Стихи́:

Прилучи́ся Лу́ппе, и́же везде́ раб, мечу́:

Свобо́дь приступи́ Бо́гу я́ко любо́вен

Стихи́:

Посе́чен приобщи́вся мертвеце́м:

О Сирми́йскый Илию́, изнесе́ сокро́вище исто́чник.

Сей бя́ше в ца́рство Диоклитиа́ново, епи́скоп Лугду́нский. Ят же быв Сими́ем и приведе́н в Пано́нию. И предста́ Про́ву иге́мону, и испове́дав ве́ру и́стинную Христа́ Бо́га на́шего. Того́ ра́ди всажде́н быв в темни́цу, и изведе́н и бие́н. И по сих прия́т осужде́ние, мече́м главу́ ему́ отсеко́ша, и вве́ржен в ре́ку Сарми́йскую. И та́ко сконча́ся муче́ние его́ во сла́ву Бо́га на́шего.

Стихи́:

Калинни́к пребы́сть от сласте́й кроме́,

Кончи́не бестра́шие име́я.

Сей бя́ше пе́рвее свяще́нник, и сосудохрани́тель, це́ркве Пресвяты́я Богоро́дицы Влахе́рнския. За премно́гую же его́ доброде́тель, поста́влен бысть архиепи́скоп Константи́ня гра́да, во времена́ Иустиа́на Но́ваго, вну́ка Иракли́ева. Той мно́гия подъе́м ско́рби, е́же сотвори́ти моли́тву на разоре́ние це́ркве, Пресвяты́я Богородицы Митрополи́тския. Святы́й же отвеща́: «Не обрето́х ника́ко моли́тву на разоре́ние хра́ма, но па́че на основа́ние: На стоя́ния и соста́в мир соста́влен бысть, а не на разоре́ние». По́сланным же ну́дящым его́, и крамоля́щым сотвори́ти царе́во повеле́ние. Возгласи́ блаже́нный: «Слава Христу́ Бо́гу Терпя́щему». И а́бие це́рковь паде́ся. Царю́ же нос отре́завше, и в Корсу́нь заточе́н: Отту́ду же бежа́вшу ему́, и от болга́р кре́пость взе́мшу, и к стена́м Константи́ня гра́да прирази́вшеся. И ле́стию пусти́в к патриа́рху и к сигкли́ту, е́же изы́ти и того́ прия́ти. Та́же преступи́л кля́твы, еже обеща́лся бя́ше: Предложе́ну су́щу честно́му Кресту́, и всечестно́му Ева́нгелию, и Влады́чнему Те́лу и Кро́ви. И а́бие по вхожде́нии свое́м, весь ца́рствующий град уби́йства напо́лни, и восхище́н быв от него́ оружено́сник. Блаже́нный Каллини́к заточе́н бысть в Рим, показа́вшу ему́ Иустиниа́ну, но́са обре́зания и язы́ка. Веде́н же в Рим вели́кий Бо́жий архиере́й, и в не́коем сте́ны основа́нии всажде́н быв, и извну́ зама́зан: та́ко мучи́телю повеле́вшу. По четы́редесяти у́бо днех спа́дшу зама́занию, и жив сый обре́теся еще́ дыша́. И по четы́рех днех ко Го́споду отъи́де. И положе́н бысть в це́ркви святы́х апо́стол Петра́ и Па́вла, я́коже тогда́ па́пе Ри́мскому во сне святи́и апо́столи яви́шася. Собира́ется же собо́р его́ во святе́й Вели́цей це́ркви.

Пове́да нам оте́ц не́кий, я́ко бысть рече́ в ле́та на́ша 6880 брат не́кий и́менем Иоа́нн, его́же зовя́хом ки́прянин, не вем а́ще заста́л еси́ того́. Книже́вен же бя́ше, име́яй четца́ поставле́ние. Сей брат у́мре, и́же по не́коем вре́мени явля́шеся не в виде́нии, но я́ве духо́вному бра́ту Кирса́ве, его́же и ты ве́си. Ви́димь же бя́ше во две́рех ке́лии его́ наг стоя́ весь, огоре́л я́коже главня́ от огня́, го́рько вопия́ и прося́ ми́лостыни и проще́ния. И вину́ муче́ний испове́дуя и глаго́ля, я́ко сопротивля́хся и пререкова́х зако́ну и писа́нием. Таково́е у́бо стра́шное виде́ние зря духо́вный наш оте́ц, да́же не до ма́ла вре́мене, не я́ве сотвори́в отню́д о сем кому́, или́ мне су́щему с ним. Боя́ся я́коже глаго́лаше по́слежде, да не ка́ко пре́лесть бесо́вская есть. По не́коем же вре́мени мно́зе, я́ве глаго́ла ему́, я́ко а́ще не возглаго́леши о гресе́ мое́м, истя́зан бу́деши. Тогда́ изрече́ ми вся. И разсмотри́вше обрето́хом вину́, я́коже и сам испове́даше. И во и́стинну никто́же ин я́коже он, сопротивля́шеся глаго́лемым же и пи́шемым, от зако́н Бо́жиих и боже́ственых писа́ний. А́ще и от нас недосто́йных, глаго́лема же и пи́шема бя́ху, ни бо мо́щно отня́ти или́ приложи́ти, от и́хже Святы́м Ду́хом положеных же и уста́вленых. Про́клят бо рече́ да бу́дет, а́ще кто к сим приложи́т что, или́ отъи́мет, да не ка́ко подо́бно что таково́ постра́ждет. Мы же сия́ слы́шавше, ели́ко по с́иле на́шей сотвори́хом о нем. Бо́гу на́шему сла́ва, ны́не и при́сно и во ве́ки веко́в. Аминь.