Если чтения отсутствуют - значит, по данному дню еще не были добавлены тексты.
На третьем часе:
Ѡ҆ несказа́нныхъ по́мыслѣхъ хꙋ́лныхъ.
л҃ѳ. Лю́та ко́рене и҆ ма́тере, лютѣ̑йшо и҆сча́дїе бы́ти въ предва́ршихъ слы́шахомъ: гл҃ю же, скве́рныѧ горды́ни, неизрече́нно хꙋлы̀ и҆сча́дїе: тѣ̑мже нꙋ́ждно є҆́сть томꙋ̀ на средꙋ̀ приведе́нꙋ бы́ти: не бо ѿ приклю́чшихсѧ є҆́сть, но ѹ҆́бѡ мно́гѡ и҆ всѣ̑хъ лю́тшъ вра́гъ и҆ сꙋпоста́тъ є҆́сть. и҆ є҆́же ѹ҆́бѡ лютѣ̑йшее, нижѐ ѹ҆до́бнѣ сказа́тисѧ и҆ и҆сповѣ̑стисѧ, и҆лѝ ѡ҆б̾ѧви́тисѧ могꙋ́що: тѣ̑мже мнѡ́зѣмъ мно́жицею и҆ ѿча́ѧнїе и҆ безнаде́жїе родило̀ є҆́сть: ꙗ҆́коже че́рвь во дре́вѣ всю̀ и҆́хъ наде́ждꙋ и҆стреби́вшо непреподо́бное сїѐ.
м҃. Сїѐ ѹ҆̀бо сїѐ всескве́рное ѡ҆бы́че мно́жицею, въ са̑маѧ та̑ ст҃а̑ѧ собра̑нїѧ, и҆ въ са́мый то́й стра́шный та̑инъ ѻ҆́нѣхъ ча́съ хꙋ́лити гдⷭ҇а, и҆ соверша́ємаѧ ст҃а̑ѧ. Ѿѻнꙋ́дꙋже наипа́че и҆ разꙋмѣва́емъ ꙗ҆́вѣ, не дꙋ́шꙋ на́шꙋ сꙋ́щꙋ беззакѡ́ннаѧ и҆ непостижи̑маѧ ѻ҆́на и҆ неизречє́нна словеса̀ внꙋ́трьꙋдꙋ провѣща́вшꙋю: но бг҃оненави́стнаго бѣ̑са съ нб҃съ бѣжа́вшаго: за є҆́же и҆ та́мѡ гдⷭ҇а хꙋла́ми по мнѣ̑нїю (своемꙋ̀) ѹ҆да́рити. А҆́ще бо моѧ̑ сꙋ́ть безчє́стнаѧ ѻ҆́на и҆ неподѡ́бнаѧ словеса̀, то̀ ка́кѡ да́ръ ѻ҆́нъ прїе́мъ покланѧ́юсѧ; Ка́кѡ ѹ҆корѧ́ти и҆ бл҃гослови́ти могꙋ̀;
м҃а. Мно́гихъ преле́стникъ се́й и҆ дꙋшетли́тель во и҆зстꙋпле́нїе ѹ҆ма̀ приведѐ мно́жицею: ниеди́нъ бо и҆́нъ по́мыслъ та́кѡ неꙋдобоисповѣ̑дꙋемь є҆́сть ꙗ҆́коже се́й: тѣ̑мже мно́жицею со мно́зѣми и҆ состарѣ̑лсѧ є҆́сть: ничто́же бо та́кѡ бѣсовѡ́мъ и҆ помыслѡ́мъ крѣ̑пость на ны̀ дае́тъ, ꙗ҆́коже є҆́же сїѧ̑ неисповѣ̑дꙋємы въ се́рдцѣ пита́ти и҆ таи́ти.
м҃в. Никто́же за по́мыслы хꙋ̑лны, себѐ вино́вна бы́ти да вознепщꙋ́етъ: сердцевѣ̑децъ бо є҆́сть гдⷭ҇ь, и҆ вѣ̑сть не на́шѧ бы́ти, но врагѡ́въ на́шихъ такѡвы́ѧ глаго́лы.
м҃г. Є҆́же ѹ҆пива́тисѧ, вино́вно є҆́сть сегѡ̀ є҆́же претыка́тисѧ: и҆ є҆́же гордѣ̑тисѧ, вино́вно є҆́сть неподо́бныхъ пѡ́мыслъ: и҆ за сїѐ ѹ҆́бѡ є҆́же претыка́тисѧ, непови́ненъ є҆́сть преткнꙋ́выйсѧ: за сїе́ же є҆́же ѹ҆пива́тисѧ, всѧ́кѡ мꙋ́ченъ бꙋ́детъ.
м҃д. На мл҃и́твѣ ста́вшымъ на́мъ, нечи́стїи и҆ неизрече́ннїи по́мысли ѻ҆́ни на ны̀ воста́ша: и҆ мл҃твꙋ и҆спо́лнившымъ, а҆́бїе ѿидо́ша: съ нера́тꙋющимисѧ бо съ ни́ми, не ѡ҆быко́ша ра́товатисѧ.
м҃є. Не то́чїю бг҃а, и҆ бжⷭ҇твєннаѧ всѧ̑ безбо́жный се́й хꙋ́литъ, но и҆ стꙋ̑днѣйша нѣ́каѧ и҆ неподѡ́бна словеса̀ въ на́съ вѣща́етъ мы́сленнѣ: ꙗ҆́кѡ да и҆лѝ мл҃и́твꙋ ѡ҆ста́вимъ, и҆лѝ са́мѣхъ себѐ ѿча́емсѧ.
м҃ѕ. Мно́зѣхъ ѹ҆́бѡ ѿ мл҃и́твы возбрани́лъ є҆́сть, мно́зѣхъ же ѿ та̑инъ ѿлꙋчи́лъ є҆́сть: нѣ̑кихъ ѹ҆́бѡ тѣлеса̀ печа́лїю и҆ста́ѧ, и҆нѣ̑хъ же посто́мъ ѹ҆мꙋ́чилъ є҆́сть лꙋка́вый се́й и҆ безчеловѣ̑чный мꙋчи́тель: и҆ ниеди́но тѣ́мъ послабле́нїе дадѐ.
м҃з. Не то́чїю въ сꙋ́щихъ въ мі́рѣ, но и҆ мона́шеское житїѐ проходѧ́щихъ сїѐ содѣ̑лавъ: ниеди́но тѣ́мъ про́чее спасе́нїе и҆мѣ̑ти совѣ̑тꙋѧ: но и҆ невѣ̑рныхъ и҆ є҆́ллинъ всѣ̑хъ ѻ҆каѧ́ншихъ бы́ти со и҆зрече́нїемъ глаго́лѧ.
м҃и. И҆́же дꙋ́хомъ хꙋлы̀ стꙋжа́емый, и҆ ѿ негѡ̀ и҆зба́витисѧ хотѧ́й, да позна́етъ и҆звѣ̑стнѡ, не дꙋ́шꙋ свою̀ вино́внꙋ бы́ти таковы́хъ помыслѡ́въ, но са́маго нечи́стаго бѣ̑са, нѣ̑когда ко гдⷭ҇ꙋ глаго́лавшаго: сїѧ̑ всѧ̑ тебѣ̀ да́мъ, а҆́ще па́дъ поклони́шимисѧ. Тѣ̑мже и҆ мы̀ ѹ҆ничижа́юще є҆го̀, и҆ ника́коже ꙗ҆̀же ѿ негѡ̀ глаго́лємаѧ въ радѣ̑нїи и҆мꙋ́ще, рце́мъ: и҆дѝ за мно́ю сатано̀, гдⷭ҇ꙋ бг҃ꙋ моемꙋ̀ поклоню́сѧ, и҆ томꙋ̀ є҆ди́номꙋ послꙋжꙋ̀: твоѧ́ же ѡ҆брати́тсѧ болѣ̑знь и҆ сло́во твоѐ на главꙋ̀ твою̀, и҆ на ве́рхъ тво́й хꙋла̀ твоѧ̀ сни́детъ и҆ въ ны́нѣшнїй и҆ въ бꙋ́дꙋщїй вѣ̑къ.
м҃ѳ. И҆́же кромѣ̀ предрече́ннагѡ ѻ҆́браза бѣ̑са хꙋлы̀ боре́нїемъ побѣди́ти хотѧ́й, подо́бенъ є҆́сть рꙋка́ма свои́ма мо́лнїю ѹ҆держа́ти покꙋша́ющемꙋсѧ: ка́кѡ бо и҆ пости́гнетъ и҆лѝ противорече́тъ, и҆лѝ боро́тисѧ и҆́мать со внеза́пꙋ въ се́рдцѣ а҆́ки вѣ̑тръ преходѧ́щимъ, и҆ мгнове́нїѧ скорѣ̑е сло́во глаго́лющимъ, и҆ а҆́бїе и҆счеза́ющимъ; Вси́ бо сꙋпоста́ти и҆ стоѧ́тъ, и҆ противобо́рютсѧ, и҆ коснѧ́тъ, и҆ вре́мѧ подаю́тъ проти́вꙋ тѣ́мъ боро́тисѧ подвиза́ющемꙋсѧ: се́й же нѝ, но кꙋ́пнѡ со є҆́же ꙗ҆ви́тисѧ, ѿстꙋпи́лъ є҆́сть, и҆ кꙋ́пнѡ со є҆́же съ ни́мъ проглаго́лати, пре́йде.
н҃. Мно́жицею въ про́стшихъ и҆ неѕло́бившихъ ѹ҆мѣ̀, таковы́й бѣ̑съ пребыва́ти ѡ҆бы́че: и҆́же и҆ наипа́че лю́тѣе и҆нѣ̑хъ, мѧтꙋ́тсѧ и҆ смꙋща́ютсѧ: въ ни́хже и҆ гл҃емъ, сво́йственнѣ не ѿ возноше́нїѧ, но ѿ за́висти бѣсѡ́въ всемꙋ̀ семꙋ̀ быва́ти.
н҃а. Ѿ є҆́же сꙋди́ти и҆ ѿ є҆́же ѡ҆сꙋжда́ти бли́жнѧго преста́нимъ, и҆ пѡ́мыслъ хꙋ́лныхъ не ѹ҆бои́мсѧ: вина́ бо и҆ ко́рень є҆́сть, втора́гѡ пе́рвшее.
н҃в. Ꙗ҆коже въ домꙋ̀ затворе́нъ сы́й, внѣ̀ преходѧ́щихъ словеса̀ слы́шитъ, са́мъ съ ни́ми не вѣща́ѧ: та́кѡ и҆ дꙋша̀ въ себѣ̀ пребыва́ющи, хꙋлы̑ бѣ̑са сегѡ̀ слы́шащи смꙋща́етсѧ, ꙗ҆̀же вѣща́етъ сквозѣ̀ тꙋ̀ преходѧ́щъ.
н҃г. Ѹ҆ничижи́вый сего̀, ѿ стра́сти сеѧ̀ свободи́сѧ: и҆́накѡ же съ ни́мъ боро́тисѧ ѹ҆хищрѧ́ѧй, въ коне́цъ подлежи́тъ. И҆́же словеса̀ дꙋхѡ́въ ѹ҆держа́ти хотѧ́й, подо́бенъ є҆́сть вѣ̑тры затворѧ́ющемꙋ.
н҃д. Мона́хъ тщали́въ, ѿ сегѡ̀ стꙋжа́емь бѣ̑са до двадесѧ́тагѡ лѣ̑та, плѡ́ти своѧ̑ поще́нми и҆ бдѣ̑нми и҆ста́ѧ. Да ꙗ҆́кѡ ниеди́нꙋ по́льзꙋ ѡ҆щꙋтѝ, ше́дъ и҆ стра́сть сїю̀ на хартїѝ написа́въ, ст҃ꙋ нѣ̑коемꙋ мꙋ́жꙋ подадѐ, на лицѣ̀ лежа̀ и҆ на него̀ взира́ти не могі́й: и҆ ꙗ҆́коже прочтѐ ста́рецъ ѻ҆́нъ, ѡ҆скла́бисѧ: и҆ возста́вивъ бра́та сего̀, гл҃етъ къ немꙋ̀: возложѝ ча́до рꙋ́кꙋ твою̀ на мою̀ вы́ю: и҆ ꙗ҆́коже сїѐ бра́тъ то́й сотворѝ, гл҃етъ вели́кїй ѻ҆́нъ: на вы́и мое́й бра́те грѣ̑хъ се́й да бꙋ́детъ, є҆ли̑ка лѣ́та и҆ сотворѝ, и҆ сотвори́тъ въ тебѣ̀: то́чїю ты̀ того̀ въ радѣ̑нїи не ктомꙋ̀ и҆мѣ̑й. И҆ и҆звѣ̑ствоваше таковы́й, ꙗ҆́кѡ не пре́жде и҆з̾ ке́ллїи ста́рца ѻ҆́нагѡ и҆зы́де, доне́лѣже стра́сть ѻ҆́на неви́дима бы́сть. Сегѡ̀ во и҆скꙋ́сѣ бы́вый, мнѣ̀ и҆сповѣ̑да бл҃годарѧ̀ хрⷭ҇то́ви.
Побѣ̑дꙋ стра́сти сеѧ̀ прїе́мый, ѿри́нꙋлъ є҆́сть горды́ню.
На шестом часе:
СЛО́ВО К҃Д. Ѡ҆ кро́тости, и҆ простотѣ̀, и҆ неѕло́бїи, и҆ лꙋка́вствѣ, ѹ҆хищре́нныхъ, а҆ не є҆сте́ственныхъ.
Предтече́тъ ѹ҆́бѡ со́лнца, ѹ҆́треннїй свѣ̑тъ: всѧ́кагѡ же смиренномꙋ́дрїѧ, кро́тость є҆́сть предте́ча: тѣ̑мже и҆ свѣ̑та ѻ҆́наго ѹ҆слы́шимъ, та́кѡ ты̑ѧ степе́немъ ѻ҆́нымъ вчинѣва́юща: наꙋчи́тесѧ бо ѿ менѐ, гл҃етъ, ꙗ҆́кѡ кро́токъ є҆́смь и҆ смире́нъ се́рдцемъ: тѣ̑мже пра́ведно є҆́сть пре́жде со́лнца, ѡ҆ свѣ̑тѣ (се́мъ) просвѣти́тисѧ, та́же на со́лнцѣ ѻ҆́но воззрѣ̑ти ꙗ҆́снѣ: нѣ̑сть бо возмо́жно, нѣ̑сть, сегѡ̀ не пред̾ꙋвѣ̑дѣвшемꙋ, ѻ҆́но ѹ҆зрѣ̑ти: ꙗ҆́коже глаго́лемыхъ ѹ҆чи́тъ и҆́стинное ѹ҆строе́нїе.
в҃. Кро́тость є҆́сть, непрело́жно ѹ҆ма̀ ѹ҆строе́нїе, въ че́стехъ и҆ безче́стїихъ та́кожде сꙋ́щее.
г҃. Кро́тость є҆́сть въ смꙋще́нїихъ бли́жнѧгѡ неѡщꙋ́тнѣ и҆ чи́стѣ ѡ҆ не́мъ моли́тисѧ.
д҃. Кро́тость є҆́сть, превы́ше мо́рѧ ꙗ҆́рости лежа́щъ ка́мень: всѧ̑ приража́ющыѧсѧ (къ немꙋ̀) вѡ́лны разорѧ́ющъ, и҆ ника́коже колеба́нїе терпѧ́щъ.
є҃. Кро́тость є҆́сть, терпѣ̑нїѧ ѹ҆твержде́нїе, любвѐ две́рь, па́че же ма́ти: разсꙋжде́нїѧ вина̀: наꙋчи́тъ бо, гл҃етъ, гдⷭ҇ь крѡ́ткїѧ пꙋтє́мъ свои̑мъ. Ѿпꙋще́нїѧ вино́вна: дерзнове́нїе въ мл҃и́твѣ: дх҃а ст҃а вмѣсти́лище. На кі́ихъ бо воззрю̀, то́кмѡ на кро́ткаго и҆ безмо́лвнаго;
ѕ҃. Кро́тость є҆́сть, послꙋша́нїѧ содѣ̑йственница, бра́тства пꙋтеводи́телница, неи́стовѧщымсѧ ѹ҆зда̀, ꙗ҆рѧ́щымсѧ возбране́нїе, ра́дости пода́телница, хрⷭ҇та̀ подража́нїе, а҆́гг҃лъ сво́йство, бѣсѡ́мъ ѹ҆зда̀, и҆ проти́вꙋ го́рести щи́тъ.
з҃. Въ сердца́хъ кро́ткихъ, почі́етъ гдⷭ҇ь: дꙋша́ же мѧте́жлива, дїа́воле сѣда́лище.
и҃. Кро́тцыи наслѣ̑дѧтъ зе́млю, па́че же поѡблада́ютъ зе́млю: вознеи́стовившїисѧ же мꙋ́жїе, плѣнѧ́еми быва́ютъ ѿ землѝ и҆́хъ.
ѳ҃. Дꙋша̀ кро́тка, престо́лъ простоты̀: ѹ҆́мъ же гнѣвли́въ, содѣ̑тель лꙋка́вства.
і҃. Дꙋша̀ тиха̀, вмѣсти́тъ словеса̀ премꙋ́дрости: наста́витъ бо гдⷭ҇ь крѡ́ткїѧ на сꙋ́дъ, па́че же на разсꙋжде́нїе.
а҃і. Дꙋша̀ пра́ва, сожи́телница смире́нїѧ: лꙋка́ваѧ же, горды́ни є҆́сть ѻ҆трокови́ца.
в҃і. Дꙋ́ши кро́ткихъ, и҆спо́лнѧтсѧ ра́зꙋма: ꙗ҆́ростивъ же ѹ҆́мъ, тмы̀ и҆ неразꙋ́мїѧ сожи́тель.
г҃і. Ꙗ҆ростивъ и҆ рꙋга́тель, дрꙋгъдрꙋ́га срѣто́ста: и҆ не бѣ̀ возмо́жно ѡ҆брѣстѝ сло́во пра́во въ бесѣ̑дѣ и҆́хъ: разве́рзъ се́рдце пе́рвагѡ, ѡ҆брѧ́щеши неи́стовство: втора́гѡ же дꙋ́шꙋ и҆спыта́въ, ѹ҆́зриши лꙋка́вство.
д҃і. Простота̀ є҆́сть, ѻ҆бы́чай ѹ҆твержде́нъ дꙋшѝ неразли́чно, къ ѕлоꙋ́мїю бы́вшо неподви́жно.
є҃і. Лꙋка́вство є҆́сть вѣ̑жество, па́че же без̾ѻбра́зїе бѣсова́то, и҆́стины лиши́вшеесѧ, и҆ мно́гихъ таи́тисѧ мнѧ́щеесѧ.
ѕ҃і. Лицемѣ̑рїе є҆́сть, тѣ̑ла и҆ дꙋшѝ сопроти́вно ѹ҆строе́нїе, примышле́нми всѧ́цѣми ѡ҆плете́но.
з҃і. Неѕло́бїе є҆́сть, ти́хо дꙋшѝ ѹ҆строе́нїе, примышле́нїѧ всѧ́кагѡ свобо́дно сꙋ́ще.
и҃і. Пра́вость є҆́сть, нелюбопы́тенъ ра́зꙋмъ, чи́стъ ѻ҆бы́чай, непритво́рно и непред̾ꙋстроѧ́емо сло́во.
ѳ҃і. Нелꙋка́венъ є҆́сть, чи́сто є҆стество̀ дꙋшѝ, ꙗ҆́коже бы́сть созда́но, срѣ̑тєнїѧ ко всѣ́мъ творѧ́що.
к҃. Лꙋка́вство є҆́сть, пра́вости премѣне́нїе, прелще́нъ ра́зꙋмъ: ѡ҆ смотре́нїихъ лжꙋ́що: мꙋ́цѣ пови̑нны клѧ̑твы, сплетє́на словеса̀: глꙋбина̀ се́рдца, бе́здна ле́сти, ѹ҆сво́йствована лжа̀, є҆сте́ственно про́чее возноше́нїе, смире́нїѧ противобо́рно, покаѧ́нїѧ лицемѣ̑рїе, пла́ча ѹ҆дале́нїе, и҆сповѣ̑данїю вражда̀. Своеразꙋмочи́нно, паде́нїй вино́вно, воста́нїю сопроти́вно, доса́дамъ ѡ҆склабле́нїе, ѡ҆бꙋе́но сѣ̑тованїе, притво́рно бл҃гоговѣ̑нїе, бѣсова́то житїѐ.
к҃а. Лꙋка́въ є҆́сть, дїа́волꙋ соиме́нникъ и҆ соѡ́бщникъ: тѣ̑мже и҆ гдⷭ҇ь та́кѡ того̀ и҆менова́ти наꙋчѝ на́съ, глаго́лющихъ: и҆зба́ви на́съ ѿ лꙋка́вагѡ.
На девятом часе:
к҃в. Бѣжи́мъ ѿ стремни́ны лицемѣ̑рїѧ, и҆ ѿ ро́ва тайнолꙋка́вства, слы́шаще гл҃ющаго: лꙋка́внꙋющїи потребѧ́тсѧ, и҆ ꙗ҆́кѡ ѕе́лїе зла́ка ско́рѡ ѿпадꙋ́тъ: такові́и бо сꙋ́ть, па́жить бѣсѡ́мъ.
к҃г. Ꙗ҆коже любо́вїю бг҃ъ и҆менꙋ́етсѧ, та́кѡ и҆ пра́востїю: тѣ̑мже премꙋ́дрый ѻ҆́нъ въ пѣ̑снехъ гл҃етъ къ чи́стомꙋ се́рдцꙋ: пра́вость возлюби́ тѧ. И҆ па́ки, ѻ҆ц҃ъ сегѡ̀: бл҃гъ и҆ пра́въ гдⷭ҇ь. И҆ соимє́нныѧ є҆гѡ̀ спаса́ємы бы́ти гл҃етъ: гл҃етъ бо, спаса́ющагѡ пра̑выѧ се́рдцемъ: и҆ па́ки, правѡты̀ дꙋ́шъ ви́дѣ, и҆ посѣтѝ лицѐ є҆гѡ̀.
к҃д. Пе́рвое сво́йство дѣ̑тскагѡ возраще́нїѧ є҆́сть, простота̀ неразли́чна: ю҆́же до́ндеже и҆мѣ̑ѧше а҆да́мъ ѻ҆́нъ, не ви́дѣ наготы̀ дꙋшѝ своеѧ̀, нижѐ без̾ѻбра́зїѧ пло́ти своеѧ̀. Добра̀ ѹ҆́бѡ є҆́сть и҆ є҆стество́мъ въ нѣ̑кихъ сꙋ́щаѧ простота̀ и҆ бл҃же́ннаѧ: но не та́кѡ, ꙗ҆́коже ꙗ҆́же ѿ лꙋка́вства чрез̾ по́ты прецѣпи́вшаѧсѧ: занѐ, ѻ҆на̀ ѹ҆́бѡ ѿ мно́га разли́чїѧ и҆ страсте́й, покрыва́ема быва́етъ: сїѧ́ же, высоча́йша смиренномꙋ́дрїѧ и҆ кро́тости быва́етъ вино́вна: и҆ ѻ҆́нѣй ѹ҆́бѡ, не мно́га мзда̀ ѻ҆́на: се́й же прехва́лна.
к҃є. Всѝ гдⷭ҇а къ себѣ̀ привлещѝ хотѧ́щїи, про́стѣ и҆ непритво́рнѣ, и҆ неразли́чнѣ и҆ нелꙋка́внѣ: ꙗ҆́кѡ ко ѹ҆чи́телю во ѹ҆че́нїихъ, нелюбопы́тнѣ пристꙋпи́мъ: про́стъ бо сы́й и҆ несло́женъ, про́стыхъ нѣ̑кихъ и҆ неѕло́бивыхъ къ немꙋ̀ приходѧ́щихъ дꙋ́шъ хо́щетъ: нѣ̑сть бо возмо́жно простотꙋ̀ лише́нꙋ смире́нїѧ ѹ҆ви́дѣти когда̀.
к҃ѕ. Лꙋка́въ є҆́сть, прови́децъ лжи́въ, ѿ слове́съ по́мыслы, и҆ ѿ ѻ҆́бразъ сердє́чнаѧ, разꙋмѣва́ти мечта́ющсѧ.
к҃з. Ви́дѣхъ пра́выхъ ѿ лꙋка́выхъ лꙋка́вновати наꙋчи́вшихсѧ, и҆ помы́слихъ: ка́кѡ и҆ є҆стества̀ сво́йство и҆ пе́рвшество, та́кѡ ско́рѡ погꙋби́ти возмого́ша. Є҆ли́кѡ пра́вїи ѹ҆до́бь прелага́ютсѧ, толи́кѡ неꙋдо́бь сопроти́внїи претвори́тисѧ мо́гꙋтъ.
к҃и. Стра́нничество и҆́стинно, и҆ повинове́нїе, и҆ хране́нїе ѹ҆сте́нъ, мнѡ́га мно́жицею возмого́ша и҆ претвори́ша пресла́внѡ неисцѣ́лна.
к҃ѳ. А҆́ще ра́зꙋмъ кичи́тъ мно́гшыѧ: не ка́кѡ ли невѣ̑жство и҆ неꙋче́нїе смирѧ́ти ѹ҆мѣ̑реннѡ ѡ҆бы́че.
л҃. Ѹ҆каза́нїе и҆ предѣ̑лъ ꙗ҆́вственъ, и҆ ѻ҆́бразъ на́мъ бл҃же́нныѧ простоты̀, требл҃же́нный ѻ҆́нъ па́ѵелъ бы́сть просты́й: никто́же бо нигдѣ̑же такова̀ пред̾ꙋспѣ̑ѧнїѧ въ ма́лѣ, ни ви́дѣ, ни слы́ша, нижѐ ѹ҆ви́дѣти мо́жетъ когда̀.
л҃а. Про́стъ мона́хъ є҆́сть, ско́тъ слове́сенъ послꙋшли́въ, бре́мѧ своѐ соверше́ннѣ на води́телѧ (своего̀) ѿложи́въ: не противорече́тъ живо́тно вѧ́жꙋщемꙋ, ни дꙋша̀ пра́ва, настоѧ́телеви: послѣ̑дꙋетъ ведꙋ́щемꙋ, ꙗ҆́коже хо́щетъ, и҆ да́же до заколе́нїѧ, противоглаго́лати не вѣ̑сть.
л҃в. Неꙋдо́бь бога́тїи въ црⷭ҇тво, и҆ мꙋ́дри безꙋ́мни, въ простотꙋ̀ вни́дꙋтъ.
л҃г. Паде́нїе мно́жицею кова́рныхъ ѹ҆цѣломꙋ́дрило є҆́сть: нево́льнѡ тѣ́мъ спасе́нїе и҆ неѕло́бїе пода́вшо.
л҃д. Бори́сѧ прелща́ти мꙋ́дрость твою̀: и҆ та́кѡ творѧ̀, ѡ҆брѧ́щеши спасе́нїе и҆ пра́вость, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, а҆ми́нь.