Если чтения отсутствуют - значит, по данному дню еще не были добавлены тексты.
На паремиях вечерни по прокимне:
Быт. 43:26–31; 45:1–16
26 Прїи́де же і҆ѡ́сифъ въ до́мъ: и҆ принесо́ша є҆мꙋ̀ да́ры, ꙗ҆̀же и҆мѧ́хꙋ въ рꙋка́хъ свои́хъ, въ до́мъ: и҆ поклони́шасѧ є҆мꙋ̀ лице́мъ до землѝ. 27 И҆ вопросѝ и҆̀хъ: здра́ви ли є҆стѐ; И҆ речѐ и҆̀мъ: здра́въ ли є҆́сть ѻ҆те́цъ ва́шъ, ста́рецъ, є҆го́же реко́сте, є҆ще́ ли жи́въ є҆́сть; 28 Ѻ҆ни́ же реко́ша: здра́въ є҆́сть ра́бъ тво́й, ѻ҆те́цъ на́шъ, є҆щѐ жи́въ є҆́сть. И҆ речѐ: блгⷭ҇ве́нъ человѣ́къ ѻ҆́ный бг҃ꙋ. И҆ прини́кше поклони́шасѧ є҆мꙋ̀. 29 Воззрѣ́въ же ѻ҆чи́ма свои́ма і҆ѡ́сифъ, ви́дѣ венїамі́на бра́та своего̀ є҆динома́тернѧ и҆ речѐ: се́й ли є҆́сть бра́тъ ва́шъ ю҆нѣ́йшїй, є҆го́же реко́сте ко мнѣ̀ привестѝ; И҆ речѐ: бг҃ъ да поми́лꙋетъ тѧ̀, ча́до. 30 Возмꙋти́сѧ же і҆ѡ́сифъ: подви́жесѧ бо ᲂу҆тро́ба є҆гѡ̀ ѡ҆ бра́тѣ свое́мъ, и҆ и҆ска́ше пла́кати: вше́дъ же въ ло́жницꙋ, пла́касѧ та́мѡ. 31 И҆ ᲂу҆мы́въ лицѐ, и҆зше́дъ ᲂу҆держа́сѧ и҆ речѐ: предложи́те хлѣ́бы.
1 И҆ не можа́ше і҆ѡ́сифъ ᲂу҆держа́тисѧ всѣ̑мъ предстоѧ́щымъ є҆мꙋ̀, но речѐ: ѡ҆тосли́те всѣ́хъ ѿ менє̀. И҆ не предстоѧ́ше ни є҆ди́нъ і҆ѡ́сифꙋ, є҆гда̀ познава́шесѧ бра́тїи свое́й. 2 И҆ и҆спꙋстѝ гла́съ съ пла́чемъ: слы́шаша же всѝ є҆гѵ́птѧне, и҆ слы́шано бы́сть въ домꙋ̀ фараѡ́новѣ. 3 Рече́ же і҆ѡ́сифъ бра́тїи свое́й: а҆́зъ є҆́смь і҆ѡ́сифъ: є҆ще́ ли ѻ҆те́цъ мо́й жи́въ є҆́сть; И҆ не мого́ша бра́тїѧ ѿвѣща́ти є҆мꙋ̀: смꙋти́шасѧ бо. 4 Рече́ же і҆ѡ́сифъ бра́тїи свое́й: прибли́житесѧ ко мнѣ̀. И҆ прибли́жишасѧ. И҆ речѐ: а҆́зъ є҆́смь і҆ѡ́сифъ, бра́тъ ва́шъ, є҆го́же прода́сте во є҆гѵ́петъ: 5 нн҃ѣ ᲂу҆̀бо не скорби́те, нижѐ же́стоко ва́мъ да ꙗ҆ви́тсѧ, ꙗ҆́кѡ прода́сте мѧ̀ сѣ́мѡ: на жи́знь бо посла́ мѧ бг҃ъ пред̾ ва́ми: 6 сїе́ бо второ́е лѣ́то гла́дъ на землѝ, и҆ є҆щѐ пѧ́ть лѣ́тъ ѡ҆ста̀, въ ни́хже не бꙋ́детъ ѡ҆ра́нїѧ, ни жа́твы: 7 посла́ бо мѧ̀ бг҃ъ пред̾ ва́ми ѡ҆ста́вити ва́мъ ѡ҆ста́нокъ на землѝ и҆ препита́ти ва́шъ ѡ҆ста́нокъ ве́лїй: 8 нн҃ѣ ᲂу҆̀бо не вы̀ посла́сте мѧ̀ сѣ́мѡ, но бг҃ъ: и҆ сотвори́ мѧ ꙗ҆́кѡ ѻ҆тца̀ фараѡ́нꙋ и҆ господи́на всемꙋ̀ до́мꙋ є҆гѡ̀ и҆ кнѧ́зѧ все́й землѝ є҆гѵ́петстѣй: 9 потща́вшесѧ ᲂу҆̀бо, взы́дите ко ѻ҆тцꙋ̀ моемꙋ̀ и҆ рцы́те є҆мꙋ̀: сїѧ̑ глаго́летъ сы́нъ тво́й і҆ѡ́сифъ: сотвори́ мѧ бг҃ъ господи́на все́й землѝ є҆гѵ́петстѣй: сни́ди ᲂу҆̀бо ко мнѣ̀ и҆ не ᲂу҆ме́дли: 10 и҆ всели́шисѧ въ землѝ гесе́мли а҆раві́йстѣй, и҆ бꙋ́деши бли́з̾ менє̀ ты̀ и҆ сы́нове твоѝ, и҆ сы́нове сынѡ́въ твои́хъ, ѻ҆́вцы твоѧ̑ и҆ воло́ве твоѝ, и҆ є҆ли̑ка сꙋ́ть твоѧ̑: 11 и҆ препита́ю тѧ̀ та́мѡ, є҆ще́ бо пѧ́ть лѣ́тъ бꙋ́детъ гла́дъ на землѝ, да не поги́бнеши ты̀ и҆ сы́нове твоѝ, и҆ всѧ̑ и҆мѣ̑нїѧ твоѧ̑. 12 Сѐ, ѻ҆́чи ва́ши ви́дѧтъ, и҆ ѻ҆́чи венїамі́на бра́та моегѡ̀, ꙗ҆́кѡ ᲂу҆ста̀ моѧ̑ глагѡ́лющаѧ къ ва́мъ: 13 возвѣсти́те ᲂу҆̀бо ѻ҆тцꙋ̀ моемꙋ̀ всю̀ сла́вꙋ мою̀ сꙋ́щꙋю во є҆гѵ́птѣ, и҆ є҆ли̑ка ви́дите: и҆ ᲂу҆скори́вше, приведи́те ѻ҆тца̀ моего̀ сѣ́мѡ. 14 И҆ напа́дъ на вы́ю венїамі́на, бра́та своегѡ̀, пла́касѧ над̾ ни́мъ, и҆ венїамі́нъ пла́касѧ на вы́и є҆гѡ̀. 15 И҆ ѡ҆блобыза́въ всю̀ бра́тїю свою̀, пла́касѧ над̾ ни́ми: и҆ по си́хъ глаго́лаша къ немꙋ̀ бра́тїѧ є҆гѡ̀. 16 И҆ пронесе́сѧ гла́съ въ домꙋ̀ фараѡ́новѣ, глаго́люще: прїидо́ша бра́тїѧ і҆ѡ́сифѡва. Возра́довасѧ же фараѡ́нъ и҆ рабѝ є҆гѡ̀.
Притч. 21:23 – 22:4
23 И҆́же храни́тъ своѧ̑ ᲂу҆ста̀ и҆ ѧ҆зы́къ, соблюда́етъ ѿ печа́ли дꙋ́шꙋ свою̀. 24 Проде́рзый и҆ велича́вый и҆ гордели́вый гꙋби́тель нарица́етсѧ: а҆ и҆́же памѧтоѕло́бствꙋетъ, беззако́ненъ. 25 По́хѡти лѣни́ваго ᲂу҆бива́ютъ: не произволѧ́ютъ бо рꙋ́цѣ є҆гѡ̀ твори́ти что̀. 26 Нечести́вый жела́етъ ве́сь де́нь по́хѡти ѕлы̑ѧ, првⷣный же ми́лꙋетъ и҆ ще́дритъ неща́днѡ. 27 Жє́ртвы нечести́выхъ ме́рзость гдⷭ҇еви: и҆́бо беззако́ннѡ прино́сѧтъ ѧ҆̀. 28 Свидѣ́тель ло́жный поги́бнетъ, мꙋ́жъ же послꙋшли́въ сохранѧ́емь возглаго́летъ. 29 Нечести́въ мꙋ́жъ безстꙋ́днѡ стои́тъ лице́мъ: пра́вый же са́мъ разꙋмѣва́етъ пꙋти̑ своѧ̑. 30 Нѣ́сть премꙋ́дрости, нѣ́сть мꙋ́жества, нѣ́сть совѣ́та ᲂу҆ нечести́вагѡ. 31 Ко́нь ᲂу҆готовлѧ́етсѧ на де́нь бра́ни: ѿ гдⷭ҇а же по́мощь.
1 Лꙋ́чше и҆́мѧ до́брое, не́же бога́тство мно́го, па́че же сребра̀ и҆ зла́та блгⷣть бл҃га́ѧ. 2 Бога́тъ и҆ ни́щь срѣто́ста дрꙋ́гъ дрꙋ́га, ѻ҆бои́хъ же гдⷭ҇ь сотворѝ. 3 Хꙋдо́гъ, ви́дѣвъ лꙋка́ваго мꙋ́чима крѣ́пкѡ, са́мъ наказꙋ́етсѧ: безꙋ́мнїи же мимоше́дше ѡ҆тщети́шасѧ. 4 Ро́дъ премꙋ́дрости стра́хъ гдⷭ҇ень, и҆ бога́тство и҆ сла́ва и҆ живо́тъ.
На третьем часе:
СЛО́ВО К҃И. Ѡ҆ сщ҃е́ннѣй и҆ мт҃ри добродѣ̑телей, бл҃же́ннѣй мл҃и́твѣ: и҆ ѡ҆ ѹ҆́мнѣмъ въ не́й и҆ чꙋ́вственнѣмъ предстоѧ́нїи.
Мл҃и́тва є҆́сть по ка́чествꙋ ѹ҆́бѡ своемꙋ̀, сопребыва́нїе и҆ соедине́нїе человѣ̑ка и҆ бг҃а: по дѣ̑йствꙋ же, мі́ра состоѧ́нїе, бж҃їе примире́нїе, сле́зъ ма́ти и҆ па́ки дщѝ, ѡ҆ грѣсѣ̑хъ ѹ҆милостивле́нїе, и҆скꙋше́нїй мо́стъ, скорбе́й средостѣ̑нїе, бра́ней сокрꙋше́нїе, а҆́гг҃єлъ дѣ̑ло, безпло́тныхъ всѣ̑хъ пи́ща, бꙋ́дꙋщее весе́лїе, безконе́чно дѣ̑ланїе, добродѣ̑телей и҆сто́чникъ, дарова́нїй вино́вна, пред̾ꙋспѣѧ́нїе неви́димо, пи́ща дꙋшѝ, ѹ҆ма̀ просвѣще́нїе, ѿча́ѧнїю сѣки́ра, наде́жды ѹ҆каза́нїе, печа́ли рѣше́нїе, бога́тство мона́хѡвъ, безмо́лвникѡвъ сокро́вище, ꙗ҆́рости ѹ҆мале́нїе, зерца́ло пред̾ꙋспѣѧ́нїѧ, мѣ̑ръ ꙗ҆вле́нїе, ѹ҆строе́нїѧ и҆з̾ѧвле́нїе, бꙋ́дꙋщихъ возвѣсти́тель, сла́вы зна́менїе. Мл҃и́тва є҆́сть вои́стиннꙋ молѧ́щемꙋсѧ сꙋди́лище и҆ сꙋди́ще, и҆ прⷭ҇то́лъ сꙋди́ща гдⷭ҇нь пре́жде бꙋ́дꙋщагѡ прⷭ҇то́ла.
в҃. Воста́вше ѹ҆слы́шимъ сщ҃е́ннꙋю сїю̀ цр҃и́цꙋ добродѣ̑телей, къ на́мъ высо́кимъ гла́сомъ вопїю́щꙋ и҆ гл҃ющꙋ: прїиди́те ко мнѣ̀ всѝ трꙋжда́ющїисѧ и҆ ѡ҆бремене́ннїи, и҆ а҆́зъ ѹ҆поко́ю вы̀. Возми́те и҆́го моѐ на себѐ, и҆ ѡ҆брѧ́щете поко́й дꙋша́мъ ва́шымъ, и҆ и҆сцѣле́нїе ꙗ҆́звамъ ва́шымъ. И҆́го бо моѐ бла́го и҆ согрѣше́нїй вели́кихъ и҆сцѣли́телно є҆́сть.
г҃. Є҆ли́цы цр҃ю̀ и҆ бг҃ꙋ предста́ти и҆ свозглаго́лати грѧде́мъ, не непригото́ванни тече́нїе своѐ сотвори́мъ, да не ка́кѡ ѹ҆зрѣ̑въ на́съ и҆здале́ча не и҆мꙋ́щихъ ѻ҆рꙋ́жїй и҆ ѻ҆де́жды црⷭ҇ка предстоѧ́нїѧ, слꙋга́мъ и҆ слꙋжи́телємъ повели́тъ дале́че нѣ̑гдѣ ѿ лица̀ своегѡ̀ свѧ́занныхъ и҆згони́ти: и҆ молє́нїѧ на̑ша на лицѐ на́ше раздира́єма возпосыла́ти.
д҃. Да бꙋ́детъ ри́за твоѧ̀ дꙋше́внаѧ, пред̾ гдⷭ҇емъ предста́ти грѧдꙋ́щꙋ, всѧ̀ прѧ́жею, па́че же зало́гомъ непамѧтоѕло́бїѧ и҆стка́нна: а҆́ще ли же нѝ, то̀ ничи́мже ѿ мл҃и́твы сеѧ̀ спо́лзꙋешисѧ.
є҃. Да бꙋ́детъ тѝ ве́сь моле́нїѧ сегѡ̀ (поста́въ), неразли́ченъ: є҆ди́нѣмъ бо сло́вомъ мыта́рь и҆ блꙋдни́къ бг҃а примири́ста.
ѕ҃. Є҆ди́но ѹ҆́бѡ є҆́сть предстоѧ́щихъ предстоѧ́нїе, мно́гꙋ же въ себѣ̀ разли́чность и҆ ра́зность и҆́мать. Ѻ҆́ви ѹ҆́бѡ ꙗ҆́кѡ ко дрꙋ́гꙋ и҆ ко влⷣцѣ пристꙋпа́ютъ, и҆нѣ̑хъ ра́ди про́чее, а҆ не своегѡ̀ ра́ди застꙋпле́нїѧ, пѣ̑снь и҆ молбꙋ̀ сїю̀ приносѧ́ще: и҆́ни, бога́тства и҆ сла́вы и҆ дерзнове́нїѧ мно́гша привзыскꙋ́юще: и҆́ни, ѿ сопе́рника своегѡ̀ въ коне́цъ и҆зба́витисѧ просѧ́ще: нѣ̑цыи ѹ҆́бѡ са́нъ нѣ̑кїй прїѧ́ти ѹ҆молѧ́юще: и҆́ни же соверше́нно до́лга ѻ҆́нагѡ безпопече́нїе: нѣ̑цыи ѹ҆́бѡ, ѿ темни́цы свобожде́нїе: и҆́ни же ѡ҆бвине́нїй рѣше́нїе.
з҃. Пре́жде всѣ̑хъ въ хартїѝ моле́нїѧ на́шегѡ, бл҃годаре́нїе чи́сто ѹ҆чини́мъ: вторы́й же сті́хъ, и҆сповѣ̑данїе и҆ сокрꙋше́нїе дꙋшѝ въ чꙋ́вствѣ: по си́хъ проше́нїе на́ше всѣ̑хъ цр҃е́ви скажи́мъ: и҆зрѧ́днѣйшъ бо є҆́сть предрече́нный мл҃и́твы ѻ҆́бразъ, ꙗ҆́коже нѣ̑коемꙋ и҆з̾ бра́тїй ѿ а҆́гг҃ла гдⷭ҇нѧ пока́зано бы́сть.
и҃. А҆́ще ѹ҆́бѡ вино́венъ бы́лъ бы є҆сѝ нѣ̑когда ви́димомꙋ сꙋдїѝ, то̀ не востре́бꙋеши и҆но́гѡ ѻ҆́браза въ предстоѧ́нїи мл҃и́твы твоеѧ̀: а҆́ще ли же не ѹ҆̀ предста́лъ є҆сѝ, ни и҆стѧзꙋ́емыхъ ви́дѣлъ є҆сѝ, то̀ понѐ ѿ быва́ющїѧ ко врачє́мъ недꙋ́гꙋющихъ молбы̀ ѡ҆ таковѣ̑й ве́щи наꙋчи́сѧ, внегда̀ ѿ ни́хъ и҆́мꙋтъ рѣ̑жеми и҆лѝ жего́ми бы́ти.
На шестом часе:
Ис. 58:1–11
1 Возопі́й крѣ́постїю и҆ не пощадѝ: ꙗ҆́кѡ трꙋбꙋ̀ возвы́си гла́съ тво́й и҆ возвѣстѝ лю́демъ мои̑мъ грѣхѝ и҆́хъ и҆ до́мꙋ і҆а́кѡвлю беззакѡ́нїѧ и҆́хъ. 2 Менѐ де́нь ѿ днѐ и҆́щꙋтъ и҆ разꙋмѣ́ти пꙋти̑ моѧ̑ жела́ютъ, ꙗ҆́кѡ лю́дїе пра́вдꙋ сотвори́вшїи и҆ сꙋда̀ бг҃а своегѡ̀ не ѡ҆ста́вившїи: про́сѧтъ нн҃ѣ ᲂу҆ менє̀ сꙋда̀ првⷣна и҆ прибли́житисѧ ко гдⷭ҇ꙋ жела́ютъ, глаго́люще: 3 что̀ ꙗ҆́кѡ пости́хомсѧ, и҆ не ᲂу҆ви́дѣлъ є҆сѝ; смири́хомъ дꙋ́шы на́шѧ, и҆ не ᲂу҆вѣ́дѣлъ є҆сѝ; Во дни̑ бо поще́нїй ва́шихъ ѡ҆брѣта́ете вѡ́ли ва́шѧ, и҆ всѧ̑ подрꙋ̑чныѧ ва́шѧ томитѐ: 4 а҆́ще въ сꙋдѣ́хъ и҆ сва́рѣхъ постите́сѧ и҆ бїе́те пѧстьмѝ смире́ннаго, вскꙋ́ю мнѣ̀ постите́сѧ ꙗ҆́коже дне́сь, є҆́же ᲂу҆слы́шанꙋ бы́ти съ во́племъ гла́сꙋ ва́шемꙋ; 5 Не сицева́гѡ поста̀ а҆́зъ и҆збра́хъ, и҆ днѐ, є҆́же смири́ти человѣ́кꙋ дꙋ́шꙋ свою̀: нижѐ а҆́ще слѧче́ши ꙗ҆́кѡ се́рпъ вы́ю твою̀, и҆ вре́тище и҆ пе́пелъ посте́леши, нижѐ та́кѡ нарече́те по́стъ прїѧ́тенъ. 6 Не такова́гѡ (бо) поста̀ а҆́зъ и҆збра́хъ, гл҃етъ гдⷭ҇ь: но разрѣша́й всѧ́къ соꙋ́зъ непра́вды, разрꙋша́й ѡ҆бдолжє́нїѧ наси́льныхъ писа́нїй, ѿпꙋстѝ сокрꙋшє́нныѧ во свобо́дꙋ и҆ всѧ́кое писа́нїе непра́ведное раздерѝ: 7 раздроблѧ́й а҆́лчꙋщымъ хлѣ́бъ тво́й и҆ ни́щыѧ безкрѡ́вныѧ введѝ въ до́мъ тво́й: а҆́ще ви́диши на́га, ѡ҆дѣ́й, и҆ ѿ сво́йственныхъ пле́мене твоегѡ̀ не пре́зри. 8 Тогда̀ разве́рзетсѧ ра́нѡ свѣ́тъ тво́й, и҆ и҆сцѣлє́нїѧ твоѧ̑ ско́рѡ возсїѧ́ютъ, и҆ пред̾и́детъ пред̾ тобо́ю пра́вда твоѧ̀, и҆ сла́ва бж҃їѧ ѡ҆б̾и́метъ тѧ̀. 9 Тогда̀ воззове́ши, и҆ бг҃ъ ᲂу҆слы́шитъ тѧ̀, и҆ є҆щѐ глаго́лющꙋ тѝ, рече́тъ: сѐ, прїидо́хъ. А҆́ще ѿи́меши ѿ себє̀ соꙋ́зъ и҆ рꙋкобїе́нїе и҆ глаго́лъ ропта́нїѧ 10 и҆ да́си а҆́лчꙋщемꙋ хлѣ́бъ ѿ дꙋшѝ твоеѧ̀ и҆ дꙋ́шꙋ смире́ннꙋю насы́тиши, тогда̀ возсїѧ́етъ во тьмѣ̀ свѣ́тъ тво́й, и҆ тьма̀ твоѧ̀ бꙋ́детъ ꙗ҆́кѡ полꙋ́дне, 11 и҆ бꙋ́детъ бг҃ъ тво́й съ тобо́ю прⷭ҇нѡ: и҆ насы́тишисѧ, ꙗ҆́коже жела́етъ дꙋша̀ твоѧ̀, и҆ кѡ́сти твоѧ̑ ᲂу҆тꙋчнѣ́ютъ, и҆ бꙋ́дꙋтъ ꙗ҆́кѡ вертогра́дъ напое́нъ, и҆ ꙗ҆́кѡ и҆сто́чникъ, є҆мꙋ́же не ѡ҆скꙋдѣ̀ вода̀: и҆ кѡ́сти твоѧ̑ прозѧ́бнꙋтъ ꙗ҆́кѡ трава̀, и҆ разботѣ́ютъ, и҆ наслѣ́дѧтъ ро́ды родѡ́въ.
Слово 28. О священней и матери добродетелей, блаженней молитве: и о умнем в ней и чувственнем предстоянии
ѳ҃. Не быва́й премꙋ́дръ въ мл҃и́твы твоеѧ̀ глаго́лѣхъ: дѣ́тска бо мно́жицею прѡ́ста шепєта́нїѧ и҆ неразли̑чна, ѻ҆ц҃а̀ и҆́хъ и҆́же на нб҃сѣ̑хъ ѹ҆поко́иша.
і҃. Не покꙋша́йсѧ многосло́вити, да не ко и҆спыта́нїю слове́съ расточи́тсѧ ѹ҆́мъ (тво́й): є҆ди́но сло́во мытаре́во, бг҃а ѹ҆ми́лостивило є҆́сть: и҆ є҆ди́нъ гл҃ъ вѣ̑ренъ разбо́йника ѻ҆́наго спасѐ. Многосло́вїе ѹ҆́бѡ мно́жицею въ мл҃и́твѣ ѹ҆́мъ и҆ возмечта̀ и҆ разлїѧ̀: є҆диносло́вїе же мно́жицею ѹ҆́мъ собира́ти ѡ҆бы́че.
а҃і. Ѹ҆слажда́емь и҆лѝ ѹ҆милѧ́емь въ сло́вѣ мл҃и́твы пребыва́й въ не́мъ: храни́тель бо на́шъ тогда̀ є҆́сть съ на́ми молѧ́йсѧ.
в҃і. Не дерза́й, а҆́ще и҆ чистотꙋ̀ стѧжа́лъ є҆сѝ: со мно́гимъ же па́че смиренномꙋ́дрїемъ пристꙋпѝ, и҆ мно́жае дерза́ти и҆́маши.
г҃і. А҆́ще и҆ на всю̀ лѣ̑ствицꙋ добродѣ̑телей возше́лъ є҆сѝ, ѡ҆ ѡ҆ставле́нїи грѣхѡ́въ моли́сѧ: слы́ша па́ѵла ѡ҆ грѣ̑шницѣхъ вопїю́ща: ѿ ни́хже пе́рвый є҆́смь а҆́зъ.
д҃і. заслажда́ти варє́нїѧ, є҆ле́й и҆ со́ль ѡ҆быко́ша: воскрилѧ́ти же мл҃и́твꙋ, цѣломꙋ́дрїе и҆ сле́зы.
є҃і. А҆́ще бо во всю̀ кро́тость и҆ безгнѣ̑вїе ѡ҆дѣ̑ешисѧ, то̀ не мно́гѡ и҆́маши трꙋди́тисѧ свобожда́ти ѿ плѣне́нїѧ ѹ҆́мъ тво́й.
ѕ҃і. До́ндеже мл҃и́твꙋ и҆звѣ̑стнꙋ нестѧжа́хомъ, то̀ ѡ҆бꙋча́ющымъ младе́нцы ходи́ти въ нача́лѣхъ, подо́бни є҆смы̀.
з҃і. Подвиза́йсѧ вспѧ́ть приводи́ти, па́че же затворѧ́ти мы́сль во гл҃ѣхъ мл҃и́твы: и҆ а҆́ще и҆знемо́гши за младе́нчественность паде́тъ, па́ки тꙋ̀ введѝ: сво́йственна бо є҆́сть ѹ҆мꙋ̀ нестоѧ́тельность: мо́щно же є҆́сть сего̀ сотвори́ти ста́ти всѧ̑ могꙋ́щемꙋ поставлѧ́ти. А҆́ще неѡскꙋ́днѣ по́двигъ се́й стѧжа́лъ є҆сѝ, прїи́детъ и҆ въ тебѐ мо́ре ѹ҆ма̀ (твоегѡ̀) ѡ҆предѣлѧ́ѧй: и҆ рече́тъ къ немꙋ̀ въ мл҃и́твѣ твое́й: до сегѡ̀ до́йдеши и҆ не пре́йдеши. Невозмо́жно є҆́сть дꙋ́ха вѧза́ти: а҆ и҆дѣ̑же є҆́сть дꙋ́ха сегѡ̀ созда́тель, то̀ всѧ̑ покорє́на сꙋ́ть.
и҃і. А҆́ще ѹ҆́бѡ со́лнце нѣ̑когда ѹ҆ви́дѣлъ є҆сѝ, то̀ возмо́жеши съ ни́мъ и҆ свозглаго́лати подоба́телнѣ: є҆го́же бо неви́дѣлъ є҆сѝ, ка́кѡ собесѣ̑довати нело́жнѣ мо́жеши;
На девятом часе:
ѳ҃і. Нача́ло ѹ҆́бѡ мл҃и́твы, прило́зи є҆динопо́мысленнѣ ѿгонѧ́еми ѿ са́мыхъ нача̑лъ: среда́ же, є҆́же во глаго́лемыхъ и҆ помышлѧ́емыхъ є҆ди́нѣхъ бы́ти ѹ҆мꙋ̀: соверше́нство же сеѧ̀, восхище́нїе ко гдⷭ҇ꙋ.
к҃. И҆́но є҆́сть ра́дованїе є҆́же въ мл҃и́твѣ во дрꙋжи́нѣ пребыва́ющымъ приключа́ющеесѧ: а҆ и҆́но є҆́же въ безмо́лвїи молѧ́щымсѧ прибыва́ющее: занѐ ѻ҆́но ѹ҆́бѡ, не́гли (и҆) возмечта́сѧ ма́ло: сїе́ же всѐ смиренномꙋ́дрїѧ и҆спо́лненно є҆́сть.
к҃а. А҆́ще при́снѡ ѡ҆бꙋча́еши ѹ҆́мъ тво́й не ѹ҆далѧ́тисѧ, то̀ и҆ въ предложе́нїи трапе́зы бли́зъ тебѐ бꙋ́детъ: а҆́ще ли же невозбра́ннѡ скита́етсѧ, то̀ никогда́же ѹ҆ тебѐ пребыва́ти мо́жетъ. Вели́кїй ѹ҆̀бо вели́кїѧ и҆ соверше́нныѧ мл҃и́твы дѣ̑латель, гл҃етъ: хощꙋ̀ рещѝ пѧ́ть слове́съ ѹ҆мо́мъ мои́мъ, и҆ прѡ́чаѧ: младе́нственшихъ же таково́е, чꙋ́жде є҆́сть: тѣ̑мже мы̀ съ ка́чествомъ, и҆ мно́жествомъ коли́чества, ꙗ҆́кѡ несоверше́нни мо́лимсѧ: второ́е бо пе́рвшагѡ вино́вно быва́етъ: даѧ́ бо гл҃етъ мл҃и́твꙋ чи́стꙋ без̾ лѣ̑ности молѧ́щемꙋсѧ скве́рненнѣ и҆ ѹ҆трꙋжде́ннѣ.
к҃в. И҆́но є҆́сть, скве́рна мл҃и́твы: и҆ и҆́но, потребле́нїе: и҆ и҆́но, ѡ҆краде́нїе: и҆ и҆́но, поро́къ. Скве́рна є҆́сть, бг҃ꙋ предстоѧ́ти, и҆ безмѣ́стна помышлє́нїѧ мечта́ти: потребле́нїе є҆́сть, є҆́же въ попечє́нїѧ неполє́знаѧ плѣнѧ́тисѧ: ѡ҆краде́нїе є҆́сть, є҆́же неѡщꙋ́тнѣ мы́сли пари́ти: поро́къ є҆́сть, прило́гъ ꙗ҆ко́въ либо тогда̀ къ на́мъ приближа́ющсѧ.
к҃г. А҆́ще ѹ҆́бѡ не наеди́нѣ є҆смы̀ во вре́мѧ предстоѧ́нїѧ, то̀ внꙋтрьꙋ́дꙋ ѻ҆́бразъ мол̾бы̀ сеѧ̀ воѡбрази́мъ: а҆́ще ли же не присꙋ́тствꙋютъ похва́лъ слꙋги̑, то̀ и҆ внѣ̑шнїй ви́дъ на моле́нїе воѡбрази́мъ: въ несоверше́нныхъ бо, мно́жицею ѹ҆́мъ тѣ̑лꙋ соѡбразꙋ́етсѧ.
к҃д. Всѝ ѹ҆́бѡ, наипа́че же ѿпꙋще́нїѧ до́лга ѻ҆́нагѡ прїѧ́ти къ цр҃ю̀ грѧдꙋ́щїи, неисповѣ̑дима сокрꙋше́нїѧ тре́бꙋютъ. А҆́ще въ темни́цѣ є҆щѐ є҆смы̀, ѹ҆слы́шимъ гл҃авшаго къ петрꙋ̀: препоѧ́шисѧ ле́нтїемъ послꙋша́нїѧ, и҆ и҆з̾зꙋ́йсѧ во́лей твои́хъ, и҆ на́гъ ѿ си́хъ, пристꙋпѝ ко гдⷭ҇ꙋ въ мл҃и́твѣ твое́й: є҆гѡ̀ то́чїю призыва́ѧ во́лю: и҆ тогда̀ прїи́меши бг҃а держа́щаго корми́ло дꙋшѝ твоеѧ̀, и҆ безбѣ̑днѡ ѹ҆правлѧ́ющаго тебѐ.
к҃є. Воста́въ ѿ мїролю́бїѧ и҆ сластолю́бїѧ, ѿве́ржи попечє́нїѧ, совлецы́сѧ помышле́нїй, ѿрецы́сѧ тѣ̑ла: ничто́же бо и҆́но є҆́сть мл҃и́тва, ра́звѣ то́чїю мі́ра ви́дима и҆ неви́дима ѿчꙋжде́нїе. Что́ бо мѝ є҆́сть на нб҃сѝ; ничто́же: и҆ ѿ тебѐ что̀ восхотѣ̑хъ на землѝ; ничто́же: но є҆́же безмо́лвнѣ вы́нꙋ въ мл҃и́твѣ прилѣплѧ́тисѧ къ тебѣ̀. Нѣ́кимъ ѹ҆̀бо, бога́тство: и҆нѣ́мъ, сла́ва: и҆нѣ́мъ же, стѧжа́нїе рачи́телно є҆́сть: мнѣ̑ же є҆́же прилѣплѧ́тисѧ бг҃ови, вожделѣ̑нно є҆́сть: и҆ полага́ти на́нь ѹ҆пова́нїе безстра́стїѧ моегѡ̀.