Если чтения отсутствуют - значит, по данному дню еще не были добавлены тексты.
На паремиях вечерни по прокимне:
Быт. 8:21 – 9:7
21 И҆ ѡ҆бонѧ̀ гдⷭ҇ь воню̀ благоꙋха́нїѧ. И҆ речѐ гдⷭ҇ь бг҃ъ размы́сливъ: не приложꙋ̀ ктомꙋ̀ проклѧ́ти зе́млю за дѣла̀ человѣ́чєскаѧ, занѐ прилежи́тъ помышле́нїе человѣ́кꙋ прилѣ́жнѡ на ѕла̑ѧ ѿ ю҆́ности є҆гѡ̀: не приложꙋ̀ ᲂу҆̀бо ктомꙋ̀ порази́ти всѧ́кꙋю пло́ть живꙋ́щꙋю, ꙗ҆́коже сотвори́хъ: 22 во всѧ̑ дни̑ землѝ сѣ́ѧтва и҆ жа́тва, зима̀ и҆ зно́й, лѣ́то и҆ весна̀, де́нь и҆ но́щь не преста́нꙋтъ.
1 И҆ блгⷭ҇вѝ бг҃ъ нѡ́а и҆ сы́ны є҆гѡ̀ и҆ речѐ и҆̀мъ: расти́тесѧ и҆ мно́житесѧ, и҆ напо́лните зе́млю и҆ ѡ҆блада́йте є҆́ю: 2 и҆ стра́хъ и҆ тре́петъ ва́шъ бꙋ́детъ на всѣ́хъ ѕвѣре́хъ земны́хъ (и҆ на всѣ́хъ скотѣ́хъ земны́хъ), на всѣ́хъ пти́цахъ небе́сныхъ и҆ на всѣ́хъ дви́жꙋщихсѧ по землѝ и҆ на всѣ́хъ ры́бахъ морски́хъ: въ рꙋ́цѣ ва́шы вда́хъ (ѧ҆̀). 3 И҆ всѧ́кое дви́жꙋщеесѧ, є҆́же є҆́сть жи́во, ва́мъ бꙋ́детъ въ снѣ́дь: ꙗ҆́кѡ ѕе́лїе травно́е да́хъ ва́мъ всѐ. 4 То́чїю мѧ́са въ кро́ви дꙋшѝ да не снѣ́сте. 5 Кро́ви бо ва́шей, дꙋ́шъ ва́шихъ, ѿ рꙋкѝ всѧ́кагѡ ѕвѣ́рѧ и҆зыщꙋ̀ (є҆ѧ̀): и҆ ѿ рꙋкѝ человѣ́ка бра́та и҆зыщꙋ̀ є҆ѧ̀. 6 Пролива́ѧй кро́вь человѣ́чꙋ, въ є҆ѧ̀ мѣ́стѡ є҆гѡ̀ пролїе́тсѧ: ꙗ҆́кѡ во ѡ҆́бразъ бж҃їй сотвори́хъ человѣ́ка. 7 Вы́ же расти́тесѧ и҆ мно́житесѧ, и҆ напо́лните зе́млю, и҆ мно́житесѧ на не́й.
Притч. 11:19 – 12:6
19 Сы́нъ првⷣный ражда́етсѧ въ живо́тъ: гоне́нїе же нечести́вагѡ въ сме́рть. 20 Ме́рзость гдⷭ҇еви пꙋтїѐ развраще́нни, прїѧ́тни же є҆мꙋ̀ всѝ непоро́чнїи въ пꙋте́хъ свои́хъ. 21 Въ рꙋ́кꙋ рꙋ́цѣ вложи́въ непра́веднѡ, не без̾ мꙋ́ки бꙋ́детъ ѕлы́хъ: сѣ́ѧй же пра́вдꙋ прїи́метъ мздꙋ̀ вѣ́рнꙋ. 22 Ꙗ҆́коже ᲂу҆серѧ́зь златы́й въ но́здрехъ свинїѝ, та́кѡ женѣ̀ ѕлоꙋ́мнѣй лѣ́пота. 23 Жела́нїе првⷣныхъ всѐ благо́е, наде́жда же нечести́выхъ поги́бнетъ. 24 Сꙋ́ть, и҆̀же своѧ̑ сѣ́юще, мнѡ́жайшаѧ творѧ́тъ: сꙋ́ть же и҆ собира́юще чꙋжда̑ѧ, ᲂу҆малѧ́ютсѧ. 25 Дꙋша̀ блгⷭ҇ве́нна всѧ́каѧ проста́ѧ: мꙋ́жъ ꙗ҆́рый неблагоѡбра́зенъ. 26 Оу҆держава́ѧй пшени́цꙋ ѡ҆ста́витъ ю҆̀ ꙗ҆зы́кѡмъ: продаѧ́й пшени́цꙋ скꙋ́пѡ, ѿ наро́да про́клѧтъ, блгⷭ҇ве́нїе же гдⷭ҇не на главѣ̀ подава́ющагѡ. 27 Творѧ́й блага̑ѧ и҆́щетъ блгⷣти добры̀: и҆́щꙋщаго же ѕла̑ѧ пости́гнꙋтъ є҆го̀. 28 Надѣ́ѧйсѧ на бога́тство своѐ, се́й паде́тъ: застꙋпа́ѧй же првⷣныхъ, то́й возсїѧ́етъ. 29 Не сматрѧ́ѧй своегѡ̀ до́мꙋ наслѣ́дитъ вѣ́тры: порабо́таетъ же безꙋ́мный разꙋ́мномꙋ. 30 Ѿ плода̀ пра́вды дре́во жи́зни прозѧба́етъ: ѿе́млютсѧ же безвре́меннѡ дꙋ́ши беззако́нныхъ. 31 А҆́ще првⷣный є҆два̀ спаса́етсѧ, нечести́вый же и҆ грѣ́шный гдѣ̀ ꙗ҆ви́тсѧ;
1 Любѧ́й наказа́нїе лю́битъ чꙋ́вство: ненави́дѧй же ѡ҆бличе́нїѧ безꙋ́менъ. 2 Лꙋ́чше ѡ҆брѣты́й блгⷣть ѿ гдⷭ҇а бг҃а: мꙋ́жъ же законопрестꙋ́пенъ премолча́нъ бꙋ́детъ. 3 Не и҆спра́витсѧ человѣ́къ ѿ беззако́ннагѡ: корє́нїѧ же првⷣныхъ не ѿи́мꙋтсѧ. 4 Жена̀ мꙋ́жественнаѧ вѣне́цъ мꙋ́жꙋ своемꙋ̀: ꙗ҆́коже въ дре́вѣ че́рвь, та́кѡ мꙋ́жа погꙋблѧ́етъ жена̀ ѕлотво́рнаѧ. 5 Мы̑сли првⷣныхъ сꙋдьбы̑: ᲂу҆правлѧ́ютъ же нечести́вїи лє́сти. 6 Словеса̀ нечести́выхъ льсти̑ва въ кро́вь, ᲂу҆ста́ же пра́выхъ и҆зба́вѧтъ и҆̀хъ.
На третьем часе:
СЛО́ВО К҃А. Ѡ҆ немꙋ́жественнѣмъ страхова́нїи.
А҆́ще ѹ҆́бѡ во ѻ҆бщежи́тїихъ, и҆лѝ во дрꙋжи́нахъ добродѣ̑тель прохо́диши, то̀ не ѕѣлѡ̀ ѿ страхова́нїѧ ра́тꙋемь быва́ти ѻ҆бы́чнѣ и҆́маши: а҆́ще ли же на безмо́лвн̾шихъ мѣ̑стѣхъ подвиза́ешисѧ, то̀ да не поѡблада́етъ тебѐ се́й тщесла́вїѧ поро́дъ, и҆ невѣ̑рїѧ дщѝ (страхова́нїе).
в҃. Страхова́нїе є҆́сть, младе́нчественъ нра́въ, въ ста́рѣй тщесла́внѣй дꙋшѝ. Страхова́нїе є҆́сть, ѹ҆клоне́нїе ѿ вѣ̑ры, ча́ѧнїѧ ра́ди неча́ѧнныхъ.
г҃. Стра́хъ є҆́сть, предразмышлѧ́ема бѣда̀: и҆лѝ па́ки, стра́хъ є҆́сть, тре́петно чꙋ́вство се́рдца, ѡ҆ безвѣ̑стныхъ ѕлоключе́нїихъ коле́блющосѧ и҆ печа́лꙋющо. Стра́хъ є҆́сть, и҆звѣще́нїѧ лише́нїе.
д҃. Го́рда дꙋша̀ є҆́сть, страхова́нїѧ раба̀, на себѐ ѹ҆пова́ющи, и҆ звꙋ́кѡвъ созда́нїй и҆ сѣ̑ней боѧ́щисѧ.
є҃. Пла́чꙋщїи ѹ҆́бѡ и҆ безболѣ̑знени бы́вше, страхова́нїѧ не и҆́мꙋтъ: и҆зстꙋпле́нїе же мно́жицею боѧ́щесѧ, претерпѣва́ютъ: и҆ влѣ̑потꙋ: пра́веднѡ бо го́рдыхъ ѡ҆ставлѧ́етъ гдⷭ҇ь, да и҆ про́чїи нака́жемсѧ не возноша́тисѧ.
ѕ҃. Всѝ ѹ҆́бѡ боѧ́щїисѧ, тщесла́вни сꙋ́ть: не вси́ же не боѧ́щїисѧ, сꙋ́ть смиренномꙋ́дри: є҆лма̀, и҆ разбѡ́йницы и҆ гробокопа́тели нѣ̑какѡ не боѧ́тсѧ.
з҃. На мѣ́ста ѻ҆́на въ ни́хже ѹ҆страша́тисѧ ѡ҆бы́клъ є҆сѝ, въ полꙋ́нощи не лѣни́сѧ приходи́ти: а҆́ще ли же посла́биши ма́лѡ, то̀ состарѣ̑етсѧ съ тобо́ю младе́нчественнаѧ сїѧ̀ стра́сть и҆ смѣхо́внаѧ. И҆дѧ̀, мл҃и́твою воѡрꙋжа́йсѧ: дости́гъ, рꙋ́цѣ распрострѝ: і҆и҃совымъ и҆́менемъ бі́й сꙋпоста́ты: нѣ̑сть бо на нб҃сѝ и҆ на землѝ крѣ̑плша ѻ҆рꙋ́жїѧ: и҆зба́влсѧ ѿ недꙋ́га сегѡ̀, восхвалѧ́й и҆зба́влшаго: бл҃годари́мь бо, во вѣ̑къ покры́етъ тѧ̀.
и҃. Никогда́же возмо́жеши чре́во є҆ди́ною напо́лнити, ꙗ҆́коже ни страхова́нїе побѣди́ти: по мѣ̑рѣ пла́ча, скорѣ̑е ѿи́детъ: и҆ по ѡ҆скꙋдѣ̑нїю ѻ҆́нагѡ, боѧзли́ви пребыва́емъ.
ѳ҃. Ѹ҆страши́шасѧ власѝ моѝ и҆ плѡ́ти, є҆лифа́зъ речѐ, кова́рство бѣ̑са сегѡ̀ повѣ̑даѧ. Ѻ҆вогда̀ ѹ҆́бѡ дꙋша̀, ѻ҆вогда́ же тѣ̑ло пред̾ꙋстраши́сѧ: и҆ дрꙋго́мꙋ ѿ стра́сти сеѧ̀ преподадѐ. Є҆гда̀ пло́ти ѹ҆страши́вшейсѧ, въ дꙋ́шꙋ стра́хъ се́й безвре́менный не вни́де, то̀ бли́зъ є҆́сть ѿ недꙋ́га сегѡ̀ и҆збавле́нїе: є҆гда́ же неча́ѧнныхъ всѣ̑хъ ѿ сокрꙋше́нїѧ се́рдца ѹ҆се́рднѣ ѡ҆жида́емъ, тогда̀ вои́стиннꙋ страхова́нїѧ свободи́хомсѧ.
і҃. Не мѣ̑стъ тма̀ и҆ пꙋсты́нѧ ѹ҆крѣплѧ́етъ на ны̀ бѣсѡ́въ, но дꙋшѝ безпло́дїе: ѻ҆вогда́ же и҆ смотри́телное наказа́нїе.
а҃і. Ра́бъ гдⷭ҇нь бы́вый, своегѡ̀ и҆ є҆ди́нагѡ влⷣки ѹ҆бои́тсѧ: сегѡ́ же не ѹ҆̀ боѧ́йсѧ, стѣ̑ни своеѧ̀ мно́жицею ѹ҆боѧ́сѧ.
в҃і. Пристꙋ́плшꙋ ѹ҆́бѡ неви́димѡ дꙋ́хꙋ, бои́тсѧ тѣ̑ло: пристꙋ́плшꙋ же а҆́гг҃лꙋ, ра́дꙋетсѧ смире́нныхъ дꙋша̀: тѣ̑мже ѿ дѣ̑йствїѧ сегѡ̀ прише́ствїе ѻ҆́но ѹ҆разꙋмѣ̑вше, скорѣ̑е на мл҃и́твꙋ возско́чимъ: спомоли́тисѧ бо съ на́ми бл҃гі́й на́шъ се́й храни́тель прїи́де.
На шестом часе:
Ис. 14:24–32
24 Сїѧ̑ гл҃етъ гдⷭ҇ь саваѡ́ѳъ: ꙗ҆́коже гл҃ахъ, та́кѡ бꙋ́детъ, и҆ ꙗ҆́коже совѣща́хъ, та́кѡ пребꙋ́детъ, 25 є҆́же погꙋби́ти а҆ссѷрі́анъ на землѝ мое́й и҆ на гора́хъ мои́хъ: и҆ бꙋ́дꙋтъ въ попра́нїе, и҆ ѿи́метсѧ ѿ ни́хъ ꙗ҆ре́мъ и҆́хъ, и҆ сла́ва {Є҆вр.: бре́мѧ.} и҆́хъ ѿ ра́менъ и҆́хъ ѿи́метсѧ. 26 Се́й совѣ́тъ, є҆го́же совѣща̀ гдⷭ҇ь на всю̀ вселе́ннꙋю, и҆ сїѧ̀ рꙋка̀ на всѧ̑ ꙗ҆зы́ки вселе́нныѧ: 27 ꙗ҆̀же бо бг҃ъ ст҃ы́й совѣща̀, кто̀ разори́тъ; и҆ рꙋ́кꙋ є҆гѡ̀ высо́кꙋю кто̀ ѿврати́тъ; 28 Въ лѣ́то, въ не́же ᲂу҆́мре а҆ха́зъ ца́рь, бы́сть глаго́лъ се́й: 29 не ра́дꙋйтесѧ, всѝ и҆ноплемє́нницы, сокрꙋши́сѧ бо ꙗ҆ре́мъ бїю́щагѡ вы̀: ѿ сѣ́мене бо ѕмїи́на и҆зы́дꙋтъ и҆сча̑дїѧ а҆́спїдѡвъ, и҆ и҆сча̑дїѧ и҆́хъ и҆зы́дꙋтъ ѕмїи̑ парѧ́щїи: 30 и҆ ᲂу҆пасꙋ́тсѧ ᲂу҆бо́зїи и҆́мъ, ни́щїи же человѣ́цы въ ми́рѣ почі́ютъ: и҆ потреби́тъ гла́домъ сѣ́мѧ твоѐ, и҆ ѡ҆ста́нокъ тво́й и҆збїе́тъ. 31 Воспла́читесѧ, врата̀ градѡ́въ, да возопїю́тъ гра́ды смѧте́ннїи, и҆ноплемє́нницы всѝ, занѐ ды́мъ ѿ сѣ́вера и҆́детъ, и҆ нѣ́сть, и҆́же пребꙋ́детъ. 32 И҆ что̀ ѿвѣща́ютъ ца́рїе ꙗ҆зы́кѡвъ; ꙗ҆́кѡ гдⷭ҇ь ѡ҆снова̀ сїѡ́на, и҆ тѣ́мъ спасꙋ́тсѧ смире́ннїи люді́й є҆гѡ̀.
Слово 22. О многообразнем тщеславии
СЛО́ВО К҃В. Ѡ҆ многоѻбра́знѣмъ тщесла́вїи.
Нѣ̑цыи ѹ҆́бѡ ѡ҆собноизбра́ннымъ чи́номъ и҆ сло́вомъ тщесла́вїе ѿ горды́ни лю́бѧтъ ѡ҆предѣлѧ́ти: тѣ̑мже и҆ ѻ҆́смь помыслѡ́въ ѕло́бы пе́рвенствꙋющихъ и҆ повели́тєль гл҃ютъ бы́ти. Бг҃осло́вный же григо́рїй, и҆ и҆́ни и҆з̾ ѹ҆чи́телей, напроти́въ, се́дмь си́хъ преда́ша бы́ти: и҆́мже а҆́зъ наипа́че согла́сенъ бы́ти покарѧ́юсѧ. Кто́ бо тщесла́вїе побѣди́въ, горды́ню и҆́мать; толи́ко бо то́чїю междꙋ̀ собо́ю разли́чїе и҆́мꙋтъ, є҆ли́ко и҆́мать є҆стество́мъ ѻ҆́трокъ ѿ мꙋ́жа, и҆ пшени́ца ѿ хлѣ̑ба: занѐ нача́ло ѹ҆́бѡ є҆́сть пе́рвшее, коне́цъ же второ́е. Тѣ̑мже ѡ҆ нача́лѣ и҆ и҆сполне́нїи страсте́й непреподо́бнѣмъ се́мъ возноше́нїи, вре́мени призва́вшꙋ, рце́мъ во кра́тцѣ: продолже́ннѣ бо ѡ҆ си́хъ любомꙋ́дрствовати покꙋша́ѧйсѧ, подо́бенъ є҆́сть ѡ҆ мѣ̑рилѣ вѣ̑трѡвъ любопы́тствꙋющемꙋ всꙋ́е.
в҃. Тщесла́вїе є҆́сть, по ви́дꙋ ѹ҆́бѡ, є҆стества̀ премѣне́нїе, и҆ нра́вѡвъ развраще́нїе, и҆ наблюде́нїе порече́нїѧ: по ка́чествꙋ же, трꙋдѡ́въ расточи́телство, по́тѡвъ поги́бель, сокро́вищꙋ навѣ̑тъ, невѣ̑рїѧ и҆сча́дїе, горды́ни предте́ча, въ приста́нищи и҆стопле́нїе, на гꙋмнѣ̀ мра́вїй, ма́лъ ѹ҆́бѡ сꙋ́щъ, на всѧ́къ же трꙋ́дъ и҆ пло́дъ навѣ̑тꙋющъ. Ѡ҆жида́етъ мра́вїй соверши́тисѧ пшени́цѣ: а҆ тщесла́вїе, собра́тисѧ бога́тствꙋ: занѐ, ѻ҆́въ ѹ҆́бѡ ра́дꙋетсѧ, да ѹ҆кра́детъ: сїе́ же да расточи́тъ.
г҃. Дꙋ́хъ ѿча́ѧнїѧ ра́дꙋетсѧ, зрѧ̀ ѹ҆множа́емꙋ ѕло́бꙋ: дꙋ́хъ же тщесла́вїѧ, ѹ҆множа́емꙋ добродѣ̑тель: две́рь бо пе́рвшагѡ, мно́жєства ꙗ҆́звъ: втора́гѡ же, бога́тство трꙋдѡ́въ.
д҃. Наблюда́й, и҆ да́же до гро́ба непреподо́бное сїѐ цвѣтꙋ́що ѡ҆брѧ́щеши, ри́зами, и҆ мѵ́ры, и҆ провожде́нїемъ, и҆ а҆рѡма́ты, и҆ и҆ны́ми.
є҃. Всѣ́мъ незави́стнѣ сїѧ́етъ со́лнце, и҆ ѡ҆ всѣ̑хъ ѹ҆хищре́нїихъ ра́дꙋетсѧ тщесла́вїе. Ꙗ҆коже что̀ гл҃ю: постѧ́сѧ тщесла́влюсѧ: и҆ разрѣша́ѧ да не позна́нъ бꙋ́дꙋ, ꙗ҆́кѡ мꙋ́дръ па́ки тщесла́влюсѧ. Во свѣ́тла ѻ҆дѣ̑ѧвсѧ, побѣжда́юсѧ та́кѡ: и҆ въ хꙋ̑да премѣнѧ́ѧсѧ, па́ки тщесла́влюсѧ. Бесѣ̑дꙋѧ, побѣжда́юсѧ: и҆ молча̀, па́ки побѣди́хсѧ. Ꙗ҆кѡ ни пове́ржеши се́й трезꙋ́бецъ, пра́въ ѻ҆сте́нъ стои́тъ.
ѕ҃. Тщесла́венъ є҆́сть, і҆дѡлослꙋжи́тель вѣ̑ренъ: бг҃а ѹ҆́бѡ мнѣ̑нїемъ че́ствꙋѧ, человѣ̑кѡмъ же, а҆ не бг҃ꙋ, ѹ҆гожда́ти хотѧ̀.
з҃. Тщесла́венъ є҆́сть, всѧ́къ любопоказа́теленъ: тщесла́вна по́стъ, без̾ мзды̀ є҆́сть: и҆ мл҃и́тва безвре́менна: похвалы́ бо ра́ди человѣ̑ческїѧ ѻ҆боѧ̀ дѣ̑лаетъ.
и҃. Тщесла́венъ подви́жникъ, ѡ҆би́дитсѧ сꙋгꙋ́бѡ: и҆ тѣ̑ло и҆стаева́ѧ, и҆ мзды̀ не прїе́млѧ.
ѳ҃. Кто̀ не посмѣе́тсѧ дѣ̑лателю тщесла́вїѧ, на ѱалмопѣ̑нїихъ стоѧ́щꙋ, и҆ ѿ негѡ̀ подвиза́емꙋ: ѻ҆вогда̀ ѹ҆́бѡ смѣѧ́тисѧ, ѻ҆вогда́ же пред̾ всѣ̑ми пла́кати.
і҃. Сокрыва́етъ гдⷭ҇ь ѿ ѻ҆че́съ на́шихъ мно́жицею и҆ ꙗ҆̀же стѧжа́хомъ дѡ́браѧ: мꙋ́жъ же похва́лникъ, па́че же преле́стникъ, похвало́ю ѻ҆чеса̀ на̑ша ѿве́рзе: си̑мъ же ѿве́рзєнымъ бы́вшымъ, безвѣ̑стно бога́тство ѻ҆́но бы́сть ѿ на́съ.
а҃і. Ласка́тель є҆́сть, бѣсѡ́въ слꙋжи́тель, горды́ни рꙋководи́тель, ѹ҆миле́нїѧ и҆стреби́тель, до́брыхъ потреби́тель, лсте́цъ пꙋтѝ: блажа́щїи бо ва́съ л̾стѧ́тъ вы̀, гл҃етъ прⷪ҇ро́къ.
в҃і. Высо́кихъ ѹ҆́бѡ є҆́сть, є҆́же терпѣ̑ти до́блественнѣ и҆ ра́достнѣ доса́дꙋ: ст҃ы́хъ и҆ прпⷣбныхъ, є҆́же без̾ вре́да прейтѝ похвалꙋ̀.
г҃і. Ви́дѣхъ пла́чꙋщихъ похвале́ныхъ бы́вшихъ, и҆ на гнѣ̑въ возже́гшихсѧ: и҆ ꙗ҆́коже на то́ржищи, стра́стїю стра́сть соизмѣ̑ншихъ.
д҃і. Никто́же вѣ̑сть ꙗ҆̀же въ человѣ̑цѣ, то́чїю дꙋ́хъ человѣ̑ка. Да посрамлѧ́ютсѧ ѹ҆̀бо и҆ ѡ҆бꙋздава́ютсѧ, въ лицѐ бл҃жи́ти покꙋша́ющїисѧ.
На девятом часе:
є҃і. Є҆гда̀ ѹ҆слы́шиши ꙗ҆́кѡ бли́жнїй тво́й и҆ дрꙋ́гъ ѹ҆корѝ тебѐ ѿсꙋ́тствꙋюща и҆лѝ присꙋ́тствꙋюща, тогда̀ любо́вь покажѝ похвали́въ є҆го̀.
ѕ҃і. Вели́ко є҆́сть, є҆́же ѿтрѧстѝ ѿ дꙋшѝ похвалꙋ̀ человѣ̑ческꙋ: бо́лше же, похвалꙋ̀ бѣсо́вскꙋ (ѿврати́ти).
з҃і. Смиренномꙋ́дрїе показа̀, не и҆́же са́мъ себѐ ѡ҆хꙋжда́ѧй: ка́кѡ бо са́мъ себѐ не стерпи́тъ; но и҆́же ѿ и҆но́гѡ поноше́нъ бы́вый, и҆ любо́вь къ немꙋ̀ не ѹ҆ма́ливый.
и҃і. Назна́менахъ бѣ̑са тщесла́вїѧ, по́мыслы бра́тꙋ подме́щꙋща, и҆ и҆но́мꙋ та̑ ѿкры́вша, и҆ ѻ҆́номꙋ сердє́чнаѧ є҆гѡ̀ рещѝ сотво́рша, и҆ ꙗ҆́кѡ пред̾ꙋвѣ̑дника про́чее сего̀ бл҃жа́ща. Ѻ҆вогда̀ и҆ са́михъ тѣле́сныхъ ѹ҆де́съ прикаса́ѧсѧ, трепєта́нїѧ твори́ти непреподо́бный се́й ѡ҆бы́че.
ѳ҃і. Да не прїи́меши того̀, є҆пⷭ҇кпство тебѣ̀ и҆ и҆гꙋ́менство и҆ ѹ҆чи́телство подме́щꙋщаго: трꙋ́дъ бо є҆́сть пса̀ ѿ мѧсопрода́лищныѧ трапе́зы прогна́ти.
к҃. Повнегда̀ ма́лѡ нѣ̑что ми́рно ѹ҆ви́дитъ и҆мꙋ́щихъ ѹ҆строе́нїе, а҆́бїе ѿ пꙋсты́ни въ мі́ръ прїитѝ побꙋжда́етъ: пойдѝ, глаго́лѧ, на спасе́нїе погиба́ющихъ дꙋ́шъ.
к҃а. И҆́нъ є҆́сть ѻ҆́бразъ, а҆ и҆́нъ человѣкоподо́бїй (стоѧ̑лъ): та́кѡ и҆́нъ є҆́сть ѻ҆́бразъ тщесла́вїѧ и҆ пребыва́ющихъ во ѻ҆бщежи́тїи, и҆ ѻ҆́нагѡ сꙋ́щихъ въ пꙋсты́нѧхъ.
к҃в. Мїрски́хъ прихождє́нїѧ предварѧ́етъ тщесла́вїе, и҆ ле́гшыѧ мона́хи въ срѣ̑тенїе грѧдꙋ́щихъ побꙋжда́етъ и҆зы́ти, пред̾ нога́ми ѻ҆́нѣхъ сотворѧ́етъ припа́дати, и҆ въ смире́нїе ѡ҆блека́етсѧ ѻ҆́но горды́ни и҆спо́лненное: нра́въ и҆ гла́съ ѡ҆прѧ́тиваетъ, и҆ на рꙋ́ки прише́дшихъ ра́ди є҆́же взѧ́ти взира́етъ, влады̑ки нарица́етъ и҆ предста́тели, и҆ по бг҃ꙋ живо́тъ да́рꙋющѧ: на трапе́зѣ сѣ̑дшихъ воздержава́тисѧ побꙋжда́етъ: и҆ ни́зшымъ неми́лостивнѡ запреща́етъ: на ѱалмопѣ̑нїи ста́вшихъ, лѣни̑выѧ мꙋ́жествєнны сотворѝ: безгла̑сныѧ красногла̑сны, и҆ дрема́тєлныѧ бѡ́дры. Сꙋ́щаго над̾ пра́виломъ, ласка́етъ: и҆ пе́рвства є҆мꙋ̀ пода́ти ѹ҆молѧ́етъ, ѻ҆тце́мъ и҆ ѹ҆чи́телемъ нарица́етъ, до ѿше́ствїѧ стра́нныхъ.
к҃г. Предпочита́емыхъ, го́рдыхъ сотворѝ: и҆ презира́емыхъ памѧтоѕло́бныхъ показа̀.
к҃д. Тщесла́вїе, вмѣ̑стѡ че́сти, мно́жицею безче́стїѧ бы́сть вино́вно: разгнѣ̑вавшымсѧ бо ѹ҆ченикѡ́мъ свои̑мъ сра́мъ вели́къ принесѐ.
к҃є. Тщесла́вїе, лю̑тыѧ, пред̾ человѣ̑ки крѡ́тки содѣ̑ла.
к҃ѕ. Къ є҆сте́ствєннымъ дарова́нїємъ приска́киваетъ велмѝ, и҆ чрез̾ сїѧ̑ мно́жицею ѡ҆каѧ́нныхъ си́хъ пове́рже.
к҃з. Ви́дѣхъ бѣ̑са, бра́та своегѡ̀ ѡ҆печа́ливша и҆ прогна́вша: гнѣ̑вающꙋсѧ бо нѣ̑когда нѣ̑коемꙋ бра́тꙋ, междꙋ̀ си́мъ мїрски́хъ прише́ствїе слꙋчи́сѧ, и҆ тщесла́вїю ѿ гнѣ̑ва препродаде́сѧ ѡ҆каѧ́нный се́й: є҆динодꙋ́шнѡ бо си́ма порабо́тати не можа́ше.
к҃и. Тщесла́вїю прода́выйсѧ, сꙋгꙋ́бо житїѐ и҆́мать: съ мона́хи ѹ҆́бѡ пребыва́ѧ ѻ҆́бразомъ, въ мі́рѣ же мꙋдрова́нїемъ и҆ помышле́нїемъ.
к҃ѳ. А҆́ще къ вы́шнемꙋ бл҃гоꙋгожде́нїю тещѝ тщи́мсѧ, то̀ вы́шнїѧ сла́вы всѧ́кѡ и҆ вкꙋ́симъ: ѻ҆́ныѧ бо вкꙋси́вый, всѧ́кꙋ назе́мнꙋю презрѣ̑ти и҆́мать: чꙋждꙋ́сѧ бо а҆́ще пе́рвшїѧ кто̀ не вкꙋси́въ, всѧ́кꙋ вторꙋ́ю презрѣ̑лъ є҆́сть.
л҃. Мно́жицею ѿ тщесла́вїѧ ѡ҆кра́дени бы́вше, ѡ҆бра́щшесѧ мы̀ быстроꙋ́мнѣе то̀ ѡ҆крадо́хомъ. Ви́дѣхъ нѣ̑кихъ, дѣ̑ланїе дх҃о́вно ѿ тщесла́вїѧ наче́ншихъ: и҆ нача́лꙋ положе́нꙋ бы́вшꙋ поро́чнꙋ, коне́цъ бы́сть похва́ленъ: за є҆́же пренесе́нꙋ бы́ти ра́зꙋмꙋ ѻ҆́номꙋ.
л҃а. И҆́же ѡ҆ є҆сте́ственныхъ многшеи́мствахъ, гл҃ю же, ѻ҆строꙋ́мїи, ѹ҆добоꙋче́нїи, чте́нїи, произноше́нїи, быстроразꙋ́мїи, и҆ таковы́хъ всѣ̑хъ, безтрꙋ́днѣ сꙋ́щихъ въ на́съ, возноша́ѧйсѧ, никогда́же вышеесте́ствєннаѧ бла̑га полꙋчи́тъ: невѣ̑рный бо въ ма́лѣ, и҆ во мно́зѣ невѣ̑ренъ є҆́сть, и҆ тщесла́венъ.
л҃в. Безстра́стїѧ ра́ди кра́йнѣйша, и҆ бога́тства дарова́нїй, и҆ чꙋде́съ дѣ̑йства, и҆ пред̾ꙋвѣ̑дѣнїѧ си́лы, нѣ̑цыи тѣлеса̀ своѧ̑ всꙋ́е и҆знꙋрѧ́ютъ: неꙋвѣ̑дѣвше ѻ҆каѧ́ннїи (себѐ), ꙗ҆́кѡ не трꙋдѝ, но па́че смире́нїе таковы́хъ (бла̑гъ) ма́ти є҆́сть.
л҃г. И҆́же да́ры за трꙋды̀ и҆спроша́ѧй, прибѣ̑дственно положѝ ѡ҆снова́нїе: а҆ и҆́же должника̀ себѐ бы́ти помышлѧ́ѧй, неча́ѧнно бога́тство и҆ внеза́пно прїи́метъ.
л҃д. Не повинꙋ́йсѧ вѣ̑ѧтелю семꙋ̀, на по́льзꙋ слы́шащихъ, добродѣ̑тєли ѡ҆б̾ѧвлѧ́ти под̾ꙋща́ющемꙋ: что́ бо спо́льзꙋетъ человѣ̑къ, а҆́ще ве́сь мі́ръ по́лзовати и҆́мать, себе́ же ѿтщети́тъ; Ничто́же та́кѡ, ꙗ҆́коже смире́нъ и҆ непритво́ренъ нра́въ и҆ сло́во зрѧ́щихъ созида́ти мо́жетъ: быва́етъ бо и҆ и҆нѣ́мъ по́мощь є҆́же никогда́же возноша́тисѧ: є҆гѡ́же что́ бы (въ винꙋ̀) по́льзы, бо́лше могло̀ бы́ти;