Стихи́:

Челове́к на земли́ Бо́жий еди́н наре́кся,

Восприя́л еси́ но́вую оби́тель на небеси́, о́тче:

В седмьна́десятый прия́т Алекси́я смерть.

Сей бе от ве́тхаго Ри́ма, отца́ Ефимиа́на патрики́я, и ма́тере Аглаи́ды: бога́тых и всеблагоро́дных, единоро́ден им сый. Черто́гу же бра́чну сотворе́ну ему́ от отца́, во вре́мя в не́же подоба́ше неве́сте прибли́житися, дав ей обруче́нный пе́рстень, и моли́вся ей, и утаи́вся изы́де из до́му. И прише́д во град Еде́сский, и пребы́сть в це́ркви, лет седмьна́десять, в ни́щетных и власяны́х ри́зах, ми́лостынею и человеколю́бием приходя́щих пита́емь. Изше́д же отту́ду, не бо бе мо́щно таи́тися и всегда́ доброде́тели его́ кры́тися: уже́ приходя́щым к нему́ мно́гим и стужа́ющым ему́. И хот́я сни́ти в Тарс Килики́йский, в храм свята́го апо́стола Па́вла. Сего́ у́бо жела́ния не получи́, кораблю́ ве́трами сопроти́вными привлечен́у и́нде. Прише́д же в Рим, пости́же дом своего́ отца́. И не позна́н про́чее живота́ пред враты́ его́ пребы́сть, презира́емь от свои́х раб и укоря́емь. И толи́ка стражда́, ели́ка леть бе челове́ку стра́нну. И ни еди́наго же имя́щу дерзнове́ния от пита́ющихся и безчи́нных челове́к. Прише́дши же блаже́нней его́ кончи́не, испроси́в ха́ртии, и кто бе написа́в, и сию́ держа́ше, до́ндеже царь Оно́рий от Бо́га прие́м открове́ние, прии́де, и моли́вся ему́, уже́ уме́ршу, прия́т ха́ртию. И проче́тшу ему́ во слы́шание всем, уве́дано бысть я́же о нем, и всем ужа́сшымся. Погребе́ни бы́ша святы́я его́ мо́щи, че́стне и великоле́пне, во хра́ме свята́го апо́стола Петра́, ми́ро благоуха́нно и исцеле́ния приходя́щым неоску́дне пролива́я.

Стихи́:

Пла́чеши Иису́се, сего́ ме́ртвенным существо́м:

Живо́тнаго Своего́ дру́га, боже́ственным существо́м.

Мари́н Христо́в му́ченик христиа́н сый, и ви́де идолослужи́тели жру́ща, не то́чию безслове́сныя четвероно́гия, и пти́цы, но и челове́ки. Пра́зднику же твори́му безду́шных и́дол, боже́ственою ре́вностию разжегся, тек разруши́ тре́бища, и жертвы потопта́: и злочести́выя жерцы́ укори́, и себе́ христиа́на испове́да, рек: Ве́рую во Христа́ Сы́на Бо́жия су́ща Единоча́даго, Сотво́ршаго не́бо и зе́млю, мо́ре, и вся я́же в них. Тогда́ от идолослужи́тель ят быв. И пе́рвие па́лицами бие́мь от них, и ка́мением уста́ и зу́бы ему сокруши́ша, и за власы́ влачи́мь. Посе́м связа́вше его́, и преда́ша кня́зю. И от того́ му́чен быв, и ме́чную восприя́т кончи́ну.

Пове́да нам оте́ц Иоа́нн отше́льник, я́ко слы́шах рече́, пове́дающе отца́ Стефа́на, су́щу ми рече́, во о́бщем житии́ вели́каго отца́ Феодо́сия общежи́теля. Бе́ста та́мо два бра́та, сотво́рша обеща́ния, я́ко ни в животе́ ею́, ниже́ по сме́рти разлучи́тися и́ма дру́гу от дру́га, я́ко у́бо бя́ста в монастыре́ всех по́льзующа. Еди́н же ею́ нача́т ра́товатися от бе́са блу́днаго, и не возмо́г стерпе́ти бра́ни, глаго́ла бра́ту своему́: Отпусти́ мене́ бра́те, поне́же ра́туемь есмь блудо́м, и хощу́ ити́ в мир. Брат же нача́т моли́ти его́ глаго́ля: Ни бра́те, да не погуби́ши труда́ твоего́. Он же глаго́ла ему́: Гряди́ со мно́ю в ми́ре, да испо́лню жела́ние мое, или́ отпусти́ мене́ ити́. Брат же не хотя́ отпусти́ти его́, и́де с ним во град. Брат же ра́туемый вни́де в блуди́лище, други́й же вне стоя́, взем персть и посы́па главу́ свою́ слеза́ми омыва́я себе́ и сокруша́я. И я́ко у́бо изы́де от блуди́лища сотвори́вый де́ло блу́дное. Глаго́ла ему́ други́й брат: Что по́льзова бра́та себе́ от блуда́? Но и́дем про́чее в монасты́рь наш. Он же отвеща́ ему́: Ктому́ не могу́ ити́ в пусты́ню: Ты же а́ще хо́щеши иди́, понеже аз в ми́ре хощу́ пребыва́ти. И я́ко у́бо мно́го моли́ его́ брат, и не возмо́же умоли́ти его́, е́же после́довати с ним в пусты́ню, нача́т и той с ним пребыва́ти в ми́ре, и нае́м творя́ста о́ба я́ко да пита́ютася. В то же вре́мя, оте́ц Авра́мий монасты́рь зи́даше, и́же пре́жде в Константи́не гра́де монасты́рь созда́, е́же глаго́лется Авра́миев. Последи́ же во Ефес́а бысть епи́скоп добр и кро́ток зело́. Ше́дша у́бо о́ба бра́та та́мо творя́ста нае́м, и взе́мляста нарече́нную и́ма мзду. И ходя́ по вся ве́черы во град брат он, изнуря́я сия́ в блуде́. Други́й же брат по вся дни постя́шеся со вся́цем молча́нием, никому́же бесе́дуя. Де́лателие же зря́ще его́ по вся дни, ниже́ яду́ща, ниже́ к кому́ бесе́дующа, но со вся́цем молча́нием и смиреному́дрием внима́юще себе́. Пове́даше блаже́нному Авра́мию я́же о нем, и о пребыва́нии его́. Тогда́ вели́кий Авра́мий призва́ его́, и глаго́ла ему́: Отку́ду еси́ бра́те, и что есть де́ло твое́? Он же вся по́ряду испове́да ему́: я́ко бра́та ра́ди вся терплю́, я́ко да ви́дит Бог скорбь мою́, и спасе́т бра́та моего́. Сия́ же слы́шав блаже́нный Авра́мий, глаго́ла ему́: Госпо́дь дарова́ тебе́ ду́шу бра́та твоего́. И я́ко у́бо отпусти́ бра́та оте́ц Авра́мий, и изы́де от ке́ллии его́, и се брат его́ прии́де глаго́ла ему́: Бра́те люби́мый, поими́ мя в пусты́ню да спасу́ся. Он же а́бие пое́м его́, и веде́ и́ в пеще́ру близ свята́го Иорда́на, и затвори́ его́ та́мо. И по ма́лех днех мно́го по Бо́зе предуспе́в, и у́спе о Го́споде. Пребы́сть же брат по сме́рти в то́йже пеще́ре по обеща́нию, я́ко да и той сконча́ется ту. Сему́ же бра́ту седя́щу близ свята́го Иорда́на, по успе́нии бра́та: Прии́де к нему́ не́кий ста́рец от ла́вры свята́го Гера́сима, и глаго́ла ему́: рцы ми бра́те, в толи́ко лет безмо́лвия твоего́ и поще́ния, что испра́вил еси́? И глаго́ла ему́ брат: Иди́ в ке́ллию твою́ о́тче, и по десяти́х днех прииди́, и скажу́ ти. Ста́рец же по десяти́х днех прише́д, и обре́те бра́та преста́вльшася. И на зде обре́те напи́сано си́це: Прости́ мя а́вво, я́ко николи́же творя́щу ми пра́вило мое́, оста́вих на земли́ ум мой.

В то́йже день сло́во о Гео́ргии игу́мене горы́ Сина́йския, ка́ко а́нгелом восхи́щен бысть, и обре́теся во Иерусали́ме: и ка́ко во свое́й ке́ллии посажде́н бысть

Бе игу́мен в Сина́йстей горе́ и́менем Гео́ргий: вели́к зело́, и вельми́ воздержа́ся. И сему́ в вели́кую субботу седя́щу в ке́ллии свое́й, помы́сли си́це реки́й: «Хоте́л бых воскресе́ния день твори́ти во святе́м гра́де Иерусали́ме, и причасти́тися святы́х Та́ин во святе́й це́ркви Христа́ Бо́га на́шего». И бысть весь день ста́рец мысль ту име́я. Та́же я́ко ве́чер бысть, прии́де учени́к его́ глаго́ля: «Повели́ ми о́тче о кано́не». Ста́рец же рече́ ему́: «Но егда́ бу́дет вре́мя причаще́ния возвести́ ми, тогда́ прииду́ и причащу́ся». И та́ко пребы́сть ста́рец в ке́ллии свое́й. Егда́ бысть вре́мя причаще́ния во святе́й Це́ркви воскресе́ния, обре́теся во Иерусали́ме ста́рец, у блаже́ннаго Петра́ патриа́рха, и даде́ ему́ с пресви́теры свои́ми, свято́е обще́ние. Ви́дев же патриа́рх, рече́ сигке́ллу своему́: «Когда́ есть прише́л игу́мен Сина́йския горы́?» Отвеща́ ему́ сигке́лл реки́й: «Та́ко ми владыќо моли́тв твоих́, несмь прежде его́ ви́дел, то́чию ны́не». Патриа́рх же рече́ сигке́ллу своему́: «Повеждь ему́, да не отъи́дет: хощу́, да со мно́ю вку́сит бра́шна». Сигке́лл же глаго́ла ста́рцу. Он же рече́: «Во́ля Господ́ня да бу́дет». Та́же я́ко конча́ша Литурги́ю, поклони́ся свято́му Гро́бу ста́рец, и очути́вся во свое́й ке́ллии. И се учени́к его́ уда́ри в две́ри глаго́ля: «О́тче, пойди́ да во́змеши обще́ние». Ста́рец же шед, взя па́ки обще́ние в це́ркви. Патриа́рх же опеча́лився, написа́ кни́ги к ста́рцу, и посла́ к нему три попы́: Стефа́на, Зоси́му и Докле́дия: и ти́и прише́дше, пове́даша ста́рцу. И отвеща́ игу́мен: «Не бу́ди мне преоби́дети господи́на ва́шего». Восписа́ же о нем бывшее патриа́рху. Приложи́ же ему́ па́ки, и се реки́й: «Да весть твое́ блаже́нство влады́ко, я́ко по шести́ ме́сяцех о́ба вку́пе Влады́ку Христа́ Бо́га на́шего сре́сти и́мамы, и тогда́ поклони́тися». Возвра́щьшии же ся пове́даша патриа́рху глаго́люще: Я́ко се́дмьдесять лет и́мать ста́рец не исходя́ из Сина́йския горы́. Святы́й же Петр приведе́ свиде́тели епи́скопы и кли́рики, и́же тогда́ ви́девше ста́рца, и ти́и реко́ша: «Вси целова́хом его́». И по шести́ ме́сяцех почи́ ста́рец и патриа́рх, я́коже проре́кл ста́рец.