Стихи́:

Забде́в пе́рвее мно́гими томле́ньми,

Заспа́вше Ма́рко сей боже́ственаго умире́ния:

Утро́ба Кири́лла леви́та мече́м,

Я́ко то́лща земли́ по Дави́ду, разсе́деся:

Лежа́т жены́ я́ко и коры́та в снедь сви́ниям,

Утро́бами пострада́вших, расто́ргнутия рука́ма уби́йственыма.

Уже́ благоче́стию просия́вшу Христо́вою благода́тию, и е́ллинстей пре́лести потемне́вши, во времена́ Константи́на вели́каго царя: и благочести́вым к потребле́нию и́дольских тре́бищь и ка́пищь тща́щымся, я́коже тех ре́вность распала́ше. С про́чими же ины́ми, и преподо́бный Ма́рко епи́скоп, и́дольское не́кое тре́бище низложи́в, це́рковь созда́. Веще́м же мимоше́дшым, и зако́нному ца́рствию в нече́стие, и в мучи́тельную о́бласть пресельшуся: и Иулиа́ну прии́мшу ски́птры, ему́же и дерзну́вшу на Христа́ пя́ту воздви́гнути, и вруче́нное ему́ насле́дие смири́ти. И непокрове́нне зело́ и нечу́вственне, па́че же безчелове́чне и безбо́жне, не ве́дый кто сый и Кому́ проти́вится: я́ко персть бы́вый, пе́пел и прах, Созда́телю вся́ческих, и небе́сному Царю́, И́же и отмще́ние суда́ не вда́ле подаде́ ему́, и срамоту́ долго́ву, и пе́рсскими рука́ми в па́губу быв. Тогда́ у́бо нече́стию обдержа́щу, и́же и́долом притяжа́тели иска́ху свята́го Ма́рка, дерзнове́ния ра́ди ка́пищнаго разоре́ния. О́ному же повеле́ния ра́ди за́поведи отступи́вшу вма́ле. Да я́ко ви́де не́кия влеко́мы за него́ вопроша́ющыя, изы́де, и уби́йцам предаде́ себе́. Они́ же е́мше его́, и совле́кше его́, и по всему́ те́лу ра́ны наложи́ша, и в не́кое ме́сто смердя́що ври́нувше. Та́же изве́дше его́, и отроко́м преда́вше: ти́и же сбо́дше его́ тр́остием, и мед со о́цтом смеси́вше в жа́твенный пек, по всему́ те́лу его́ пома́завше, и пра́во того́ взотко́ша, да наго́ю главо́ю, ку́пно и всем те́лом, в тве́рдем полу́дни лучы́ со́лнечныя прие́мля сгара́ет: и о́свам и ше́ршнем пи́ща бу́дет. И си́ми объяде́н бя́ше. Но богоуго́дный ста́рец такова́я стражда́ терпя́ше, зане́же не име́ти что рещи му́чащым, зда́ния ра́ди разоре́наго тре́бища. Они́ же всегда́ рыка́ху тще́тства ра́ди. Прилучи́ся же и о́нем низборе́ния ра́ди тужи́ти, и за е́же сему́ пусто́шная стерпева́ти, и о сбы́вшемся умолчавше. Сей же крепля́шеся, ка́ко не везде́ удоби́знено показа́ние, я́ко о́вем о е́же сня́ти того́, благоче́стия ра́ди тщета́ бя́ше: и сего́ ра́ди вма́ле иска́ху, и не получа́юще, и люте́йшая помышля́ху: а е́же помога́ти и предая́ти ве́ру мня́шеся, и ку́пно е́же страда́ти за Христа́, и страсте́м восприима́ти тяжча́йшая, и сла́дость тому́ вмени́ти и любоче́стие, а́ще и весь в стоя́нии соодоле́ет, и де́тельством побди́т. Да я́коже ви́деша тве́рдую кре́пость ди́внаго ста́рца, сне́мше того́ от иде́же ви́ся бя́ше, и преложи́вше себе́, учи́теля его́ наре́кше. И навыко́ша от него́ благоче́стию: добр бо бя́ше к наказа́нию нечести́вых суро́вства.

Добро́ бо бу́дет и во Финики́и сбы́вшееся дерзнове́нно, е́же на Кири́лла леви́та слу́чшееся: и́бо и той мно́гие ка́пищем потреби́тель быв, дерза́я по и́стине. Сего́ ра́ди ят быв, и не то́чию непра́ведную подъя́т и ну́жную смерть, но и утро́бу тому́ пресеко́ша, я́ко и вну́трешним его́ изы́ти: ми́лостивно и ж́алобно приходя́щым бысть виде́ние. Я́коже и о уби́йцех тех глаго́лют: По достоя́нию суд, и отмще́ние онем получи́вшым. Отше́дшым же от него́, а́бие зу́бы их изпадо́ша и изсы́павшеся, и язы́цы их раста́яша, и очи́ма зрение погуби́ша.

А и́же во Асколо́нех, и в Га́зех жен, и дев, и священ́ных муже́й страда́ния: утро́бы о́нех разре́завше, и ячмене́м насы́паша, и поме́тнуша сви́ниям в снедь. Каково́ же сло́во возмо́жет по достоя́нию изрещи́ такова́ нече́стия царе́ва, и я́же под ним учине́ная де́йства! Но у́бо му́чеником угото́вано бысть зде́шних ра́ди страда́ний ‐ неизре́ченное блаже́нство: настоя́телю же зло́бы – пла́менное муче́ние и ве́чное постыде́ние.

Во вре́мя о́но бя́ше жена́ бога́та и благоле́пна зело́, и Бо́га боя́щися, Иулиани́я нарица́емая: млада́ овдове́вши с двои́ма младе́нцама, со Иоа́нном и с Фимисти́ею. Повеле́нию же по́слану бы́вшу е́же на убие́ние христиа́н, и сия пое́мши Иоа́нна мла́да су́ща, кры́яше и в не́коем зда́нии, пита́ющи, и уча́щи и в наказа́нии Госпо́дни кни́гам по вся часы́, и моли́тве. Оста́вляше же отроча́ ма́терь, и прихожда́ше в кино́вию, и еди́н моля́ся о́тай, и па́ки возвраща́шеся. И́бо стра́ха ра́ди вси христиа́не кры́яхуся. По обы́чаю же тому́ па́ки прише́дшу, обре́те его́ не́который боголю́бец, и наказа́ его́ е́же па́че к горе́ притеца́ти, не́жели та́мо хотя́ воврещи́, и́маши себе́ му́чащым отда́ти. Он же сове́т восприи́м, рече к ма́тери свое́й: Госпоже́ моя́ ма́ти, рече́ ми не́кто от боголю́бец поити́ к нему́: Аз же па́че твои́ми моли́твами разсуди́х, е́же таково́му сбы́тися. Она́ же отпусти́ его́, мне́вши я́ко на́скоре возврати́тся. Он же целова́в ма́терь и сестру́ свою́, и по́йде в пусты́ню к еги́птянину не́коему Фарму́фию пусты́ннику. И прии́м моли́тву от него́, и по́йде во вну́треннюю пусты́ню, и обре́те верте́п та́мо испо́лнен сущь змий, и скорпи́й, и га́дов вся́ких. И помоли́вся ве́рже себе́ свы́ше до́лу. А́нгел же Госпо́день подхвати́в его́, и сведе́ его́ без вре́да. Два́десять лакте́й бе верте́п иму́щь глубину́, и просте́р ру́це крестообра́зно ста, моля́ся четы́редесять дний, ни яды́й, ни пия́, ни усну́ та́мо: и а́бие га́ди пресмыка́ющии изыдо́ша из верте́па. Ангел же иже Фарму́фию приноша́ше пи́щу всегда́, то́йже приношаше и Иоа́нну хлеб. И рече́ а́нгел к Фарму́фию: Се Госпо́дь посла́л есть тебе́ сей хлеб, да несе́ши его́ а́вве Иоа́нну на студене́ц, зане́же бы́ти ему́ ю́ну во́зрастом. И не восхоте́ а́нгел подава́ти ему́, да не превознесе́тся. Прише́дшу же Фарму́фию, и вда ему́ хлеб. Он же прии́м, и Бо́га благодари́в яде́. И бя́ше сла́вя Бо́га, пи́щу на всяк день от ста́рца прие́мля во времена́ дово́льна. Диа́вол же не моги́й зре́ти е́же к Бо́гу его́ по́двиги, преобрази́ся во еди́наго от раб его́, и доше́д к ста́рцу прельсти́ его́, и веде́ его́ до студенца́: и сказа́ Иоа́нну я́же не подо́бна бя́ше. Иоа́нн же ста́рца напра́вив, и бе́са посрами́в отсла́. Па́ки же диа́вол мно́жество бесо́в собра́в, и преобрази́ их в ма́тере его́ о́браз и в се́стрин и в сро́дник его́ и сосе́д, в рабы́ и в рабы́ни и в зна́емыя ему́: и доше́дше вси к студенцу́ пла́чуще и моля́щеся, я́коже бы хотя́ще ви́дети его́. Свято́му же ни́зу моля́щуся, и рече́ к ним: отъиди́те от мене́. И неви́дими бы́ша. Соверши́вшу же ему́ на студенц́е, де́сять лет, и вся́кое поще́ние испра́вившу, и Бо́гу до́бре угоди́вшу, преста́вися в ве́чныя оби́тели.

Хрисихи́й же не́кто мона́х три́десять лет соверши́ в пусты́ни, и боже́ственым а́нгелом наста́влен, идя́ше погребсти́ Иоа́нна преподо́бнаго. И по три дни извну́трь вертеп́а пребы́сть моля́ше, и заклина́я его́ Бо́жиею си́лою, дабы́ ничто́же утаи́ти ему́ от жития́ своего́: но сказа́ти ему́ вся по́ряду, я́ко Бо́гу та́ко изво́лившу. И бысть пресла́вно некое зна́мение, всяк удивля́яй слух и виде́ние, возвы́сися сама́ земля́ осо́бь из дна рва на два́десять ла́кот. И снидо́шася ку́пно заклина́ния ра́ди Хрисихи́я мона́ха, не оста́ви же ничто́же, но испове́да святы́й вся я́же о себ́е. И лобза́нием свята́го целова́ Иоа́нна. Сопря́тав же себе́ Иоа́нн, ко Го́споду отъи́де. Тогда́ Хрисихий положи ма́нтию свою́ на Иоа́нна, и ля́же покрыва́ло на студене́чном у́стии. И отпе́в обычныя псалмы́, и насади́ на том ме́сте фи́ник, и а́бие вкорени́ся фи́ник и возрасте́, я́ко дуб совершен и процвете, и бысть плода́ испо́лнен. И та́ко ви́де ста́рец, благодаре́ние возда́ Бо́гу, глаго́ля: Сла́ва Тебе́ Влады́ко, я́ко лю́бящих Тебе́ Сам познава́еши, и Ца́рствию насле́дники сотворя́еши. И я́ко такова́я помышля́ше ста́рец мол́яся, и а́бие восхи́ти его́ дух, и отнесе́ на ме́сто, иде́же пребыва́ше. И призва́в му́жа благочести́ва, и умоли́ его́ написа́ти о нем я́же ви́де и слы́ша.

Стихи́:

Из ка́ла изы́де Евста́фие всеблаже́нне,

Христу́ предста́л еси́, бы́вшу землено́му нас ра́ди.

Сей и́же во святы́х оте́ц наш и испове́дник Евста́фий, мир я́коже бре́мя тя́жкое от себе́ отложи́в, и за́поведи Бо́жия без ле́ности творя́, бысть мона́х, и яре́м Христо́в на ра́ме ноша́ше, и прилежа́ше о свое́й души́. Бя́ше и свяще́нник Бо́жий, мно́гими уте́хами повину́вся. Быв благода́рствуя Бо́га вы́ну, и ве́ру к Бо́гу име́я мно́гу, и любо́вь ко всем нелицеме́рну. Наказа́тель смире́н, кро́ток, ми́лостив, ревни́тель до́брым дело́м. Судо́м боже́ственым архиепи́скоп Киавифини́йский быв. Пра́вяше Це́рковь Бо́жию ле́ты дово́льными, по уче́нию и преда́нию боже́ственых апо́стол. Е́реси же не́когда во всех це́рквах Бо́жиих воста́вши, поучи́в себе́ боже́ственых Писа́ний, отрази́ пра́щею слове́с свои́х, всех хва́лящихся на Бо́жия це́ркви. О сем не́цыи от иконобо́рных о́нех, и́же тогда́ злочести́вне ца́рствующему испове́давше. Что же рещи́ и́мам? Преще́ния, оплева́ния, бие́ния, темни́цы, мяте́жы, воста́ния, же́злием бие́ния. Всех коне́чне па́лицами того неми́лостивно сопха́вше, поклоне́ния ра́ди и че́сти святы́х и всечестны́х ико́н, и изгна́на от епи́скопства сотвори́ша. И та́ко во изгна́нии мно́га ле́та дово́льствовав, оскорбля́емь, зло́бимь, лиша́емь, алчбо́ю, и жа́ждою, и нагото́ю: благода́рствуя Бо́га, преста́вися к ве́чным оби́телем.

Егда́ бысть Иису́с три́десяти лет роди́выйся от Мари́и, испо́лнишся всех проро́к прорица́ния о Нем. И кре́щься гото́вяшеся к во́льней стра́сти, ю́же прия́ Ада́мля ра́ди преступле́ния. Того́ ра́ди сни́де в плоть, и прободе́ся, и Ада́м крести́ся кро́вию Его́, ре́бром бо прободе́ным Госпо́дним, изы́де кровь и вода́, да крести́т зе́млю и Ада́ма. Того ра́ди и же́лчи вкуси́, и даде́ избавле́ние ро́ду челове́чу. Еда́ не зна́ют о́цта и же́лчи, тро́сти и губы? Кая́ ли земля́ породи́ те́рние, и́мже венча́ша Христа́? Или́ мо́ре изнесе́ ту гу́бу, е́юже отро́ша уста́ Христу́? Ко́е ли ста́до, от него́же взята́ бысть желчь? Ко́е ли ме́сто породи́ трость? Кото́рии хитрецы́ кова́ли копие́ и гво́здие, и́миже пригвозди́ша Царя́ Христа́ Бо́га, небесе́ и земли́ Творца́? Ко́е ли ме́сто роди́ вино́, от него́же сотвори́ся о́цет он? О́ вели́кое чу́до! Той бе дарова́л вся блага́я, и земли́ повеле́ расти́ти вся́ческая. То ка́ко вся злая прия́т от Свои́х Си раб? О́ вели́кое чу́до! Он прии́де от льсти изба́вити род челове́чь, и от науче́ния диа́воля, то ка́ко пострада́ от Свои́х Си? Но сла́ва Твоему́ Влады́ко милосе́рдию: Сла́ва Твоему́ Христе́ смотре́нию: Сла́ва Твоему́ прише́ствию: е́же не то́чию к нам земны́м, но и во ад схожде́нию Влады́ко, да изведе́ши и ту су́щыя вся с проро́ки, и патриа́рхи смотре́нием Твои́м Го́споди. И Тебе́ славу возсыла́ем, со Отце́м, и со Святы́м Ду́хом, ны́не и при́сно, и во ве́ки веко́в. Ами́нь.