Стихи́:

Влачи́ша по земли́ Ма́рка уби́йцы,

К небеси́ того́ отсыла́ющи, неразу́мнии:

В два́десять пя́тый по земли́ несмы́слении Ма́рка влачи́ша.

Всехва́льный Госпо́день апо́стол Ма́рко, всему́ Еги́пту и Ли́вии, и ва́рвастей стране́, и Пентапо́лии Христа́ пропове́да, во времена́ Тиве́рия ке́саря. Списа́ же е́же по себе́ свято́е Ева́нгелие, Петру́ апо́столу сказу́ющу ему́. И в Кирини́и Пентапо́льстей быв, мно́га чудеса́ соде́ла. Посе́м во Еги́петскую Александри́ю прии́де, и отту́ду в Пентапо́ль. Везде́ чудоде́йствуя, и Христо́вы це́ркви украша́я, рукоположе́ньми епи́скоп и про́чих приче́тник. Последи́ же па́ки во Александри́ю прише́д, и не́ких от бра́тий в примо́риих скотопита́тельных обре́т, и пребы́сть с ни́ми сло́во Бо́жие благовеству́я и пропове́дуя. Иде́же наше́дше нань и́дольстии покло́нницы, не терпя́ще зре́ти я́же во Христа́ ве́ру поспешествуе́му, ужми́ того́ связа́вше и влача́ху, сража́ющижеся пло́ти его́ о ка́мения разбива́шеся, и кровь его́ зе́млю обагря́ше: вве́ржену же в темни́цу, яви́ся ему́ Госпо́дь предъизъявля́я хотя́щую ему́ сла́ву прия́ти. По днех же па́ки влачи́мь по сто́гнам: внегда́ сокруша́тися ему́ и разсыпа́тися на ка́мения, Бо́гу дух пре́дал есть. И е́же по прилу́чаю сло́га его́ бя́ше си́це: ниже́ к дебеле́й великотеле́сней те́лом воображе́н бя́ше: ниже́ па́ки вельми́ ни́зок, но в ме́ру подо́бен. Цветы́й седи́нами. Вла́сы гу́сты, но не до́лзи. И не вельми́ окруже́но лице́. Ве́жди помжа́рены, и брада́ черна́ густа́. Главо́ю препро́ст и румя́н. Бя́ше и вельми́ ми́лостив, к нему́ приходя́щим благопотре́бен, я́ко сия́ти ему́ теле́сною благосты́нею, и душе́вною доброде́телию. Соверша́ет же ся собо́р его в пречестне́м его́ апо́стольстве, су́щу близ Та́вра.

Бра́тие, при́сно жада́ет на́шего спасе́ния Госпо́дь Бог наш, и непреста́нно призыва́ет ны святы́м Ева́нгелием в ве́чную жизнь, веля́ нам при́сно вся́ку скве́рну и житие́ нечи́стое отврещи́ от себе́, и чи́стым се́рдцем приступи́ти к Нему́, и прия́ти о́но Ца́рство из Него́же испадо́хом преступи́вше за́поведь, я́же бе пре́жде дана́ Ада́му пра́деду на́шему в раи́ дре́вле, воздержа́ния ра́ди. А́ще бы ю́ сохрани́л, во ве́ки бы жив был без печа́ли и без сме́рти. Егда́ же за́вистию дия́волею сла́вы Бо́жия отлучи́ся невоздержа́ния ра́ди, отто́ле нападо́ша на челове́ческий род печа́ли и стра́сти, и смерть пременя́ющи живо́т челове́чь.

И того́ ме́ста жела́юще святи́и му́ченицы и пра́ведницы, кре́пко препоя́савше чре́сла своя́, и брань прии́мше на проти́внаго, и победи́вше его́, па́ки внидо́ша в пе́рвую поро́ду. И ны́не вхо́дят и́же де́лы до́брыми украси́вшеся, и власть и бога́тство поверго́ша, и́же ско́ро ми́мо хо́дит, изменя́емо времены́ и ле́ты.

Те́мже не льсти́мся бра́тие, ни я́ко безсме́ртни мня́щеся предади́мся похоте́м жития́ се́го. И́же бо житию́ сему́ порабо́тится, то враг Бо́жий быва́ет, и па́губник души́ свое́й. Но воспря́нем отны́не, да не лиши́мся сла́вы Бо́жия и ра́дости ве́чныя. Воздви́гнемся от пре́лести ми́ра сего́, и я́коже обеща́хомся Го́сподеви в порожде́нии свята́го креще́ния, пред мно́гими по́слухи си́це глаго́люще: «Отрица́юся сатаны́ и всех дел его́». Сия́ же суть сатанина́ де́ла: идолослуже́ние, братоненави́дение, клевета́ние, гневодержа́ние, лжа, за́висть, я́рость, не́нависть, разбо́й, татьба́, пия́нство, объяде́ние, оби́да, пе́сни бесо́вския, пляса́ние, хуле́ние, срамосло́вие, волхвова́ние, детопогубле́ние, го́рдость, преступле́ние кля́тве, е́же кля́тися и́менем Бо́жиим. А́ще сих дел оста́немся, то взы́щем вся́кия доброде́тели. Я́коже и пи́шется: «Уклони́ся от зла, и сотвори́ добро́». Да а́ще отсе́ле оста́немся от злых дел, то у́бо па́ки вни́дем в ту же поро́ду. Что же у́бо есть мерзча́е таковы́х злых дел? Тем бо гнев Бо́жий прихо́дит на ны.

Но да соверши́м обетова́ния на́ша я́же ко Го́споду на́шему, возлю́бим Его́ всем се́рдцем, и все́ю мы́слию свое́ю, и бли́жняго своего́ я́ко са́ми себе́. Братолю́бием цвету́ще, да вни́дем ра́дующеся в ве́чную жизнь, и в безсме́ртный жи́вот, и неизрече́нную красоту́. Ея́же жела́я блаже́нный апо́стол Христо́в Ма́рко, подви́гнуся жития́ сего́ сла́дости попра́ти, бога́тство раздая́ ни́щим, и подви́гнуся в ве́чная жили́ща всели́тися. И той Христо́ва гла́са послу́шав, я́коже рече́ взыва́я ны к Себе́: «Не убо́йтеся от убива́ющих те́ло, а души́ не могу́щих погуби́ти. Но па́че убо́йтеся власть иму́щаго по убие́нии воврещи́ в гее́нну о́гненую». Те́мже у́бо бра́тие ка́я по́льза есть, а́ще и весь мир приобря́щем, а ду́шу свою́ погуби́м или́ отщети́м, и чим иску́пим ду́шу свою́ от му́ки ве́чныя? То́чию а́ще оста́немся зла, и пока́емся, и ни́щим дади́м.

Но потщи́мся отсе́ле те́сным путе́м вни́ти в ве́чную жизнь: си́речь воздержа́нием, поще́нием, не то́кмо от бра́шен и от похоте́й воздержа́щися, но от вся́каго зла. Бе́гай греха́ губя́щаго ду́шу и те́ло. Томи́ плоть свою́ Христа́ ра́ди, я́коже пострада́ святы́й Ма́рко апо́стол, вся му́ки и поно́сную смерть Христа́ ра́ди Сы́на Бо́жия прия́т. Те́мже сия́ет ны́не во сла́ве Бо́жией, па́че со́лнечнаго сия́ния. И в па́мять его́ ди́вна чудеса́ и исцеле́ния сотворя́ет Госпо́дь Бог наш. И́же бо ве́рою чтет па́мять свята́го апо́стола, то от всех изба́вится бед и от грех, и вся́кия напа́сти избу́дет. Тому́ бра́тие поревну́ем, и та́ко же до́брая де́ла сотвори́м. И той челове́к же бе я́коже и мы: но вся́ку зло́бу возненави́де, а Бо́жию во́лю сотвори́. Ю́же потщи́мся и мы сотвори́ти, да бу́дем сы́нове Све́та и прича́стницы Ца́рствия Его́. Ему́же сла́ва, ны́не и при́сно и во ве́ки веко́в. Ами́нь.