Сави́н му́ченик бе от страны́ Еги́петския, во времена́ царя́ Диоклитиа́на. Належа́щаго же ра́ди гоне́ния и ну́жди, оста́ви дом свой, и бли́жники бога́тство, и всего́ ми́ра отве́ржеся: и шед во ин град, кры́яшеся в хлеви́не ма́ле со ины́ми христиа́ны. Мно́зем же взыску́емым, взыска́емь бысть и Сави́н от идолослужи́телей. Не обре́тше же его́, скорбя́ху неве́рнии. Тогда́ приступи́в ни́щий еди́н от приходя́щих к нему́, и́же приимова́ше от него пи́щу, и рече́: Что ми дадите́, и аз вам покажу́, его́же и́щете Сави́на? Они́ же вда́ша ему́ два златника́, и по нем ше́дше, и обступи́ша хра́мину, и я́ша Сави́на, и приведо́ша его́ свя́зана ко кня́зю. И рече́ ему́ князь: Почто преоби́диши повеле́ние царе́во, и не жре́ши вели́ким бого́м, иного же Бо́га пропове́даеши не зн́аема? Он же рече́: Я́ко па́че Его́же аз пропове́даю Бо́га, подоба́ет ти позна́ти, и ве́ровати Ему́. И мно́го му́чен быв. Последи́ же вве́ржен бысть в реку́ Скама́ндру, и та́ко сконча́ся.

Та бе́ста от Лаодики́и Кесари́йския, презви́тера су́ща собо́рныя це́ркве, я́же мно́гажды проти́вистася е́ллином, укаря́юще их бесо́вскую слу́жбу. Прише́дшу же ту Асклипиа́ду воево́де, в Вофо́р град Лаодики́йский. Приведо́ша же Трофи́ма и Фа́ма к воево́де связа́вше, клевета́ху на ня глаго́люще: Сия́ еста́ учи́теля христиа́нская, и руга́теля бого́м на́шым вели́ким, и се приведо́хом я́ к твое́й держа́ве. Воево́да же рече́: Почто́ вы проти́витася жерце́м бог на́ших? Не ве́ста ли я́ко повеле́ние самоде́ржца есть, да всяк и́же не пожрет бого́м, му́ками зле живота́ го́нзнет? Отвеща́ Трофи́ма: Ни мук у́бо бои́мася, ни Христа́ отве́ржемася, ни бесо́м пожре́ма. Тогда́ воево́да повел́е би́ти я́ же́злием. Посе́м на дре́ве пове́сивши строга́ти ногты́ желе́зными. Рече́ и́ма: Пожри́та бого́м да не распну ва́ю, я́коже и О́ного волхва́, в Негоже ве́руета. Трофи́м же рече́: А́ще у́бо и недосто́йна есма́ стра́сти Го́спода на́шего Иису́са Христа́, но оба́че та́ко да бу́дет я́коже рече́. И повеле́ я́ распя́ти. И ведо́ша я́ из гра́да на ме́сто нарица́емое Моапо́т, ту бо бе́ста креста́ водруже́на. И приве́дшу нужда́ху я́ я́сти бра́шно. О́на же вкуси́ста ма́ло бра́шна, а про́чее предстоя́щым да́ста. Тогда́ распя́ша я́, в шесты́й на́десять день ма́рта. И та́ко прия́ста житию́ коне́ц. Ма́ти же у́бо ею́ испроси́ телеса́ ею́, да погребе́т я. Мно́зи же от гра́ждан омоча́ху в кровь пе́рстни и убру́сцы, и тем исцеле́ния творя́ху неду́жным: Бо́гу прославля́ющу свята́я своя му́ченика, и вси неду́жнии от кро́ве ею́ исцели́шася, и вероваша во Христа́.

Арестовул боже́ственный Христо́в апо́стол, бе у́бо от седми́десяти учени́к. По сла́вном вознесе́нии вели́каго Го́спода Бо́га и Спа́са на́шего Иису́са Христа́, восле́довав свято́му и вели́кому Па́влу апо́столу, учи́телю всея́ вселе́нныя: и с ним во вся страны́ проше́д рабо́тая ему. Его́же посыла́ше по вся гра́ды и страны́, поставля́ти епи́скопы на уче́ние истинныя ве́ры, и пропове́дати Христа́. Поста́вив же его́ епи́скопом, и посла́ во страну́ Фри́ческую, неве́рным су́щым и свире́пым зело́, и су́ровым мучи́телем. И та́мо шед пропове́даше Христа́, и овогда́ бие́н бысть, овогда́ же по у́лицам влачи́мь. И мно́ги научи́ ве́ровати во Христа́, и крести́ вся. Тем и це́рковь поста́вив, попы́ же и диа́коны в ней освяти́в, и ту сконча́ся.