Если чтения отсутствуют - значит, по данному дню еще не были добавлены тексты.
По шестой песни:
И поется кондак и икос (или мученичен, аще несть).Стихи́:
Рыда́еши, Іису́се, — сіе́ сме́ртнаго существа́;
Оживля́еши дру́га Твоего́, — сіе́ Боже́ственныя крѣ́пости.
Въ то́йже де́нь воста́ніе пра́зднуемъ свята́го и пра́веднаго дру́га Христо́ва Ла́заря Четверодне́внаго.
Се́й евре́инъ у́бо бя́ше ро́домъ, фарисе́й же е́ресію, и сы́нъ, я́коже нѣ́гдѣ обрѣ́теся, фарисе́я сы́й Си́мона, отъ Виѳа́ніи ве́си происходя́. Го́споду же на́шему Іису́су Христу́, по земли́ творя́щу хожде́нія о спасе́ніи ро́да на́шего, и си́це въ содру́жество Ему́ соединя́ется. Поне́же бо къ Си́мону Христо́съ ча́сто бесѣ́доваше, а́ки и тому́ о воскресе́ніи ме́ртвыхъ зѣло́ моля́щуся, и къ до́му его́ прихожда́ше мно́гажды, Ла́зарь въ сво́йство возлюбля́ется, не то́йже еди́нъ, но и сестрѣ́ его́ двѣ́, Ма́рѳа я́вѣ и Марíя.
Уже́ бо спаси́тельной Стра́сти приближа́ющейся, ельма́ подоба́ше воскресе́нія та́инству извѣ́стнѣе увѣ́ритися. Бя́ше у́бо пребыва́я Іису́съ объ о́нъ по́лъ Іорда́на, пе́рвѣе Іаи́рова о́трочища и вдови́ча сы́на воскреси́въ изъ ме́ртвыхъ. Дру́гъ же его́ Ла́зарь неду́гомъ тя́жкимъ объя́тъ бы́въ, у́мре. Іису́съ у́бо и не сы́й та́мо, ученико́мъ глаго́летъ: «Ла́зарь, дру́гъ на́шъ, у́спе». И ма́ло па́ки преста́въ, «Ла́зарь», рече́, «у́мре». Прихо́дитъ у́бо въ Виѳа́нію, Іорда́нъ оста́вль, отъ се́стръ его́ возвѣще́нъ бы́въ. Разстои́тъ же отъ Іерусали́ма Виѳа́нія, а́ки ста́дій пятьна́десять. И предусрѣто́стѣ сестрѣ́ Ла́заревѣ, глаго́лющѣ: «Го́споди, а́ще бы еси́ бы́лъ здѣ́, не бы́ у́мерлъ на́шъ бра́тъ; но и ны́нѣ а́ще Тебѣ́ хоти́тельно, воздви́гнеши и́, мо́жеши бо». Вопроша́етъ же наро́да Іису́съ: «гдѣ́ положи́сте его́?» И а́біе вси́ предыдя́ху на гро́бъ. И ка́мени взя́ту бы́вшу, Ма́рѳа глаго́летъ: «Го́споди, уже́ смерди́тъ, четверодне́венъ бо е́сть». Помоли́вся Іису́съ и сле́зы надъ лежа́щаго испусти́въ, гла́сомъ ве́ліимъ воззва́: «Ла́заре гряди́ во́нъ!» И а́біе уме́рый изы́де и, разрѣше́нъ бы́въ, оты́де въ до́мъ.
Сіе́ стра́нное чу́до на за́висть воздвиза́етъ евре́йскія лю́ди, и на Христа́ возбѣша́ются. Іису́съ же, па́ки укло́нься, оты́де. Архіере́и же и Ла́заря уби́ти помышля́ху, зане́ мно́зи, его́ зря́ще, ко Христу́ прилага́хуся. Но о́нъ мы́слимая разумѣ́въ, къ Ки́прскому о́строву избѣга́етъ, и та́мо пребыва́я, по́слѣжде отъ апо́столовъ архіере́й показу́ется Ките́йскаго гра́да. До́брѣ же и боголюбе́знѣ пожи́въ, по тридесятолѣ́тномъ вре́мени ожи́тія своего́, умира́етъ па́ки и та́можде погреба́ется, мно́гая чудеса́ содѣ́явъ. Глаго́лется же, по ожи́тіи ничесо́же я́сти, кромѣ́ услажда́ющаго. И я́ко его́ омофо́ръ Пречи́стая Бо́жія Ма́ти, Свои́ма угото́вльши рука́ма, ему́ дарова́.
Сего́ честны́я и святы́я мо́щи прему́дрѣйшій ца́рь Ле́въ, отъ нѣ́коего видѣ́нія Боже́ственнѣйшаго, отту́ду прене́съ, въ созда́ннѣмъ отъ него́ въ Константиногра́дѣ, во и́мя сего́ свята́го хра́мѣ, че́стно и многоцѣ́нно полага́етъ, одесну́ю въ хра́мъ входя́ще, въ проти́вной свяще́нному олтарю́ стѣнѣ́. И ны́нѣ еще́ пребыва́ютъ честны́я его́ мо́щи, неизрече́нное нѣ́кое благово́ніе соверша́юще.
Пра́здноватися же въ настоя́щій де́нь вчини́ся его́ воста́ніе, зане́ святíи и богоно́сніи отцы́ на́ши, па́че же святíи апо́столи, по четыредесятодне́внѣмъ постѣ́ за очище́ніе, святы́я Стра́сти Го́спода на́шего Іису́са Христа́ хотя́ще жре́ти, поне́же сіе́ чу́до нача́ло и вину́ наипа́че обрѣто́ша іуде́йскаго на Христа́ неи́стовства, посему́ здѣ́ преесте́ственное сіе́ чу́до положи́ша. Еже у́бо евангели́стъ Іоа́ннъ са́мъ спису́етъ, я́ко други́мъ евангели́стомъ оста́вльшимъ сіе́, я́вѣ еще́ жи́въ бѣ́ Ла́зарь и ви́димь. Глаго́лется у́бо, я́ко и сего́ ра́ди самаго́ и про́чее списа́ся Ева́нгеліе, и я́ко ничесо́же о безнача́льномъ Рождествѣ́ Христо́вѣмъ друзíи воспомяну́ша. Се́ бо бя́ше иско́мое увѣ́ритися, я́ко Сы́нъ Бо́жій и Бо́гъ бѣ́ Христо́съ, и я́ко воскре́се, и воскресе́ніе бу́детъ ме́ртвымъ, е́же Ла́заремъ па́че увѣря́ется.
Ничто́же отъ е́же во а́дѣ Ла́зарь, рече́, — или́ я́ко не оста́влено бы́сть ви́дѣти я́же та́мо, или́ ви́дѣвшу, молча́ти о си́хъ повелѣ́но бы́сть.
Отсе́лѣ и вся́къ человѣ́къ ны́нѣ уме́рый, «Ла́зарь» глаго́лется, и гро́бная оде́жда па́ки «лаза́рома» нарица́ется, гада́тельствующему сло́ву, е́же въ па́мять пе́рваго Ла́заря приходи́ти. Аще бо о́нъ сло́вомъ Христо́вымъ воста́ и оживе́ па́ки, та́ко и се́й, а́ще и у́мре, въ послѣ́днѣй трубѣ́ воста́въ, вѣ́чно жи́ти бу́детъ.
Моли́твами дру́га Твоего́ Ла́заря, Христе́ Бо́же, поми́луй на́съ, ами́нь.
Апостол на Литургии:
Евр. 333Б
28 Тѣ́мже црⷭ҇тво непоколеби́мо прїе́млюще, да и҆́мамы блгⷣть, є҆́юже слꙋ́жимъ бл҃гоꙋго́днѡ бг҃ꙋ съ бл҃гоговѣ́нїемъ и҆ стра́хомъ, 29 и҆́бо бг҃ъ на́шъ ѻ҆́гнь поѧда́ѧй (є҆́сть).
1 Братолю́бїе да пребыва́етъ: 2 страннолю́бїѧ не забыва́йте, тѣ́мъ бо не вѣ́дѧще нѣ́цыи страннопрїѧ́ша а҆́гг҃лы. 3 Помина́йте ю҆́зники, а҆́ки съ ни́ми свѧ́зани: ѡ҆ѕлоблѧ́ємыѧ, а҆́ки и҆ са́ми сꙋ́ще въ тѣ́лѣ. 4 Честна̀ жени́тва во всѣ́хъ и҆ ло́же нескве́рно: блꙋдникѡ́мъ же и҆ прелюбодѣ́ємъ сꙋ́дитъ бг҃ъ. 5 Не сребролю́бцы нра́вомъ, дово́льни сꙋ́щими. То́й бо речѐ: не и҆́мамъ тебѐ ѡ҆ста́вити, нижѐ и҆́мамъ ѿ тебє̀ ѿстꙋпи́ти: 6 ꙗ҆́кѡ дерза́ющымъ на́мъ глаго́лати: гдⷭ҇ь мнѣ̀ помо́щникъ, и҆ не ᲂу҆бою́сѧ: что̀ сотвори́тъ мнѣ̀ человѣ́къ; 7 [Заⷱ҇ 334] Помина́йте наста́вники ва́шѧ, и҆̀же глаго́лаша ва́мъ сло́во бж҃їе: и҆́хже взира́юще на сконча́нїе жи́тельства, подража́йте вѣ́рѣ (и҆́хъ). 8 І҆и҃съ хрⷭ҇то́съ вчера̀ и҆ дне́сь то́йже, и҆ во вѣ́ки.
Евангелие на Литургии:
Ин. 39
1 [Заⷱ҇ 39] Бѣ́ же нѣ́кто болѧ̀ ла́зарь ѿ виѳа́нїи, ѿ ве́си марі́ины и҆ ма́рѳы сестры̀ є҆ѧ̀. 2 Бѣ́ же марі́а пома́завшаѧ гдⷭ҇а мѵ́ромъ и҆ ѡ҆те́ршаѧ но́зѣ є҆гѡ̀ власы̑ свои́ми, є҆ѧ́же бра́тъ ла́зарь болѧ́ше. 3 Посла́стѣ ᲂу҆̀бо сестрѣ̑ къ немꙋ̀, глаго́лющѣ: гдⷭ҇и, сѐ, є҆го́же лю́биши, боли́тъ. 4 Слы́шавъ же і҆и҃съ речѐ: сїѧ̀ болѣ́знь нѣ́сть къ сме́рти, но ѡ҆ сла́вѣ бж҃їи, да просла́витсѧ сн҃ъ бж҃їй є҆ѧ̀ ра́ди. 5 Люблѧ́ше же і҆и҃съ ма́рѳꙋ и҆ сестрꙋ̀ є҆ѧ̀ и҆ ла́зарѧ. 6 Є҆гда́ же ᲂу҆слы́ша, ꙗ҆́кѡ боли́тъ, тогда̀ пребы́сть на не́мже бѣ̀ мѣ́стѣ два̀ дни̑. 7 Пото́мъ же гл҃а ᲂу҆чн҃кѡ́мъ: и҆́демъ во і҆ꙋде́ю па́ки. 8 Глаго́лаша є҆мꙋ̀ ᲂу҆чн҃цы̀: равві̀, нн҃ѣ и҆ска́хꙋ тебѐ ка́менїемъ поби́ти і҆ꙋде́є, и҆ па́ки ли и҆́деши та́мѡ; 9 Ѿвѣща̀ і҆и҃съ: не два́ ли на́десѧте часа̑ є҆ста̀ во днѝ; а҆́ще кто̀ хо́дитъ во днѝ, не по́ткнетсѧ, ꙗ҆́кѡ свѣ́тъ мі́ра сегѡ̀ ви́дитъ: 10 а҆́ще же кто̀ хо́дитъ въ нощѝ, по́ткнетсѧ, ꙗ҆́кѡ нѣ́сть свѣ́та въ не́мъ. 11 Сїѧ̑ речѐ и҆ посе́мъ гл҃а и҆̀мъ: ла́зарь дрꙋ́гъ на́шъ ᲂу҆́спе: но и҆дꙋ̀, да возбꙋжꙋ̀ є҆го̀. 12 Рѣ́ша ᲂу҆̀бо ᲂу҆чн҃цы̀ є҆гѡ̀: гдⷭ҇и, а҆́ще ᲂу҆́спе, спасе́нъ бꙋ́детъ. 13 Рече́ же і҆и҃съ ѡ҆ сме́рти є҆гѡ̀: ѻ҆ни́ же мнѣ́ша, ꙗ҆́кѡ ѡ҆ ᲂу҆спе́нїи сна̀ гл҃етъ. 14 Тогда̀ речѐ и҆̀мъ і҆и҃съ не ѡ҆бинꙋ́ѧсѧ: ла́зарь ᲂу҆́мре: 15 и҆ ра́дꙋюсѧ ва́съ ра́ди, да вѣ́рꙋете, ꙗ҆́кѡ не бѣ́хъ та́мѡ: но и҆́демъ къ немꙋ̀. 16 Рече́ же ѳѡма̀, глаго́лемый близне́цъ, ᲂу҆чн҃кѡ́мъ: и҆́демъ и҆ мы̀, да ᲂу҆́мремъ съ ни́мъ. 17 Прише́дъ же і҆и҃съ, ѡ҆брѣ́те є҆го̀ четы́ри дни̑ ᲂу҆жѐ и҆мꙋ́ща во гро́бѣ. 18 Бѣ́ же виѳа́нїа бли́з̾ і҆ерⷭ҇ли́ма, ꙗ҆́кѡ ста́дїй пѧтьна́десѧть, 19 и҆ мно́зи ѿ і҆ꙋдє́й бѧ́хꙋ пришлѝ къ ма́рѳѣ и҆ марі́и, да ᲂу҆тѣ́шатъ и҆̀хъ ѡ҆ бра́тѣ є҆ю̀. 20 Ма́рѳа ᲂу҆̀бо є҆гда̀ ᲂу҆слы́ша, ꙗ҆́кѡ і҆и҃съ грѧде́тъ, срѣ́те є҆го̀: марі́а же до́ма сѣдѧ́ше. 21 Рече́ же ма́рѳа ко і҆и҃сꙋ: гдⷭ҇и, а҆́ще бы є҆сѝ здѣ̀ бы́лъ, не бы̀ бра́тъ мо́й ᲂу҆́мерлъ: 22 но и҆ нн҃ѣ вѣ́мъ, ꙗ҆́кѡ є҆ли̑ка а҆́ще про́сиши ѿ бг҃а, да́стъ тебѣ̀ бг҃ъ. 23 Гл҃а є҆́й і҆и҃съ: воскре́снетъ бра́тъ тво́й. 24 Глаго́ла є҆мꙋ̀ ма́рѳа: вѣ́мъ, ꙗ҆́кѡ воскре́снетъ въ воскр҃ше́нїе, въ послѣ́днїй де́нь. 25 Рече́ (же) є҆́й і҆и҃съ: а҆́зъ є҆́смь воскр҃ше́нїе и҆ живо́тъ: вѣ́рꙋѧй въ мѧ̀, а҆́ще и҆ ᲂу҆́мретъ, ѡ҆живе́тъ: 26 и҆ всѧ́къ живы́й и҆ вѣ́рꙋѧй въ мѧ̀ не ᲂу҆́мретъ во вѣ́ки. Є҆́млеши ли вѣ́рꙋ семꙋ̀; 27 Глаго́ла є҆мꙋ̀: є҆́й, гдⷭ҇и: а҆́зъ вѣ́ровахъ, ꙗ҆́кѡ ты̀ є҆сѝ хрⷭ҇то́съ сн҃ъ бж҃їй, и҆́же въ мі́ръ грѧды́й. 28 И҆ сїѧ̑ ре́кши, и҆́де и҆ пригласѝ марі́ю сестрꙋ̀ свою̀ та́й, ре́кши: ᲂу҆чт҃ль прише́лъ є҆́сть и҆ глаша́етъ тѧ̀. 29 Ѻ҆на́ (же) ꙗ҆́кѡ ᲂу҆слы́ша, воста̀ ско́рѡ и҆ и҆́де къ немꙋ̀. 30 Не ᲂу҆же́ бо бѣ̀ прише́лъ і҆и҃съ въ ве́сь, но бѣ̀ на мѣ́стѣ, и҆дѣ́же срѣ́те є҆го̀ ма́рѳа. 31 І҆ꙋде́є (же) ᲂу҆̀бо сꙋ́щїи съ не́ю въ домꙋ̀ и҆ ᲂу҆тѣша́юще ю҆̀, ви́дѣвше марі́ю, ꙗ҆́кѡ ско́рѡ воста̀ и҆ и҆зы́де, по не́й и҆до́ша, глаго́люще, ꙗ҆́кѡ и҆́детъ на гро́бъ, да пла́четъ та́мѡ. 32 Марі́а же ꙗ҆́кѡ прїи́де, и҆дѣ́же бѣ̀ і҆и҃съ, ви́дѣвши є҆го̀, падѐ є҆мꙋ̀ на ногꙋ̀, глаго́лющи є҆мꙋ̀: гдⷭ҇и, а҆́ще бы є҆сѝ бы́лъ здѣ̀, не бы̀ ᲂу҆́мерлъ мо́й бра́тъ. 33 І҆и҃съ ᲂу҆̀бо, ꙗ҆́кѡ ви́дѣ ю҆̀ пла́чꙋщꙋсѧ и҆ прише́дшыѧ съ не́ю і҆ꙋдє́и пла́чꙋщѧ, запретѝ дх҃ꙋ и҆ возмꙋти́сѧ са́мъ 34 и҆ речѐ: гдѣ̀ положи́сте є҆го̀; Глаго́лаша є҆мꙋ̀: гдⷭ҇и, прїидѝ и҆ ви́ждь. 35 Прослези́сѧ і҆и҃съ. 36 Глаго́лахꙋ ᲂу҆̀бо жи́дове: ви́ждь, ка́кѡ люблѧ́ше є҆го̀. 37 Нѣ́цыи же ѿ ни́хъ рѣ́ша: не можа́ше ли се́й, ѿве́рзый ѻ҆́чи слѣпо́мꙋ, сотвори́ти, да и҆ се́й не ᲂу҆́мретъ; 38 І҆и҃съ же па́ки претѧ̀ въ себѣ̀, прїи́де ко гро́бꙋ. Бѣ́ же пеще́ра, и҆ ка́мень лежа́ше на не́й. 39 Гл҃а і҆и҃съ: возми́те ка́мень. Глаго́ла є҆мꙋ̀ сестра̀ ᲂу҆ме́ршагѡ ма́рѳа: гдⷭ҇и, ᲂу҆жѐ смерди́тъ: четверодне́венъ бо є҆́сть. 40 Гл҃а є҆́й і҆и҃съ: не рѣ́хъ ли тѝ, ꙗ҆́кѡ а҆́ще вѣ́рꙋеши, ᲂу҆́зриши сла́вꙋ бж҃їю; 41 Взѧ́ша ᲂу҆̀бо ка́мень, и҆дѣ́же бѣ̀ ᲂу҆ме́рый лежѧ̀. І҆и҃съ же возведѐ ѻ҆́чи горѣ̀ и҆ речѐ: ѻ҆́ч҃е, хвалꙋ̀ тебѣ̀ воздаю̀, ꙗ҆́кѡ ᲂу҆слы́шалъ є҆сѝ мѧ̀: 42 а҆́зъ же вѣ́дѣхъ, ꙗ҆́кѡ всегда̀ мѧ̀ послꙋ́шаеши: но наро́да ра́ди стоѧ́щагѡ ѡ҆́крестъ рѣ́хъ, да вѣ́рꙋ и҆́мꙋтъ, ꙗ҆́кѡ ты̀ мѧ̀ посла́лъ є҆сѝ. 43 И҆ сїѧ̑ ре́къ, гла́сомъ вели́кимъ воззва̀: ла́заре, грѧдѝ во́нъ. 44 И҆ и҆зы́де ᲂу҆ме́рый, ѡ҆бѧ́занъ рꙋка́ма и҆ нога́ма ᲂу҆кро́емъ, и҆ лицѐ є҆гѡ̀ ᲂу҆брꙋ́сомъ ѡ҆бѧ́зано. Гл҃а и҆̀мъ і҆и҃съ: разрѣши́те є҆го̀ и҆ ѡ҆ста́вите и҆тѝ. 45 Мно́зи ᲂу҆̀бо ѿ і҆ꙋдє́й прише́дшїи къ марі́и и҆ ви́дѣвше, ꙗ҆̀же сотворѝ і҆и҃съ, вѣ́роваша въ него̀: