Стихи́:

Отруси́в мы́сли вся́ких страсте́й,

Я́ко изузда́нием жи́зненыя у́зы Венеди́кт оплева́я.

Преподо́бный оте́ц наш Венеди́кт, бе от Ри́мскаго гра́да. Юн же сый, оста́вль дом и роди́теля своя́, отъи́де в пу́сто ме́сто, с кормя́щею его́ ста́рицею. Молвы́ отбе́г, моля́ся Го́сподеви, и прия́ дар исцеле́ния. Пе́рвое у́бо проси́вши ста́рице решета на се́яние пшени́цы, Изломи́вшуся же решету́, скорбя́ше о нем. Венеди́кт же помоли́вся о нем, устро́и е́ це́ло. Томле́н же быв блудо́м, обнажи́вся, вве́ржеся в ядови́тую кропи́ву и изба́влен бысть от блуда́. Бысть же по вре́мени игу́меном, и опа́снаго ра́ди воздержа́ния возненави́ден бысть от мона́хов. Помы́слиша же они потво́рным зе́лием умори́ти его́. И егда́ взя ча́шу, назна́менаше ю́ кресто́м, и разсяде́ся я́ко сткло, и мно́га чудеса́ сотвори́в. Хотя́щу же ему́ преста́витися к Бо́гу от жития́ сего́, два мона́ха ви́деста во сне путь на не́бо восходя́щь, и п́остлан ри́зами многоце́нными, и свещы́ мно́ги возже́ны сю́ду и сю́ду, и вопроси́ста: чий есть путь сей? И слы́шаста от белори́зца му́жа, я́ко сей есть путь блаже́ннаго Венеди́кта. Тогда́ и сконча́ся.

Стихи́:

Пре́жде уме́ртвия благообра́зно,

А́ще и рече́ Па́вел благообра́зне хожда́ше я́ко дни́ю.

Евсхимо́н епи́скоп во святы́х отец наш испове́дник Христо́в и учи́тель христиа́нский, измла́да доброде́тели держа́ся, и бысть друг Бо́жий, и муж соверше́н, це́рковь сотвори́ себе́ Свято́му Ду́ху. А́нгельское прия́ житие́, и пра́вое ве́ру изво́лив: и на высоту́ святи́тельства вшед, благода́ти испо́лнився духо́вныя. Ре́вностию же боже́ственою разже́гся, иконобо́рец разори́ е́ресь. Сотвори́ же чудеса́ пресла́вна: ме́ртваго младе́нца ма́терию носи́ма, и пла́чущися ей, помоли́вся Бо́гу, на живо́т приведе́. И ди́виим звере́м стра́шен быв, сло́вом бо еди́нем прогоня́ше я́, стада́ врежда́ющая. И в темни́цу вве́ржен бысть, держа́щим еретико́в царе́м, я́ко покло́нник святы́х ико́н, и учи́тель святы́я ве́ры и храни́тель ея. Помы́сли же богобо́рец о сем, и в поточе́ние посла́ его́, и та́ко сконча́ся.

В ле́то шесть ты́сящь осмьсо́т пятидеся́тое, сей святы́й Феогно́ст митрополи́т во орду́ к царю́ Зянибе́ку ра́ди умире́ния по́йде, и та́мо от Росси́йских злоде́ивых муж, оклевета́н бысть тому́ злочести́вому царю́ Зянибе́ку си́це: Митрополи́т сей Феогно́ст, о царю́ не дае́т да́ни во орду́, со всего́ освяще́ннаго чи́на своего́. А сам себе́ на них да́ни взима́ет, безчи́сленно мно́го зла́та и сребра́, и вся́кого бога́тства, а тебя́ царя́ преоби́дит. Царь же слы́шав сие́, проси́ у митрополи́та по ле́тних да́ней. Святы́й же ника́коже подви́гся таковы́я да́ни дая́ти ему́. И повеле́нием царе́вым, безбо́жнии тата́рове, мно́го ну́дяще его́ глаго́лаху: Почто́ ты не дае́ши да́ни царю́, от своего́ церко́внаго чи́на? Христо́в же святи́тель отвеща́: Христо́с И́стинный Бог наш Це́рковь Свою́ искупи́л есть от язы́к, честно́ю Свое́ю Кро́вию. Пога́нии же мно́го истяза́ху его́, и мно́го му́чивше его́, я́ко да бы им дань и́мати на освяще́нном чи́ну. Блаже́нный же страда́лец, до́блественне муче́ние претерпе́в, о Це́ркви Христо́ве. О име́нии же неради́, и раздая́ тогда́ сурове́йшым тата́ром сребра́ я́ко до шести́ сот рубле́в. И та́ко свободи́ Це́рковь Христо́ву от нечести́вых да́ни нера́туему, и приче́тников ея́, и я́ко непобеди́мый во́ин со одоле́нием возврати́ся во своя́ си. И прии́де здрав на свой ему́ престо́л Росси́йския митропо́лии: Благода́рствуя Бо́га и Пречи́стую Богоро́дицу. И по сих пребы́сть, де́сять лет, до́бре управля́я Бо́гом поруче́нную ему́ па́ству, с ми́ром преста́вися. Пас Це́рковь Бо́жию, два́десять и пять лет. И положе́н бысть в собо́рной це́ркви, Пречи́стыя Богома́тере, близ гро́ба чудотво́рца Петра́, в ле́то шесть ты́сящь осмьсо́т шестьдеся́ть пе́рвое, ма́рта в четыренадеся́тый день. Боѓу на́шему сла́ва, ны́не и при́сно, и во ве́ки веко́в. Ами́нь.