Если чтения отсутствуют - значит, по данному дню еще не были добавлены тексты.
На паремиях вечерни по прокимне:
Быт. 49:33 – 50:26
33 И҆ преста̀ і҆а́кѡвъ завѣща́ѧ сынѡ́мъ свои̑мъ, и҆ возложи́въ і҆а́кѡвъ но́зѣ своѝ на ѻ҆́дръ ᲂу҆́мре, и҆ приложи́сѧ къ лю́демъ свои̑мъ.
1 И҆ припа́дъ і҆ѡ́сифъ на лицѐ ѻ҆тца̀ своегѡ̀, пла́касѧ (го́рькѡ) ѡ҆ не́мъ и҆ ѡ҆блобыза̀ є҆го̀: 2 и҆ повелѣ̀ і҆ѡ́сифъ рабѡ́мъ свои̑мъ погреба́телємъ погребстѝ ѻ҆тца̀ своего̀. И҆ погребо́ша погреба́телїе і҆и҃лѧ. 3 И҆ и҆спо́лнишасѧ є҆мꙋ̀ четы́редесѧть дні́й: та́кѡ бо и҆счислѧ́ютсѧ дні́е погребе́нїѧ: и҆ пла́касѧ є҆гѡ̀ є҆гѵ́петъ се́дмьдесѧтъ дні́й. 4 Є҆гда́ же преидо́ша дні́е пла́ча, глаго́ла і҆ѡ́сифъ ко вельмо́жамъ фараѡ́нѡвымъ, глаго́лѧ: а҆́ще ѡ҆брѣто́хъ благода́ть пред̾ ва́ми, рцы́те ѡ҆ мнѣ̀ во ᲂу҆́шы фараѡ́нꙋ, глаго́люще: 5 ѻ҆те́цъ мо́й заклѧ́ мѧ пре́жде сконча́нїѧ (своегѡ̀), глаго́лѧ: во гро́бѣ, є҆го́же и҆скопа́хъ себѣ̀ въ землѝ ханаа́ни, та́мѡ мѧ̀ погребѝ: нн҃ѣ ᲂу҆̀бо возше́дъ погребꙋ̀ ѻ҆тца̀ моего̀ и҆ возвращꙋ́сѧ. И҆ реко́ша фараѡ́нꙋ по словесѝ і҆ѡ́сифовꙋ. 6 И҆ речѐ фараѡ́нъ ко і҆ѡ́сифꙋ: взы́ди, погребѝ ѻ҆тца̀ твоего̀, ꙗ҆́коже заклѧ́ тѧ. 7 И҆ взы́де і҆ѡ́сифъ погребстѝ ѻ҆тца̀ своего̀. И҆ совзыдо́ша съ ни́мъ всѝ рабѝ фараѡ̑ни и҆ старѣ̑йшины до́мꙋ є҆гѡ̀, и҆ всѝ старѣ̑йшины землѝ є҆гѵ́петскїѧ, 8 и҆ ве́сь до́мъ і҆ѡ́сифовъ и҆ бра́тїѧ є҆гѡ̀, и҆ ве́сь до́мъ ѻ҆тца̀ є҆гѡ̀ и҆ срѡ́дницы є҆гѡ̀: ѻ҆́вцы же и҆ волы̀ ѡ҆ста́виша въ землѝ гесе́мъ. 9 И҆ совзыдо́ша съ ни́мъ и҆ колєсни́цы и҆ кѡ́нницы, и҆ бы́сть по́лкъ вели́къ ѕѣлѡ̀. 10 И҆ прїидо́ша на гꙋмно̀ а҆та́дово, є҆́же є҆́сть ѡ҆б̾ ѡ҆́нъ по́лъ і҆ѻрда́на, и҆ рыда́ша є҆гѡ̀ рыда́нїемъ ве́лїимъ и҆ крѣ́пкимъ ѕѣлѡ̀: и҆ сотворѝ пла́чь ѻ҆тцꙋ̀ своемꙋ̀ се́дмь дні́й. 11 И҆ ви́дѣша жи́телїе землѝ ханаа́нскїѧ пла́чь на гꙋмнѣ̀ а҆та́довѣ и҆ рѣ́ша: пла́чь вели́къ се́й є҆́сть є҆гѵ́птѧнѡмъ. Сегѡ̀ ра́ди нарече́сѧ и҆́мѧ мѣ́стꙋ томꙋ̀ пла́чь є҆гѵ́петскъ, є҆́же є҆́сть ѡ҆б̾ ѡ҆́нъ по́лъ і҆ѻрда́на. 12 И҆ сотвори́ша є҆мꙋ̀ та́кѡ сы́нове є҆гѡ̀, ꙗ҆́коже заповѣ́да и҆̀мъ. 13 И҆ взѧ́ша є҆го̀ сы́нове є҆гѡ̀ въ зе́млю ханаа́ню и҆ погребо́ша є҆го̀ въ пеще́рѣ сꙋгꙋ́бѣй, ю҆́же стѧжа̀ а҆враа́мъ пеще́рꙋ въ стѧжа́нїе гро́ба ѿ є҆фрѡ́на хетте́анина, прѧ́мѡ мамврі́и. 14 И҆ возврати́сѧ і҆ѡ́сифъ во є҆гѵ́петъ, са́мъ и҆ бра́тїѧ є҆гѡ̀ и҆ всѝ совозше́дшїи погребстѝ ѻ҆тца̀ є҆гѡ̀. 15 Ви́дѣвше же бра́тїѧ і҆ѡ́сифѡвы, ꙗ҆́кѡ ᲂу҆́мре ѻ҆те́цъ и҆́хъ, рѣ́ша: да не когда̀ воспомѧне́тъ ѕло́бꙋ на́шꙋ і҆ѡ́сифъ и҆ воздаѧ́нїемъ возда́стъ на́мъ за всѧ̑ ѕла̑ѧ, ꙗ҆̀же показа́хомъ є҆мꙋ̀. 16 И҆ прише́дше ко і҆ѡ́сифꙋ реко́ша: ѻ҆те́цъ тво́й заклѧ̀ пре́жде кончи́ны своеѧ̀, глаго́лѧ: 17 та́кѡ рцы́те і҆ѡ́сифꙋ: ѡ҆ста́ви и҆̀мъ непра́вдꙋ и҆ грѣ́хъ и҆́хъ, ꙗ҆́кѡ лꙋка̑ваѧ тебѣ̀ показа́ша: и҆ нн҃ѣ прїимѝ непра́вдꙋ рабѡ́въ бг҃а ѻ҆тца̀ твоегѡ̀. И҆ пла́касѧ і҆ѡ́сифъ, глаго́лющымъ и҆̀мъ къ немꙋ̀. 18 И҆ прише́дше къ немꙋ̀ реко́ша: сѐ, мы̀ тебѣ̀ рабѝ. 19 И҆ речѐ къ ни̑мъ і҆ѡ́сифъ: не бо́йтесѧ, бж҃їй бо є҆́смь а҆́зъ: 20 вы̀ совѣща́сте на мѧ̀ ѕла̑ѧ, бг҃ъ же совѣща̀ ѡ҆ мнѣ̀ во бл҃га̑ѧ, дабы̀ бы́ло ꙗ҆́коже дне́сь, и҆ препита́лисѧ бы лю́дїе мно́зи. 21 И҆ речѐ и҆̀мъ: не бо́йтесѧ, а҆́зъ препита́ю ва́съ и҆ до́мы ва́шѧ. И҆ ᲂу҆тѣ́ши и҆̀хъ, и҆ глаго́ла и҆̀мъ по се́рдцꙋ и҆́хъ. 22 И҆ всели́сѧ і҆ѡ́сифъ во є҆гѵ́птѣ са́мъ и҆ бра́тїѧ є҆гѡ̀ и҆ ве́сь до́мъ ѻ҆тца̀ є҆гѡ̀: и҆ поживѐ і҆ѡ́сифъ лѣ́тъ сто̀ де́сѧть. 23 И҆ ви́дѣ і҆ѡ́сифъ є҆фрє́мли дѣ́ти до тре́тїѧгѡ ро́да: и҆ сы́нове махі́ра сы́на манассі́ина роди́шасѧ при бе́дрѣхъ і҆ѡ́сифовыхъ. 24 И҆ речѐ і҆ѡ́сифъ бра́тїи свое́й, глаго́лѧ: а҆́зъ ᲂу҆мира́ю, посѣще́нїемъ же посѣти́тъ ва́съ бг҃ъ и҆ и҆зведе́тъ ва́съ ѿ землѝ сеѧ̀ въ зе́млю, ѡ҆ не́йже клѧ́тсѧ бг҃ъ ѻ҆тцє́мъ на́шымъ а҆враа́мꙋ, і҆саа́кꙋ и҆ і҆а́кѡвꙋ. 25 И҆ заклѧ̀ і҆ѡ́сифъ сы́ны і҆и҃лєвы, глаго́лѧ: въ посѣще́нїи, и҆́мже посѣти́тъ ва́съ бг҃ъ, совознеси́те и҆ кѡ́сти моѧ̑ ѿсю́дꙋ съ ва́ми. 26 И҆ сконча́сѧ і҆ѡ́сифъ сы́й лѣ́тъ ста̀ десѧтѝ: и҆ погребо́ша є҆го̀, и҆ положи́ша въ ра́цѣ во є҆гѵ́птѣ.
Притч. 31:8–31
8 Сы́не, ѿверза́й ᲂу҆ста̀ твоѧ̑ сло́вꙋ бж҃їю и҆ сꙋдѝ всѧ̑ здра́вѡ: 9 ѿверза́й ᲂу҆ста̀ твоѧ̑ и҆ сꙋдѝ првⷣнѡ, разсꙋжда́й же ᲂу҆бо́га и҆ не́мощна. 10 Женꙋ̀ до́блю кто̀ ѡ҆брѧ́щетъ, дража́йши є҆́сть ка́менїѧ многоцѣ́ннагѡ такова́ѧ: 11 дерза́етъ на ню̀ се́рдце мꙋ́жа є҆ѧ̀: такова́ѧ до́брыхъ коры́стей не лиши́тсѧ: 12 дѣ́лаетъ бо мꙋ́жꙋ своемꙋ̀ блага̑ѧ во всѐ житїѐ: 13 ѡ҆брѣ́тши во́лнꙋ и҆ ле́нъ, сотворѝ благопотре́бное рꙋка́ма свои́ма. 14 Бы́сть ꙗ҆́кѡ кора́бль кꙋ́плю дѣ́ѧ, и҆здале́ча собира́етъ себѣ̀ бога́тство: 15 и҆ востае́тъ и҆з̾ но́щи, и҆ дадѐ бра̑шна до́мꙋ и҆ дѣла̀ рабы́нѧмъ. 16 Оу҆зрѣ́вши село̀ кꙋпѝ, ѿ плодѡ́въ же рꙋ́къ свои́хъ насадѝ стѧжа́нїе. 17 Препоѧ́савши крѣ́пкѡ чрє́сла своѧ̑, ᲂу҆тверди́тъ мы̑шцы своѧ̑ на дѣ́ло, 18 и҆ вкꙋсѝ, ꙗ҆́кѡ добро̀ є҆́сть дѣ́лати, и҆ не ᲂу҆гаса́етъ свѣти́льникъ є҆ѧ̀ всю̀ но́щь. 19 Ла̑кти своѧ̑ простира́етъ на полє́знаѧ, рꙋ́цѣ же своѝ ᲂу҆твержда́етъ на вретено̀, 20 и҆ рꙋ́цѣ своѝ ѿверза́етъ ᲂу҆бо́гомꙋ, дла́нь же прострѐ ни́щꙋ. 21 Не пече́тсѧ ѡ҆ сꙋ́щихъ въ домꙋ̀ мꙋ́жъ є҆ѧ̀, є҆гда̀ гдѣ̀ заме́длитъ: вси́ бо ᲂу҆ неѧ̀ ѡ҆дѣ́ѧни сꙋ́ть. 22 Сꙋгꙋ̑ба ѡ҆дѣѧ̑нїѧ сотворѝ мꙋ́жꙋ своемꙋ̀, ѿ вѷссо́на же и҆ порфѵ́ры себѣ̀ ѡ҆дѣѧ̑нїѧ. 23 Сла́венъ быва́етъ во вратѣ́хъ мꙋ́жъ є҆ѧ̀, внегда̀ а҆́ще сѧ́детъ въ со́нмищи со старѣ̑йшины жи́тельми землѝ. 24 Плащани̑цы сотворѝ и҆ продадѐ фїнїкі́анѡмъ, ѡ҆поѧ̑санїѧ же ханане́ѡмъ. 25 Оу҆ста̀ своѧ̑ ѿве́рзе внима́тельнѡ и҆ зако́ннѡ и҆ чи́нъ заповѣ́да ѧ҆зы́кꙋ своемꙋ̀. 26 Крѣ́постїю и҆ лѣ́потою ѡ҆блече́сѧ, и҆ возвесели́сѧ во дни̑ послѣ̑днїѧ. 27 Тѣ̑сны стєзѝ до́мꙋ є҆ѧ̀, бра́шна же лѣ́ностнагѡ не ꙗ҆дѐ. 28 Оу҆ста̀ своѧ̑ ѿве́рзе мꙋ́дрѡ и҆ зако́ннѡ. 29 Ми́лостынѧ же є҆ѧ̀ возста́ви ча̑да є҆ѧ̀, и҆ ѡ҆богати́шасѧ: и҆ мꙋ́жъ є҆ѧ̀ похвалѝ ю҆̀: 30 мнѡ́ги дще́ри стѧжа́ша бога́тство, мнѡ́ги сотвори́ша си́лꙋ: ты́ же пред̾ꙋспѣ́ла и҆ превознесла́сѧ є҆сѝ над̾ всѣ́ми: 31 ло́жнагѡ ᲂу҆гожде́нїѧ и҆ сꙋ́етныѧ добро́ты же́нскїѧ нѣ́сть въ тебѣ̀: жена́ бо разꙋ́мнаѧ благослове́на є҆́сть: стра́хъ же гдⷭ҇ень сїѧ̀ да хва́литъ.
На третьем часе:
СЛО́ВО Л҃. Ѡ҆ сою́зѣ добродѣ̑телныѧ тро́йцы въ добродѣ̑телехъ.
Ны́нѣ же про́чее, по всѣ̑хъ предрече́нныхъ, пребыва́ютъ трѝ сїѧ̑, сою́зъ всѣ̑хъ присостѧга̑ющаѧ и҆ держа̑щаѧ: вѣ̑ра, наде́жда, любы̀: бо́лши же всѣ̑хъ любы̀ (а҃. Кор. г҃і, г҃і): бг҃ъ бо и҆менꙋ́етсѧ.
в҃. Ѻ҆ба́че а҆́зъ, ѻ҆́вꙋ ѹ҆́бѡ, лꙋчꙋ̀ бы́ти разꙋмѣва́ю: ѻ҆́вꙋ же, свѣ̑тъ: ѻ҆́вꙋ же крꙋ́гъ: всѧ̑ же, є҆ди́но сїѧ́нїе, и҆ є҆ди́нꙋ свѣ̑тлость.
г҃. занѐ ѻ҆́ва ѹ҆́бѡ, всѧ̑ мо́жетъ и҆ твори́ти и҆ содѣ̑телствовати: ѻ҆́вꙋ же, ми́лость бж҃їѧ ѡ҆гражда́етъ, и҆ непосты́днꙋ твори́тъ: ѻ҆́ва же, нижѐ па́даетъ, нижѐ стои́тъ ѿ є҆́же тещѝ: нижѐ ѹ҆ѧ́звленнаго почива́ти про́чее ѿ бл҃же́ннагѡ неи́стовства ѡ҆ставлѧ́етъ.
д҃. И҆́же ѡ҆ любвѝ бж҃їей глаго́лати хотѧ́й, ѡ҆ бз҃ѣ глаго́лати покꙋси́лсѧ є҆́сть: ѡ҆ бз҃ѣ же словесы̀ глаго́лати, погрѣ̑шно и҆ прибѣ̑дственно є҆́сть не внима́ющымъ.
є҃. Сло́во є҆́же ѡ҆ любвѝ, а҆́гг҃лѡмъ зна́емо є҆́сть: и҆ ѻ҆́нѣмъ, по дѣ̑йствꙋ ѡ҆сїѧва́нїѧ.
ѕ҃. Любы̀ бг҃ъ є҆́сть: предѣ̑лъ же тогѡ̀ глаго́лати хотѧ́й, въ бе́зднѣ слѣ̑потствꙋѧ песо́къ мѣ̑рѧетъ.
з҃. Любы̀, по ка́чествꙋ ѹ҆́бѡ є҆́сть, ѹ҆подобле́нїе бг҃ꙋ, поели́кꙋ человѣ̑кѡмъ дости́гнꙋти мо́щно є҆́сть: по дѣ̑йствꙋ же, пїѧ́нство дꙋшѝ: по сво́йствꙋ же, и҆сто́чникъ вѣ̑ры, бе́здна долготерпѣ̑нїѧ, мо́ре смире́нїѧ.
и҃. Любы̀ є҆́сть сво́йственнѣ, ѿложе́нїе всѧ́ческагѡ сопроти́вна помышле́нїѧ, поне́же любы̀ не мы́слитъ ѕла̀ (а҃. Кор. г҃і. є҃).
ѳ҃. Любы̀, и҆ безстра́стїе, и҆ сыноположе́нїе, и҆мены̀ и҆ є҆ди́нѣми раздѣли́шасѧ. Ꙗ҆коже свѣ̑тъ, и҆ ѻ҆́гнь, и҆ пла́мень, въ є҆ди́но стека́ютсѧ дѣ̑йство, та́кѡ и҆ ѡ҆ си́хъ разꙋмѣва́й.
і҃. По мѣ̑рѣ ѡ҆скꙋдѣ̑нїѧ любвѐ, внꙋ́трь є҆́сть стра́хъ: без̾ стра́ха бо сы́й, любвѐ и҆спо́лненъ є҆́сть, и҆лѝ дꙋше́ю ѹ҆мертви́лсѧ є҆́сть.
а҃і. Ничто́же неꙋдо́бно є҆́сть ѿ человѣ̑ческихъ, и҆ вожделѣ̑нїѧ, и҆ стра́ха, и҆ тща́нїѧ, и҆ ре́вности, и҆ рабо́ты, и҆ раче́нїѧ бж҃їѧ приравни́ти ѻ҆́бразы. Бл҃же́нъ є҆́сть и҆́же таково̀ къ бг҃ꙋ стѧжа́лъ є҆́сть раче́нїе, ꙗ҆ково̀ неи́стовъ рачи́тель къ рачи́мой свое́й стѧжа́лъ є҆́сть. Бл҃же́нъ є҆́сть та́кѡ ѹ҆боѧ́выйсѧ гдⷭ҇а, ꙗ҆́коже сꙋдїѝ ѡ҆сꙋждє́нницы боѧ́тсѧ. Бл҃же́нъ є҆́сть та́кѡ тщали́въ сотвори́выйсѧ во и҆́стиннѣмъ тща́нїи, ꙗ҆́коже бл҃горазꙋ́мни рабѝ ко своемꙋ̀ гдⷭ҇ꙋ. Бл҃же́нъ є҆́сть и҆́же та́кѡ ревни́тель въ добродѣ̑телехъ сотвори́лсѧ є҆́сть, ꙗ҆́коже ѡ҆ сꙋпрꙋ́жницахъ свои́хъ ѿ ревнова́нїѧ трезвѧ́щїисѧ. Бл҃же́нъ є҆́сть та́кѡ гдⷭ҇ꙋ въ мл҃и́твѣ предстоѧ́й, ꙗ҆́коже слꙋги̑ цр҃ю предстоѧ́тъ. Бл҃же́нъ є҆́сть и҆́же гдⷭ҇ꙋ, ꙗ҆́коже человѣ̑кѡмъ ѹ҆гожда́ти, неѡскꙋ́днѣ подвиза́ѧйсѧ.
в҃і. Не та́кѡ ма́ти къ младе́нцꙋ ссꙋ́щꙋ, ꙗ҆́коже сы́нъ любвѐ ко гдⷭ҇ꙋ прилѣплѧ́тисѧ ѡ҆бы́че всегда̀.
г҃і. Вои́стиннꙋ рачи́телствꙋѧй, при́снѡ лицѐ люби́магѡ воѡбража́етъ и҆ сїѐ внꙋ́трь всла́ственнѣ ѡ҆б̾е́млетъ, таковы́й ктомꙋ̀ ни во снѣ̑хъ почива́ти ѿ вожделѣ̑нїѧ сегѡ̀ мо́жетъ: но и҆ та́кѡ съ вожделѣва́емымъ велерѣ̑читъ: та́кѡ ѡ҆ тѣлесѣ̑хъ, та́кѡ и҆ ѡ҆ безтѣле́сныхъ ѡ҆бы́че быва́ти. Ѹ҆ѧ́звленъ бы́въ нѣ̑кто са́мъ ѡ҆ себѣ̀ гл҃аше, ѡ҆ чесо́мъ ѹ҆дивлѧ́юсѧ: ꙗ҆́кѡ а҆́зъ сплю̀, нꙋ́жды ра́ди є҆стества̀ сегѡ̀: а҆ се́рдце моѐ бди́тъ, мно́жества ра́ди раче́нїѧ.
д҃і. Назна́менати подоба́етъ тебѣ̀, ѽ разꙋ́мнѣ, ꙗ҆́кѡ ѕвѣре́й си́хъ ѿ є҆ле́нѧ дꙋшѝ погꙋбле́нїи, тогда̀ жела́етъ и҆ скончава́етсѧ ко гдⷭ҇ꙋ, ѻ҆гне́мъ любвѐ ꙗ҆́кѡ ѿ ꙗ҆́да ѹ҆ѧ́звлѧ́ема.
є҃і. А҆лчбы̀ ѹ҆́бѡ дѣ̑йство, безвѣ̑стно нѣ̑кое є҆́стьи неѧ́вственно: жа́жды же, ѹ҆множи́телно нѣ̑кое и҆ ꙗ҆́вственно є҆́сть, и҆ распале́нїѧ сегѡ̀ всѣ́мъ знамена́телно: сегѡ̀ ра́ди гл҃етъ бг҃а вожделѣва́ѧй: возжада̀ дꙋша̀ моѧ̀ къ бг҃ꙋ, крѣ̑пкомꙋ, живо́мꙋ (ѱал. ма҃. г҃).
ѕ҃і. А҆́ще лицѐ люби́ма, ꙗ҆́вственнѣ всѣ̑хъ на́съ прелага́етъ, и҆ ра́достныхъ, и҆ весе́лыхъ и҆ безпеча́лныхъ содѣ̑ловаетъ: то̀ что́бы не сотвори́ло и҆ лицѐ влⷣки въ чи́стѣ дꙋшѝ прише́ствїе неви́димѡ творѧ́ща;
з҃і. Стра́хъ ѹ҆́бѡ, є҆гда̀ въ чꙋ́вствѣ дꙋшѝ бꙋ́детъ, и҆стаѧва́ти и҆ поѧда́ти скве́рнꙋ ѡ҆бы́че: пригвозди́ бо, гл҃етъ, стра́хомъ твои́мъ плѡ́ти моѧ̑: прпⷣбнаѧ же любы̀, нѣ̑кихъ ѹ҆́бѡ поѧда́ти ѡ҆бы́че, по ре́кшемꙋ: на се́рдцѣ ѹ҆ѧзви́ла є҆сѝ на́съ, на се́рдцѣ ѹ҆ѧзви́ла є҆сѝ: ѻ҆вогда́ же нѣ̑кихъ просвѣща́ти, и҆ ра́доватисѧ твори́тъ: на него́ бо, гл҃етъ, ѹ҆пова̀ се́рдце моѐ, и҆ помо́же мѝ (ѱал. к҃з, з҃). И҆, се́рдцꙋ веселѧ́щꙋсѧ, лицѐ цвѣте́тъ (прит. є҃і. г҃і). Є҆гда̀ про́чее ве́сь человѣ̑къ, а҆́ки нѣ̑какѡ срастворе́нъ бꙋ́детъ съ любо́вїю бж҃їею, тогда̀ и҆ внѣ̀ себѐ на тѣ̑лѣ свое́мъ, ꙗ҆́кѡ зерца́ломъ нѣ̑кимъ, дꙋшѝ своеѧ̀ показꙋ́етъ свѣ̑тлость: та́кѡ прославлѧ́етсѧ мѡѷсе́й бг҃ови́децъ ѻ҆́нъ.
На шестом часе:
Ис. 66:10–24
10 Весели́сѧ, і҆ерⷭ҇ли́ме, и҆ торжествꙋ́йте въ не́мъ, всѝ лю́бѧщїи є҆го̀ и҆ живꙋ́щїи въ не́мъ: ра́дꙋйтесѧ вкꙋ́пѣ съ ни́мъ ра́достїю, всѝ є҆ли́цы пла́касте ѡ҆ не́мъ, 11 да ссе́те и҆ насы́титесѧ ѿ сосца̀ ᲂу҆тѣше́нїѧ є҆гѡ̀, да сса́вше насладите́сѧ ѿ вхо́да сла́вы є҆гѡ̀. 12 Ꙗ҆́кѡ сїѧ̑ гл҃етъ гдⷭ҇ь: сѐ, а҆́зъ ᲂу҆кланѧ́ю на нѧ̀ а҆́ки рѣкꙋ̀ ми́ра, и҆ а҆́ки пото́къ наводнѧ́емый сла́вꙋ ꙗ҆зы́кѡвъ: дѣ́ти и҆́хъ на ра́мена взѧ̑ты бꙋ́дꙋтъ и҆ на колѣ̑нꙋ ᲂу҆тѣ́шатсѧ. 13 Ꙗ҆́коже а҆́ще кого̀ ма́ти ᲂу҆тѣша́етъ, та́кѡ и҆ а҆́зъ ᲂу҆тѣ́шꙋ вы̀, и҆ во і҆ерⷭ҇ли́мѣ ᲂу҆тѣ́шитесѧ 14 и҆ ᲂу҆́зрите, и҆ возра́дꙋетсѧ се́рдце ва́ше, и҆ кѡ́сти ва́шѧ ꙗ҆́кѡ трава̀ прозѧ́бнꙋтъ: и҆ позна́етсѧ рꙋка̀ гдⷭ҇нѧ боѧ́щымсѧ є҆гѡ̀, и҆ запрети́тъ непокарѧ́ющымсѧ. 15 Се́ бо, гдⷭ҇ь ꙗ҆́кѡ ѻ҆́гнь прїи́детъ, и҆ ꙗ҆́кѡ бꙋ́рѧ колєсни́цы є҆гѡ̀, возда́ти ꙗ҆́ростїю ѿмще́нїе своѐ и҆ преще́нїе во пла́мени ѻ҆́гненнѣ: 16 ѻ҆гне́мъ бо гдⷭ҇нимъ сꙋди́тисѧ бꙋ́детъ всѧ̀ землѧ̀, и҆ мече́мъ є҆гѡ̀ всѧ́ка пло́ть: мно́зи ꙗ҆́звени бꙋ́дꙋтъ ѿ гдⷭ҇а. 17 Ѡ҆чища́ющїисѧ и҆ ѡ҆свѧща́ющїисѧ во вертогра́дѣхъ и҆ въ преддве́рїихъ ꙗ҆дꙋ́щїи мѧ́со свино́е и҆ ме́рзѡсти и҆ мы́шы вкꙋ́пѣ поги́бнꙋтъ, речѐ гдⷭ҇ь. 18 И҆ а҆́зъ дѣла̀ и҆́хъ и҆ помышле́нїе и҆́хъ вѣ́мъ, и҆ грѧдꙋ̀ собра́ти всѧ̑ наро́ды и҆ ꙗ҆зы́ки, и҆ прїи́дꙋтъ и҆ ᲂу҆́зрѧтъ сла́вꙋ мою̀: 19 и҆ ѡ҆ста́влю на ни́хъ зна́менїе, и҆ послю̀ ѿ ни́хъ спасе́ныхъ во ꙗ҆зы́ки, во ѳарсі́съ и҆ въ фꙋ́дъ, и҆ въ лꙋ́дъ и҆ въ мосо́хъ, и҆ въ ѳове́ль и҆ во є҆лла́дꙋ, и҆ во ѻ҆́стровы да̑льнїѧ, и҆̀же не слы́шаша и҆́мене моегѡ̀, нижѐ ви́дѣша сла́вꙋ мою̀: и҆ возвѣстѧ́тъ сла́вꙋ мою̀ во ꙗ҆зы́цѣхъ, 20 и҆ приведꙋ́тъ бра́тїю ва́шꙋ ѿ всѣ́хъ ꙗ҆зы̑къ да́ръ гдⷭ҇еви, съ ко́ньми и҆ колесни́цами и҆ съ носи́лами мскѡ́въ, под̾ сѣ́ньми во ст҃ы́й гра́дъ і҆ерⷭ҇ли́мъ, речѐ гдⷭ҇ь, а҆́ки бы принеслѝ сы́нове і҆и҃лєвы жє́ртвы своѧ̑ мнѣ̀ со ѱалмы̑ въ до́мъ гдⷭ҇ень: 21 и҆ ѿ тѣ́хъ поимꙋ̀ себѣ̀ жерцы̀ и҆ леѵі́ты, речѐ гдⷭ҇ь. 22 Ꙗ҆́коже бо не́бо но́во и҆ землѧ̀ нова̀, ꙗ҆̀же а҆́зъ творю̀, пребыва́ютъ предо мно́ю, гл҃етъ гдⷭ҇ь, та́кѡ ста́нетъ сѣ́мѧ ва́ше и҆ и҆́мѧ ва́ше: 23 и҆ бꙋ́детъ мцⷭ҇ъ ѿ мцⷭ҇а, и҆ сꙋббѡ́та ѿ сꙋббѡ́ты, прїи́детъ всѧ́ка пло́ть поклони́тисѧ предо мно́ю во і҆ерⷭ҇ли́мъ, речѐ гдⷭ҇ь: 24 и҆ и҆зы́дꙋтъ и҆ ᲂу҆́зрѧтъ трꙋ́пы человѣ́кѡвъ престꙋпи́вшихъ мнѣ̀: че́рвь бо и҆́хъ не сконча́етсѧ, и҆ ѻ҆́гнь и҆́хъ не ᲂу҆га́снетъ, и҆ бꙋ́дꙋтъ въ позо́ръ всѧ́цѣй пло́ти.
Слово 30. О союзе добродетельныя троицы в добродетелех
и҃і. Такова̀ равноа́гг҃лна дости́гшїи степе́не, мно́жицею пи́щꙋ тѣле́снꙋ забыва́ютъ: непщꙋ́ю же, нижѐ ча́стѣе тоѧ̀ жела́ютъ: и҆ не чꙋ́до, поне́же и҆ вожделѣ̑нїе сопроти́вно мно́жицею пи́щꙋ ѿри́нꙋло є҆́сть.
ѳ҃і. Непщꙋ́ю нетлѣ̑нныхъ си́хъ про́чее, нижѐ, ꙗ҆́коже бы приключи́лосѧ, тѣ̑лꙋ недꙋ́говати: ѡ҆чи́стисѧ бо, и҆ ѻ҆́бразомъ нѣ̑кимъ нетлѣ̑нносотвори́сѧ пла́менемъ чистоты̀ пресѣ̑кшїѧ пла́мень: непщꙋ́ю, нижѐ са́мꙋю тꙋ̀ снѣ̑дь, ю҆́же прїе́млютъ про́чее со сла́достїю прїима́ти: занѐ, вода̀ ѹ҆́бѡ подзе́мна, ко́рень садо́венъ: си́хъ же дꙋ́шы, ѻ҆́гнь нб҃е́сенъ пита́ти ѡ҆бы́че.
к҃. Возраще́нїе стра́ха, нача́ло є҆́сть любвѐ: коне́цъ же чистоты̀, вина̀ є҆́сть бг҃осло́вїѧ.
к҃а. Съ бг҃омъ соверше́ннѣ чꙋ̑вства своѧ̑ соедини́вый, словесє́мъ є҆гѡ̀ тайноꙋчи́мь быва́етъ ѿ негѡ̀: си̑мъ бо совокꙋплє́нымъ не бы́вшымъ, неꙋдо́бно є҆́сть ѡ҆ бз҃ѣ бесѣ̑довати.
к҃в. Всꙋще́ственно ѹ҆́бѡ сло́во, соверше́ннꙋ твори́тъ чистотꙋ̀, прише́ствїемъ свои́мъ ѹ҆мертви́вшо сме́рть: се́й же, ѹ҆мерщвле́нѣй бы́вшей, ѹ҆чени́къ бг҃осло́вїѧ просвѣще́нъ бы́сть.
к҃г. Сло́во гдⷭ҇не, є҆́же ѿ гдⷭ҇а чи́сто є҆́сть: пребыва́ющо въ вѣ̑къ вѣ̑ка: бг҃а бо не ѹ҆вѣ̑дѣвый, ѹ҆смотрѣва́телнѣ провѣщава́етъ.
к҃д. Чистота̀, ѹ҆ченика̀ бг҃осло́ва содѣ̑ла: са́мѣмъ собо́ю ѹ҆тверди́вша трⷪ҇цы трїе́хъ догма́ты.
к҃є. Любѧ́й гдⷭ҇а, бра́та своего̀ предвозлюби́лъ є҆́сть: ѹ҆каза́нїе бо пе́рвшагѡ, є҆́сть второ́е.
к҃ѕ. Любѧ́й бли́жнѧго, никогда́же ѡ҆клевета́ющихъ стерпи́тъ: но ꙗ҆́кѡ ѿ ѻ҆гнѧ̀ па́че ѿбѣжи́тъ.
к҃з. Глаго́лѧй гдⷭ҇а люби́ти, а҆ не бра́та своего̀ гнѣ̑ваѧйсѧ, подо́бенъ є҆́сть во снѣ̑хъ текꙋ́щемꙋ.
к҃и. Держа́ва любвѐ є҆́сть, наде́жда: то́ю бо любвѐ мзды̀ ѡ҆жида́етъ.
к҃ѳ. Наде́жда є҆́сть, несꙋмнѣ̑нно пре́жде сокро́вища сокро́вище.
л҃. Сїѧ̀ трꙋдѡ́въ є҆́сть поко́й, сїѧ̀ ѿсꙋ́тствꙋющихъ ѻ҆́бразъ.
л҃а. Наде́жды ѡ҆скꙋдѣ̑нїе, любвѐ є҆́сть потребле́нїе: къ се́й свѧза́шасѧ трꙋждє́нїѧ, на се́й зави́сѧтъ трꙋдѝ: сїю̀ ѡ҆крꙋжа́етъ ми́лость.
л҃в. Бл҃гонаде́жденъ мона́хъ, ѹ҆ны́нїѧ закала́тель: мече́мъ сеѧ̀, ѻ҆́но побѣжда́ѧ.
л҃г. Наде́ждꙋ ражда́етъ дарѡ́въ гдⷭ҇нихъ вкꙋ́съ: невкꙋ́сный бо, несꙋмнѣ̑ненъ не пребыва́етъ.
л҃д. Наде́ждꙋ разорѧ́етъ ꙗ҆́рость: занѐ та̀ ѹ҆́бѡ не посрамлѧ́етъ, мꙋ́жъ же ꙗ҆́ростивъ, не благоѻбра́зенъ (прит. а҃і, к҃є).
л҃є. Любы̀ пррⷪ҇о́чества є҆́сть пода́тель: любы̀ чꙋде́съ подава́телна: любы̀, ѡ҆сїѧва́нїѧ бе́здна: любы̀ є҆́сть, и҆сто́чникъ ѻ҆гнѧ̀: є҆ли́кѡ и҆стече́тъ, толи́кѡ жа́ждꙋщаго распали́тъ. Любы̀ є҆́сть, а҆́гг҃єлъ стоѧ́нїе, пред̾ꙋспѣѧ́нїе вѣкѡ́въ.
л҃ѕ. Возвѣстѝ на́мъ ѽ добра̀ въ добродѣ̑телехъ, гдѣ̀ пасе́ши ѻ҆́вцы твоѧ̑: гдѣ̀ почива́еши въ полꙋ́дне; (пѣ̑снь пѣ̑с. а҃, ѕ҃) просвѣтѝ на́съ, напо́й на́съ, наста́ви на́съ, рꙋководи́телствꙋй на́съ, поне́же про́чее восходи́ти къ тебѣ̀ хо́щемъ: ты́ бо влады́чествꙋеши всѣ̑ми. Ны́нѣ же дꙋ́шꙋ мою̀ на се́рдцѣ ѹ҆ѧ́зви́ла є҆сѝ, и҆ не могꙋ̀ держа́ти пла́мене твоегѡ̀: тѣ̑мже воспѣ̑въ тѧ̀ и҆дꙋ̀. Ты̀ влⷣчествꙋеши держа́вою морско́ю, возмꙋще́нїе же во́лнъ є҆гѡ̀ ты̀ ѹ҆кроча́еши и҆ ѹ҆мерщвлѧ́еши (ѱал. п҃и, і҃): ты̀ смирѧ́еши ꙗ҆́кѡ ꙗ҆́звена, го́рда по́мысла: мы́шцею си́лы твоеѧ̀ расточи́ла є҆сѝ врагѝ твоѧ̑, и҆ нера́тꙋемыхъ рачи́телей твои́хъ содѣ̑ловаеши.
л҃з. Ка́кѡ же і҆а́кѡвъ ѻ҆́нъ на лѣ̑ствицѣ тѧ̀ ѻ҆́нѣй ѹ҆твержде́нꙋ ви́дѣ, ѹ҆разꙋмѣ̑ти тщꙋ́сѧ: кі́й же ли ѹ҆̀бо є҆́сть ви́дъ ѻ҆́нъ такова́гѡ восхо́да, вопроша́ющꙋ скажи; Кі́й же ли є҆́сть ѻ҆́бразъ ѻ҆́нъ и҆ собра́нїе сложе́нїѧ твоегѡ̀ степе́ней ѻ҆́ноѧ, ꙗ҆̀же восхождє́нїѧ въ се́рдцѣ свое́мъ положѝ ѻ҆́нъ рачи́тель тво́й: ко́е же є҆́сть число̀ си́хъ. жажда́хъ ѹ҆вѣ̑дѣти: ко́е же ли ѹ҆̀бо є҆́сть тече́нїѧ ѻ҆́нагѡ вре́мѧ; Рꙋководи́телей бо ѻ҆́нѣхъ возвѣсти́лъ є҆́сть ѻ҆́нъ наꙋчи́выйсѧ боре́нїю твоемꙋ̀ ѻ҆́номꙋ и҆ видѣ̑нїю: но ничто́же и҆́но и҆звѣщава́ти восхотѣ̑лъ є҆́сть, па́че же возмо́же, а҆́ще бы подоба́ло мнѣ̀ гл҃ати сво́йственнѣе. Ѻ҆на́ же. а҆́ки съ нб҃се мнѣ̀ ꙗ҆́влшисѧ, цр҃и́ца сїѧ̀, и҆ ꙗ҆́кѡ во ѹ҆́хо дꙋшѝ моеѧ̀ бесѣ̑дꙋющи гл҃аше: а҆́ще не разрѣши́шисѧ, ѽ рачи́телю, ѿ дебелства̀ сегѡ̀, то̀ красотꙋ̀ мою̀, ꙗ҆́коже є҆́сть, вѣ̑дѣти не мо́жеши. Лѣ̑ствица же ѻ҆́на ѡ҆ дх҃о́внѣмъ добродѣ̑телей да наꙋча́етъ тѧ̀ сложе́нїи: на є҆ѧ́ же ѹ҆твержде́на є҆́смь а҆́зъ версѣ̀, ꙗ҆́коже вели́кїй ѻ҆́нъ тайноꙋчени́къ мо́й речѐ: ны́нѣ же пребыва́ютъ трѝ сїѧ̑: вѣ̑ра, наде́жда, любы̀: бо́лши же всѣ̑хъ любы̀ (а҃ кор. г҃і. г҃і).
На девятом часе:
Побꙋжде́нїе кра́тко и҆ равноси́лно простра́ннѣ речє́ннымъ.
Восходи́те, восходи́те, восхождє́нїѧ ѹ҆се́рднѣ въ се́рдцѣ полага́юще, бра́тїе, гл҃ющаго слы́шаще: прїиди́те взы́демъ на го́рꙋ гдⷭ҇ню, и҆ въ до́мъ бг҃а на́шегѡ (и҆са́. в҃. г҃): соверша́ющагѡ но́ги на́шѧ ꙗ҆́кѡ є҆ле́ни, и҆ на высо́кихъ поставлѧ́ющагѡ (ѱал. зі҃. лд҃), є҆́же побѣди́ти въ пꙋтѝ є҆гѡ̀. Тецы́те молю̀, со ѻ҆́нѣмъ гл҃ющимъ: потщи́мсѧ, до́ндеже дости́гнемъ всѝ въ соедине́нїе вѣ̑ры, и҆ позна́нїѧ бж҃їѧ, въ мꙋ́жа соверше́нна, въ мѣ̑рꙋ во́зраста и҆сполне́нїѧ хрⷭ҇то́ва (є҆фе́с. д҃. гі҃), и҆́же тридесѧтолѣ̑тенъ ви́димымъ во́зрастомъ крⷭ҇ти́всѧ, тридесѧ́тый степе́нь во ѹ҆́мнѣй ѻ҆́нѣй лѣ̑ствицѣ полꙋчи́лъ є҆́сть: поне́же любы̀ є҆́сть бг҃ъ: є҆мꙋ́же хвала̀, є҆мꙋ́же держа́ва, є҆мꙋ́же си́ла: въ не́мже всѣ̑хъ бла̑гъ вина̀ є҆́сть, и҆ бѣ̀, и҆ бꙋ́детъ въ неѡпредѣлѧ́ємы вѣ̑ки. А҆ми́нь.