Стихи́:

С трои́ми Пли́сие посе́чен мече́м

Бли́жае Бо́га с ним предстои́т:

Я́ко Алекса́ндром назва́ния ра́ди венцы,

Вся о́бща, о́бщии же и венцы́.

Си́и святи́и многострада́льнии бя́ху при Диоклитиа́не царе́. Ага́пий у́бо от Га́зскаго гра́да. Тимола́й же от По́нта от Екса́нтия. А Диони́сия два от Трипо́ля Фини́ческаго. Ро́мул же у́бо диа́кон Диоспо́льския це́ркве. Пуплий же и два Алекса́ндра от Еги́пта, и́же во вре́мя гоне́ния, любве́ ра́ди Христо́вы связа́вше осо́бь ру́це, и приступи́ша к му́чащему тогда́ христиа́ны, иге́мону ца́рскаго гра́да, и ста́вше пред ним, христиа́ни ся испове́даша. Иге́мон же от се́рдца помоли́вся им, и да́ры честны́я обеща́в им, а́ще послу́шают его́, и не увеща́. И пону́ди я́ пожре́ти и́долом, и не повину́шася. И я́ко не послу́шаша его́, повеле́ я́ му́чити вельми́. И по том главы́ их усекну́ти. И та́ко преда́ша святы́я своя́ ду́шы в ру́це Го́сподеви.

Ца́рствующу Аврилиа́ну, бысть гоне́ние вели́ко на христиа́ны. Вся́чески бо угоди́ти иска́ше диа́волу, с ни́мже в бе́здне погруже́н бысть. Сам же и́де на восто́к. Антони́на же своего́ воево́ду на Памфили́ю посла́, да везде́ у́бо вся изы́щет христиа́ны, и прину́дит их пожре́ти и́долом. Прише́дшу же Антони́ну в Си́ду град Памфили́йский, ят бысть Алекса́ндр презви́тер ту су́щия це́ркве. И сед на суди́щи воево́да вопроси́ его́, кто у́бо есть и отку́ду приведе́н? Алекса́ндр же рече́: Памфили́анин ро́дом, христиа́н ве́рою. Презви́тер са́ном, пасту́х Христо́ва ста́да: Князь же рече́: Где есть Христо́во ста́до? Алекса́ндр же рече́: Под все́ю небе́сною челове́ки сотвори́л есть Христо́с, а заблу́ждшии от ста́да суть, неве́рующии в Него́. Князь же рече́: Двоего́ у́бо ра́ди му́ки вели́ки ти есть прия́ти. Пе́рвое, да ми пове́си ве́рующыя во Христа́: Второ́е же, да пожре́ши бого́м. И повел́е его́ би́ти сухи́ми жи́лами по чре́ву. Пото́м же повеле́ развари́ти смолу́ с ма́слом, и поврещи́ ту Алекса́ндра, и не прикосну́ся ему́ огнь. Посе́м повеле́ разжещи́ сковраду́ желе́зну, и возложи́ти на ню Алекса́ндра. А́нгел же Госпо́день прише́д, устуди́ сковраду́. И ви́деша вси лю́дие я́ко сам тре́тий бысть. И рече́ князь: Алекса́ндре, пожри́ бого́м, да бу́деши друг царе́ви. Алекса́ндр же укори́ царя́, и кня́зя, я́ко рабо́тающа диа́волу. Повеле́ же князь пове́сити его́, и строга́ти ногты́ желе́зными, и ника́коже вреди́ его́. И посе́м пусти́ша на него́ два льва, и прише́дше львы лиза́ста но́зе свято́му, и отъидо́ста во огра́ду свою́. И посе́м мече́м повеле́ его́ усе́кнути. И усе́чен бысть свяще́нный Алекса́ндр, ме́сяца ма́рта, в пятнадеся́тый день. И взе́мше христиа́не те́ло его́, погребо́ша че́стно.

Стихи́:

Ника́ндра одра́ша я́коже а́гня,

Ру́це возло́жше льсти́вии по́вари.

Ника́ндр вели́кий му́ченик, бе в ца́рство Диоклитиа́не. Се бе де́ло его́, посеща́ше вы́ну в темни́цах святы́х му́ченик, и исцеля́ше я́, и подава́ше им ну́ждную пи́щи, и погреба́ше мо́щи святы́х. Еди́ною же узре́ мощи святы́х, пове́ржены и небрего́мы, не сме́я прибли́житися их в день, в да не и сам ят бу́дет. И шед но́щию еди́н, и по еди́ному взима́я, полага́ше я́ на еди́ном ме́сте. Уве́ден же бысть от не́коего служи́теля и́дольскаго, и той оклевета́ его́ кня́зю: и ят бысть а́бие и му́чен. Поне́же не отве́ржеся Христа́, но Бо́га Его́ испове́да И́стиннаго и Соде́теля всему́. И та́ко подви́же мучи́теля на гнев, и прия́т ме́чную смерть. И та́ко за Христа́ пострада́в, восприя́т блаже́нный коне́ц, и безконе́чный живо́т.