Егда́ к Себе́ Христо́с и Бог наш прия́ти благоизво́ли Свою́ Ма́терь, тогда́ пре́жде трие́х дней а́нгелом е́же от земли́ преставле́ние возвеща́я Той: «Вре́мя, рече́, Мою́ Ма́терь прия́ти Ми к Себе́. Ничто́же у́бо о сем да смути́шися, но с весе́лием приими́ сло́во, и́бо к безсме́ртней гряде́ши жи́зни». И у́бо жела́нием е́же к Сы́ну преставле́ния, на го́ру Елео́нскую восхо́дит моля́щися со тща́нием, обы́чай бо име́яше нача́сте на ню восходя́щи моли́тися, на не́йже и не́что пресла́вно тогда́ случи́ся бы́ти. Прекланя́ют бо ся от себе́ я́же на горе́ садо́вия, и я́коже одушевле́нная рабо́тна, подоба́ющую честь Влады́чице исполня́ют.

По моли́тве же возвраща́ется в дом, и а́бие потрясо́шася вся. Она́ же мно́ги свещи́ сотво́рши и благодари́вши Бо́га, созыва́ет своя́ сро́дники и сосе́ды, украша́ет всю хра́мину, уготовля́ет одр, и вся я́же к погребе́нию прили́чна явле́нна твори́т, я́же от а́нгела к Ней глаго́ланная о е́же на небеса́ Свое́м преставле́нии. И во увере́ние глаго́лемых, да́ное Себе́ вра́вие показу́ет е́же бе фи́никовы ве́тви. Созва́нныя же жены́ сия́ слы́шавше, рыда́ньми себе́ со слеза́ми измыва́ху и с во́плем восклица́ху, ку́пно е́же би́тися о Оста́вльшей, е́же си́рым не оста́тися Сея́ моля́хуся. Она́ же не то́кмо тех, но и весь мир преста́вльшися, посеща́ти и назира́ти изве́ствоваше. И мно́гое печа́ли отъе́мляше утеши́тельными глаго́лы, и́миже ко о́крест стоя́щым глаго́лаше. Посе́м о Своею́ двою́ ри́зу завещава́ет, я́коже те двема́ ни́щетныма вдови́цама по еди́ной ри́зе взя́ти и́ма, я́же обы́чна ей бе́сте и зна́еме, и я́же к препита́нию от Тоя́ взима́сте.

Сия́ та́ко запове́дающи Ей и завещава́ющи, бысть внеза́пу гро́ма зе́льна шум, и мно́жайших представле́ние о́блак, от и́же по ми́ру Христо́вым ученико́м напра́сно в хра́мину Богома́тере нося́щим. В ни́хже бы́ша богому́дрии священнонача́льницы: Диони́сий Ареопаги́т, Иерофе́й же вку́пе и Тимофе́й, и́же поне́же навыко́ша вину́ своего́ напра́снаго прише́ствия, такова́я к Ней веща́ют глаго́люще: «Тебе́ Влады́чице пребыва́ющу в ми́ре, я́коже Самого́ Влады́ку на́шего и Учи́теля зря́ще, утеша́хомся. Ны́не же ка́ко стерпи́м страсть? Но поне́же Сы́на и Бо́га Твоего́ сове́том преставля́ешися к преми́рным, ра́дуемся и́же о Тебе́ устроя́емым». Сия́ глаго́люще, слеза́ми себе́ облива́ху. Она́ же к ним: «Ни, дру́зи и ученицы́ Моего́ Сы́на и Бо́га, не се́тование соде́ловайте Моея́ ра́дости. Но Мое́ те́ло я́коже Аз украшу́ на одре́, погреби́те».

Сим та́ко испо́лненом, приспе́ и Па́вел боже́ственый, сосу́д избра́нный, и́же и пад к нога́ма Богома́тере, поклони́ся, отве́рз же уста́ своя́ и мно́гими похваля́ет Ю́: «Ра́дуйся, - глаго́ля,- Ма́ти Жи́зни, и моея́ про́поведи Изложе́ние. А́ще бо Христа́ не ви́дех, Тебе́ зря, О́наго мнех ви́дети». Та́же завещава́ет всем Деви́ца, воскланя́ется на одре́, украша́ет Пречи́стое Свое́ я́коже хотя́ше те́ло. О состоя́нии ми́ра и ми́рнем житии́ моли́твы твори́т, благослове́ния Ея́ ра́ди да испо́лнит и тех. И та́ко в ру́це Своего́ Сы́на и Бо́га дух испусти́.

И а́бие слепы́м очеса́ просвеща́хуся, глухи́м слу́ха отверза́хуся, хромы́м стопы́ ног утвержда́хуся, и вся́ческая какова́ лю́бо страсть и боле́зней род, удо́бь разреша́шеся. По сих начина́ет исхо́дная пе́ния Петр. И восприе́млют про́чии от апо́стол, о́ви у́бо одр, о́виже пред иду́ще со свеща́ми и пе́сньми, богоприя́тное те́ло ко гро́бу предсыла́юще. Тогда́ у́бо и а́нгели пою́ще слы́шахуся, и гла́сы преми́рных чино́в возду́ха исполня́ху.

Тогда́ же иуде́йстии нача́льницы не́киих от наро́да поощри́вше, и возъяри́вше, увещева́ют окуси́тися, одр опроврещи́ на зе́млю, на не́мже живонача́льное лежа́ше те́ло, и то низри́нути. Но у́бо дерза́теля суд пости́г, оче́с слепото́ю всех молча́ше. Еди́наго же сих и руку́ лиша́ет обою́, неи́стовейше устреми́вшася и свяще́ннаго о́наго одра́ прикосну́вшася. И́же и при одре́ де́рзыя ру́це отъя́те мече́м отмще́ния и ви́сяща оста́вль пребы́ваше бе́дно виде́ние, до́ндеже ве́ровав от всея́ души́ и исцеле́ния получи́в, устраби́ся я́коже пре́жде здрав. Та́коже осле́пльшим ве́ровавшим, часть не́кая покро́ва одру́ возложе́на, исцеле́ние дарова́.

Апо́столи же доше́дше ве́си Гефсима́нии, положи́ша во гро́бе живонача́льное те́ло. И три дни пробыва́ху та́мо быва́емии, непреста́нно а́нгельския гла́сы слы́шаще. Внегда́ же по боже́ственному смотре́нию еди́н от апо́стол [и́же глаго́лется бы́ти Фома́] лише́н погребе́ния живонача́льнаго те́ла, в тре́тий приспе́ день, малоду́шествоваше зело́ и тужа́ше, за е́же и тому́ не сподо́битися тех же, и́хже сподо́бишася вси со апо́столы. Я́коже у́бо о́бщим сове́том оста́вльшагося ра́ди апо́стола, гроб отверзо́ша, та́ко я́вльшуся им всем во е́же поклони́тися ему́ пресвято́му и пренепоро́чному о́ному селе́нию, и ви́девше ужасо́шася, обрето́ша бо и́ тощь свята́го телесе́, еди́ну бо плащани́цу оста́вльшу взе́млют на утеше́ние скорбе́ти хотя́щим и всем ве́рным, и преложе́ния нело́жно свиде́тельство. Ниже́ бо досто́яше Ски́нии Живота́ сме́ртию держи́мей бы́ти, и Ро́ждьшей Зижди́теля тва́ри в неистле́ннем телеси́ оста́вленне бы́ти с тва́рию в земли́ истле́ти. Весть бо весть, И́же зако́н по́чести роди́телем проуста́вив от сыно́в, Ма́терь Свою́ я́коже воля́ше поче́ствовати. И Его́же Самого́ Те́ло во гро́бе истле́ния не уви́де, то́жде и Роди́тельнице Свое́й дарова́ти. О сем бо увещава́ет и боже́ственный Дави́д велегла́сно Ма́терь с Сы́ном взыва́я от уме́рших глаго́ля: «Воскресни́ Го́споди в поко́й Твой, Ты и Киво́т святы́ни Твоея́».

И я́коже у́бо Сыно́вень, та́ко и Богома́тере да́же доны́не в ка́мени изсе́чен гроб зри́тся и покланя́ется, пребыва́я телесе́ тощь, во сла́ву и честь Христу́ Бо́гу на́шему, и Преблагослове́ней Влады́чице на́шей Богоро́дице и при́сно Де́ве Мари́и.

Ея́же моли́твами и предста́тельством и неусы́пным хода́тайством, Бо́же поми́луй и спаси́ нас, я́ко Благ и Человеколю́бец. Ами́нь.

Карп епи́скоп бе от Европи́йска гра́да, мужь вельми́ блаже́н житие́м. По вся дни служа́ше Бо́гу творя́ше Литурги́ю святу́ю, и свою́ возноша́ше же́ртву со мно́гими слеза́ми. Еди́ною же святы́я приима́я та́йны внутрь сый во святе́м олтаре́, отве́т от Бо́га прия́ явле́нием не́коего ему́ попа́ своего́ глаго́люща: Твори́ у́бо епи́скопе е́же твори́ши служа́ ми, не уста́нет ти нога́, и не ослабе́ет ти рука́. Но в Богоро́дицын бо день Успе́ния прии́деши ко мне, и отда́м ти мзду в Ца́рствии небе́снем, со все́ми о ни́хже ми моли́тву приноси́л еси́. По еди́ном же ле́те в день преставления Пресвяты́я Богоро́дицы сконча́вшу ему та́йны святы́я Литурги́и, и прии́м их, и облобыза́ кли́рики своя́ вся, и от теле́сных разреши́ся соу́з, в ру́це Бо́жии предаде́ ду́шу свою́. И тогда́ просвети́ся лице́ его́ я́ко со́лнце.

Днесь бра́тие Ма́ти Го́спода на́шего преста́вльшися от жития́ сего́ в вы́шнее Ца́рство и во оби́тель ве́чную вселя́ется. В ра́дость ве́чную и весе́лие неизглаго́ланное, а́може жела́ют а́нгели прини́кнути. Днесь пра́деду Ада́му Вну́ка и Госпожа́ в ве́чная жили́ща прихо́дит. Днесь свобожда́ется пра́бабняя кля́тва су́щая на естестве́ челове́честем. Днесь богоху́льнии жи́дове посрами́шася. Влады́чицы Богоро́дицы на не́бо вше́дши. Ми́лостивною моли́твою я́ко со́лнце озаря́ет ми́ра. Сла́вою и че́стию правове́рныя венча́ющи. И́же испове́дают Бо́жию Ма́терь Та бо яви́ся оби́димым Помо́щница, печа́льным Засту́пница. И скорбя́щим Утеше́ние. Боля́щим Цели́тельница, правове́рным Утвержде́ние, апо́столом Похвала́, му́чеником Кре́пость. И святи́телем нетле́нный Вене́ц. К Той бра́тие святе́й Госпожи́ Бо́жии Ма́тери всем се́рдцем и все́ю душе́ю да припаде́м в це́ркви Ея́. Че́стен творя́ще пра́здник Ея́ с похвало́ю и ра́достию че́стно творя́ще стра́нныя и ни́щая в до́мы прие́млюще своя́. Мир и любо́вь между́ собо́ю иму́ще. И телеса́ своя́ очи́стяще от греха́. И та́ко приступа́ем к пречи́стому Те́лу Бо́жию. Чи́сти и непоро́чни и сверше́ни де́лы до́брыми. А не я́коже Иу́да зло́бою и несы́тством ослепи́ся. И приступи́ ко святе́й и ко стра́шней Бо́жии трапе́зе, недосто́ин сый зло́бою такоя́ та́йны. И а́бие вмести́ся вонь сатана́. И во благослове́ния ме́сто кля́тву приобре́те си. Но мы бра́тие не мо́зем та́цы бы́ти. Но бу́дем братолю́бцы и боголю́бцы, Бо́жия рабы́ святи́тели в честь име́юще. Тех бо рука́ма Бо́жию благода́ть и креще́ние прие́млюще. И от тех бо свято́е те́ло Христо́во прие́млем. Тех бо мольба́ми грехо́в избавля́емся. Ти бо при́сно мо́лятся за христиа́ны и за всего́ ми́ра. Тех моли́твами схо́дит Дух Святы́й от Бо́га на приноси́мую святу́ю проску́ру. И претворя́ют ю́ Те́лом Бо́жиим и вино́ Кро́вию Христо́вою. И яде́м во оставле́ние грехо́в. Да подо́бно есть таковы́я име́ти в честь. Ти бо в апо́стол ме́сто на земли́ устрое́ни моли́твеницы. Ти бо бдят о душа́х ва́ших, я́ко сло́во хотя́ще отда́ти за душа́ ва́ша пред Иису́сом Христо́м Го́сподом на́шым.

Да с ра́достию се твори́те, а не воздыха́юще. Помо́лим же Пречи́стую Богома́терь, и И́же из Нея́ ро́ждьшагося Го́спода Бо́га и Спа́са на́шего Иису́са Христа́, яќо да моли́твами Ея́ изба́вит нас му́ки ве́чныя, и да́рует нам оставле́ние грехо́в и жизнь ве́чную, соверша́ющым Тоя́ пра́зднество, и па́мять Ея́ че́стне почита́ющым. Я́коже и в моли́тве Свое́й рече́, я́ко призыва́ющих и́мя Мое́, ниже́ из Мене́ рожде́ннаго Сы́на и Бо́га Моего́, святи́ ме́сто то, и вся я́же ко спасе́нию поле́зная проше́ния тех испо́лни. И я́ко да сохрани́т нас от злонача́льнаго врага́, при́сно борю́щаго нас, и того́ се́ти и ко́зни запина́ющаго по Бо́зе стопы́ на́ша. И да сподо́бит нас про́чее вре́мя живота́ на́шего, ми́рно и немяте́жно преити́. И покая́нием и слезами и про́чими благи́ми де́лы угоди́ти Ему́. Я́ко Тоя́ ра́ди от зде су́щих неисцели́мых изме́ньшеся, и та́мо су́щих благ получи́м, благода́тию и человеколю́бием Го́спода на́шего Иису́са Христа́. С Ни́мже Отцу́ ку́пно сла́ва, честь и держа́ва и покланя́ние, и со Святы́м Ду́хом, ны́не и при́сно и в безконе́чныя ве́ки веко́в. Ами́нь.