Стихи́:

Агафо́никово зва́ние нело́жно:

Христо́ви воспи́вшу, Ему́же соодоле́ние мече́м:

Посече́ Агафо́ника в два́десять вторы́й:

Трие́ сотерпе́ша шата́ния ну́жду:

Шата́ния разруши́ша вся мече́тная,

И в му́ченицех отсе́чену ты́лу мече́м:

И Севириа́н учини́ся посе́чен мече́м:

Се с ва́ми сый и Кирине́й вели́кый,

Не ну́ждею, но во́лею Крест несы́й.

Му́ченик Христо́в Агафо́ник, бя́ше во времена́ Максимиа́на царя́. Ят же быв коми́том Евто́лмием, и́же от Никомиди́и, в Пони́тскую страну́ по́слан бы́ти от царя́ на убие́ние христиа́ном. И внегда́ ми́мо ходи́ти ему́ с корабле́м, дости́же ме́сто нарица́емое Ка́лпи, и та́мо свята́го Зо́тика со ученики́ его́ обре́т Христа́ испове́дающи, сме́рти распя́тию осуди́ их. Та́же возврати́ся в Никомиди́ю, и уве́дев я́ко Принги́пс не́которым Агафо́ником, отвраща́ющему е́ллины от и́дол и приводя́ ко Христу́, ве́рова и той. А́бие посла́в приведе́ и обои́х, и свята́го Агафо́ника бив вельми́. Принги́пса же с про́чими свя́заными христиа́ны, ку́пно со Агафо́ником во Фраки́ю приведе́, иде́же и царю́ прише́дшу, и та́мо истяза́нию бы́вшу. Прише́д же во страну́ глаго́лемую Пота́ма, уби́ свята́го Зино́на и Феопре́пия и Акинди́на. Та́же быв близ Халкидо́на, уби́ свята́го Севериа́на (ист.: Севастиа́на), дерзнове́нно Христа́ испове́дающа. В Византи́и же предста́вив свята́го Агафо́ника с про́чими свя́заными и с Принги́псом, и изведе́н бысть из гр́ада бие́н вельми́. И доше́дше до Селиври́я, иде́же бя́ше Максимиа́н, отсеко́ша главу́ ему́, та́ко и с Принги́псом и с про́чими христиа́ны, ели́ко их коми́т от Никомиди́и приве́д. И́же и с ни́ми муче́ния венце́м украси́вся. Соверша́ет же сея собо́р их во святе́м их муче́нии, су́щем в Новогра́дии, и в муче́нии святы́я Феодо́ры, и в Сероке́рцех.

Стихи́:

От земли́ Селевки́йския ши́пок,

Анфи́су прия́ша чи́нове а́нгельстии:

Афана́сия поне́ а́ще умру́ мече́м,

К живы́м жив Христо́ви учиню́ся друг:

Два раба́ посе́ченая обрето́ста и о́ба,

Благоро́дие е́же погуби́ша дре́вле.

Сия́ бя́ше при Уалериа́не царе́, от гра́да Селевки́йскаго, дщи Антони́нова и Марти́рии, вельми́ бога́тыма: и́же и́дольскому прилежа́ще служе́нию. Жела́ющи же креще́ния Христо́ва, и хотя́щи епи́скопа Афана́сия ви́дети, в Та́рсе Килики́йстем Бо́жие сло́во уча́ща, умоли́ ма́терь свою́ пода́ти ей две мске, на них же вше́дши к пита́тельнице ити́. Хариси́ма же и Неофи́та пое́мши идя́ше путе́м. И а́бие епи́скоп Афанасий ангелом восхи́щен предста́ ей. Его́же ви́девши я́ко той есть, умоли его припа́дши к нога́ма его́, е́же зна́менати ю́ святы́м креще́нием. И не б́ы́вши воде́, помоли́ся епи́скоп, и абие искипе́ исто́чник водны́й: И два та́мо яви́стася а́нгела, о́бразом во́инческим, бе́лы оде́жды святе́й простира́юща. Крести́ся же у́бо сама́, и и́же с не́ю о́ба раба́. И пода́вши многоце́нную и златоплете́нную свою́ оде́жду епи́скопу, и повеле́вши ему́ пода́ти ю́ ни́щым. Она́ же обле́кшися в смире́нную и худу́ю оде́жду, к пита́тельнице по́йде. Она же ви́девши на ней худу́ю оде́жду, отри́ну ю́. И уже́ к ма́тери возврати́вшися, и зло́бну обре́тши ю́. Изше́дши тече́ к епи́скопу Афана́сию, и и́ноческое житие́ восприе́мши: и в оде́жду власяну́ю обле́кшися, и крест взе́мши в пусты́ню изы́де. За два́десять три ле́та со зверьми́ водвори́вшися, и с ни́ми претерпе́вши, с ми́ром Бо́гу дух предаде́. Вообрази́вши себе́ на камени, иде́же ей обы́чай бя́ше седе́ти. Епи́скоп же Афана́сий ят бысть, и приведе́н к царю́ Уалериа́ну, и мно́гими ра́нами и же́злием истя́жимь, отсеко́ша главу́ его́ мече́м. Та́коже и святы́й Хариси́м и Неофи́т скопцы́ су́ще, и пе́рвии челове́цы блаженныя Анфу́сы, и́же и с не́ю крести́вшеся от Афана́сия епи́скопа. И госпожи́ их отше́дши, епи́скопу же муче́нием сконча́вшуся, приидо́ша ко Уалериа́ну, и христиа́ны себе́ именова́вше, и и́долы и тем поклоня́ющихся проклина́юще. Он же посла́ их свя́заны Апелиа́ну ду́ксу, и пред ним Христа́ испове́давше, пове́шени бы́ше и стро́гани по всему́ телу. Та́же па́лицами бие́ни вельми́. Пото́м же Христа́ ра́ди, главы́ им отсеко́ша.

Бе не́кто в горе́ Елео́нстей затво́рник ста́рец подви́жен зело́, боря́жеся с ним бес блу́дный. Во еди́н же от дний належа́щу на него́ бе́су зело́, нача́ ста́рец рыда́ти, и глаго́лати к бе́су: «Доко́ле не оста́нешися мене́, состаре́лся еси́ со мно́ю». И яви́ся ему́ бес ви́дящима очи́ма его́, и глаго́ла ста́рцу: «Клени́мися ста́рче, я́ко не пове́дати ти никому́же е́же хощу́ глаго́лати, и посе́м не борю́ся с тобо́ю». И кля́тся ста́рец ему́ глаго́ля: «Я́ко никому́же не возвещу́ та́ко ми живу́щаго в вы́шних, и не реку́ никому́же е́же пове́си ми». И глаго́ла ему́ бес: «Не кла́няйся сему́ о́бразу, и посе́м не борю́ся с тобо́ю». Бя́ше бо ико́на Пресвяты́я Влады́чицы на́шея Богоро́дицы и при́сно Де́вы Мари́и, Роди́тельницы Го́спода на́шего Иису́са Христа́. И рече́ затво́рник бе́су: «Оста́нися мене́, да тя не ви́жу». И а́бие бес исчезе́. На у́трие же прии́де затво́рник в Фео́дору Сикео́ту, испове́да ему́ вся бы́вшая. Ста́рец же глаго́ла к затво́рнику: «Вся́чески пору́ган еси́, поне́же кля́лся еси́ к бе́су, то́кмо добро́ я́ко испове́дал еси́. Но лу́чше бы ти не оста́вити ни еди́ныя блудни́цы во гра́де том, иде́же в дом вни́деши, не́жели отврещи́ся поклоне́ния ико́не Го́спода на́шего Иисус́а Христа́ и Пречи́стыя Его́ Ма́тере». Утверди́в же его́ и укрепи́в бо́льшими словесы́, и отъиде в свое место. Яви́жеся бес па́ки затво́рнику, и глаго́ла ему́: «Ка́ко еси́ калуге́ре, не́си ли ми ся клял, я́ко никому́же не пове́дати, то ка́ко изре́кл еси́ о́ному калуге́ру. И се ны́не глаго́лю ти калуге́ре, я́ко кля́твеник и́маши осужде́н бы́ти в день Су́дный». И отвеща́в затво́рник глаго́ла ему́: «Вем я́ко роти́х ти ся и кля́хся, но Мои́м Влады́кою и Творце́м, тебе́ же не слу́шаю окая́нне», - и отбежа́ от него́ бес посра́млен. И ктому́ облегча́ от бра́ни ста́рец. И про́чее ле́то богоуго́дно пожи́в сконча́ся. Бо́гу на́шему сла́ва, ны́не и при́сно и во ве́ки веко́в. Ами́нь.

Страна́ не́кая вели́кия Росси́и, Двинска́я нари́чема, прилежа́щи кра́ем вели́каго мо́ря окия́на полу́нощнаго, по нему́же и корабли́ прихо́дят от за́падных стран в Росси́ю, в не́йже есть и вели́кая река́ Двина́, я́же тече́т в той великий окия́н. Есть же в преде́лех тоя́ дви́нския о́бласти река́, нарица́емая Пене́га, яже тече́т во о́ну вели́кую реку́ Двину́, иму́щи по себе́ мно́гия вес́и: Прилежи́т же реце́ той гора́ вели́кая и превысо́ка зело́, Че́рная зово́ма, продолжа́ющися до того́же вели́кого мо́ря окия́на, на се́верную страну́, иму́щи вели́чество я́ко пятьсо́т по́прищ: Я́же пре́жде пу́ста и не живо́ма челове́ки бя́ше. В ле́то же от сотворе́ния ми́ра седмь ты́сящь сто единона́десять, по не́коему открове́нию Бо́жию, со́здан бысть монасты́рь в горе́ той, во и́мя Пресвяты́я Богоро́дицы от не́коего иере́я тоя́же страны́, и́менем Ми́рона, и́же последи́ бысть игу́мен монастыря́ того́. В ца́рство же царя́ и вели́каго кня́зя Михаи́ла Фео́доровича всея́ Росси́и, егда́ пе́рсский царь шах Абба́с поплени́ И́верскую зе́млю, и многоцеле́бную ри́зу, вели́каго Го́спода Бо́га и Спа́са на́шего Иису́са Христа́ обре́те та́мо. Та́кожде и многия святы́ни, и честны́я ико́ны пе́рсяне взя́ша отту́ду, и принесоша в Перси́ду не почита́ния ра́ди, и́бо злочести́ви суть, но яко да препродаду́т их росси́йским купце́м: понеже тогда́ росси́йстии купцы́ мно́зи бя́ху в Перси́де, ве́дяху бо их пе́рсяне, яќо че́стне держа́т поклоне́ние святым ико́нам. Бе же не́кто от приключи́вшихся тогда́ та́мо купцев гра́да Яросла́вля, и́менем Стефа́н, приста́вник име́ния не́коего го́стя, и́менем Гео́ргия, прозва́нием же Лы́ткина. К нему́ же пе́рсин не́кий принесе́ ико́ну Пресвяты́я Богоро́дицы, укра́шену сребро́м и зла́том, я́ко да ку́пит ю́ у него́. Благочести́вый же той муж, с вели́кою ра́достию купи́ у него́ честну́ю ико́ну ту. В то же вре́мя егда́ купи́ он святу́ю ико́ну ту в Перси́де, бысть не́кое явле́ние Бо́жие во сне во гра́де Яросла́вле, преждепомяну́тому господи́ну его́ Гео́ргию глаго́ля: я́ко приста́вник име́ния твоего́ сый в Перси́де, купи́ тебе́ безце́нный бисер. И егда́ принесе́т ти, ты же посли́ сию́ в преде́лы двински́я о́бласти, в Че́рную го́ру. Он же возбну́в от сна, и мно́го размышля́ше о виде́нии, не ве́дый что есть би́сер он, ни ме́ста Ч́е́рныя горы́. По не́коем же вре́мени прии́де от Перси́ды преждепомяну́тый приста́вник име́ния его́ Стефа́н, и принесе́ ему́ честну́ю ико́ну Пресвяты́я Богоро́дицы, ю́же бе куп́ил в Перси́де. Он же с ра́достию сию́ прия́т, и воспомяну́в виде́ние глаго́ла: «Я́ко сей есть вои́стинну безце́нный он би́сер». И вско́ре по повеле́нному ему́ прихо́дит в преде́лы двински́я о́бласти, и ме́ста монастыря́ Че́рныя горы́ достиза́ет, с честно́ю ико́ною тою Пресвяты́я Богоро́дицы, я́же от зва́ния страны́ тоя́, Грузи́нская нарече́ся. И мно́го от име́ния своего зла́та и сребра́, и ины́х веще́й церко́вных, и книг мно́жество монастырю́ тому́ дает. Во вре́мя же принесе́ния тоя́ святы́я ико́ны, [еще́ су́щу ту и благочести́вому му́жу тому́ Гео́ргию,] всено́щное бде́ние игу́мену монастыря́ того́, и братии соверша́ющым в це́ркви: и́нок не́кий оби́тели тоя́ и́менем Питири́м слеп очи́ма, и глух уши́ма от мног лет, и́же бя́ше в больни́це монасты́рьстей, и во вре́мя пе́ния того изы́де в се́ни пред ке́ллию свою ́помоли́тися. Егда́ же моля́щуся ему́, внеза́пу свет вели́к осия́ его́. Он же вельми́ ужасе́ся о сем, бе бо от мног лет не ви́дя света, и мня́ше мечта́ние бесо́вское бы́ти. И сотвори́ на себе зна́мение честн́аго Креста́, и возведе́ о́чи свои́ на вели́кую го́ру ту, и ви́де на ней я́ко лучь со́лнечный светя́щься: и сотвори́в моли́тву, а́бие нача́т очи́ма ви́дети, и уши́ма слы́шати. И по у́треннем славосло́вии прии́де на собо́р пове́дая бы́вшее ем́у исцеле́ние, игу́мену и бра́тии. И вси приключи́вшиися ту просла́виша Бо́га. Ви́дев же пресла́вное чу́до сие́ благочести́вый той муж Гео́ргий, и храм красне́йшь в монастыре́ том, во сла́ву Пресвяты́я Богоро́дицы созда. От святы́я же тоя́ ико́ны мно́жайшая чудеса́ бы́ша на мно́го вре́мя, разли́чными неду́ги одержи́мым: Жену́ бо не́кую Неони́лу и́менем, разсла́бленну су́щу исцели́. И другу́ю и́менем Феодо́сию, очи́ма стра́ждущу. И челове́ка не́коего и́менем Кодра́та бесну́ющася и гони́ма бе́сы сквозе пусты́ни де́сять седми́ц, и ничто́же вкуси́вша, и уже́ от гла́да погиба́юща, в пусты́ни тому́ Богоро́дица я́вльшися, и от гла́да укре́пльши, путь к до́му роди́телей его́ показа́, и во Свою́ оби́тель его́ приити́, и соверше́нное здра́вие тому́ получи́ти запове́да. И ино́го челове́ка и́менем Иоа́нна, рыболо́вца су́ща, и на е́зере утопа́юща, и уже́ погря́знути хотя́ща, от потопле́ния изба́ви. И друга́го челове́ка от примо́рския страны́ су́ща, и́менем Па́вла, годи́щное вре́мя вну́треннею боле́знию вельми́ стра́ждуща, я́вльшися тому́ в неду́зе су́щу, боже́ственному Писа́нию того́ изучи́, и от боле́зни свободи́. Еще́ многоразли́чныя и смертоно́сныя боле́зни исцели́: чревоболе́ния, и опухле́ния, и разли́чныя очны́я и зубны́я боле́зни, и от нечи́стых дух стра́ждущих, и от чарова́ния содержи́мых. И да́же и до днесь де́йствует неизче́тное мно́жество разли́чных чуде́с. И не то́кмо та́мо, но и в ца́рствующем гра́де Москве́. От препи́санныя с тоя́ честны́я ико́ны, я́же стои́т в це́ркви Святы́я Тро́ицы, близ врат святы́я Варва́ры, мно́гая содева́ются чудеса́, с ве́рою приходя́щым, в сла́ву из Нея́ ро́ждьшагося Христа́ Бо́га. Ему́же сла́ва, ны́не и при́сно, и во ве́ки веко́в. Ами́нь.