Подоба́ет нам о том ма́ло побесе́довати о само́й благода́ти Го́спода на́шего Иису́са Христа́, мно́га чудеса́ благоле́пне соде́явшей, и во всех усте́х пове́даемей. А́вгарь Еде́сский князь, и́же от си́ния прока́зы и разслабле́ния томи́мь бе, и жела́ше свои́ми очесы́ таковы́х чуде́с Де́лателя ви́дети. И писа́ к нему́ писа́ние моле́бно Ана́ниею, и́же бе иконопи́сец, посла́ и запове́дав, о́браз лица́ Его́ преписа́в принести́. И доше́д Иерусали́ма Ана́ния, даде́ посла́ние Христо́ви. И окуша́шешася боже́ственый о́браз Его́ ва́пы на хартии написа́ти, и недоумева́ше. Не бо можа́ше Бо́жию Сло́ву пости́гнути о́браз. Та́йным же Разуме́тель, и сокрове́нным Ви́дец, тай быва́ющее яви́, во́ду испроси́в Иису́с, умы́ пречи́стое лице́, и плащани́цею отре́. О чу́до, про́стая вода́, на ва́пное преложи́ся и гбе́жи и соста́вы на плащани́це иму́щи. И вдаде́ ю́ Христо́с Ана́нии, с ни́мже и посла́ние ко А́вгарю рек: «Даждь посла́вшему тя». И сие́ прие́м А́вгарь, и прочет посла́ние. Плащани́цу же ту, на не́йже бе воображе́ние лица́ Христо́ва облобыза́в и любе́зно поклони́вся, неисце́льных о́нех страсте́й свободи́ся.

Фадде́ю же апо́столу, по спасе́ней стра́сти к нему́ прише́дшу, не пожда́ А́вгарь, но со всем до́мом свои́м приступи́ к боже́ственному креще́нию. Отто́ле нача́т А́вгарь чти́ти боже́ственую ико́ну Христову. И пред людски́ми враты́ гра́да е́ллинский куми́р стоя́щь разори́, и нерукотворе́нный о́браз в того́ ме́сто поста́ви. И запове́дав си́це, вся́кому входя́щему и исходя́щему, пе́рвее боже́ственей ико́не покланя́тися, и та́ко входи́ти и исходи́ти. Написа́в си́це: «Христе́ Бо́же наш, всяк наде́яйся на Тя, не постыди́тся».

Вре́мя же преи́де мно́го. И не́кто идолослужи́тель прии́м власть гра́да того́, восхоте́ разори́ти боже́ственую ико́ну Христо́ву, бесо́вское же те́ло в нея́ ме́сто поста́вити на мес́те. Разуме́в же се епи́скоп гра́да ча́емое помышле́ние, сотвори́ свети́льник боже́ственей ико́не вжег, и кереми́дою зало́жь, пли́тами извну́ вхо́ды загради́. И на ра́вное обавле́ние сте́ну упра́ви. И егда́ неви́дима бысть, оста́ся нечести́вый начина́ния, и рече́ что се неви́димо бысть вре́менно сокро́вище. Посе́м приидо́ша пе́рси, хотя́ще взя́ти град Еде́с, и на недомы́слие воста́ша гра́ждане о ве́щи, и Бо́гу моля́щеся, разреше́ние ско́рбем обрето́ша. Во еди́ну у́бо нощь Ула́лию епи́скопу, того́же гра́да жена́ сла́вна я́вльшися рече́: «Верху́ сих врат гра́да сокрове́н боже́ственый о́браз нерукотворе́ный Спа́са Христа́ – возми́ сего́ и до́бре соде́еши». Он же показа́наго ме́ста доше́д, и окопа́в обре́те боже́ственую ико́ну неврежде́ну, и свети́льник за толи́ко вре́мя не уга́сшь, и положи́ на сохране́ние кереми́ду. Друго́е бо подо́бие неизме́нно пе́рвому, вообрази́лся бе на ней и виде́нию после́дуя епи́скоп на разли́чных ме́стех явля́я боже́ственую ико́ну, и я́ко огне́м прогони́ми бя́ху. И́же бо наде́яхуся град прия́ти пе́рси, пострада́вше без успе́ха отступи́ша. И по не́мже от всю́ду це́ркви до́брая прихожда́ху. Бе же у́бо Бо́жие хоте́ние, и боже́ственому о́бразу, со инеми до́брыми сокрове́ну бы́вшу в Ца́рстем гра́де, гре́ческую власть держа́щу Рома́ну, и́де со тмо́ю наро́читых вой, и дав, две ты́сящи сре́бреник, и у держа́щаго тогда́ Еде́сский град Ами́ра, взят нерукотворе́нный о́браз Христо́в, и тем обогати́ся. И изше́дше епи́скопи восприя́ша и́, и к Царю́ гра́ду несу́ще вся неду́ги отгоня́ху. Бе́си устраша́ющеся от челове́к отбега́ху глаго́люще: «Константи́нь град сла́ву и ра́дость обре́те». Сего́же принесе́ Рома́н в ца́рство свое́, в шесты́й на́десять день а́вгуста. Его́же царь и святи́тель со мно́жеством наро́да ра́достию прии́мше, и ве́рою покло́ньшеся целова́ша и́. И отто́ле пра́зднует све́тло це́ркви боже́ственому о́бразу, богому́жнаго зра́ка Христо́ва, и́стиннаго Бо́га на́шего.

В безбо́жных у́бо ага́рянех си́це есть: Разсильне́в срацы́нский язы́к, и мно́га у́бо ме́ста отъи́мши и страны́ при царе́ Льве нарица́емем Ко́ноне, по земли́ же и по мо́рю обступи́ша Константи́нь град, и взя́ти хотя́щим, и христиа́нскую ве́ру преврати́ти на свою́ лесть мы́сляще, е́йже научи́шася от не́коего лжеучи́теля ариа́нина, ю́же прии́м Моаме́д во еди́но нача́ло соста́ви. Царе́ви же Льву обеща́вшуся дань дая́ти им. Они́же восхоте́ша стра́жей поста́вити у врат гра́да. Но оба́че христиа́нских ра́ди моли́тв, всу́е труди́шася. Госпо́дь бо бе сохраня́я их град: ви́дя же сие́ Солии́ма старе́йшина их, я́ко ничто́же успе́ша, и помоли́ся поне́ вни́ти во град и ви́дети, и получи́в проше́ние. И вни́де во врата́ к Волу́ю торгу́ на коне́. И пре́жде его́ вше́дшим ины́м без вре́да, того ́же конь не вхожда́ше. И возре́в Солии́ма, и ви́дев ико́ну Богоро́дицы верху́ врат, и разуме́ я́ко Тоя́ ра́ди вни́ти не да́стся ему́, я́ко злу речь глаго́ла на Ню. И вни́де пешь, зазира́я мно́гому злоче́стию своему́. Посе́м возврати́шася без успе́ха, воева́ни бы́вше от Бо́га мо́ром и гла́дом погуби́вше во́и мно́гия. На морсте́й же пучи́не бы́вше су́щии в корабли́, от гра́да о́гненаго погибо́ша. На Успе́ние у́бо Святы́я Богоро́дицы обступи́ша град, и па́ки в то же Успе́ние отступи́ша посра́млени на друго́е ме́сто.

Си́це глаго́лет Госпо́дь: «Сы́не челове́чь, иди́ и рцы сыново́м Изра́илевым, и глаго́ли словеса́ Моя́ к ним: Не убо́йся их, ни ужаса́йся лица́ их, зане́же дом разгне́ваяй есть: Зане́ стра́жа дах тя до́му Изра́илеву, да слышиши сло́во от усте́н Мои́х, и возпрети́ши им от Мене́: Внегда глаго́лю беззако́ннику: Сме́ртию у́мреши, и не возвести́ши ему́, ни соглаго́леши, я́ко оста́ти беззако́ннику, и обрати́тися от пути́ его́, я́коже жи́ву бы́ти ему́: Беззако́нник же той в беззако́нии своем у́мрет, кро́ви же его́ от руки́ твоея́ взыщу́: И ты же а́ще возвести́ши беззако́ннику, и не обрати́тся от беззако́ния своего́, и от пути́ своего́ беззако́ннаго, той беззако́нник в беззако́нии свое́м у́мрет, а ты ду́шу твою́ изба́виши: И егда́ соврати́тся правди́вый от правд свои́х, и сотвори́т согреше́ние, и дам му́ку пред ним, той у́мрет, я́ко ты оста́ви его́ во гресе́х свои́х умре́ти, зане́ не помяну́тся пра́вды его́ я́же сотвори́, кро́ви же его́ от руки́ твоея́ взыщу́: Ты же а́ще возвести́ши правди́вому, я́коже не согреши́ти, и той не согреши́т, правди́вый же жи́знию оживе́т, и ты твою́ ду́шу изба́виши». Па́ки же рече́м и от дея́ний святы́х апо́стол, я́коже рече́ Па́вел: «Вы весте, я́ко от пе́рваго дне отне́лиже приидо́х во Аси́ю, ка́ко с ва́ми все вре́мя бых, рабо́тая Го́сподеви со всем смиреному́дрием: и мно́гими слеза́ми, и напа́стьми прилучи́вшихся ми от иуде́йских наве́т. Я́ко ничто́же обину́хся от поле́зных, еже не сказа́ти вам, и научи́ти вас пред людми́ и по до́мом, засвиде́тельствуя иуде́ом же и е́ллином, е́же к Бо́гу покая́ние, и ве́ру я́же ко Го́споду на́шему Иису́су Христу́: Те́мже свиде́тельствую вам во дне́шний день, я́ко чист аз от кро́ве всех: Не обину́хся бо е́же не сказа́ти вам всю во́лю Божию. Внима́йте у́бо себе́, и всему́ ста́ду: аз бо вем сие́ я́ко по отшествии мое́м вни́дут во́лцы тя́жцы в вас, не щадяще стада». Той же Па́вел рече́ в посла́нии к Тимофе́ю: «Аще кто епи́скопству хо́щет, добру́ де́лу жела́ет: Подоба́ет бо епи́скопу не зазо́рну бы́ти, еди́ныя жены́ му́жу: тре́зву, страннолюби́ву, наказа́тельну, не пия́ницы, не сребролюби́ву, свой дом до́бре стро́ящу. А́ще же кто своего́ до́му стро́ити не мо́жет, то ка́ко це́рковию Бо́жию попече́тся». И п́аки то́йже рече́ апо́стол: «Пропове́дуй сло́во, насто́й, пону́ди благовре́менне и безвре́менне: обличи́, запрети́, умоли́, со вся́ким долготерпе́нием и уче́нием: Будет бо вре́мя, егда́ здра́ваго уче́ния не послу́шают, но по свои́х похоте́х изберу́т себе́ учи́телей, че́шеми слу́хом, и от и́стины слух отвратя́т, и к ба́снем укло́нятся. Те́мже бра́тие сие́ слы́шавше, попече́мся о свое́м и о людско́м спасе́нии, о́во моле́нием, о́во преще́нием наказу́ем лю́ди Бо́жия, чи́сто житие́ снабде́ти, и Бо́га Ми́лостива себе́ сотвори́ти. И та́ко спасе́м себе́ и о́нех. Ему́же сла́ва, ны́не и при́сно, и во ве́ки веко́в. Ами́нь.