совлещи́сѧ, и҆ побѣ̑днꙋю чистоты̀, ꙗ҆́коже нѣ̑когда чи́стїи младе́нцы, пѣ̑снь гдⷭ҇ви воспѣ̑ти: а҆́ще совле́кшесѧ, не на́зи ѻ҆́нѣхъ неѕло́бїѧ и҆ смире́нїѧ є҆сте́ственна, ѡ҆брѧ́щꙋтсѧ.

ѻ҃ѳ. Наблюда́етъ и҆ са́мъ се́й бѣ̑съ, и҆ мно́гѡ мно́жае ѿ и҆нѣ̑хъ, времена̀, є҆гда̀ наипа́че не мо́жемъ тѣле́снѣ на́нь помоли́тисѧ: и҆ тогда̀ ра́товати на́съ покꙋша́етсѧ непреподо́бный се́й.

п҃. Помоществꙋ́етъ не ѹ҆̀ стѧжа́вшымъ мл҃и́твꙋ се́рдца и҆́стиннꙋ, є҆́же въ тѣле́снѣй мл҃и́твѣ ѕлострада́нїе, гл҃ю же, протѧже́нїе рꙋ́къ, пе́рсей бїе́нїе, на нб҃са̀ чи́сто воззрѣ̑нїе, воздыха́нїй молва̀, колѣ̑нъ ча́сто преклоне́нїе, ꙗ҆̀же твори́ти присꙋ́тствꙋющихъ ра́ди мно́жицею не мо́гꙋтъ, тѣ̑мже тогда̀ ра́товати бѣ̑сове покꙋша́ютсѧ: и҆́же и҆ не могꙋ́ще є҆щѐ ѹ҆ма̀ мꙋ́жествомъ, и҆ неви́димою си́лою мл҃и́твы сопротивлѧ́тисѧ: не́гли по нꙋ́ждѣ послаблѧ́ютъ ра́тꙋющымъ тѣ̑хъ. Ѿскочѝ, а҆́ще мо́щно є҆́сть, вско́рѣ, ѹ҆кры́йсѧ ма́лѡ невѣ̑домѡ: воззрѝ ѻ҆́комъ, а҆́ще мо́щно є҆́сть, дꙋше́внымъ: а҆́ще ли же нѝ, то̀ понѐ внѣ̑шнимъ: крⷭ҇тови́днѣ воздѣ̑й рꙋ́цѣ недви́жимѡ, да и҆ ѻ҆́бразомъ си́мъ а҆мали́ка сего̀ посрами́ши и҆ побѣди́ши. Возопі́й къ могꙋ́щемꙋ спастѝ, не ѹ҆хищре́нными гл҃ы, но смире́нными веща́нми: пре́жде всѣ̑хъ, поми́лꙋй мѧ̀, ꙗ҆́кѡ не́мощенъ є҆́смь, предначина́ѧ: тогда̀ и҆скꙋ́съ прїи́меши вы́шнѧгѡ си́лы: и҆ неви́димѡ неви́димыхъ пожене́ши неви́димою по́мощїю. И҆́же та́кѡ ѡ҆бы́кнꙋвый ра́товати, вско́рѣ и҆ дꙋше́ю є҆ди́ною врагѝ сїѧ̑ ѿгонѧ́ти на́чнетъ: возда́рїе бо пе́рвшагѡ второ́е ѿ бг҃а дѣ̑лателємъ є҆́сть, и҆ пра́веднѣ.

п҃а. Въ собра́нїи нѣ̑гдѣ ѡ҆брѣ̑тсѧ, назна́менахъ тщали́ва бра́та ѿ лꙋка́выхъ пѡ́мыслъ стꙋже́на бы́вша, и҆ мѣ̑стꙋ прили́чнꙋ не ѡ҆брѣ̑тшꙋсѧ на та́йнꙋ мл҃и́твꙋ, на нꙋ́ждꙋ чре́внꙋю вскочи́въ ꙗ҆́кѡ ѿ неѧ̀ понꙋжда́емь, крѣ̑пкꙋ мл҃и́твꙋ на сꙋпоста́ты сїѧ̑ сотвори́лъ є҆́сть: мнѣ̑ же за неприли́чность мѣ̑ста ѻ҆́нагѡ зазрѣ̑вшꙋ є҆мꙋ̀, ѡ҆ нечи́стыхъ, глаго́летъ, пѡ́мыслъ прогна́нїи, въ нечи́стѣ мѣ̑стѣ помоли́хсѧ ѡ҆чи́ститисѧ ѿ скве́рны.

п҃в. Всѝ ѹ҆̀бо бѣ̑сове помрача́ти ѹ҆́мъ покꙋша́ютсѧ, та́же, люби̑маѧ тѣ́мъ совѣ̑тꙋютъ: а҆́ще бо ѻ҆́нъ не смѣжи́тсѧ, сокро́вище ѻ҆́но ѹ҆кра́дено не бꙋ́детъ. А҆ и҆́же блꙋда̀, мно́гѡ мно́жае всѣ̑хъ: се́й мно́жицею влады́кꙋ сего̀ ѹ҆ма̀ помрачи́въ, и҆ пред̾ человѣ̑ки твори́ти побꙋжда́етъ и҆ ѹ҆строѧ́етъ, ꙗ҆̀же вознеи́стовившїисѧ є҆ди́ни дѣ̑лаютъ: тѣ̑мже по вре́мени ѹ҆мꙋ̀ и҆стрезви́вшꙋсѧ, не то́чїю ѹ҆ви́дѣвшихъ, но и҆ сами́хъ себѐ за нечє́стнаѧ своѧ̑ дѣѧ̑нїѧ и҆ бесѣ́ды и҆лѝ ѻ҆́бразы срамлѧ́емсѧ, и҆ ѡ҆ пе́рвомъ на́шемъ ѡ҆слѣпле́нїи ѹ҆жаса́емсѧ: тѣ̑мже нѣ̑цыи мно́жицею ѿ такова́гѡ разсꙋжде́нїѧ, ѿ ѕла̀ сегѡ̀ преста́ша.

п҃г. Ѿвраща́йсѧ ѿ сꙋпоста́та сегѡ̀ по содѣ̑ѧнїи се́мъ моли́тисѧ тебѣ̀, и҆лѝ бг҃оче́ствовати, и҆лѝ бдѣ̑ти возбранѧ́ющагѡ, помина́ѧ ре́кшаго: занѐ твори́тъ мѝ трꙋды̀ дꙋша̀ сїѧ̀ мꙋчи́телствꙋемаѧ ѿ предпрїѧ́тїй, сотворю̀ ѿмще́нїе є҆ѧ̀ ѿ врагѡ́въ є҆ѧ̀.

п҃д. Кто̀ тѣ̑ло побѣди́лъ є҆́сть; И҆́же се́рдце сокрꙋшѝ: кто́ же се́рдце сокрꙋши́лъ є҆́сть; И҆́же са́мъ себѐ ѿве́ржесѧ: ка́кѡ бо не сокрꙋши́лсѧ є҆́сть, и҆́же во́ли (свое́й) ѹ҆́мре.

п҃є. Є҆́сть встра́ственъ встра́ственна встра́ственшъ, и҆ са́мое то̀ скве́рнъ свои́хъ и҆сповѣ̑данїе со сладостра́стїемъ всла́ственнѣ творѧ́й. Нечи̑стаѧ въ се́рдцѣ и҆ стꙋ̑днаѧ помышлє́нїѧ, ѿ сегѡ̀ преле́стника се́рдца, бѣ̑са блꙋда̀ ѡ҆быко́ша ражда́тисѧ: ꙗ҆̀же и҆сцѣлѧ́етъ воздержа́нїе, и҆ є҆́же та̑ нивочто́же ѿню́дъ вмѣнѧ́ти.

п҃ѕ. Кі́имъ же а҆́зъ нра́вомъ и҆ ѻ҆́бразомъ сего̀ дрꙋ́га моего̀ свѧза́въ, по послѣ̑дованїю про́чїихъ сꙋди́ти и҆́мамъ, не вѣ̑мъ: пре́жде бо не́же свѧжꙋ̀, разрѣша́етсѧ: и҆ пре́жде не́же сꙋди́ти и҆́мамъ, примирѧ́юсѧ: и҆ пре́жде не́же мꙋ́чити и҆́мамъ, преклонѧ́юсѧ: ка́кѡ возненави́ждꙋ, є҆го́же є҆стество́мъ люби́ти ѡ҆быко́хъ; Ка́кѡ свобождꙋ́сѧ, съ ни́мже во вѣ̑ки свѧ́занъ є҆́смь; Ка́кѡ ѹ҆праздню̀ є҆̀ со мно́ю и҆ воскреса́ющее; Ка́кѡ покажꙋ̀ нетлѣ̑нно, тлѣ̑нно прїе́мшее є҆стество̀; Что̀ благосло́вно рекꙋ̀ ко бл҃гослѡ́внаѧ и҆мꙋ́щемꙋ є҆стество́мъ; А҆́ще свѧжꙋ̀ посто́мъ сего̀, то̀ ѡ҆сꙋди́въ бли́жнѧго, томꙋ̀ па́ки предава́емь є҆́смь: а҆́ще и҆ ѿ є҆́же сꙋди́ти преста́въ сего̀ побѣждꙋ̀, то̀ возне́ссѧ се́рдцемъ, низведе́нъ бы́хъ си́мъ: и҆́бо и҆ содѣ̑йственникъ є҆́сть и҆ сꙋпоста́тъ: и҆ помо́щникъ, и҆ сопе́рникъ: и҆ застꙋ́пникъ, и҆ навѣ̑тникъ: ѹ҆го́дїе прїе́млѧ, ра́тꙋетъ: и҆ и҆стаѧва́емь, и҆знемога́етъ: ѹ҆покоева́емь, безчи́нствꙋетъ: и҆ ѡ҆тѧгчава́емь, не терпи́тъ: а҆́ще ѡ҆печа́лю, то̀ ѿню́дъ возбѣ̑дствꙋю: а҆́ще ѹ҆ѧзвлю̀, то̀ не и҆́мамъ чи́мъ добродѣ̑тєли стѧжꙋ̀: того́жде и҆ ѿвраща́юсѧ, и҆ ѡ҆б̾е́млю. Ко́е є҆́сть є҆́же ѡ҆ мнѣ̀ та́инство; Ко́е сло́во є҆́сть моегѡ̀ срастворе́нїѧ; Ка́кѡ са́мъ себѣ̀ вра́гъ и҆ дрꙋ́гъ є҆́смь; Глаго́ли мѝ ты̀, глаго́ли мѝ, ѽ сꙋпрꙋ́жница моѧ̀, ѽ є҆стество̀ моѐ: не бо ѿ и҆но́гѡ наꙋчи́тисѧ ѡ҆ тебѣ̀ востре́бꙋю: ка́кѡ ѿ тебѐ пребꙋ́дꙋ неꙋѧзвлѧ́емь; Ка́кѡ возмогꙋ̀ є҆сте́ственныѧ и҆збѣжа́ти бѣды̀, поне́же про́чее враждова́ти на тѧ̀ хрⷭ҇тꙋ̀ ѡ҆бѣща́хсѧ; Ка́кѡ мꙋчи́телство твоѐ побѣждꙋ̀, поне́же понꙋжда́тель тво́й бы́ти произво́лихъ; Ѻ҆но́ же къ дꙋшѝ свое́й ѿвѣщава́ющо гл҃аше: не скажꙋ́ ти ѹ҆́бѡ, чесогѡ̀ и҆ ты̀ не вѣ̑си, но є҆́же кꙋ́пнѡ ра́зꙋмомъ содержи́мъ. А҆́зъ во мнѣ̀ возлюбле́нїе ѻ҆тца̀ и҆́мамъ: внѣ̑шнѧгѡ ѹ҆́бѡ раждиза́нїѧ, ѹ҆гожде́нїе моѐ и҆ повсе́мнѣ ѿра́дꙋ: внꙋ́треннѧгѡ же двиза́нїѧ, ѿ предва́ршїѧ ѿра́ды, и҆ бы́вшихъ сотворе́нныхъ дѣѧ́нїй. А҆́зъ заче́ншо ражда́ю падє́нїѧ. Ѻ҆́на же рождє́на бы̑вша, па́ки сме́рть ѿча́ѧнїемъ ражда́ютъ. А҆́ще позна́еши мою̀ и҆ твою̀ ꙗ҆́вственнꙋ и҆ глꙋбо́кꙋ не́мощь, то̀ свѧза́лъ є҆сѝ рꙋ́цѣ моѝ: а҆́ще горта́нь ѹ҆мꙋ́чиши, то̀ свѧза́лъ є҆сѝ но́зѣ моѝ є҆́же на пре́дъ не и҆тѝ: а҆́ще спрѧже́шисѧ съ послꙋша́нїемъ, то̀ ѿ менѐ распрѧ́глсѧ є҆сѝ: а҆́ще стѧ́жеши смире́нїе, то̀ главꙋ̀ мнѣ̀ ѿсѣ̑клъ є҆сѝ.

Пѧтьнадесѧ́таѧ по́честь. И҆́же во пло́ти сы́й и҆ сїю̀ прїе́мый, ѹ҆́мре и҆ воскре́се: и҆ бꙋ́дꙋщагѡ нетлѣ̑нїѧ нача́ло ѹ҆жѐ ѿсю́дꙋ позна̀.

СЛО́ВО Ѕ҃I. Ѡ҆ сребролю́бїи.

Мно́жайши и҆з̾ премꙋ́дрыхъ ѹ҆чи́тєль ѡ҆быко́ша по предпи́саннѣмъ мꙋчи́тели настоѧ́щаго тмогла́ваго бѣ̑са сребролю́бїѧ вчинѣва́ти: да ѹ҆̀бо чи́на сегѡ̀ премꙋ́дрыхъ ѻ҆́нѣхъ немꙋ́дрїи мы̀ не премѣни́мъ, томꙋ́жде предѣ̑лꙋ и҆ пра́вилꙋ послѣ̑дствовахомъ: тѣ̑мже и҆ ѡ҆ недꙋ́зѣ се́мъ, а҆́ще ѹ҆го́дно є҆́сть, ма̑ла, та́же ѡ҆ здра́вїи вкра́тцѣ ѡ҆б̾и́мимъ.

в҃. Сребролю́бїе є҆́сть, і҆́дѡлѡмъ поклоне́нїе, невѣ̑рїѧ дщѝ, не́мощей и҆звини́телница, ста́рости во́лхвъ, гла́дѡвъ предвозвѣсти́телница, бездо́ждїѧ под̾ꙋща́тель:

г҃. Сребролю́бецъ є҆́сть, є҆ѵⷢ҇лїй порꙋга́тель, и҆ во́ленъ престꙋ́пникъ. Стѧжа́вый любо́вь, расточѝ пѣ́нѧзи: глаго́лѧй же со двѣма̀ си́ма жи́ти, са́мъ себѐ прелсти́лъ є҆́сть.

д҃. Пла́чай себѐ, и҆ тѣ̑ла сегѡ̀ ѿве́ржесѧ: и҆ вре́мени зовꙋ́щꙋ, ни сїѐ пощадѣ̀.

є҃. Не глаго́ли собира́ти ни́щихъ ра́ди, двѣ̑ бо ле́птѣ црⷭ҇твїе ѻ҆́но кꙋпи́стѣ.

ѕ҃. Страннолю́бецъ и҆ сребролю́бецъ съ собо́ю срѣто́стасѧ, и҆ вторы́й пе́рваго неразсꙋ́дна бы́ти и҆менова̀.

з҃. Побѣди́вый стра́сть сїю̀, попечє́нїѧ ѿсѣчѐ: свѧ́заный же, никогда́же чи́стѣ помо́литсѧ.

и҃. Нача́ло сребролю́бїѧ, вина̀ ми́лостыни: коне́цъ же сегѡ̀, не́нависть ко ѹ҆бѡ́гимъ. Доне́лѣже собере́тъ, ми́лостивъ быва́етъ: пѣ̑нѧзємъ же присꙋ́щымъ, рꙋ́цѣ стѧгнꙋ́лъ є҆́сть.

ѳ҃. Ви́дѣхъ ѹ҆бо́гихъ пѣ̑нѧзьми, въ жи́телствѣ ни́щихъ дх҃омъ ѡ҆богатѣ̑вшихъ: и҆ пе́рвшагѡ ѹ҆бо́жества своегѡ̀ забы́ша.

і҃. Пѣнѧзолюби́въ мона́хъ, ѹ҆ны́нїѧ чꙋ́ждь є҆́сть: а҆пⷭ҇лское сло́во на всѧ́къ ча́съ помина́ѧ: пра́здный нижѐ да ꙗ҆́стъ: и҆, рꙋ́цѣ моѝ сі́и послꙋжи́стѣ мнѣ̀, и҆ сꙋ́щымъ со мно́ю.

Шестьнадесѧ́та борба̀ є҆́сть, ю҆́же побѣди́вый, и҆лѝ любо́вь стѧжа̀, и҆лѝ попече́нїе ѿсѣчѐ.

СЛО́ВО з҃I. Ѡ҆ къ нб҃сѝ текꙋ́щемъ нестѧжа́нїи.

Нестѧжа́нїе є҆́сть, попече́нїй ѿложе́нїе, безпопече́нїе житїѧ̀, пꙋтеше́ственникъ невозбранѧ́емь, вѣ̑ра за́повѣдемъ, печа́ли чꙋ́жде.

в҃. Нестѧжа́теленъ мона́хъ, є҆́сть влады́ка мі́рꙋ, бг҃ови попече́нїе ѹ҆вѣрѧ́ѧ, и҆ вѣ̑рою всѣ̑хъ рабы̑ стѧжа́въ: не рече́тъ человѣ̑кꙋ ѡ҆ потре́бѣ свое́й: приходѧ̑щаѧ же ꙗ҆́кѡ ѿ рꙋкѝ гдⷭ҇ни прїи́метъ.

г҃. Нестѧжа́теленъ дѣ̑латель, безпристра́стїѧ сы́нъ, приходѧ̑щаѧ є҆мꙋ̀ ꙗ҆́кѡ не сꙋ̑щаѧ вмѣнѧ́ѧ: ѿхожде́нїю пости́гшꙋ, вмѣнѝ всѧ̑ ѹ҆ме́ты бы́ти: а҆́ще ли же печа́лꙋетъ ѡ҆ нѣ̑чесомъ, то̀ не ѹ҆̀ нестѧжа́тель бы́сть.

д҃. Нестѧжа́теленъ мꙋ́жъ, въ мл҃и́твѣ чи́стъ: любостѧжа́телный же, ѻ҆́бразы вещества̀ мо́литсѧ.

є҃. Пребыва́ющїи въ повинове́нїи, сребролю́бїѧ чꙋ́жди сꙋ́ть, и҆дѣ̑же бо тѣ̑ло (своѐ) преда́ша, что̀ про́чее и҆́мꙋтъ своѐ; Є҆ди́нымъ такові́и ѡ҆би́дими быва́ти ѡ҆быко́ша, на прехожде́нїе ѹ҆до́бни и҆ гото́ви сꙋ́ще. Ви́дѣхъ вещество̀, терпѣ̑нїе мона́хѡмъ на мѣ̑стѣ роди́вшо, па́че ѻ҆́нѣхъ же а҆́зъ гдⷭ҇а ра́ди скита́ющихсѧ мно́жае ѹ҆бл҃жи́хъ.

ѕ҃. Вкꙋси́вый вы́шнихъ, ѹ҆до́бь презира́етъ ни̑жнѧѧ: ѻ҆́ныхъ же не вкꙋси́вый, ѡ҆ стѧжа́нїихъ ра́дꙋетсѧ.

з҃. Безслове́сенъ нестѧжа́тель, двѣма̀ ѡ҆би́димь быва́етъ: настоѧ́щихъ ѹ҆далѧ́ѧсѧ, и҆ бꙋ́дꙋщихъ лиша́ѧсѧ.

и҃. Да не ѹ҆̀бо ꙗ҆ви́мсѧ ѽ мона́си, пти́цъ невѣ̑рнши: не пекꙋ́тсѧ бо, ни собира́ютъ.

ѳ҃. Вели́къ ѹ҆́бѡ є҆́сть ѿверга́ѧй бл҃гоче́стнѣ и҆мѣ́нїѧ, ст҃ъ же ѿверга́ѧй во́лю свою̀. Ѻ҆́нъ ѹ҆́бѡ стори́цею и҆лѝ и҆мѣ̑нїи, и҆лѝ дарова́нми прїи́метъ: се́й же, живо́тъ вѣ̑чный наслѣ̑дитъ.

і҃. Не ѡ҆ста́влѧтъ вѡ́лны мо́ре, нижѐ сребролю́бца гнѣ̑въ и҆ печа́ль.

а҃і. Презрѣ̑вый вещество̀, и҆зба́висѧ ѿ словоѡправда́нїѧ и҆ прекосло́вїѧ: любостѧжа́телный же, за и҆глꙋ̀ до сме́рти подвиза́етсѧ.

в҃і. Вѣ̑ра неꙋкло́нна, ѿсѣче́тъ попечє́нїѧ: сме́рти же па́мѧть, ѿверга́етсѧ и҆ тѣ̑ла.

г҃і. Не бѣ̀ во і҆́ѡвѣ сребролю́бїѧ слѣ̑дъ: тѣ̑мже и҆ лише́нъ бы́въ, без̾ смꙋще́нїѧ пребы́сть.

д҃і. Ко́рень всѣ́мъ ѕлы̑мъ є҆́сть и҆ глаго́летсѧ сребролю́бїе: не́нависть бо, и҆ татбы̑, и҆ за̑висти, и҆ разлꙋчє́нїѧ, и҆ вражды̑, и҆ смꙋщє́нїѧ, и҆ памѧтоѕлѡ́бїѧ, и҆ немилосє́рдїѧ, и҆ ѹ҆бі̑йства, то̀ сотвори́ло є҆́сть.

є҃і. Ма́лымъ ѻ҆гне́мъ нѣ̑цыи, мно́го вещество̀ сожго́ша: и҆ є҆ди́ною добродѣ̑телїю, всѣ̑хъ настоѧ́щихъ и҆ рече́нныхъ бѣжа́ша страсте́й: сїѧ̀ нарица́етсѧ безпри- стра́стїе, сїе́ же родѝ и҆скꙋ́съ и҆ вкꙋ́съ ра́зꙋма бж҃їѧ, и҆ попече́нїе ѿвѣ̑тствованїѧ и҆схо́да.

ѕ҃і. Не неꙋвѣ̑дѣно ѹ҆́бѡ є҆́сть со внима́нїемъ проче́тшемꙋ всеѧ̀ ма́тере ѕлы́хъ (чревоѡб̾ѧде́нїѧ) сло́во ѻ҆́но: глаго́летъ бо въ лꙋка́вомъ свое́мъ и҆ проклѧ́томъ чадоро́дїи, второ́мꙋ є҆ѧ̀ бы́ти и҆сча́дїю, ка́мени нечꙋ́вствїѧ: возбрани́ же мѧ̀ сво́й є҆мꙋ̀ чи́нъ ѿда́ти, многогла́вый ѻ҆́нъ і҆дѡлослꙋже́нїѧ ѕмі́й: тре́тїй не вѣ̑мъ ка́кѡ полꙋчи́въ ѹ҆ разсꙋди́телныхъ и҆з̾ ѻ҆ц҃є́въ во ѻ҆сми́хъ (страсте́й) ѻ҆́нѣхъ вери́зѣ: є҆го́же ѹ҆мѣ̑реннѣ ѡ҆ко́нчивше, гл҃ати про́чее ѡ҆ нечꙋ́вствѣ хо́щемъ, ꙗ҆́кѡ тре́тїемꙋ сꙋ́щꙋ семꙋ̀ въ рожде́нїи второ́мꙋ: по не́мже про́чее и҆ ѡ҆ снѣ̀ и҆ ѡ҆ бдѣ̑нїи, не то́чїю же но и҆ ѡ҆ младе́нчественнѣмъ и҆ не мꙋ́жественнѣмъ страхова́нїи, вкра́тцѣ побесѣ̑дꙋемъ: новонача́лныхъ бо сꙋ́ть такѡва́ѧ недꙋ̑гованїѧ.

Седмьнадесѧ́тый по́двигъ стѧжа́вый къ нб҃сѝ невеще́ственнѣ ше́ствꙋетъ.