Вторник седмицы ваий

Если чтения отсутствуют - значит, по данному дню еще не были добавлены тексты.

На паремиях вечерни по прокимне
На третьем часе
На шестом часе
На девятом часе

На паремиях вечерни по прокимне:

Быт. 31:3–16

³ Рече́ же гдⷭ҇ь ко і҆а́кѡвꙋ: возврати́сѧ въ зе́млю ѻ҆тца̀ твоегѡ̀ и҆ въ ро́дъ тво́й, и҆ бꙋ́дꙋ съ тобо́ю. ⁴ Посла́въ же і҆а́кѡвъ, призва̀ лі́ю и҆ рахи́ль на по́ле, и҆дѣ́же бѧ́хꙋ стада̀, ⁵ и҆ речѐ и҆̀мъ: ви́ждꙋ а҆́зъ лицѐ ѻ҆тца̀ ва́шегѡ, ꙗ҆́кѡ нѣ́сть ко мнѣ̀, ꙗ҆́коже вчера̀ и҆ тре́тїѧгѡ днѐ: бг҃ъ же ѻ҆тца̀ моегѡ̀ бѣ̀ со мно́ю: ⁶ и҆ вы̀ са́ми вѣ́сте, ꙗ҆́кѡ все́ю си́лою мое́ю рабо́тахъ ѻ҆тцꙋ̀ ва́шемꙋ: ⁷ ѻ҆те́цъ же ва́шъ ѡ҆би́дѣ мѧ̀ и҆ и҆змѣнѝ мздꙋ̀ мою̀ десѧтѝ а҆́гнцєвъ, но не дадѐ є҆мꙋ̀ бг҃ъ ѕла̀ сотвори́ти мнѣ̀. ⁸ А҆́ще си́це рече́тъ: пє́стрыѧ, бꙋ́детъ твоѧ̀ мзда̀: и҆ родѧ́тсѧ всѧ̑ ѻ҆́вцы пє́стрыѧ. А҆́ще же рече́тъ: бѣ̑лыѧ, бꙋ́детъ твоѧ̀ мзда̀: и҆ родѧ́тсѧ всѧ̑ ѻ҆́вцы бѣ̑лыѧ. ⁹ И҆ ѿѧ̀ бг҃ъ всѧ̑ скоты̀ ѻ҆тца̀ ва́шегѡ и҆ дадѐ ѧ҆̀ мнѣ̀. ¹⁰ И҆ бы́сть є҆гда̀ зачина́хꙋ ѻ҆́вцы во чре́вѣ прїе́млющѧ, и҆ ви́дѣхъ ѻ҆чи́ма мои́ма во снѣ̀: и҆ сѐ, козлы̀ и҆ ѻ҆вны̀ восходѧ́ще бѧ́хꙋ на ѻ҆́вцы и҆ ко́зы, бѣлова̑тыѧ и҆ пє́стрыѧ и҆ пепелови̑дныѧ пє́стрыѧ. ¹¹ И҆ рече́ ми а҆́гг҃лъ бж҃їй во снѣ̀: і҆а́кѡве. А҆́зъ же рѣ́хъ: что́ є҆сть; ¹² И҆ речѐ: воззрѝ ѻ҆чи́ма твои́ма и҆ ви́ждь козлы̀ и҆ ѻ҆вны̀ восходѧ́щыѧ на ѻ҆́вцы и҆ ко́зы, бѣ̑лыѧ и҆ пє́стрыѧ и҆ пепелови̑дныѧ пє́стрыѧ: ви́дѣхъ бо, є҆ли̑ка тебѣ̀ лава́нъ твори́тъ: ¹³ а҆́зъ є҆́смь бг҃ъ ꙗ҆ви́выйсѧ тебѣ̀ на мѣ́стѣ бж҃їи, и҆дѣ́же пома́залъ мѝ є҆сѝ та́мѡ сто́лпъ, и҆ ѡ҆бѣтова́лъ мѝ є҆сѝ та́мѡ ѡ҆бѣ́тъ: нн҃ѣ ᲂу҆̀бо воста́ни и҆ и҆зы́ди ѿ землѝ сеѧ̀, и҆ и҆дѝ въ зе́млю рожде́нїѧ твоегѡ̀, и҆ бꙋ́дꙋ съ тобо́ю. ¹⁴ И҆ ѿвѣща̑вши рахи́ль и҆ лі́а, реко́стѣ є҆мꙋ̀: є҆да̀ є҆́сть на́мъ є҆щѐ ча́сть и҆лѝ наслѣ́дїе въ домꙋ̀ ѻ҆тца̀ на́шегѡ; ¹⁵ не ꙗ҆́кѡ ли чꙋжы́ѧ вмѣни́хомсѧ є҆мꙋ̀; продаде́ бо на́съ и҆ снѣдѐ снѣ́дїю сребро̀ на́ше: ¹⁶ всѐ бога́тство и҆ сла́ва, ю҆́же ѿѧ̀ бг҃ъ ѿ ѻ҆тца̀ на́шегѡ, на́мъ бꙋ́детъ и҆ ча́дѡмъ на́шымъ: нн҃ѣ ᲂу҆̀бо, є҆ли̑ка тебѣ̀ речѐ бг҃ъ, творѝ.

Притч. 21:3–21

³ Твори́ти првⷣнаѧ и҆ и҆́стинствовати ᲂу҆гѡ́дна бг҃ꙋ па́че, не́жели же́ртвъ кро́вь. ⁴ Велемꙋ́дрый во ᲂу҆кори́знѣ дерзосе́рдъ, свѣти́ло же нечести́выхъ грѣсѝ. ⁵ Помышлє́нїѧ тщали́вагѡ во и҆з̾ѻби́лїи, и҆ всѧ́къ неради́вый въ лише́нїи. ⁶ Дѣ́лаѧй сокрѡ́вища ѧ҆зы́комъ лжи́вымъ сꙋ́етнаѧ го́нитъ въ сѣ̑ти смє́ртныѧ. ⁷ Всегꙋби́тельство на нечєсти́выѧ ᲂу҆стремлѧ́етсѧ: не хотѧ́тъ бо твори́ти првⷣнаѧ. ⁸ Къ стро́пѡтнымъ стро́пѡтныѧ пꙋти̑ посыла́етъ бг҃ъ: чи̑ста бо и҆ пра̑ва дѣла̀ є҆гѡ̀. ⁹ Лꙋ́чше жи́ти во ᲂу҆́глѣ непокрове́ннѣмъ, не́жели въ пова́пленныхъ съ непра́вдою и҆ въ хра́минѣ ѻ҆́бщей. ¹⁰ Дꙋша̀ нечести́вагѡ не поми́лꙋетсѧ ни ѿ є҆ди́нагѡ ѿ человѣ́кѡвъ. ¹¹ Тщетꙋ̀ прїе́млющꙋ невозде́ржномꙋ, кова́рнѣйшїй бꙋ́детъ неѕло́бивый, разꙋмѣва́ѧй же мꙋ́дрый прїи́метъ ра́зꙋмъ. ¹² Разꙋмѣва́етъ првⷣный сердца̀ нечести́выхъ и҆ ᲂу҆ничтожа́етъ нечести̑выѧ въ ѕлы́хъ. ¹³ И҆́же затыка́етъ ᲂу҆шеса̀ своѧ̑, є҆́же не послꙋ́шати немощна́гѡ, и҆ то́й призове́тъ, и҆ не бꙋ́детъ послꙋ́шаѧй є҆гѡ̀. ¹⁴ Даѧ́нїе та́йно ѿвраща́етъ гнѣ́вы, щадѧ́й же дарѡ́въ воздвиза́етъ ꙗ҆́рость крѣ́пкꙋю. ¹⁵ Весе́лїе првⷣныхъ твори́ти сꙋ́дъ: прпⷣбный же нечи́стъ ᲂу҆ ѕлодѣ́євъ. ¹⁶ Мꙋ́жъ заблꙋжда́ѧй ѿ пꙋтѝ пра́вды въ со́нмищи и҆споли́нѡвъ почі́етъ. ¹⁷ Мꙋ́жъ скꙋ́денъ лю́битъ весе́лїе, любѧ́й же вїно̀ и҆ є҆ле́й не ѡ҆богати́тсѧ. ¹⁸ Ѡ҆тре́бїе же првⷣникꙋ беззако́нникъ. ¹⁹ Лꙋ́чше жи́ти въ землѝ пꙋ́стѣ, не́же жи́ти съ жено́ю сварли́вою и҆ ѧ҆зы́чною и҆ гнѣвли́вою. ²⁰ Сокро́вище вожделѣ́нно почі́етъ во ᲂу҆стѣ́хъ мꙋ́драгѡ: безꙋ́мнїи же мꙋ́жїе пожира́ютъ є҆̀. ²¹ Пꙋ́ть пра́вды и҆ ми́лостыни ѡ҆брѧ́щетъ живо́тъ и҆ сла́вꙋ.

На третьем часе:

н҃а. Ма́лъ вла́съ смꙋща́етъ ѻ҆́ко: и҆ ма́ло попече́нїе потреблѧ́етъ безмо́лвїе: безмо́лвїе бо є҆́сть, ѿложе́нїе помышле́нїй, и҆ ѿверже́нїе ѿ бл҃госло́вныхъ попече́нїй.

н҃в. И҆́же вои́стиннꙋ безмо́лвїѧ достигі́й, нижѐ ѡ҆ пло́ти свое́й пещи́сѧ и҆́мать: нело́женъ бо є҆́сть ѡ҆бѣтова́вый.

н҃г. И҆́же ѹ҆́мъ чи́стъ предста́вити бг҃ови хотѧ́й, и҆ попече́н̾ми смꙋща́ѧйсѧ, подо́бенъ є҆́сть но́зѣ своѝ крѣ̑пцѣ ѡ҆кова́вшемꙋ, и҆ ско́рѡ ходи́ти покꙋша́ющемꙋсѧ.

н҃д. Рѣ̑дцы ѹ҆́бѡ сꙋ́ть сꙋ́щемꙋ въ мі́рѣ любомꙋ́дрїю въ коне́цъ наказꙋ́емїи: а҆́зъ же гл҃ю, ма́л̾ши сꙋ́ть и҆́стиннагѡ безмо́лвїѧ любомꙋ́дрїе (по бг҃ꙋ) вѣ̑дꙋщїи.

н҃є. И҆́же не ѹ҆̀ бг҃а позна́вый на безмо́лвїе неискꙋ́сенъ є҆́сть, и҆ мнѡ́гимъ бѣда́мъ подверга́ющсѧ. Безмо́лвїе неискꙋ́сныхъ ѹ҆давлѧ́етъ: без̾ вкꙋ́са бо сла́дости бж҃їѧ сꙋ́ть на плѣнє́нїѧ и҆ ѡ҆крада̑нїѧ, и҆ ѹ҆ны̑нїѧ, и҆ парє́нїѧ вре́мѧ и҆ждива́юще.

н҃ѕ. И҆́же мл҃и́твы добро́ты коснꙋ́выйсѧ, бѣжа́ти и҆́мать ѿ нарѡ́дъ ꙗ҆́коже ѻ҆на́гръ: кто́ бо а҆́ще бы не сїѧ̀, ѡ҆ста́вила ѻ҆сла̀ ди́вїѧ свобо́дна бы́ти всѧ́кагѡ спребыва́нїѧ человѣ̑ческа;

н҃з. Ѡ҆блага́емый страстмѝ, при́снымъ ѡ҆ си́хъ размышле́нїемъ въ пꙋсты́ни пребыва́етъ: ꙗ҆́коже и҆ ста́рецъ мѝ ст҃ъ таково́е провѣща̀, и҆ наꙋчѝ, геѡ́ргїа гл҃ю а҆рсїлаі́та, є҆го́же и҆ че́стность твоѧ̀ нижѐ ѿню́дъ неꙋвѣ̑дѣ. Се́й непотре́бнꙋ дꙋ́шꙋ нѣ̑когда первонаꙋча́ѧ и҆ наставлѧ́ѧ къ безмо́лвїю, гл҃аше: во ѹ҆́трїе ѹ҆́бѡ, гл҃етъ, назна́менахъ ꙗ҆́кѡ наимно́жайше тщесла́вїѧ и҆ по́хоти приходи́ти бѣсовѡ́мъ: въ полꙋ́дни же, ѹ҆ны́нїѧ, и҆ печа́ли, и҆ гнѣ̑ва: въ ве́черъ же, мотылолюби̑вымъ и҆ мꙋчи́телємъ чре́ва.

н҃и. Лꙋ́чшїй є҆́сть послꙋ́шникъ ни́щъ, па́че безмо́лвника пекꙋ́щагѡсѧ.

н҃ѳ. И҆́же сло́вомъ безмо́лвїе проходѧ́й, и҆ приѡбрѣ̑тенїѧ є҆гѡ̀ на всѧ́къ де́нь не зрѧ́й, то̀ и҆лѝ сло́вомъ не безмо́лвствова, и҆лѝ мнѣ̑нїемъ крадо́мъ быва́етъ.

ѯ҃. Безмо́лвїе є҆́сть неѿверза́емаѧ бг҃ꙋ слꙋ́жба и҆ предстоѧ́нїе.

ѯ҃а. І҆и҃сова па́мѧть, да соедини́тсѧ съ дыха́нїемъ твои́мъ, и҆ тогда̀ позна́еши безмо́лвїѧ по́лзꙋ.

ѯ҃в. Паде́нїе ѹ҆́бѡ по́слꙋшникꙋ є҆́сть, сво́йственнаѧ во́лѧ: безмо́лвникꙋ же, мл҃и́твы разстоѧ́нїе.

ѯ҃г. А҆́ще ра́дꙋешисѧ ѡ҆ прихожде́нїихъ въ ке́ллїю, то̀ вѣ̑ждь себѐ во ѹ҆ны́нїи є҆ди́номъ, а҆ не въ бз҃ѣ ѹ҆пражнѧ́ющасѧ.

ѯ҃д. Прописа́нїе тѝ да бꙋ́детъ мл҃и́твы, вдова̀ ѻ҆́на ꙗ҆́же ѡ҆би́дима быва́ше ѿ сопе́рника своегѡ̀: безмо́лвїѧ же ѻ҆́бразъ, вели́кїй ѻ҆́нъ и҆ равноа́гг҃лный безмо́лвникъ а҆рсе́нїй. Помѧнѝ сы́й во ѹ҆едине́нїи, равноа́гг҃лнагѡ сегѡ̀ пребыва́нїе: и҆ зрѝ ꙗ҆́кѡ приходи́вшихъ мно́жицею ѿосла̀, да не бо́лшее погꙋби́тъ.

ѯ҃є. Позна́хъ бѣсѡ́въ ко сло́вомъ безмо́лвствꙋющымъ безсловє́сныѧ и҆з̾ ѡ҆бхо́дникѡвъ приходи́ти ча́стѣе наꙋща́ющихъ, да дѣ̑лателємъ тѣ́мъ понѐ чрез̾ ѻ҆́нѣхъ ма́лѡ препѧ́ти возмо́гꙋтъ: зна́менꙋй таковы́хъ, ѽ ты̀: и҆ не ѿрица́йсѧ ѡ҆печалѧ́ти бл҃гоче́стнѣ, лѣни́выхъ: не́гли бо ѿ ѡ҆печале́нїѧ сегѡ̀ ѿ є҆́же ѡ҆бходи́ти преста́нꙋтъ. зрѝ да не предрече́ннагѡ ра́ди ра́зꙋма, всꙋ́е ѡ҆печали́ши дꙋ́шꙋ, во́дꙋ ѿ жа́жды приходѧ́щꙋю почерпстѝ ѿ тебѐ: во все́мъ же свѣти́лника тѝ потре́бно є҆́сть.

На шестом часе:

Ис. 49:6–10

⁶ И҆ рече́ ми: ве́лїе тѝ є҆́сть, є҆́же назва́тисѧ тебѣ̀ рабо́мъ мои́мъ, є҆́же возста́вити племена̀ і҆а̑кѡвлѧ и҆ разсѣ́ѧнїе і҆и҃лево ѡ҆брати́ти: сѐ, да́хъ тѧ̀ въ завѣ́тъ ро́да, во свѣ́тъ ꙗ҆зы́кѡмъ, є҆́же бы́ти тебѣ̀ во спⷭ҇нїе да́же до послѣ́днихъ землѝ. ⁷ Та́кѡ гл҃етъ гдⷭ҇ь, и҆зба́вивый тѧ̀ бг҃ъ і҆и҃левъ: ѡ҆свѧти́те ᲂу҆ничижа́ющаго дꙋ́шꙋ свою̀, гнꙋша́емаго ѿ ꙗ҆зы̑къ рабѡ́въ кнѧ́жескихъ: ца́рїе ᲂу҆́зрѧтъ є҆го̀, и҆ воста́нꙋтъ кнѧ̑зи и҆ покло́нѧтсѧ є҆мꙋ̀ гдⷭ҇а ра́ди, ꙗ҆́кѡ вѣ́ренъ є҆́сть ст҃ы́й і҆и҃левъ, и҆ и҆збра́хъ тѧ̀. ⁸ Та́кѡ гл҃етъ гдⷭ҇ь: во вре́мѧ прїѧ́тно послꙋ́шахъ тебѐ и҆ въ де́нь спⷭ҇нїѧ помого́хъ тѝ, и҆ сотвори́хъ тѧ̀ и҆ да́хъ тѧ̀ въ завѣ́тъ вѣ́чный ꙗ҆зы́кѡвъ, є҆́же ᲂу҆стро́ити зе́млю и҆ наслѣ́дити наслѣ̑дїѧ пꙋсты́ни, ⁹ гл҃юща сꙋ́щымъ во ᲂу҆́захъ: и҆зыди́те, и҆ сꙋ́щымъ во тьмѣ̀: ѿкры́йтесѧ. На всѣ́хъ пꙋте́хъ пасти́сѧ бꙋ́дꙋтъ, и҆ на всѣ́хъ стезѧ́хъ па́жить и҆́хъ: ¹⁰ не вза́лчꙋтъ, нижѐ вжа́ждꙋтъ, нижѐ порази́тъ и҆̀хъ зно́й, нижѐ со́лнце, но ми́лꙋѧй и҆̀хъ ᲂу҆тѣ́шитъ и҆̀хъ и҆ сквозѣ̀ и҆сто́чники водны̑ѧ проведе́тъ и҆̀хъ.

Слово 27. О священнем тела и души безмолвии

ѯ҃ѕ. Житїѐ безмо́лвствꙋющихъ, па́че же мона́шествꙋющихъ, по со́вѣсти и҆ ра́зꙋмꙋ да быва́етъ. И҆́же сло́вомъ текі́й, то̀ тща̑нїѧ, и҆ провѣща̑нїѧ, и҆ помышлє́нїѧ, и҆ хождє́нїѧ, и҆ движє́нїѧ всѧ̑ по гдⷭ҇ꙋ и҆ гдⷭ҇а ра́ди тѣ́мъ наро́чнѣ твори̑маѧ, въ чꙋ́вствѣ дꙋшѝ и҆ пред̾ лице́мъ гдⷭ҇нимъ дѣ̑лаетъ: а҆́ще ли же ѡ҆крада́емь быва́етъ, то не ѹ҆̀ по добродѣ̑тели жи́телствꙋетъ.

ѯ҃з. Ѿве́рзꙋ гл҃етъ нѣ̑кто во ѱалти́ри гана́нїе моѐ, и҆ во́лю мою̀, за несоверше́нство є҆щѐ разсꙋжде́нїѧ: а҆́зъ же вознесꙋ̀ мл҃и́твою во́лю мою̀, и҆ ѿѻнꙋ́дꙋ и҆звѣще́нїѧ моегѡ̀ жда́ти и҆́мамъ.

ѯ҃и. Вѣ̑ра крило̀ є҆́сть мл҃и́твы: сегѡ́ бо не и҆мꙋ́ще, па́ки въ нѣ̑дро моѐ возврати́тсѧ. Вѣ̑ра є҆́сть несꙋмнѣ̑нно дꙋшѝ стоѧ́нїе, ниѿкоеѧ́же проти́вности коле́блемо. Вѣ̑ренъ є҆́сть, не непщꙋ́ѧй бг҃а мощѝ, но вѣ̑рꙋѧй всѧ̑ полꙋчи́ти. Вѣ̑ра є҆́сть, ненаде́жныхъ вино́вна: и҆ сїѐ разбо́йникъ ѻ҆́нъ показа́лъ є҆́сть. Вѣ̑ры ма́ти є҆́сть, трꙋ́дъ и҆ пра́во се́рдце: занѐ сїѐ ѹ҆́бѡ, несꙋмнѣ̑ннꙋ твори́тъ: ѻ҆́нъ же созида́етъ. Безмо́лвникѡмъ ма́ти є҆́сть вѣ̑ра: а҆́ще бо не и҆́мать вѣ̑ровати, ка́кѡ безмо́лвствовати бꙋ́детъ;

ѯ҃ѳ. Въ темни́цѣ ѡ҆кова́нный, стра́ха ра́ди мꙋчи́телева бои́тсѧ: въ ке́ллїи же безмо́лвствꙋѧй, стра́хъ гдⷭ҇ень породи́лъ є҆́сть: не та́кѡ пе́рвшїй сꙋди́лища сегѡ̀: ꙗ҆́коже вторы́й сꙋдїѝ ѻ҆́нагѡ сꙋди́ща бои́тсѧ. Стра́ха тѝ мно́га въ безмо́лвїи потре́бно є҆́сть, ѽ чꙋ́дне! ничто́же бо та́кѡ ѹ҆ны́нїе ѿгонѧ́ти мо́жетъ. Взира́етъ ѹ҆́бѡ ѡ҆сꙋжде́нникъ вы́нꙋ, когда̀ во ѹ҆зи́лище сꙋдїѧ̀ прихо́дитъ: и҆́стинный же дѣ̑латель, когда̀ скоропринꙋжда́ющаѧ (сме́рть) прїи́детъ: свѧза́сѧ съ пе́рвшимъ бре́мѧ печа́ли, со вторы́мъ же и҆сто́чникъ сле́зъ.

ѻ҃. А҆́ще стѧ́жеши терпѣ̑нїѧ же́злъ, то̀ скорѣ̑е преста́нꙋтъ тѝ ѻ҆́ни безстꙋ́дствовати. Терпѣ̑нїе є҆́сть, крѣ̑пка болѣ̑знь дꙋшѝ, ѿ бл҃госло́вныхъ кло́пѡтъ ника́коже коле́блемо. Терпѣли́въ є҆́сть дѣ̑латель непа́дателенъ, и҆ чрез̾ падє́нїѧ побѣ̑дꙋ творѧ́щъ. Терпѣ̑нїе є҆́сть ѡ҆предѣле́нїе ско́рби на всѧ́къ де́нь ѡ҆жида́емо. Терпѣ̑нїе є҆́сть и҆звѣ̑тѡвъ ѿсѣче́нїе, и҆ своѐ внима́нїе. Не та́кѡ пи́щи своеѧ̀, ꙗ҆́коже терпѣ̑нїѧ дѣ̑латель се́й тре́бꙋетъ: занѐ чрез̾ второ́е ѹ҆́бѡ, прїи́метъ вѣне́цъ: чрез̾ пе́рвшее же, поги́бель прїи́метъ. Терпѣли́въ мꙋ́жъ, пре́жде гро́ба ѹ҆́мре: гро́бъ ке́ллїю свою̀ сотвори́въ. Терпѣ̑нїе родѝ, наде́жда и҆ пла́чь: без̾ двою́ бо сею̀ сы́й, ра́бъ є҆́сть ѹ҆ны́нїѧ.

ѻ҃а. Вѣ̑дѣти подоба́етъ борцꙋ̀ хрⷭ҇то́вꙋ, кі́ихъ ѹ҆́бѡ и҆з̾ врагѡ́въ и҆здале́че гони́ти, кі́ихъ же боро́тисѧ съ ни́мъ попꙋща́ти: ѻ҆вогда̀ ѹ҆́бѡ борба̀ сїѧ̀ вѣнца̀ вино́вна бы́сть, ѻ҆вогда́ же борбы̀ непотре́бныхъ сотвори́ло є҆́сть. Нѣ̑сть дости́жно ѡ҆ таковы́хъ сло́вомъ нака́зоватисѧ: не бо̀ всѝ тѣ̑мижде, нижѐ та́кожде ѹ҆сво́йствовахомсѧ.

ѻ҃в. Є҆ди́наго и҆з̾ дꙋхѡ́въ си́хъ наблюда́й тре́звеннѣ: поне́же и҆ то́й тѧ̀ ра́тꙋетъ непреста́ннѡ, во стоѧ́нїи, и҆ прехожде́нїи, и҆ сѣда́лищи, и҆ движе́нїи, и҆ возлежа́нїи, и҆ мл҃и́твѣ, и҆ снѣ̀. Ѻ҆́ви ѹ҆́бѡ и҆з̾ въ тече́нїи се́мъ безмо́лвїѧ сѣдѧ́щихъ, предзрѣ̑хъ гдⷭ҇а предо мно́ю вы́нꙋ, въ себѣ̀ дѣ̑ланїе содержа́тъ.

ѻ҃г. Не бо̀ всѝ хлѣ̑би ѻ҆́ни дх҃о́внагѡ сегѡ̀ нбⷭ҇ныѧ пшени́цы дѣ̑ланїѧ, є҆динови́дни сꙋ́ть: и҆́ни же, въ терпѣ̑нїи ва́шемъ стѧжи́те дꙋ́ши ва́шѧ: и҆́ни, бди́те и҆ моли́тесѧ: и҆́ни, ѹ҆готовлѧ́й на и҆схо́дъ дѣла̀ твоѧ̑. И҆́ни, смири́хсѧ и҆ спасе́ мѧ. Нѣ̑цыи ѹ҆́бѡ, нѣ̑сꙋть достѡ́йна страда̑нїѧ ны́нѣшнѧгѡ вре́мене къ бꙋ́дꙋщей сла́вѣ: и҆́ни, па́ки, да не когда̀ похи́титъ и҆ не бꙋ́детъ и҆збавлѧ́ѧй: вы́нꙋ разсмотрѣва́ютъ: всѝ ѹ҆́бѡ текꙋ́тъ, є҆ди́нъ же и҆з̾ си́хъ прїе́млетъ по́честь без̾ трꙋда̀.

ѻ҃д. Не то́чїю бдѧ̀, но и҆ спѧ̀ пред̾ꙋспѣ̑вый дѣ̑лаетъ: тѣ̑мже нѣ̑цыи и҆ въ са́михъ тѣ̑хъ снѣ̑хъ бѣсѡ́въ приходѧ́щихъ ѡ҆безчеща́ютъ, и҆ блꙋ́дныхъ же́нщищъ ѡ҆ цѣломꙋ́дрїи ѹ҆ча́тъ. Не ѡ҆жида́й прише́ствїй, нижѐ пред̾ꙋготовлѧ́йсѧ ѡ҆ ни́хъ: про́сто бо є҆́сть всѐ и҆ свобо́дно безмо́лвїѧ сегѡ̀ ѹ҆строе́нїе.

На девятом часе:

ѻ҃є. Никто́же хотѧ̀ созда́ти сто́лпъ и҆ ке́ллїю безмо́лвїѧ, покꙋша́етсѧ, а҆́ще не пе́рвѣе сѣ̑дъ разчте́тъ и҆ и҆спыта́етъ мл҃и́твою и҆́мать ли свѡ́йства ѻ҆́на на соверше́нїе: да не когда̀ бꙋ́детъ по ѡ҆снова́нїѧ сегѡ̀ положе́нїи посмѣѧ́нїе врагѡ́мъ свои̑мъ и҆ препѧ́тїе дрꙋги̑мъ дѣ̑лателємъ.

ѻ҃ѕ. Смотрѧ́й приходѧ́щꙋю сла́дость, не ка́кѡ ли ѿ го́ркихъ вра̑чь, па́че же навѣ́тникъ, срастворє́на є҆́сть.

ѻ҃з. Въ нощѝ ѹ҆́бѡ, мнѡ́гаѧ мл҃и́твѣ дава́й: ма̑лаѧ же, ѱалмопѣ̑нїю: во дни́ же по твое́й па́ки ѹ҆готовлѧ́й си́лѣ.

ѻ҃и. Не ма́лѡ просвѣща́ти и҆ собира́ти ѹ҆́мъ, чте́нїе ѡ҆бы́че: словеса́ бо дх҃а ст҃а сꙋ́ть: и҆ прочита́ющихъ та̑, всѧ́кѡ наказꙋ́ютъ. Да бꙋ́дꙋтъ тѝ дѣ̑лателю сꙋ́щꙋ, прочита́єма дѣ̑ѧтєлна: си́хъ бо дѣ̑ланїе, и҆зли́шнее твори́тъ про́чїихъ прочита́нїе: трꙋды̀ па́че а҆ не кни́гами, здра̑ваѧ словеса̀ просвѣща́єма бы́ти и҆щѝ. Чꙋждеꙋ̑мна пре́жде си́лы дх҃о́вны, не проходѝ словеса̀: тмы́ бо сꙋ́ще глаго́ли, немощны́хъ помрача́ютъ.

ѻ҃ѳ. Є҆ди́на ча́ша мно́жицею, вїна̀ вкꙋ́съ и҆з̾ѧви́ла є҆́сть: и҆ є҆ди́но сло́во безмо́лвника, и҆скꙋша́ти могꙋ́щымъ, всѐ є҆гѡ̀ внꙋ́треннее показа̀ дѣ̑ланїе и҆ ѹ҆строе́нїе.

п҃. Непари́телно дꙋшѝ ѻ҆́ко стѧжѝ проти́вꙋ возноше́нїю, нѣ̑сть бо въ пре́лестехъ что̀ сегѡ̀ гꙋби́телнше.

п҃а. ŕадѝ ѧ҆зы́къ (тво́й) и҆сходѧ̀, вѣ̑сть бо ско́рѡ мнѡ́ги трꙋды̀ расточа́ти.

п҃в. Нелюбопы́тнꙋ ѡ҆бꙋча́йсѧ ѹ҆строе́нїю: ѡ҆сквернѧ́ти бо безмо́лвїе любопы́тство, ꙗ҆́кѡ ничто̀ и҆́но мо́жетъ.

п҃г. Приходѧ́щымъ потрє́бнаѧ предлага́й, тѣ̑лꙋ гл҃ю и҆ дꙋ́хꙋ: а҆́ще ѹ҆́бѡ премꙋ́дрши сꙋ́ть, то̀ молча́нїемъ любомꙋ́дрїе покажи́мъ: а҆́ще ли же бра́тїѧ сꙋ́ть ѹ҆строе́нїемъ, то̀ соꙋмѣ̑реннѣ две́рь сїю̀ ѿверзи́мъ: ѻ҆ба́че лꙋ́чше є҆́сть всѣ̑хъ превосходѧ́щихъ бы́ти непщева́ти.

п҃д. őотѧ́ща мѧ̀ ѿню́дъ возбранѧ́ти въ собра́нїихъ тѣле́сное дѣ̑ло є҆щѐ младе́нствєннымъ, ѹ҆держа̀ то́й и҆́же песо́къ во ѻ҆де́ждѣ всю̀ но́щь ноша́ше.

п҃є. Ꙗ҆коже сопротивлѧ́ютсѧ сло́вꙋ догма́тѡвъ ст҃ы́ѧ и҆ несозда́нныѧ и҆ покланѧ́емыѧ трⷪ҇цы ꙗ҆̀же ѡ҆ пло́тстѣмъ смотре́нїи є҆ди́нагѡ тоѧ́жде всепѣ̑тыѧ трⷪ҇цы: занѐ та́мѡ ѹ҆́бѡ мно́жєственнаѧ, въ се́мъ сꙋ́ть є҆ди́нствєнна: та́мѡ꙳ же є҆ди́нствєннаѧ, здѣ̀ сꙋ́ть мно́жествєнна : та́кѡ и҆́на безмо́лвїю, а҆ и҆́на послꙋша́нїю подоба̑ющаѧ сꙋ́ть ѡ҆бꙋчи́тєлства.

п҃ѕ. Бж҃е́ственный ѹ҆́бѡ гл҃етъ а҆пⷭ҇лъ, кто̀ разꙋмѣ̀ ѹ҆́мъ гдⷭ҇нь; а҆́зъ же гл҃ю, кто̀ разꙋмѣ̀ ѹ҆́мъ человѣ̑ка безмо́лвника тѣ̑ломъ и҆ дх҃омъ.

Держа́ва цр҃ю є҆́сть, бога́тство и҆ мно́жество: держа́ва же безмо́лвникꙋ, мл҃и́твы мно́жество.

꙳ Си́рѣчь, въ тро́ицѣ трѝ лица̀, а҆ во христѣ̀ ѻ҆дно̀ лицо̀: въ тро́ицѣ ѻ҆дно̀ є҆стество̀, а҆ во христѣ̀ два̀ є҆стества̀.