Если чтения отсутствуют - значит, по данному дню еще не были добавлены тексты.
На третьем часе:
к҃ѕ. Вѣ̑ра мл҃и́твꙋ воскрилѝ: без̾ неѧ́ бо на нб҃о возлетѣ̑ти не мо́жетъ.
к҃з. Помо́лимъ встра́ственнїи пребыва́телнѣ гдⷭ҇а: вси́ бо встра́ственнїи ѿ встра́стїѧ въ безстра́стїе пред̾ꙋспѣ̑ша.
к҃и. А҆́ще и҆ бг҃а не бои́тсѧ сꙋдїѧ̀ ѻ҆́нъ (си́рѣчь бг҃ъ), но занѐ трꙋды̀ є҆мꙋ̀ твори́тъ, грѣхо́мъ и҆ паде́нїемъ ѡ҆вдовѣ̑вшаѧ ѿ негѡ̀ дꙋша̀, сотвори́тъ ѿмще́нїе є҆ѧ̀, ѿ сопе́рника є҆ѧ̀ тѣ̑ла, и҆ сꙋпоста́тѡвъ є҆ѧ̀ дꙋхѡ́въ. Бл҃горазꙋ́мныхъ ѹ҆̀бо бл҃гі́й се́й на́шъ кꙋпе́цъ ско́рымъ проше́нїѧ подаѧ́нїемъ, къ любвѝ свое́й привлека́етъ: неблагода̑рныѧ же псѡ́въ си́хъ дꙋ́шы, а҆́лчбою и҆ жа́ждою проше́нїѧ при не́мъ присѣдѣ̑ти мл҃и́твою сотворѧ́етъ: неблагода́рный бо пе́съ взе́мъ хлѣ̑бъ, а҆́бїе ѿхо́дитъ ѿ да́вшагѡ.
к҃ѳ. Не глаго́ли коснѧ̀ въ моле́нїи се́мъ ничто́же и҆спра́вити: ѹ҆же́ бо и҆ и҆спра́вилъ є҆сѝ: ко́е бо и҆ вы́шше бл҃го є҆́сть ѿ є҆́же ко гдⷭ҇ꙋ прилѣплѧ́тисѧ, и҆ во є҆́же къ немꙋ̀ соедине́нїи непреста́ннѡ претерпѣва́ти.
л҃. Не та́кѡ ѡ҆сꙋжде́нный бои́тсѧ ка́зни своеѧ̀ и҆зрече́нїѧ, ꙗ҆́коже ѡ҆ мл҃и́твѣ прилѣжа́й, тоѧ̀ предстоѧ́нїѧ: тѣ̑мже а҆́ще премꙋ́дръ кто̀ и҆ ѡ҆строꙋ́менъ є҆́сть, то̀ па́мѧтїю ѻ҆́нагѡ, всѧ́ко досажде́нїе, и҆ гнѣ̑въ, и҆ попече́нїе, и҆ неꙋпраздне́нїе, и҆ ско́рбь, и҆ насыще́нїе, и҆ по́мыслъ ѿвраща́ти мо́жетъ.
л҃а. Пред̾ꙋготовлѧ́йсѧ приснѡтекꙋ́щею въ дꙋшѝ мл҃и́твою, къ предстоѧ́нїю моле́нїѧ твоегѡ̀, и҆ вско́рѣ пред̾ꙋспѣ̑еши. Ви́дѣхъ въ послꙋша́нїи блиста́ющихсѧ, и҆ ѡ҆ сꙋ́щей во ѹ҆мѣ̀ є҆ли́кѡ возмо́жно є҆́сть па́мѧти бж҃їей не нерадѧ́щихъ, внеза́пꙋ на мл҃и́твꙋ предста́вшихъ, и҆ вско́рѣ ѹ҆́мъ сво́й превозше́дшихъ, и҆ пото́чнѣ сле́зы произлива́ющихъ: пред̾ꙋгото́вани бо ѿ прпⷣбнагѡ послꙋша́нїѧ бѧ́хꙋ.
л҃в. Ѱалмопѣ̑нїю ѹ҆̀бо є҆́же со мно́жествомъ, плѣнє́нїѧ и҆ парє́нїѧ припослѣ̑дствꙋютъ: ѻ҆со́бнꙋ же сꙋ́щемꙋ, не та́кѡ: но сїѐ ѹ҆́бѡ, ѹ҆ны́нїе ра́тꙋетъ: ѻ҆́номꙋ же ѹ҆се́рдїе содѣ̑йствꙋетъ.
л҃г. Любо́вь ѹ҆́бѡ во́инствꙋющагѡ къ цр҃ю̀, показа̀ бра́нь: любо́вь же мона́ха ко бг҃ꙋ, показа́ло є҆́сть мл҃и́твы вре́мѧ и҆ предстоѧ́нїе.
л҃д. Ѹ҆строе́нїе твоѐ, мл҃и́тва твоѧ̀ ꙗ҆ви́тъ тебѣ̀: зерца́ло бо тꙋ̀ мона́хово бг҃осло́ви ѻ҆́ни преда́ша бы́ти.
л҃є. И҆́же каково́либо ни приключи́тсѧ дѣ̑ло дѣ̑лаѧй, и҆ мл҃и́твы часꙋ̀ приспѣ̑вшꙋ приꙋпражнѧ́ѧйсѧ въ не́мъ, ѿ бѣсѡ́въ порꙋга́емь быва́етъ: намѣ̑ренїе бо та́тємъ си̑мъ є҆́сть ча́съ ѿ часа̀ ѿ на́съ ѹ҆кра́сти.
л҃ѕ. Не ѿрица́йсѧ про́симъ и҆ ѡ҆ (нѣ̑коей) дꙋшѝ моли́тисѧ, а҆́ще и҆ мл҃и́твы не стѧжа́лъ є҆сѝ: вѣ̑ра бо ѻ҆́на просѧ́щагѡ мно́жицею и҆ молѧ́щагосѧ съ сокрꙋше́нїемъ спасла̀ є҆́сть.
л҃з. Не возноша́йсѧ ѡ҆ и҆́нѣхъ молѧ́сѧ и҆ ѹ҆слышава́емь: вѣ̑ра бо ѻ҆́нѣхъ, дѣ̑йствова и҆ возмо́же.
л҃и. Ѻ҆́трокъ ѹ҆́бѡ всѧ́къ, всѧ́кїѧ премꙋ́дрости є҆́йже ѿ ѡ҆бꙋчи́телѧ наꙋчи́лсѧ є҆́сть, на всѧ́къ де́нь без̾ ѡ҆пꙋще́нїѧ ѿ негѡ̀ и҆стѧ́занъ бꙋ́детъ: ѹ҆́мъ же всѧ́къ си́лы, ю҆́же ѿ бг҃а прїѧ́лъ є҆́сть во всѧ́цѣй мл҃и́твѣ и҆стѧ́занъ бꙋ́детъ: тѣ̑мже внима́ти подоба́етъ. Є҆гда̀ тре́звеннѣ помо́лишисѧ, скорѣ̑е и҆ на гнѣ̑вы ра́тованъ бꙋ́деши: ра́зꙋмъ бо се́й є҆́сть врагѡ́въ на́шихъ.
На шестом часе:
л҃ѳ. Всѧ́кꙋ ѹ҆́бѡ добродѣ̑тель, наипа́че же мл҃и́твꙋ со мно́гимъ чꙋ́вствомъ сотвори́мъ всегда̀. Тогда̀ дꙋша̀ съ чꙋ́вствомъ мо́литсѧ, є҆гда̀ ꙗ҆́рости крѣ̑плша бꙋ́детъ.
м҃. Мно́гими молє́нїи и҆ лѣ̑ты стѧжава́ємаѧ, пребыва́тєлна сꙋ́ть.
м҃а. Стѧжа́вый гдⷭ҇а, нектомꙋ̀ въ мл҃и́твѣ сло́во своѐ ска́жетъ: дх҃ъ (дꙋша̀ и҆мꙋ́ща дарова́нїе мл҃и́твы) бо тогда̀ мо́литсѧ ѡ҆ не́мъ въ само́мъ себѣ̀ воздыха́нїи неглаго́лными.
м҃в. Всѧ́кагѡ чꙋ́вственна мечта́нїѧ въ мл҃и́твѣ да не прїи́меши, да не и҆зстꙋпле́нїе постра́ждеши.
м҃г. Всѧ́кагѡ проше́нїѧ и҆звѣще́нїе, въ мл҃и́твѣ и҆з̾ѧвлѧ́етсѧ. И҆звѣще́нїе є҆́сть, рѣше́нїе сꙋмнѣ̑нїѧ: и҆звѣще́нїе є҆́сть, безвѣ̑стности и҆з̾ѧвле́нїе незы́блемо.
м҃д. Ми́лостивъ быва́й ѕѣлѡ̀, ѡ҆ мл҃и́твѣ прилѣжа̀: то́ю бо мона́си стори̑чнаѧ прїи́мꙋтъ, про́чее же, въ бꙋ́дꙋщемъ.
м҃є. Ѻ҆́гнь ѹ҆́бѡ прише́дъ въ се́рдце мл҃и́твꙋ возста́ви: се́й же воста́вшей, и҆ на нб҃о возне́сшейсѧ, ѻ҆гнѧ̀ въ го́рницѣ дꙋшѝ, соше́ствїе бы́сть.
м҃ѕ. Гл҃ю́тъ ѹ҆́бѡ нѣ̑цыи, лꙋ́чшꙋ бы́ти мл҃и́твꙋ (па́че) па́мѧти и҆схо́да: а҆́зъ же є҆ди́ныѧ ѵ҆поста́си два̀ сꙋщєства̀ пою̀.
м҃з. Ко́нь ѹ҆́бѡ и҆скꙋ́сенъ, по превосхожде́нїю, разгрѣва́тисѧ, и҆ къ тече́нїю прилага́ти ѡ҆бы́че: тече́нїе же разꙋмѣва́ю бы́ти, пѣснопѣ̑нїе: конѧ́ же мꙋ́жественнаго ѹ҆ма̀: и҆здале́ча таковы́й ѡ҆бонѧва́етъ бра́нь: и҆ пред̾ꙋгото́ванъ сы́й пребыва́етъ про́чее ѿню́дъ непобѣди́мь.
м҃и. Лю́тѡ ѹ҆́бѡ є҆́сть и҆з̾ꙋ́стъ жа́ждꙋща, во́дꙋ и҆схи́тити: лю́тше же дꙋшѝ со ѹ҆миле́нїемъ молѧ́щейсѧ, пре́жде соверше́нїѧ тоѧ̀, себѐ ѿ предстоѧ́нїѧ ѻ҆́нагѡ многовожделѣ̑ннагѡ ѿто́ргнꙋти.
м҃ѳ. Да не ѿско́чиши, до́ндеже ѻ҆́гнь и҆ во́дꙋ сїю̀ смотри́телнѣ преста́вшѧ не ѹ҆ви́диши: не бо̀ прїи́меши вре́мѧ таково̀ ко проще́нїю согрѣше́нїй не́гли во все́мъ животѣ̀ твое́мъ.
На девятом часе:
СЛО́ВО К҃Ѳ. Ѡ҆ назе́мнѣмъ нб҃сѝ: бг҃оподража́телнѣмъ безстра́стїи, и҆ соверше́нствѣ: и҆ воскрⷭ҇нїи дꙋшѝ, пре́жде ѻ҆́бщагѡ воскрⷭ҇нїѧ.
Сѐ про́чее и҆ мы̀, положе́ннїи въ ро́вѣ невѣ̑дѣнїѧ глꙋбоча́йшемъ, и҆ те́мныхъ страсте́хъ, и҆ сѣ̑ни сме́ртнѣй тѣ̑ла сегѡ̀: ѡ҆ назе́мнѣмъ нб҃сѝ ѿ де́рзости любомꙋ́дрствовати начина́емъ.
в҃. И҆́мать бо тве́рдь ѹ҆́бѡ добро́тꙋ, ѕвѣ̑зды: безстра́стїе же, ѹ҆краше́нїе, добродѣ̑тєли. Ниеди́но бо и҆́но что̀ а҆́зъ безстра́стїе вознепщева́хъ бы́ти, ра́звѣ то́чїю всерде́чно ѹ҆ма̀ нб҃о, кова̑рствїѧ бѣсѡ́въ, и҆́гры про́чее вмѣнѧ́ющее.
г҃. Безстра́стенъ ѹ҆́бѡ про́чее сво́йственнѣ и҆ є҆́сть и҆ познава́етсѧ, пло́ть ѹ҆́бѡ нетлѣ̑ннꙋ сотвори́вый: ѹ҆́мъ же ѿ тва́ри сеѧ̀ возвы́сивый: чꙋ̑вства же всѧ̑ семꙋ̀ покори́вый: лицꙋ́ же гдⷭ҇ню, дꙋ́шꙋ предста́вивый, па́че крѣ̑пости своеѧ̀ къ немꙋ̀ при́снѡ простира́ющꙋсѧ.
д҃. Нѣ̑цыи же напроти́въ, безстра́стїе бы́ти ѡ҆предѣлѧ́ютъ, воскрⷭ҇нїе дꙋшѝ пре́жде тѣле́снагѡ: и҆́ни же, позна́нїе бг҃а соверше́нно, ѿ а҆́гг҃єлъ второ́е.
є҃. Сїѐ ѹ҆̀бо соверше́нное ѻ҆́но соверше́нныхъ несоверша́емое соверше́нство, ꙗ҆́коже мѝ нѣ̑кто тогѡ̀ вкꙋси́вый сказа́лъ є҆́сть, та́кѡ про́чее ѹ҆́мъ ѡ҆сщ҃а́етъ, и҆ ѿ веще́ствъ и҆схища́етъ, ꙗ҆́кѡ наимно́жае ѿ ꙗ҆́же во пло́ти жи́зни, по достиже́нїи ѻ҆ба́че нбⷭ҇нагѡ сегѡ̀ приста́нища, на нб҃о и҆зстꙋпи́вша є҆го̀ къ видѣ̑нїю возно́ситъ: ѡ҆ чесо́мъ гл҃етъ нѣ̑гдѣ и҆ и҆скꙋ́съ не́гли прїе́мшїй, ꙗ҆́кѡ бж҃їи держа́внїи землѝ ѕѣлѡ̀ вознесо́шасѧ (ѱал. м҃ѕ, і҃). Такова̀ позна́хомъ и҆ є҆гѵ́птѧнина ѻ҆́наго, и҆́же не ѡ҆ставлѧ́ше рꙋ́цѣ своѝ на мл҃и́твѣ, внегда̀ бы съ нѣ̑кими моли́лсѧ.
ѕ҃. Є҆́сть безстра́стенъ, и҆ є҆́сть безстра́стна безстра́стншъ: занѐ ѻ҆́нъ ѹ҆́бѡ, крѣ́пцѣ ненави́дитъ лꙋка̑ваѧ: се́й же, ненасы́тнѣ богатѣ̑етъ добродѣ̑телми.
з҃. И҆ чистота̀, безстра́стїе гл҃етсѧ: и҆ влѣ̑потꙋ: нача́ло бо є҆́сть ѻ҆́бщагѡ воскрⷭ҇нїѧ, и҆ нетлѣ̑нїѧ тлѣ̑нныхъ.
и҃. Безстра́стїе показа̀ рекі́й: ѹ҆́мъ же гдⷭ҇нь и҆́мамъ (а҃ кор. в҃, ѕ҃і). Безстра́стїе показа̀ є҆гѵ́птѧнинъ ѻ҆́нъ рекі́й, не боѧ́тисѧ гдⷭ҇а. Безстра́стїе показа̀ ѻ҆́нъ, воз̾ѡбрати́тисѧ страсте́мъ помоли́выйсѧ. Кто̀ пре́жде бꙋ́дꙋщїѧ свѣ̑тлости, ꙗ҆́коже сѵ́ринъ ѻ҆́нъ безстра́стїѧ сподо́бисѧ: занѐ дв҃дъ ѹ҆́бѡ ѻ҆́нъ прехва́лный во прⷪ҇ро́цѣхъ: ѡ҆сла́би мѝ, гл҃етъ ко гдⷭ҇ꙋ, да почі́ю (ѱал. л҃и, д҃і): бж҃їй же подви́жникъ се́й, ѡ҆сла́би вѡ́лны бл҃года́ти твоеѧ̀.
ѳ҃. Безстра́стїе и҆́мать дꙋша̀, та́кѡ ѹ҆ка́чествовавшаѧсѧ добродѣ̑телми, ꙗ҆́коже встра́ственнїи сластмѝ.
і҃. А҆́ще сїѐ предѣ̑лъ є҆́сть чревоѡб̾ѧде́нїѧ, є҆́же, и҆ не жела́юща понꙋжда́ти себѐ: то̀ сїѐ ѿню́дъ предѣ̑лъ є҆́сть воздержа́нїѧ, є҆́же, и҆ а҆́лчꙋщо є҆стество̀ сїѐ непови́нно сꙋ́ще воздержава́ти. А҆́ще сїѐ предѣ̑лъ є҆́сть блꙋда̀, є҆́же и҆ на живѡ́тна и҆ бездꙋ̑шна неи́стовитисѧ: то̀ сїѐ предѣ̑лъ є҆́сть чистоты̀, є҆́же, ко всѣ́мъ ꙗ҆́кѡ бездꙋ̑шнымъ зало́гъ и҆мѣ̑ти. А҆́ще сїѐ є҆́сть сребролю́бїѧ коне́цъ, є҆́же, никогда́же ѿ є҆́же собира́ти престава́ти, и҆лѝ насыща́тисѧ: то̀ сїѐ нестѧжа́нїѧ, є҆́же, ни тѣ̑ла пощадѣ̑ти своегѡ̀. А҆́ще сїѐ є҆́сть ѹ҆ны́нїѧ коне́цъ, є҆́же, во всѧ́цѣй сꙋ́щꙋ ѿра́дѣ, терпѣ̑нїѧ не стѧжа́ти: то̀ сїѐ терпѣ̑нїѧ, є҆́же, во ѹ҆тѣсне́нїи сꙋ́щꙋ, ѿра́дꙋ и҆мѣ̑ти непщева́ти. А҆́ще сїѐ гнѣ̑ва є҆́сть пꙋчи́на, є҆́же и҆ никомꙋ́же присꙋ́тствꙋющꙋ раз̾ѧрѧ́тисѧ: то̀ сїѐ долготерпѣ̑нїѧ, є҆́же и҆ ѿсꙋ́тствꙋющꙋ ѹ҆корѧ́ющемꙋ и҆ присꙋ́тствꙋющꙋ. та́кожде ти́хꙋ бы́ти. А҆́ще сїѐ тщесла́вїѧ є҆́сть высота̀, є҆́же и҆ никомꙋ́же присꙋ́тствꙋющꙋ похвалѧ́ти до́лжнꙋ сꙋ́щемꙋ, тщесла́вїѧ дѣла̀ притворѧ́ти: то̀ сїѐ ѿню́дъ є҆́сть нетщесла́вїѧ ви́дъ, є҆́же никогда́же во прише́ствїихъ мы́слїю ѡ҆крада́тисѧ.
А҆́ще сїѐ ви́дъ є҆́сть поги́бели, си́рѣчь горды́ни, є҆́же въ хꙋ́дѣ ѻ҆́бразѣ возноша́тисѧ: то̀ сїѐ, спаси́телно є҆́сть смире́нїѧ зна́менїе, є҆́же въ высо́кихъ начина́нїихъ и҆ и҆справле́нїихъ, смире́нно и҆мѣ̑ти мꙋдрова́нїе. И҆ а҆́ще сїѐ встра́стїѧ всесоверше́нна є҆́сть зна́менїе, є҆́же ма́лѡ не всѣ́мъ ѿ бѣсѡ́въ ѡ҆́тай всѣва́ємымъ ско́рѡ повинова́тисѧ: то̀ а҆́зъ сїѐ, ст҃а́гѡ безстра́стїѧ вознепщева́хъ бы́ти вознава́нїе, є҆́же мощѝ ꙗ҆́вственнѣ гл҃ати, ѹ҆клонѧ́ющꙋсѧ ѿ менѐ лꙋка́вомꙋ, не познава́хъ: нижѐ ка́кѡ прїи́де, нижѐ чесогѡ̀ ра́ди, нижѐ ка́кѡ ѿи́де: но ве́сь про́чее без̾ ѡ҆щꙋще́нїѧ къ такѡвы́мъ є҆́смь, соедине́нъ ве́сь сы́й, и҆ при́снѡ бꙋ́дꙋщъ, со бг҃омъ.
а҃і. Сподо́бивыйсѧ такова́гѡ ѹ҆строе́нїѧ, є҆щѐ сы́й во пло́ти, са́маго того̀ въ не́мъ живꙋ́щаго бг҃а при́снѡ во всѣ̑хъ словесѣ̑хъ и҆ дѣ̑лѣхъ и҆ помышле́нїихъ и҆́мать ѡ҆кормлѧ́юща: тѣ̑мже про́чее и҆ ꙗ҆́коже гла́съ нѣ̑кїй во́лю гдⷭ҇ню внꙋ́трь просвѣще́нїемъ разꙋмѣва́етъ, и҆ всѧ́кагѡ ѹ҆че́нїѧ человѣ̑ческа вы́шшїй бы́въ, гл҃етъ: когда̀ прїидꙋ̀, и҆ ꙗ҆влю́сѧ лицꙋ̀ бж҃їю; (ѱал. м҃а, г҃). Не бо̀ терплю̀ про́чее дѣ̑йства вожделѣ̑нїѧ сегѡ̀: но и҆щꙋ̀ безсме́ртныѧ добро́ты ю҆́же пре́жде бре́нїѧ сегѡ̀ да́лъ мѝ є҆сѝ.
в҃і. Безстра́стный, что̀ подоба́етъ мнѡ́га гл҃ати: живе́тъ ѹ҆́бѡ не ктомꙋ̀ то́й, но живе́тъ въ не́мъ хрⷭ҇то́съ (гал. в҃, к҃): ꙗ҆́коже гл҃етъ, по́двигомъ до́брымъ подвиза́выйсѧ, и҆ тече́нїе сконча́вый. и҆ вѣ̑рꙋ соблюды́й правосла́внꙋ (в҃ тїм. д҃. з҃).
г҃і. Не составлѧ́етсѧ вѣне́цъ цр҃евъ ѿ є҆ди́нагѡ ка́мене, и҆ не соверша́етсѧ безстра́стїе, а҆́ще и҆ ѡ҆ є҆ди́ной добродѣ̑тели и҆ приклю́чшейсѧ вознеради́мъ.
д҃і. Безстра́стїе ѹ҆́бѡ разꙋмѣ̑ти и҆́маши, ѻ҆́нꙋ нбⷭ҇нагѡ цр҃ѧ на нб҃сѣ̑хъ пала́тꙋ: мнѡ́ги же ѻ҆би́тєли, ꙗ҆̀же внꙋ́трь гра́да сегѡ̀ жили̑ща: стѣ̑нꙋ, і҆ерⷭ҇ли́мъ ѻ҆́нъ, проще́нїе согрѣше́нїй. Потецы́мъ бра́тїе, потецы́мъ, вхо́дъ въ черто́гъ пала́ты ѻ҆́ныѧ полꙋчи́ти: а҆́ще ли же ѿ нѣ̑коегѡ и҆лѝ бре́мене предпрїѧ́тїѧ, ѽ ѕлоключе́нїѧ! и҆лѝ вре́мене пред̾ꙋдержа́ни бы́хомъ, то̀ понѐ ѻ҆би́тель нѣ̑кꙋю ѻ҆́крестъ черто́га ѻ҆́нагѡ пред̾ꙋдержи́мъ: а҆́ще ли же є҆щѐ хра́млемъ, и҆лѝ ѡ҆сла́блени є҆смы̀, то̀ понѐ внꙋ́трь стѣны̀ ѻ҆́ныѧ всѧ́цѣмъ ѻ҆́бразомъ вни́димъ: пре́жде бо кончи́ны та́мѡ не вше́дый, па́че же не преше́дый, въ пꙋсты́ни бѣсѡ́въ и҆ страсте́й водвори́тсѧ: сегѡ̀ ра́ди нѣ̑кто молѧ́шесѧ гл҃ѧ: бг҃омъ мои́мъ прейдꙋ̀ стѣ̑нꙋ (ѱал. з҃і, л҃): и҆ и҆́нъ ꙗ҆́кѡ ѿ лица̀ бж҃їѧ гл҃етъ: не грѣси́ ли ва́ши сꙋ́ть разлꙋча́ющїи междꙋ̀ ва́ми и҆ мно́ю; (и҆са́. нѳ҃҃, в҃) разсѣцы́мъ ѽ дрꙋ́зи средостѣ̑нїе сїѐ ѡ҆гра́ды, є҆́же преслꙋша́нїемъ ѕлѣ̀ созда́хомъ: возми́мъ ѿсю́дꙋ и҆збавле́нїе ѿ до́лга ѻ҆́нагѡ, зане́же нѣ̑сть во а҆́дѣ могі́й и҆сцѣли́ти. Ѹ҆праздни́мсѧ бра́тїе, ѹ҆празднє́нницы бо написа́хомсѧ: невозмо́жно є҆́сть паде́нїемъ, невозмо́жно є҆́сть бре́менемъ и҆звинѧ́тисѧ: є҆ли́цы бо прїѧ́ша гдⷭ҇а ба́нею пакибытїѧ̀, дадѐ и҆́мъ ѻ҆́бласть ча́дѡмъ бж҃їимъ бы́ти (і҆ѡан. а҃, в҃і), ре́къ: ѹ҆праздни́тесѧ и҆ разꙋмѣ̑йте, ꙗ҆́кѡ а҆́зъ є҆́смь бг҃ъ (ѱал. м҃є, а҃і), и҆ безстра́стїе. Томꙋ̀ сла́ва во вѣ̑ки вѣкѡ́въ, а҆ми́нь.
Возставлѧ́етъ ѹ҆́бѡ ѿ землѝ на нб҃о ѹ҆бо́га ѹ҆ма̀, и҆ ѿ гно́ища страсте́й воздвиза́етъ ни́ща (а҃ црⷭ҇тв. в҃, и҃), бл҃же́нное безстра́стїе: всехва́лнаѧ же любы̀, твори́тъ є҆го̀ сѣ̑сти съ кнѧ́зи, ст҃ы́ми а҆́гг҃лы, съ кнѧ́зи люде́й гдⷭ҇нихъ (ѱал. рв҃і, и҃).