Если чтения отсутствуют - значит, по данному дню еще не были добавлены тексты.
На третьем часе:
л҃є. Назна́мена нѣ̑кто ѿ зрѣ̑ти могꙋ́щихъ и҆ повѣ̑даше ви́дѣвый: ꙗ҆́кѡ, гл҃етъ, въ сосѣда́лищи мѝ сѣдѧ́щꙋ, прише́дше тщесла́вїѧ и҆ горды́ни бѣ̑сове, ѿ ѻ҆бою́дꙋ менѐ сѣдо́ста: и҆ ѻ҆́въ ѹ҆́бѡ толца́ше въ бо́къ мо́й пе́рстомъ свои́мъ ѻ҆́нѣмъ тщесла́внымъ побꙋжда́ѧ менѐ глаго́лати нѣ̑кое видѣ̑нїе и҆лѝ дѣ̑ланїе, є҆́же сотвори́хъ въ пꙋсты́ни: да ꙗ҆́коже сего̀ ѿри́нꙋхъ, ре́къ: да возвратѧ́тсѧ вспѧ́ть, и҆ постыдѧ́тсѧ помышлѧ́ющїи мѝ ѕла̑ѧ: то̀ скорѣ̑е и҆́же ѡ҆шꙋ́юю ко ѹ҆́хꙋ моемꙋ̀ глаго́лаше, бл҃гоже бл҃гоже сотвори́лъ є҆сѝ: и҆ вели́къ бы́лъ є҆сѝ, безстꙋ́днѣйшꙋю ма́терь мою̀ побѣди́въ. Къ немꙋ́ же а҆́зъ правопримѣ̑тнѣ про́чее стїха̀ сегѡ̀ воспрїе́мь рѣ̑хъ: да возвратѧ́тсѧ а҆́бїе стыдѧ́щесѧ, глаго́лющїи мѝ: бл҃гоже бл҃гоже сотвори́лъ є҆сѝ. Вопроси́вшꙋ же мѝ того́жде, ка́кѡ тщесла́вїе ма́ти є҆́сть горды́ни, ѿвѣща̀: похвалы̑ ѹ҆́бѡ возвыша́ютъ и҆ напыщава́ютъ: возвы́сившейсѧ же дꙋшѝ, тогда̀ тꙋ̀ горды́нѧ прїе́мши возво́дитъ до нб҃съ, и҆ низво́дитъ до бе́зднъ.
л҃ѕ. Є҆́сть сла́ва, ѿ гдⷭ҇а приходѧ́щаѧ: прославлѧ́ющыѧ бо мѧ̀ просла́влю, гл҃етъ: и҆ є҆́сть ѿ дїа́волска строе́нїѧ припослѣ̑дствꙋющаѧ: го́ре бо, гл҃етъ, є҆гда̀ до́брѣ рекꙋ́тъ ва́мъ всѝ человѣ̑цы. Позна́еши ꙗ҆́вѣ пе́рвшꙋю, внегда̀ тꙋ̀ ꙗ҆́кѡ вре́дъ бы́ти вмѣнѧ́ѧ, всѧ́цѣмъ ѹ҆хищре́нїемъ тоѧ̀ ѿврати́шисѧ: и҆ гдѣ̑ либо и҆́деши, жи́телство своѐ скрыва́еши: вторꙋ́ю же, внегда̀ а҆́ще и҆ что́ либо да ви́димь бꙋ́деши человѣ̑ки, дѣ̑лаеши.
л҃з. Притворѧ́ти на́мъ не сꙋ́щꙋю въ на́съ добродѣ̑тель, скве́рное сїѐ совѣ̑тꙋетъ: та́кѡ бо, глаго́летъ, да просвѣти́тсѧ свѣ̑тъ ва́шъ пред̾ человѣ̑ки, ꙗ҆́кѡ да ви́дѧтъ дѡ́браѧ ва̑ша дѣла̀ под̾ꙋща́ющо.
л҃и. Мно́жицею гдⷭ҇ь тщесла̑вныѧ безче́стїемъ приключа́ющимсѧ, въ нетщесла́вїе ѹ҆стро́и.
л҃ѳ. Нача́ло нетщесла́вїѧ, хране́нїе ѹ҆́стъ, и҆ безче́стїѧ любле́нїе: среда́ же, пресѣче́нїе всѣ̑хъ помышлѧ́емыхъ тщесла́вїѧ ѹ҆хищре́нїй: коне́цъ же, и҆ є҆́сть ли бе́зднѣ се́й коне́цъ, є҆́же къ безче́стїю прили́чєствꙋющаѧ пред̾ мно́жествомъ ѹ҆хищрѧ́ти неѡщꙋ́тнѣ.
м҃. Не кры́й сра́ма твоегѡ̀, за є҆́же мнѣ̑тисѧ не даѧ́ти претыка́нїѧ: про́чее же и҆ по ви́дꙋ согрѣше́нїѧ, не то́йжде пла́стырь не́гли ѹ҆потреби́ти подоба́етъ.
м҃а. Внегда̀ мы̀ сла́вꙋ сїю̀ призыва́емъ: и҆ є҆гда̀ незва́ннѣ ѿ и҆нѣ̑хъ провожда́ема къ на́мъ прихо́дитъ: (и҆) є҆гда̀ къ тщесла́вїю ѹ҆хищрє́нїѧ нѣ́каѧ твори́ти покꙋ́симсѧ, то̀ пла́чь сво́й (помѧ́нимъ) и҆ стра́шнагѡ ѻ҆́нагѡ во ѻ҆со́бнѣй мл҃и́твѣ на́шей предстоѧ́нїѧ помышле́нїе воспрїи́мемъ вско́рѣ: и҆ всѧ́кѡ посрами́мъ безстꙋ́дное сїѐ а҆́ще ѹ҆́бѡ и҆ ѡ҆ мл҃и́твѣ и҆́стиннѣй прилѣжи́мъ: а҆́ще ли же нѝ: то̀ ѡ҆ и҆схо́дѣ свое́мъ вско́рѣ помышле́нїе прїи́мемъ: а҆́ще ли же нѝ, то̀ понѐ сра́ма припослѣ̑дствꙋющагѡ тщесла́вїю ѹ҆бои́мсѧ. Возносѧ́й бо себѐ ѿню́дъ смири́мсѧ, и҆ здѣ̀ пре́жде бꙋ́дꙋщагѡ вѣ̑ка.
м҃в. Є҆гда̀ похва̑лницы, па́че же преле́стницы хвали́ти на́съ на́чнꙋтъ: то̀ мно́жество беззако́нїй на́шихъ во ѹ҆мѣ̀ вско́рѣ помѧни́мъ, и҆ ѡ҆брѧ́щемъ себѐ недосто́йныхъ, глаго́лемыхъ и҆лѝ дѣ̑емыхъ.
м҃г. Сꙋ́ть и҆ тщесла́вни, въ нѣ̑кихъ проше́нїихъ свои́хъ, всѧ́кѡ ѹ҆слы́шани бы́ти ѿ бг҃а до́лжни сꙋ́ще, и҆́хже гдⷭ҇ь предварѧ́ти мл҃и̑твы и҆ молє́нїѧ ѡ҆бы́че: да не мл҃твою прїе́мше, къ своемꙋ̀ и҆́хъ возноше́нїю приложа́тъ.
м҃д. Про́стшїи, не ѕѣлѡ̀ въ ꙗ҆́дъ се́й впа́дати ѡ҆быко́ша: тщесла́вїе бо є҆́сть простоты̀ погꙋбле́нїе, и҆ притво́рно пребыва́нїе.
м҃є. Че́рвь мно́жицею возра́стшъ, ѡ҆крила́тѣвъ вознесе́сѧ на высотꙋ̀: и҆ тщесла́вїе соверши́вшосѧ, горды́ню родило̀ є҆́сть, всѣ̑хъ ѕѡ́лъ нача́лницꙋ и҆ соверши́телницꙋ.
м҃ѕ. И҆́же недꙋ́га сегѡ̀ внѣ̀ є҆́сть, ближа́йше є҆́сть спасе́нїѧ: а҆ и҆́же нѣ̑сть, то̀ дале́че ꙗ҆ви́сѧ ѿ сла́вы ст҃ы́хъ.
Степе́нь два́десѧть вторы́й є҆́сть. Не ꙗ҆́тъ бы́вый тѣ̑мъ не впаде́тъ во враждꙋ́ющꙋю на бг҃а безгла́внꙋю горды́ню.
На шестом часе:
СЛО́ВО К҃Г. Ѡ҆ безгла́внѣй горды́ни, въ не́мже и҆ ѡ҆ нечи́стыхъ по́мыслѣхъ хꙋ́лныхъ.
Горды́нѧ є҆́сть, бг҃а ѿверже́нїе: бѣсо́вско и҆з̾ѡбрѣ̑тенїе, ѹ҆ничиже́нїе человѣ́къ, ѡ҆сꙋжде́нїѧ ма́ти: похва́лъ и҆сча́дїе, безпло́дїѧ зна́менїе: по́мощи бж҃їѧ прогони́телство, и҆зстꙋпле́нїѧ предте́ча: паде́нїй вино́вна: бѣснова́нїѧ вина̀, ꙗ҆́рости и҆сто́чникъ. Лицемѣ̑рїѧ две́рь, бѣсѡ́въ ѹ҆твержде́нїе: грѣхѡ́въ храни́телница: немилосе́рдїѧ вино́вна: милосе́рдїѧ невѣ̑дѣнїе: словоистѧза́тель го́рекъ, сꙋдїѧ̀ безчеловѣ̑ченъ: бг҃а сопротивобо́рецъ: хꙋлы̀ ко́рень.
в҃. Нача́ло горды́ни, коне́цъ тщесла́вїѧ: среда́ же, ѹ҆ничиже́нїе бли́жнѧгѡ: трꙋдѡ́въ свои́хъ безстꙋ́дно и҆з̾ѧвле́нїе, хвала̀ въ се́рдцѣ: ѡ҆бличе́нїѧ не́нависть: коне́цъ же, ѿверже́нїе бж҃їѧ по́мощи, и҆ тща́нїѧ своегѡ̀ возноше́нїе: бѣсова́тъ нра́въ.
г҃. Ѹ҆слы́шимъ всѝ, ѿ ро́ва сегѡ̀ и҆збѣжа́ти хотѧ́щїи: ѿ бл҃годаре́нїѧ мно́жицею стра́сть сїѧ̀ па́жить ѡ҆бы́че прїима́ти: безстꙋ́днѣ бо ѿ нача̑лъ, бг҃а ѿверга́тисѧ не под̾ꙋща́етъ. Ви́дѣхъ бл҃годарѧ́щихъ бг҃ови ѹ҆сты̀, и҆ велехвалѧ́щихсѧ мꙋдрова́нїемъ: и҆ свидѣ̑телствꙋетъ сїѐ ꙗ҆́вѣ фарїсе́й ѻ҆́нъ, ре́къ (ле́стнѣ), бж҃е бл҃годарю̀ тебѣ̀.
д҃. И҆дѣ̑же паде́нїе дости́же, та́мѡ горды́нѧ предвсели́сѧ: возвести́тель бо пе́рвшагѡ, є҆́сть второ́е.
є҃. Предложи́ ми бы́ти двана́десѧть страсте́й безче́стїѧ: нѣ̑коего почте́нна слы́шахъ ре́кша. А҆́ще є҆ди́нꙋ и҆з̾ си́хъ, гл҃ю же возноше́нїе возлю́биши во́лею, то̀ ѻ҆на̀ и҆спо́лнитъ мѣ̑сто ѻ҆́нѣхъ є҆динона́десѧтихъ.
ѕ҃. Высокомꙋ́дръ мона́хъ, прекосло́витъ ѕѣлѡ̀: смиренномꙋ́дрый же, ника́коже прекосло́вити вѣ̑сть.
з҃. Не подкланѧ́етсѧ кѷпарі́съ, на землѝ ходи́ти: нижѐ мона́хъ высокосе́рдъ, послꙋша́нїе стѧжа́ти.
и҃. Мꙋ́жъ высокосе́рдъ, нача́лствовати жела́етъ: и҆́накѡ бо нѣ̑какѡ, поги́бнꙋти вконе́цъ, не мо́жетъ: па́че же не хо́щетъ.
ѳ҃. Гѡ́рдымъ гдⷭ҇ь проти́витсѧ: кто̀ про́чее си́хъ поми́ловати мо́жетъ; Нечи́стъ пред̾ гдⷭ҇емъ всѧ́къ высокосе́рдъ: и҆ кто̀ про́чее такова́го ѡ҆чи́стити мо́жетъ;
і҃. Наказа́нїе ѹ҆́бѡ го́рдꙋ є҆́сть паде́нїе: ѻ҆сте́нъ же бѣ̑съ: ѡ҆ставле́нїе же и҆зстꙋпле́нїе. И҆ ѿ пе́рвшихъ ѹ҆́бѡ, мно́жицею и҆ человѣ̑цы ѿ челѡвѣ̑къ и҆сцѣли́шасѧ: послѣ̑днее же, ѿ челѡвѣ̑къ неисцѣ̑лно є҆́сть.
а҃і. Ѿрѣва́ѧй ѡ҆бличе́нїе, стра́сть сїю̀ и҆з̾ѧви́лъ є҆́сть: притекі́й же, ѿ ѹ҆́зы сеѧ̀ разрѣше́нъ є҆́сть.
в҃і. А҆́ще без̾ и҆ны́ѧ стра́сти нѣ̑кто се́ю и҆ є҆ди́ною съ нб҃съ спадѐ, то̀ и҆спыта́ти подоба́етъ не ка́кѡ ли и҆ без̾ и҆ны́ѧ добродѣ̑тели смире́нїемъ на нб҃са̀ восходи́ти возмо́жно є҆́сть.
г҃і. Горды́нѧ є҆́сть, бога́тства и҆ по́тѡвъ поги́бель: воззва́ша, и҆ не бѣ̀ спаса́ѧй, всѧ́кѡ, занѐ съ горды́нею. Воззва́ша ко гдⷭ҇ꙋ, и҆ не ѹ҆слы́ша и҆́хъ: всѧ́кѡ, занѐ ви́нъ ѻ҆́нѣхъ на нѧ́же молѧ́хꙋсѧ не ѿсѣка́хꙋ. Бра́та гордѧ́щасѧ, ста́рецъ разꙋмѣва́телнѣйшъ, дх҃о́внѣ поꙋчѝ: ѻ҆́нъ же слѣпотствꙋ́ѧ, гл҃етъ: простѝ мѧ̀ ѻ҆́ч҃е, нѣ̑смь го́рдъ.
д҃і. Всепремꙋ́дрый же ѻ҆́нъ ста́рецъ къ немꙋ̀: и҆ ко́е, гл҃етъ, ча́до, ѹ҆каза́нїе ꙗ҆́вственше сегѡ̀ пода́лъ бы є҆сѝ на́мъ стра́сти сеѧ̀, па́че є҆́же рещѝ, нѣ̑смь го́рдъ.
є҃і. Ѕѣлѡ̀ таковы̑мъ прили́чествꙋетъ повинове́нїе, и҆ дебе́лше и҆ безче́стн̾ше пребыва́нїе: и҆ вышеесте́ственныхъ ѻ҆те́ческихъ и҆справле́нїй прочита́нїе: не́гли понѐ та́кѡ бꙋ́детъ недꙋ́гꙋющымъ си̑мъ ма́ла спасе́нїѧ наде́жда.
На девятом часе:
ѕ҃і. Сра́мъ є҆́сть ѡ҆ чꙋ́ждей ѹ҆́твари возноша́тисѧ: безꙋ́мїе же послѣ̑днее, ѡ҆ дарова́нїихъ бж҃їихъ кичи́тисѧ. Є҆ли̑ка тѝ и҆справлє́нїѧ пре́жде рожде́нїѧ твоегѡ̀ бы́ша, ѡ҆ тѣ̑хъ є҆ди́нѣхъ возноша́йсѧ: ꙗ҆̀же бо по рожде́нїи, бг҃ъ дарова̀, ꙗ҆́коже и҆ рожде́нїе. Є҆ли̑ка кромѣ̀ ѹ҆ма̀ добродѣ̑тєли и҆спра́вилъ є҆сѝ, то̀ ты̑ѧ и҆ є҆ди̑ны твоѧ̑ сꙋ́ть, ѹ҆́мъ бо бг҃ъ дарова́вый є҆́сть. Є҆ли̑ки кромѣ̀ тѣ̑ла показа́лъ є҆сѝ по́двиги, то̀ ѿ твоегѡ̀ тща́нїѧ и҆ то́чїю бы́ша, тѣ̑ло бо, нѣ̑сть твоѐ, но бж҃їе творе́нїе.
з҃і. Не дерза́й до́ндеже и҆зрече́нїе ѻ҆́но прїи́меши, зрѧ̀ ѻ҆́наго и҆ по возлежа́нїи въ черто́зѣ ѻ҆́нѣмъ рꙋка́ма и҆ нога́ма свѧзꙋ́ема и҆ во тмꙋ̀ кромѣ̑шнюю и҆згонѧ́ема.
и҃і. Не возвыша́й вы́ю, зе́мленъ сы́й: мно́зи бо и҆ съ нб҃съ све́ржени бы́ша, ст҃и и҆ невеще́ственни сꙋ́ще.
ѳ҃і. Є҆гда̀ вмѣще́нїе въ дѣ̑лателѣхъ свои́хъ бѣ̑съ се́й прїи́метъ, тогда̀ тѣ́мъ во снѣ̑хъ, и҆лѝ и҆ наѧ́вѣ ꙗ҆́кѡ во ѻ҆́бразѣ а҆́ки бы ст҃а а҆́гг҃ла и҆лѝ и҆ мч҃ника нѣ̑коего ꙗ҆влѧ́ѧсѧ, та̑инъ тѣ́мъ ѿкрове́нїе, и҆ дарова́нїй да́ръ подае́тъ: ꙗ҆́кѡ да прелсти́вшесѧ ѻ҆каѧ́ннїи сі́и, соверше́ннѣ ѿ ѹ҆ма̀ и҆спадꙋ́тъ.
к҃. А҆́ще и҆ безчи́слєнны смє́рти за хрⷭ҇та̀ претерпи́мъ, то̀ ни та́кѡ подоба́ющее и҆спо́лнихомъ: и҆́но бо є҆́сть кро́вь бж҃їѧ, а҆ и҆́но кро́вь рабѡ́въ: по досто́инствꙋ а҆ не по сꙋществꙋ̀.
к҃а. Соиспытꙋ́ще себѐ при́снѡ, и҆ и҆стѧзꙋ́юще къ бы́вшымъ пре́жде на́съ ѻ҆ц҃є́мъ и҆ свѣти́лѡмъ, не преста́нимъ: и҆ тогда̀ ѡ҆брѧ́щемъ себѐ ѿню́дъ ни слѣда̀ ѻ҆па́сна жи́телства настꙋпи́вшихъ, ни ѡ҆бѣ̑та сегѡ̀ преподо́бнѣ соблю́дшихъ: но є҆щѐ въ мїрстѣ̑мъ ѹ҆строе́нїи пребыва́ющихъ.
к҃в. Мона́хъ сво́йственнѣ є҆́сть, невы́симо ѻ҆́ко дꙋшѝ и҆ неподви́жно тѣ̑ла чꙋ́вство.
к҃г. Мона́хъ є҆́сть и҆́же сꙋпоста́тѡвъ а҆́ки ѕвѣре́й призыва́ѧй, и҆ раздража́ѧй внегда̀ бѣ̑гати ѿ негѡ̀.
к҃д. Мона́хъ є҆́сть, неразстоѧ́нно восхище́нїе ѹ҆ма̀, и҆ печа́ль жи́зни.
к҃є. Мона́хъ є҆́сть, ѹ҆сво́йствовавыйсѧ добродѣ̑тельми, ꙗ҆́коже и҆́нъ сластмѝ.
к҃ѕ. Мона́хъ є҆́сть, непреста́ненъ свѣ̑тъ, во ѻ҆́цѣ се́рдца.
к҃з. Мона́хъ є҆́сть, бе́здна смире́нїѧ, въ не́й всѧ́каго дꙋ́ха низри́нꙋвшъ и҆ потопи́вшъ.
к҃и. забве́нїе согрѣше́нїй, киче́нїе дѣ̑лаетъ: ѻ҆́нѣхъ бо па́мѧть, смиренномꙋ́дрїѧ вино́вна є҆́сть.
к҃ѳ. Горды́нѧ є҆́сть послѣ̑днее ѹ҆бо́жество дꙋшѝ, бога́тство (мечта́ющїѧ, и҆ свѣ̑тъ) мнѧ́щїѧ бы́ти во тмѣ̀.
л҃. Не то́чїю пред̾итѝ не ѡ҆ставлѧ́етъ скве́рнаѧ сїѧ̑, но и҆ съ высоты̀ сверга́етъ.
л҃а. Го́рдъ є҆́сть ши́покъ, внꙋ́трь ѹ҆́бѡ согни́вшъ, и҆з̾ внѣꙋ́дꙋ же красото́ю блеща́щсѧ.
л҃в. Мона́хъ го́рдъ, не востре́бꙋетъ бѣ̑са: са́мъ бо про́чее себѣ̀ бѣ̑съ и҆ сꙋпоста́тъ бы́сть.
л҃г. Чꙋ́жда ѹ҆́бѡ є҆́сть свѣ̑та тма̀: чꙋ́ждь же и҆ го́рдый, разли́чныѧ добродѣ̑тели.
л҃д. Въ сердца́хъ го́рдыхъ, роди́тисѧ и҆́мꙋтъ хꙋ̑лни глагѡ́ли: въ дꙋша́хъ же смире́нныхъ, нб҃сна видѣ́нїѧ.
л҃є. Гнꙋша́етсѧ со́лнца та́ть, го́рдъ же, кро́ткихъ ѹ҆ничижи́тъ.
л҃ѕ. Не ѹ҆вѣ̑дѣша са́мѣхъ себѐ не вѣ̑мъ ка́кѡ и҆з̾ го́рдыхъ мно́жайши: и҆ возмнѣ̑вшесѧ безстра́стни бы́ти, ѹ҆бо́жество своѐ во и҆схо́дѣ ѹ҆ви́дѣша.
л҃з. Се́ю ꙗ҆́тъ бы́вый, гдⷭ҇а востре́бꙋетъ: сꙋ́етно бо кромѣ̀ ѻ҆́нагѡ спасе́нїе человѣ̑ческо.
л҃и. Ꙗ҆хъ нѣ̑камѡ сїю̀ безгла́внꙋю преле́стницꙋ сꙋ́щꙋю въ се́рдцѣ мое́мъ, и҆ на ра́мꙋ ма́тере своеѧ̀ ꙗ҆здѧ́щꙋю: ꙗ҆̀же ѹ҆лови́въ ѹ҆́зою послꙋша́нїѧ, и҆ биче́мъ хꙋ́дости би́въ, вхо́дъ и҆́хъ въ менѐ и҆стѧ́зовахъ глаго́лати: тѣ̑мже и҆ бїє́мы сꙋ́ще глаго́лахꙋ: мы̀ нача́ла не и҆́мамы, ни рожде́нїѧ: нача̑лницы бо и҆ роди́тєлницы всѣ̑хъ страсте́й є҆смы̀. ра́тꙋетъ же на́съ не ма́лѡ сокрꙋше́нїе се́рдца повинове́нїемъ ражда́емо: нача́лствꙋємы же бы́ти ни ѿ чесогѡ̀ терпи́мъ: тѣ̑мже и҆ на нб҃сѣ̑хъ нача̑лницы сотво́ршесѧ ѿѻнꙋ́дꙋ ѿстꙋпи́хомъ: тѣ̑мже и҆ всѣ̑хъ соѡб̾ѧ́тнѣ рещѝ, сопротивлѧ́ющихсѧ смиренномꙋ́дрїю, мы̀ роди́тєлницы є҆смы̀: всѧ̑ бо ѻ҆́номꙋ содѣ́йствꙋющаѧ, на́мъ сопротивлѧ́ютсѧ: ѻ҆ба́че на нб҃сѝ возмого́хомъ, и҆ ка́мѡ ѿ лица̀ на́шегѡ ѹ҆бѣжи́ши; Мы̀ мно́жицею по безче́стїихъ, и҆ послꙋша́нїи, и҆ безгнѣ̑вїи, и҆ непамѧтоѕло́бїи, и҆ слꙋже́нїи, припослѣ̑дствовати ѡ҆быко́хомъ. На̑ша и҆сча̑дїѧ сꙋ́ть, падє́нїѧ дх҃о́вныхъ, гнѣ̑въ, клевета̀, го́ресть, ꙗ҆́рость, во́пль, хꙋла̀, лицемѣ̑рїе, не́нависть, за́висть, прекосло́вїе, своечи́нїе, непоко́рство. Є҆ди́но є҆́сть и҆ є҆ди́нственно, на не́же покꙋша́тисѧ не и҆́мамы си́лы, и҆ сїѐ тебѣ̀ бїє́мы сꙋ́ще глаго́лемъ: а҆́ще са́мъ себѐ пред̾ гдⷭ҇емъ чи́стѣ ѹ҆корѧ́еши, то̀ на́съ ꙗ҆́кѡ паꙋчи́нꙋ вмѣни́ши: занѐ, ко́нь ѹ҆́бѡ, ꙗ҆́коже зри́ши, горды́ни, є҆́сть тщесла́вїе, на не́же всѣдо́хъ: прпⷣбное же смире́нїе и҆ самоꙋкоре́нїе, посмѣе́тасѧ коню̀ и҆ вса́дникꙋ є҆гѡ̀, побѣ̑днꙋю ѻ҆́нꙋ пѣ̑снь со сла́достїю пою́ще: пои́мъ гдⷭ҇ви, сла́внѡ бо просла́висѧ: конѧ̀ и҆ вса́дника вве́рже въ мо́ре, и҆ въ бе́зднꙋ смире́нїѧ.
Два́десѧть тре́тїй степе́нь є҆́сть: возше́дый ѹ҆крѣпи́лсѧ є҆́сть, а҆́ще ѹ҆́бѡ и҆ взы́ти возмо́же.