Стихи́:

Посе́чен быв Васи́лие, соца́рствуя небе́сному Царю́,

От свои́х крове́й багр червле́н принося́:

В два́десять шесты́й Васи́лию вы́ю отсеко́ша.

Сла́вный му́ченик Васи́лий, бя́ше епи́скоп Амаси́йския митропо́лии, во времена́ Ликини́я царя́. И́же и по́слан быв вели́ким Константи́ном на Максимиа́на, воста́вшу ему́ нань. И сотвори́ его́ зя́тя, вдаде́ зань Константи́ю свою́ сестру́. Бы́вшу же в Никомиди́и Ликини́ю, и воста́нию разре́щшуся, и мучи́телю не разуме́вшу отмще́ния разстоя́нию и е́же напа́дшия беды́ уго́ньзшу. Той в Никомиди́и принесе́ же́ртву и́долом, и свята́го Васи́лия от Амаси́и с не́которою отрокови́цею, нарица́емая Глафи́ра, привести́ повеле́ к себе́. Глафи́ра же бя́ше раба́ Константи́и жены́ Ликини́евы, и́же и похоте́вшу о́ну Ликини́ю. И се уве́девши госпожа́ ея́, со мно́гим бога́тством к восто́ку отсла́ ю́. И от ме́ста до ме́ста преходя́щи, прии́де во Амаси́ю, таково́е пра́вящу Ликини́ю. И я́ко носи́мое от нея́ зла́то на созда́ние епи́скопу вда́вши ей. И снаходи́в повеле́ я́ обою́ ку́пно я́ти и привести́ к себе́. Но Глафи́ра от жития́ отше́дши. Приведе́н бысть блаже́нный епи́скоп Васи́лий в Никомиди́ю к мучи́телю, и прия́т ме́чное осуже́ние. Супроти́вльшуся свято́му, и дово́льна ему́ изре́кшу, окая́нствия ра́ди вменя́емых бого́в, и су́етствия его́ поплева́в, отсеко́ша ему́ главу́. И вложи́вше главу́ и те́ло его́ в кора́бль, вверго́ша в мо́ре на́резно. И́же и совоку́пльшеся [ча́сти] по есте́ственому соста́ву. Последи́ же обре́тен бысть святы́й цел и́же проти́ву сино́па глубине́, ловце́м не́ким мре́жу низпусти́вшим, и на край того́ привле́кшым. Та́же и а́нгелу я́вльшуся Елпидифо́ру, прие́мшему пе́рвее свята́го в Никомиди́и, и объяви́ ему́ о свято́м. И́же и прише́д ку́пно с Феоти́мом и Парфе́нием дия́конома, и́же бя́ху от Амаси́и со святы́м пришли́, и обрето́ста его́ извлече́на на су́хо. И взе́мше и́, и кади́лы благоуха́нными покади́вше, и отпе́вше, с честны́ми пе́сньми во Амаси́ю отсла́ша. Соверша́етжеся собо́р свята́го во святе́й Вели́цей це́ркви.

Сей преподо́бный оте́ц наш Стефа́н бе ро́дом вели́кия Руси́и, от язы́ка слове́нска, от страны́ полу́нощныя, глаго́лемы Двински́я, от гра́да нарица́емаго Усть ю́га. Бе же роди́телю наро́читу сын, не́коего христолю́бца му́жа ве́рна и́менем Симео́на, еди́наго от кли́рик собо́рныя це́ркве святы́я Богоро́дицы, и́же на Усть ю́га: и ма́тере та́коже христиа́ны, нарица́емыя Мари́и. И еще́ де́тищем сый, вдан бысть гра́моте учи́тися, и́же вско́ре извы́че боже́ственое писа́ние. Та́же и чтец бысть в собо́рней це́ркви. Бе же превзы́де па́че мно́гих све́рстник в ро́де свое́м добропа́мятством, и ско́ростию естества́ преспева́я. И остроу́мием же и бы́стростию и смы́слом превосходя́ всех, и бысть доброразу́мичен зело́. Преспева́ше же ра́зумом душе́вным, и версто́ю, и благода́тию. К де́тем игра́ющым не пристава́ше, и́же в пу́стошь теку́щым, и всу́е тружда́ющимся, и тще́тная гоня́щим не внима́ше, ниже́ водворя́шеся с ни́ми. Но от всех де́тских обы́чаев, нрав и игр отвраща́шеся. Но то́чию на славосло́вие упражня́шеся, и к пи́сменому ра́зуму прилежа́ше, и кни́гам вся́чески выче́ния изда́вся. Та́ко дарова́нием боже́ственым в ма́ле вре́мени мно́го извы́кшу ему́, есте́ственою острото́ю ума́ своего́. Возра́стшу же ему́ в де́встве, и в чистоте́, и в целому́дрии. И зане́ мно́ги кни́ги почита́ше Ве́тхаго и Но́ваго зако́на, и отту́ду разсмотри́в житие́ све́та сего́ маловре́менное, и скоромину́ющее, и мимоходя́щее, а́ки ре́чная быстрина́, или́ а́ки травны́й цвет. И та́ко прии́де ему́ Бо́жия любы́, и постриже́ся во мни́шеский чин во гра́де Росто́ве, в монастыре́ свята́го Григо́рия Богосло́ва близ епи́скопии, при епи́скопе Росто́встем Арсе́нии, от не́коего игу́мена и́менем Макси́ма. И до́бре потружа́вся во и́ноческом житии́, в посте́ и в моли́твах и в слеза́х е́же к Бо́гу. Сей же блаже́нный оте́ц наш святы́й Стефа́н мно́ги стихи́ протолкова́ше. Мно́зи же проста́я чадь, житию́ его́ до́брому зазира́ху. Написа́ же святы́й мно́ги кни́ги свои́ма рука́ма, и до сего́ дне свиде́тельствуют. И та́ко святы́й за мно́гую доброде́тель поста́влен бысть дия́коном от Арсе́ния епи́скопа Росто́вскаго. По сем же по преста́влении митрополи́та Алекси́я, повеле́нием го́рдаго наме́стника хотя́щаго бы́ти митрополи́том Миха́йла, нарица́емаго Митя́я, поста́влен бысть святы́й Стефа́н презви́тером, от Гера́сима епи́скопа Коло́менскаго. По сем научи́ся сам пе́рмьскаго язы́ка гра́моте, Бо́жиим вразумле́нием, а́збуку не зна́ему сложи́ с пе́рмьскаго язы́ка; и кни́ги ру́сския на пе́рмьский язы́к преведе́ и преписа́. Та́ко же научи́ся и гре́честей гра́моте, и до́бре почита́ше святы́й кни́ги, зане́же уме́яше всех язы́к трех кни́ги, гре́ческия, и ру́сския, и пе́рмьския. По сем святы́й Бо́гом сый наставля́емь, и по благослове́нию предрече́ннаго епи́скопа Коло́менскаго Гера́сима, и́же издавна́ жела́ше, и́де в зе́млю неве́рную вели́кия Пе́рми: в ней же челове́цы некреще́нии куми́ром кла́няются, и ве́руют в чароде́йство, и бесо́м же́ртву прино́сят. И даде́ епи́скоп свято́му от моще́й святы́х, и антими́нсы, ми́ро и ма́сло , и я́же подо́бная сим на освяще́ние це́ркве, и прии́де в Пермь вели́кую, и нача́ учи́ти ве́ре Христо́ве от боже́ственых писа́ний, я́коже и апо́столи Христо́вы, и крести́ти во и́мя Отца́ и Сы́на и Свята́го Ду́ха. И мно́ги неве́рныя кумирослужи́тели препре́ и крести́, и от гра́ждан мно́жество. Та́же и куми́рницу со и́долы сожже́, и мно́ги куми́ры святы́й поби́ и посече́, и чароде́йства испрове́рже о и́мени Христо́ве. И мно́га зла претерпе́ от неве́рных люде́й. По сем же прии́де ко свято́му не́кий старе́йшина волхво́м и́менем Па́ма со́тник, и хотя́ше свята́го отца́ препре́ти о ве́ре, и чародея́нием свои́м сме́рти преда́ти пред тмочи́сленым наро́дом. И препира́шеся со святы́м от у́тра и до ве́чера, и во всю нощь ни яды́ ни пия́, и посра́млен бысть от свята́го Стефа́на си́лою Свята́го Ду́ха. И посе́м помоли́вся Бо́гу всем жале́нием се́рдца своего́, и поста́ви це́рковь во и́мя Пречи́стыя Богоро́дицы честна́го Ея́ Благове́щения. И украси́ ю́ всем украше́нием церко́вным, я́ко неве́сту, на ме́сте, нарица́емем на у́стии Вы́ми реки́. Последи́ же создана́ бысть ту оби́тель свята́го, и пото́м епи́скопия его́ наречена́ бысть. И та́ко святы́й непреста́нно моля́шеся Бо́гу со слеза́ми, и обраща́ше лю́ди неве́рныя к Бо́гу от пре́лести и́дольския. И уча́ше и хожда́ше по всей земли́ пе́рмьстей, и це́ркви Бо́жия поставля́ше по градо́м и по се́лом. Посе́м же сове́товал святы́й со ученики́ свои́ми, е́же есть с новокреще́нными людми́, я́ко ну́жда бя́ше им бы́ти без епи́скопа, и уго́ден бысть сове́т свята́го. И таковы́я ра́ди вины́ и́де святы́й на Москву́ к вели́кому кня́зю Дими́трию, сы́ну вели́каго кня́зя Иоа́нна, и к митрополи́ту Пи́мену: и пове́да и́ма о сове́те свое́м, да даду́т епи́скопа в Пе́рмьскую зе́млю, его́же жада́ют лю́дие пе́рмьстии, и да по́шлют рече́ со мно́ю. У́же бо бя́ше жа́тва мно́га, а де́лателей ма́ло: та́ко Бо́гу поспешеству́ющу. Посе́м же митрополи́т, помы́слив с вели́ким кня́зем, и собра́ епи́скопы и свяще́нники. И избра́нием мно́гих люде́й, Бо́жиею благода́тию сам святы́й Стефа́н поста́влен бысть епи́скопом Пе́рми, ю́же научи́ и просвети́ святы́м креще́нием. И посе́м князь вели́кий и митрополи́т одари́в свята́го мно́гими да́ры, и отпусти́ша его́ на престо́л свой в свою́ зе́млю. Святы́й же прише́д во своя́ си ра́дуяся и благодаря́ше Бо́га, устро́ившаго ему́ вся до́бре. И я́ко пе́рвее, си́це и второ́е уча́ше лю́ди и креща́ше, и́же не прия́ша еще́ креще́ния. И це́ркви Бо́жия поставля́ше и иере́ов в них учрежда́ше, и весь чин церко́вный уставля́ше до́бре по пе́рмьскому язы́ку. И монастыри́ устроя́ше, и ми́лостыни подава́ше, и кормя́ше ни́щыя и убо́гия. И посе́м святы́й оте́ц наш Стефа́н вели́кий, уве́дев свое́ преставле́ние ко Го́споду за три ме́сяцы и бо́ле, и созва́ вся христиа́ны земли́ тоя́, и поучи́в их дово́льно от боже́ственых писа́ний, е́же в ве́ре пребыва́ти, и в любви́ нелицеме́рне ме́жду собо́ю. И глаго́ла им: се у́же хо́щет Бог вско́ре преста́вити мене́ от вас, я́коже яви́ мне Госпо́дь наш Иису́с Христо́с. Посе́м святы́й Стефа́н отъе́ха к Москве́ к Киприа́ну митрополи́ту не́ких ра́ди исправле́ний церко́вных, и о зако́нных пра́вилех я́же суть на спасе́ние челове́ком. И тогда́ прилучи́ся свято́му не́колико дней боле́ти, и преста́вися к Бо́гу, Его́же измла́да возлюби́. И мно́го потружда́вся о спасе́нии лю́дстем. И пе́рмьския земли́ наро́ды в ве́ру приведе́ и крести́, при благове́рном вели́ком кня́зе Васи́лии сы́не Дими́триеве вели́каго кня́зя, и́же царя́ Мама́я победи́, в седмо́е ле́то княже́ния кня́зя Васи́лия и при Киприа́не митрополи́те. Собра́шажеся на погребе́ние свята́го кня́зи и боля́ре и свяще́ннии чи́нове и мно́жество наро́да, и проводи́ша те́ло его́ че́стно в приснослову́щем гра́де Москве́, и положи́ша е́ в монастыре́ свята́го Спа́са, иде́же ны́не двор царе́в в це́ркви ка́менней, на ле́вой стране́. И мног плачь лю́дем своея́ па́ствы оста́ви. Бо́гу на́шему сла́ва, ны́не и при́сно и во ве́ки веко́в.