Если чтения отсутствуют - значит, по данному дню еще не были добавлены тексты.
На третьем часе:
с҃. Мо́щно є҆́сть всѣ̑ми на́шими ꙗ҆̀же по є҆стествꙋ̀, ꙗ҆́вственнѣ ѡ҆ мы́сленныхъ наꙋча́тисѧ.
с҃а. Ꙗ҆коже ѕмі́ю невозмо́жно є҆́сть ве́тхости своеѧ̀ совлещи́сѧ, въ тѣ̑снꙋ сква́жню не влѣ̑зшꙋ: та́кѡ и҆ мы̀ вє́тхаѧ предпрїѧ̑тїѧ, и҆ ве́тхость дꙋшѝ, и҆ ри́зꙋ ве́тхагѡ человѣ̑ка не ѿве́ржемъ, а҆́ще ѹ҆́зкагѡ и҆ тѣ̑снагѡ поста̀ и҆ безче́стїѧ пꙋ́ть не про́йдемъ.
с҃в. Ꙗ҆коже многоплѡ́тнымъ и҆з̾ пти̑цъ на нб҃о возлетѣ̑ти невозмо́жно є҆́сть: та́кѡ и҆ пло́ти свое́й ѹ҆гожда́ющемꙋ.
с҃г. И҆зсо́хши ти́на, не ктомꙋ̀ свинїѧ́мъ ѹ҆гожда́етъ: и҆ ѹ҆вѧ́дши пло́ть, не ктомꙋ̀ бѣ̑сы ѹ҆покоева́етъ.
с҃д. Ꙗ҆коже полѣ́нъ мно́жество мно́жицею сподавлѧ́етъ пла́мень, и҆ ѹ҆гаша́етъ, мно́жество ды́ма содѣ̑лавшо: та́кѡ мно́жицею и҆ печа́ль вышемѣ̑рна, дымова́тꙋ и҆ те́мнꙋ дꙋ́шꙋ дѣ̑лаетъ, и҆ во́дꙋ сле́зъ и҆зсꙋша́етъ.
с҃є. Ꙗ҆коже слѣ̑пъ стрѣле́цъ, неискꙋ́сенъ є҆́сть: та́кѡ (и҆) ѹ҆чени́къ прекосло́вѧщъ, погиба́етъ.
с҃ѕ. Ꙗ҆коже желѣ̑зо и҆скꙋ́сно, и҆ неискꙋ́сное наѡстри́ти мо́жетъ: та́кѡ (и҆) бра́тъ ѹ҆се́рденъ, лѣни́ваго мно́жицею спасѐ.
с҃з. Ꙗ҆коже ꙗ҆́ица въ нѣ̑дрѣ грѣ̑єма ѡ҆животворѧ́ютсѧ: та́кѡ и҆ по́мысли не ѡ҆б̾ѧвлѧ́еми въ дѣла̀ происхо́дѧтъ.
с҃и. Ꙗ҆коже ко́ни текꙋ́ще, є҆ди́ни съ дрꙋги́ми ретѧ́тсѧ: та́кѡ (и҆) дрꙋжи́на бла́га са́мꙋ себѐ побꙋжда́етъ.
с҃ѳ. Ꙗ҆коже ѻ҆́блацы покрыва́ютъ со́лнце: та́кѡ (и҆) лꙋка̑ваѧ помышлє́нїѧ, помрача́ютъ и҆ погꙋблѧ́ютъ ѹ҆́мъ.
с҃і. Ꙗ҆коже и҆зрече́нїе прїе́мый, и҆ на ѡ҆сꙋжде́нїе и҆ды́й, не бесѣ̑дꙋетъ ѡ҆ позо́рищахъ: та́кѡ ни и҆́же вои́стиннꙋ пла́чай, чре́во ѹ҆поко́итъ когда̀.
са҃і. Ꙗ҆коже ѹ҆бо́зи сокрѡ́вища ца̑рска зрѧ́ще, наипа́че нищетꙋ̀ свою̀ познава́ютъ: та́кѡ и҆ дꙋша̀ вели̑кїѧ ѻ҆тє́цъ добродѣ̑тєли чтꙋ́щи, ѿню́дъ смире́нше твори́тъ мꙋдрова́нїе своѐ.
св҃і. Ꙗ҆коже и҆ не хотѧ́що желѣ̑зо, повинꙋ́етсѧ магни́тꙋ: та́кѡ и҆ ѹ҆ка́чествовавшїисѧ предпрїѧ́тїи, мꙋчи́телствꙋеми быва́ютъ ѿ ни́хъ.
сг҃і. Ꙗ҆коже є҆ле́й и҆ нехотѧ́що мо́ре ѹ҆крощева́етъ: та́кѡ и҆ по́стъ, и҆ невѡ́лна ѹ҆гаша́етъ тѣлє́снаѧ раждиза̑нїѧ.
сд҃і. Ꙗ҆коже ѹ҆тѣснѧ́ема вода̀, на высотꙋ̀ востека́етъ: та́кѡ мно́жицею и҆ дꙋша̀ ѿ бѣ̑дъ ѹ҆тѣсне́на бы́вши, ко бг҃ꙋ покаѧ́нїемъ взы́де и҆ спасе́сѧ.
сє҃і. Ꙗ҆коже а҆рѡма́ты носѧ́й, и҆ не хотѧ̀ ѿ вонѝ тоѧ̀ ѡ҆б̾ѧвлѧ́емь быва́етъ: та́кѡ и҆ дх҃а гдⷭ҇нѧ и҆мѣ̑ѧй, ѿ слове́съ свои́хъ и҆ смире́нїѧ познава́емь быва́етъ.
сѕ҃і. Ꙗ҆коже вѣ̑три смꙋща́ютъ бе́зднꙋ: та́кѡ и҆ ꙗ҆́рость мно́жае всѣ̑хъ, смꙋща́етъ ѹ҆́мъ.
сз҃і. Ꙗ҆коже тѣ̑хъ ꙗ҆̀же ѻ҆́ко не ви́дѣ, ни горта́нь ѕѣлѡ̀ ѿ слꙋ́ха жела́етъ вкꙋси́ти: та́кѡ и҆ чи́стїи тѣ̑ломъ, мно́го ѿ сегѡ̀ ѡ҆блегче́нїе и҆́мꙋтъ.
си҃і. Ꙗ҆коже ѻ҆рꙋ̑жїѧ ца́рска на мѣ̑стѣ нѣ̑коемъ лежа̑ща зрѧ́ще та́тїе, не ꙗ҆́коже бы приключи́лосѧ та́мѡ нахо́дѧтъ: та́кѡ и҆ съ се́рдцемъ мл҃и́твꙋ совокꙋпи́вый, не ꙗ҆́коже бы приключи́лосѧ, ѿ мы́сленныхъ разбѡ́йникъ ѡ҆крада́емь быва́етъ.
сѳ҃і. Ꙗ҆коже не ражда́етъ ѻ҆́гнь снѣ̑га, та́кѡ ни и҆́же здѣ̑шнїѧ и҆ща́й че́сти, та́мошнїѧ наслажда́тисѧ и҆́мать.
с҃к. Ꙗ҆коже є҆ди́на и҆́скра ѻ҆́гненна мно́жицею мно́го вещество̀ сожжѐ: та́кѡ и҆ є҆ди́но бл҃го ѡ҆брѣта́етсѧ мно́жество вели́кихъ согрѣше́нїй и҆згла́дившо.
ск҃а. Ꙗ҆коже нѣ̑сть мо́щно без̾ ѻ҆рꙋ́жїѧ ѕвѣ́ри погꙋби́ти: та́кѡ ни без̾ смире́нїѧ, безгнѣ̑вїе стѧжа́ти.
ск҃в. Ꙗ҆коже нѣ̑сть возмо́жно жи́ти по є҆стествꙋ̀ без̾ снѣ̑ди: та́кѡ нѣ̑сть возмо́жно да́же до и҆схо́да понѐ во мгнове́нїи вознерадѣ̑ти.
ск҃г. Ꙗ҆коже лꙋча̀ со́лнечна сква́жнею вше́дши въ хра́минꙋ, всѧ̑ просвѣща́етъ, ꙗ҆́кѡ и҆ тонча́йшїй зрѣ̑ти тогда̀ пра́хъ лета́ющъ: та́кѡ и҆ стра́хъ гдⷭ҇нь въ се́рдце прише́дъ, всѧ̑ томꙋ̀ грѣхѝ є҆гѡ̀ показꙋ́етъ.
ск҃д. Ꙗ҆коже глаго́лемїи ра́ки ѹ҆добое́млеми быва́ютъ, за є҆́же, ѻ҆вогда̀ ѹ҆́бѡ напре́дъ ходи́ти, ѻ҆вогда́ же наза́дъ: та́кѡ и҆ дꙋша̀, ѻ҆вогда̀ ѹ҆̀бо смѣю́щисѧ, ѻ҆вогда́ же пла́чꙋщи, ѻ҆вогда́ же, наслажда́ющисѧ, никꙋ́ю же по́л̾зꙋ воз̾имѣ̑ти мо́жетъ.
ск҃є. Ꙗ҆коже спѧ́щїи, ѹ҆до́бь ѡ҆крада́еми быва́ютъ: та́кѡ и҆ бли́зъ мі́ра добродѣ̑тель проходѧ́щїи.
ск҃ѕ. Ꙗ҆коже со лво́мъ ра́тꙋѧйсѧ, а҆́ще ѹ҆клони́тсѧ ѻ҆́комъ, а҆́бїе погиба́етъ: та́кѡ и҆ и҆́же съ пло́тїю свое́ю ра́тꙋѧйсѧ, а҆́ще тꙋ̀ ѹ҆поко́итъ.
На шестом часе:
ск҃з. Ꙗ҆коже на лѣ̑ствицꙋ восходѧ́щїи гни́лꙋ, бѣ̑дствовати и҆́мꙋтъ: та́кѡ (и҆) всѧ́ка че́сть и҆ сла́ва и҆ могꙋ́тство, смиренномꙋ́дрїю сопротивлѧ́ютсѧ.
ск҃и. Ꙗ҆коже невозмо́жно є҆́сть а҆́лчꙋщемꙋ, не помина́ти хлѣ̑ба: та́кѡ невозмо́жно є҆́сть спасти́сѧ, и҆схо́да и҆ сꙋда̀ не помина́ющемꙋ.
ск҃ѳ. Ꙗ҆коже вода̀ пи́смена, та́кѡ слеза̀ согрѣшє́нїѧ, и҆зглажда́ти мо́жетъ.
с҃л. Ꙗ҆коже нѣ́каѧ и҆з̾ пи́сменъ, не и҆мꙋ́ще воды̀, и҆нѣ̑ми ѻ҆́бразы и҆зглажда́емъ: та́кѡ сꙋ́ть и҆ дꙋ́ши лиша́ющесѧ сле́зъ, и҆ печа́лїю, и҆ воздыха́нїемъ, и҆ мно́гимъ сѣ̑тованїемъ та̑ и҆зглажда́ютъ и҆ и҆стреблѧ́ютъ.
сл҃а. Ꙗ҆коже мно́жество гно́ѧ, мно́жество че́рвїѧ дѣ̑лаетъ: та́кѡ (и҆) мно́жество бра́шенъ, мно́жество паде́нїй и҆ лꙋка́выхъ пѡ́мыслъ и҆ со́нїй дѣ̑лаетъ.
сл҃в. Ꙗ҆коже нога́ма ѡ҆кова́нный, ходи́ти ѹ҆до́бь не мо́жетъ: та́кѡ и҆ сокро́виществꙋющїи пѣ́нѧзи, на нб҃о взы́ти не мо́гꙋтъ.
сл҃г. Ꙗ҆коже горѧ́щаѧ ра́на, ѹ҆добьисцѣлѧ́ема быва́етъ: та́кѡ и҆ многовре́мєнныѧ ꙗ҆̀звы дꙋшє́вныѧ сопроти́вное стра́ждꙋтъ, и҆ неꙋдо́бь и҆сцѣлѧ́ємы быва́ютъ, є҆гда̀ и҆ и҆сцѣлѣ̑ютъ.
сл҃д. Ꙗ҆коже нѣ̑сть возмо́жно ѹ҆мира́ющемꙋ ходи́ти, та́кѡ невозмо́жно є҆́сть ѿча́ѧвшемꙋсѧ спасти́сѧ.
сл҃є. И҆́же вѣ̑рꙋ ѹ҆́бо пра́вꙋ и҆мѣ̑ти глаго́лѧй, грѣхи́ же содѣва́ѧй, подо́бенъ є҆́сть лицꙋ̀ ѻ҆́чїю неимꙋ́щемꙋ: и҆́же вѣ̑ры не и҆мѣ̑ѧй, дѡ́браѧ же не́гли нѣ́каѧ дѣ̑лаѧй, подо́бенъ є҆́сть во́дꙋ че́рплющемꙋ, и҆ въ де́лвꙋ провертѣ̑ннꙋ влива́ющемꙋ.
сл҃ѕ. Ꙗ҆коже кора́бль, бла́га ко́рмчїѧ и҆мѣ̑ѧ, безбѣ̑днѣ въ приста́нище бг҃ꙋ содѣ̑йствꙋющꙋ вхо́дитъ: та́кѡ и҆ дꙋша̀, бла́га па́стырѧ и҆мꙋ́щи, ѹ҆до́бь на нб҃о восхо́дитъ, а҆́ще и҆ мнѡ́га ѕла̑ содѣ̑ѧвши є҆́сть.
сл҃з. Ꙗ҆коже не и҆мѣ̑ѧй пꙋтеводи́телѧ, ѹ҆до́бь на пꙋтѝ заблꙋжда́етъ, а҆́ще и҆ ѕѣлѡ̀ мꙋ́дръ є҆́сть: та́кѡ и҆ самовла́стнѣ пꙋте́мъ мона́шескимъ ходѧ́й, ѹ҆до́бь погиба́етъ, а҆́ще и҆ всю̀ премꙋ́дрость мі́ра сегѡ̀ вѣ̑сть.
сл҃и. Внегда̀ кто̀ тѣ̑ломъ не́мощенъ, и҆ лю̑та согрѣшє́нїѧ содѣ̑ѧвъ, то̀ пꙋте́мъ смире́нїѧ, и҆ сво́йствы є҆гѡ̀ да ше́ствꙋетъ, и҆но́гѡ бо спасе́нїѧ не ѡ҆брѧ́щетъ.
сл҃ѳ. Ꙗ҆коже нѣ̑сть возмо́жно до́лгимъ недꙋ́говавшемꙋ недꙋ́гомъ, въ є҆ди́номъ мгнове́нїи здра́вїе стѧжа́ти: та́кѡ нѣ̑сть возмо́жно внеза́пꙋ стра̑сти и҆лѝ стра́сть ѡ҆долѣ̑ти.
с҃м. Всѧ́кїѧ стра́сти и҆ всѧ́кїѧ добродѣ̑тели и҆мѣ̑й зна́менїе коли́чества, и҆ ѹ҆вѣ̑си своѐ пред̾ꙋспѣѧ́нїе.
см҃а. Ꙗ҆коже зла́томъ бре́нїе и҆мѣнѧ́ющїи, ѿщетѣва́ютсѧ: та́кѡ и҆ тѣле́сныхъ ра́ди, дх҃ѡ́внаѧ позо́рствꙋющїи и҆ сказꙋ́ющїи.
см҃в. Ѿпꙋще́нїе ѹ҆́бѡ вско́рѣ мно́зи, безстра́стїе же никто́же стѧжа́лъ є҆́сть: сїѧ́ бо ве́щь вре́мене, и҆ любвѐ мно́ги, и҆ бг҃а тре́бꙋетъ.
см҃г. И҆спыта́имъ, кі́и ѹ҆́бѡ въ сѣ̑ѧтвꙋ, кі́и же во вре́мѧ зла́ка, кі́и же въ жа́твꙋ на ны̀ ѕвѣ̑ри и҆лѝ пти̑цы навѣ̑тꙋютъ.
см҃д. Ꙗ҆коже нѣ̑сть пра́веднѡ ѻ҆гневи́цею жего́момꙋ, са́маго себѐ ѹ҆би́ти: та́кѡ да́же до послѣ̑днѧгѡ и҆здыха́нїѧ не подоба́етъ ѿча́ѧтисѧ когда̀.
см҃є. Ꙗ҆коже безче́стно є҆́сть ѻ҆тца̀ своего̀ погре́бшемꙋ, та́же ѿ погребе́нїѧ тогѡ̀ возврати́вшꙋсѧ на бра́къ ходи́ти: та́кѡ неприли́чнѡ є҆́сть пла́чꙋщымъ ѡ҆ согрѣше́нїихъ, че́сть, и҆лѝ поко́й, и҆лѝ сла́вꙋ, въ настоѧ́щемъ вѣ̑цѣ взыска́ти ѿ челѡвѣ̑къ.
см҃ѕ. Ꙗ҆коже и҆́на гражда́нѡвъ, а҆ и҆́на ѡ҆сꙋжде́нникѡвъ сꙋ́ть жили̑ща: та́кѡ ѿню́дъ до́лжно є҆́сть премѣне́но бы́ти пла́чꙋщихъ ѡ҆ вина́хъ ѻ҆со́бнѣ ѿ непови́нныхъ, ѹ҆строе́нїе.
см҃з. Ꙗ҆коже во́ина на лицѣ̀ свое́мъ прїе́мшаго ра̑ны лю̑ты на бра́ни, не повелѣва́етъ цр҃ь ѿ вои́нствованїѧ ѿверга́ема бы́ти, но и҆ па́че пред̾ꙋспѣва́ти: та́кѡ и҆ мона́ха, мнѡ́ги бѣды̑ ѿ бѣсѡ́въ терпѧ́щаго, нбⷭ҇ный цр҃ь вѣнчава́етъ.
см҃и. Чꙋ́вство дꙋшѝ є҆́сть, сво́йство є҆ѧ̀: грѣ̑хъ же чꙋ́вства заꙋше́нїе. Соѡщꙋще́нїе ражда́етъ, ѕла̀ и҆лѝ преста́тїе, и҆лѝ ѹ҆мале́нїе: соѡщꙋще́нїе же є҆́сть, рожде́нїе со́вѣсти. Со́вѣсть же є҆́сть, сло́во и҆ ѡ҆бличе́нїе храни́телѧ на́шегѡ, ѿ кр҃ще́нїѧ пре́даннагѡ на́мъ: тѣ̑мже нижѐ толи́кѡ непросвѣще́нныхъ ѡ҆брѣта́емъ бїе́мыхъ ѡ҆ ѕлы́хъ дѣѧ́нїихъ въ дꙋшѝ свое́й: но неѧ́снѣ нѣ̑какѡ.
см҃ѳ. И҆ ѹ҆мале́нїе ѹ҆́бѡ ѕла̀, ражда́етъ ѹ҆дале́нїе ѿ ѕла̀: ѹ҆дале́нїе же ѿ ѕла̀, нача́ло є҆́сть покаѧ́нїѧ: нача́ло же покаѧ́нїѧ, нача́ло є҆́сть спасе́нїѧ: нача́ло же спасе́нїѧ є҆́сть, предложе́нїе бл҃го: предложе́нїе же бл҃го, роди́тель є҆́сть трꙋдѡ́въ: трꙋдѡ́въ же нача́ло, сꙋ́ть добродѣ̑тєли: нача́ло же добродѣ̑телей, цвѣ̑тъ є҆́сть: цвѣ̑тъ же добродѣ̑тели є҆́сть, дѣ̑ланїе: добродѣ̑тели же рожде́нїе є҆́сть, ча́стость: ча́стагѡ же ѡ҆бꙋче́нїѧ пло́дъ и҆ рожде́нїе є҆́сть, неꙋдобопрелага́емо дꙋшѝ завѣща́нїе: и҆́мства же рождество̀ є҆́сть ѹ҆сво́йствованїе. Добра́ же ѹ҆ка́чествованїе є҆́сть, роди́тель стра́ха: стра́хъ же ражда́етъ блюде́нїе за́повѣдей, нбⷭ҇ныхъ гл҃ю же и҆ земны́хъ: за́повѣдей хране́нїе, зна́менїе є҆́сть любвѐ: любве́ же нача́ло, мно́жество є҆́сть смире́нїѧ: мно́жество же смире́нїѧ, ма́ти є҆́сть безстра́стїѧ: сегѡ́ же стѧжа́нїе є҆́сть, любвѐ и҆сполне́нїе: си́рѣчь бж҃їе соверше́нно вселе́нїе, во ѻ҆́нѣхъ безстра́стїемъ чи́стыхъ се́рдцемъ: ꙗ҆́кѡ ті́и бг҃а ѹ҆́зрѧтъ: томꙋ̀ сла́ва во вѣ̑ки вѣкѡ́въ, а҆ми́нь.
На девятом часе:
СЛО́ВО К҃З. Ѡ҆ сщ҃е́ннѣмъ тѣ̑ла и҆ дꙋшѝ безмо́лвїи.
Мы̀ ꙗ҆́коже при́снѡ кꙋпе́жни нѣ̑цыи непреподо́бныхъ страсте́й сꙋ́ще, и҆ рабѝ поддрꙋ́жни бы́вше, ѿ сегѡ̀ и҆ лє́сти, и҆ ѻ҆́бразы, и҆ повелѣ́нїѧ, и҆ кова̑рства ѿча́сти вѣ̑мы, дꙋхѡ́въ влады́чествовавшихъ ѡ҆каѧ́нною дꙋше́ю на́шею: и҆́ни бо сꙋ́ть дѣ̑йствомъ дх҃а ст҃а, и҆ ѿ си́хъ и҆збавле́нїемъ, ѡ҆ ко́знехъ и҆́хъ просвѣти́вшїисѧ: занѐ и҆́нъ ѹ҆̀бо є҆́сть ѿ сꙋ́щїѧ въ недꙋ́зѣ болѣ̑зни, поко́й здра́вїѧ разсмотрѣва́ѧй: а҆ и҆́нъ ѿ сꙋ́щагѡ во здра́вїи благодꙋ́шїѧ, сꙋ́щꙋю въ недꙋ́зѣ печа́ль разꙋмѣва́ѧй, и҆ примѣча́ѧй. Мы̀ ѹ҆́бѡ ꙗ҆́кѡ не́мощни сꙋ́ще, бои́мсѧ къ ва́мъ ны́нѣ ѡ҆ приста́нищи безмо́лвїѧ въ сло́вѣ се́мъ любомꙋ́дрствовати: вѣ̑дѧще при́снѡ предстоѧ́ти нѣ̑кого пса̀ ѹ҆ трапе́зы до́брыѧ сеѧ̀ дрꙋжи́ны: и҆ хлѣ̑бъ, си́рѣчь дꙋ́шꙋ ѿ неѧ̀ восхища́ти покꙋша́ющасѧ: и҆ сего̀ ѹ҆сты̀ носѧ́ща про́чее ѿтека́юща, и҆ въ безмо́лвїи сего̀ ꙗ҆дꙋ́ща. Тѣ̑мже да не псꙋ̀ семꙋ̀ мѣ̑сто сло́вомъ на́шимъ да́мы, и҆ винꙋ̀ и҆́щꙋщымъ: непра́ведно вознепщева́хомъ бы́ти къ на бра́ни се́й сꙋ́щымъ, бл҃годꙋ̑шнымъ цр҃ѧ̀ на́шегѡ ра́тникѡмъ, ѡ҆ ми́рѣ ны́нѣ бесѣ̑довати: ѻ҆́но же то́чїю гл҃емъ: ꙗ҆́кѡ крѣ̑пцѣ ра́тꙋющымсѧ, ми́ра и҆ тишины̀ соплето́шасѧ вѣнцы̀. Ꙗ҆коже разсꙋжде́нїѧ ѹ҆̀бо ѻ҆́бразомъ, а҆́ще ѹ҆го́дно є҆́сть, ма̑ла ны́нѣ гл҃имъ: є҆ли́кѡ не ѡ҆печа́лити нѣ̑кихъ, ꙗ҆́кѡ неѡбꙋче́нно є҆́же ѡ҆ си́хъ сло́во посредѣ̀ ѡ҆ста́влше.
в҃. Безмо́лвїе ѹ҆̀бо тѣ̑ла є҆́сть, нра́вѡвъ и҆ чꙋ́вствъ, вѣ̑жество и҆ ѹ҆строе́нїе: безмо́лвїе же дꙋшѝ, пѡ́мыслъ вѣ̑жество, и҆ неѡкрада́ема мы́сль.
г҃. Безмо́лвїѧ люби́тель є҆́сть, мꙋ́жественъ нѣ̑кїй и҆ же́стокъ по́мыслъ во две́рехъ се́рдца недре́мленнѡ стоѧ́щъ, и҆ приходѧ́щыѧ (по́мыслы) и҆лѝ ѹ҆бива́ющъ и҆лѝ ѿрѣва́ющъ. И҆́же въ чꙋ́вствѣ се́рдца безмо́лвствꙋѧй, вѣ̑сть рече́нное: а҆ и҆́же младе́нецъ є҆щѐ сы́й, то̀ сегѡ̀ невкꙋси́тель и҆ невѣ̑дѣтель є҆́сть.
д҃. Безмо́лвникъ разꙋмѣва́теленъ, не востре́бꙋетъ слове́съ: на словесѣ̑хъ бо дѣ̑лы просвѣща́етсѧ.
є҃. Нача́ло ѹ҆́бѡ безмо́лвїѧ, є҆́же ѿрѣва́ти то́поты, ꙗ҆́кѡ глꙋбинꙋ̀ смꙋща́ющыѧ: коне́цъ же є҆гѡ̀, є҆́же не боѧ́тисѧ мѧте́жей, но без̾ ѡ҆щꙋще́нїѧ бы́ти ѡ҆ ни́хъ. И҆сходѧ̀, сло́вомъ не и҆сходѧ́й, кро́токъ є҆́сть, ве́сь любвѐ до́мъ: неꙋдобоподви́жимь сы́й на сло́во, неподви́жимь на ꙗ҆́рость ѡ҆бы́че бы́ти: сопроти́вное же ꙗ҆́вственно є҆́сть.
ѕ҃. Безмо́лвникъ є҆́сть, и҆́же безтѣле́сное въ тѣле́снѣмъ домꙋ̀ ѡ҆предѣлѧ́ти любопрѧ́йсѧ, є҆́же пресла́вно є҆́сть.
з҃. Блюде́тъ ѹ҆́бѡ мы́шь, лови́телница є҆ѧ̀: мы́ша же мы́сленнаго, безмо́лвника мы́сль. Да не бꙋ́детъ тѝ ѿме́тенъ предрече́нный примѣ̑ръ: а҆́ще ли же нѝ, то̀ не ѹ҆̀ безмо́лвїе позна́лъ є҆сѝ.
и҃. Не та́кѡ мона́хъ, ꙗ҆́коже мона́хъ съ мона́хомъ: є҆ди́нственный, мно́га трезвѣ̑нїѧ и҆ непари́телна ѹ҆ма̀ тре́бꙋетъ: пе́рвшемꙋ ѹ҆̀бо, мно́жицею помо́же дрꙋгі́й: второ́мꙋ же, споспѣ̑шествова а҆́гг҃лъ.
ѳ҃. Ѹ҆́мны си̑лы сослꙋ́жатъ и҆ любо́внѣ пребыва́ютъ въ дꙋше́внѣ безмо́лвницѣ: сопроти́вное же ѹ҆молчꙋ̀ тебѣ̀.