Стихи́:

Да прии́мем ве́рнии неоску́дную благода́ть:

Варфоломе́й обре́теся сокрове́н:

В два́десять пя́тый обре́теся Варфоломе́й мертв.

Я́ко ди́вен Бог во святы́х Свои́х, благовре́менно есть мне ны́не возопи́ти, пове́дати преждерече́нная, и изря́дное не́кое чудоде́йствие. И́бо святы́й апо́стол Варфоломе́й в разли́чных ме́стех Госпо́дне и́мя челове́ком пропове́дав, р́аспят бысть во Алфени́йстем гра́де, в вели́цей Арме́нии восто́чней. И того́ положи́ша в ра́це ка́менней, и́же при кончи́не его́ ве́рнии обре́тшиися, во Алва́не Вели́ких Ра́мен. Да я́ко непреста́нно свята́я о́на ра́ка бя́ше цельбы́ точа́щи, прите́каху лю́дие и преименова́хуся от страсте́й стра́ждущих. Такова́я у́бо зря́ще диа́воли слуги́, гне́вахуся на о́ну боже́ственую ра́ку, и собра́вшеся не́когда пове́ргше ю́, иму́щу свята́го апо́стола те́ло, со ине́ми четы́рми телесы́ и ра́ками святы́х му́ченик. Се же все бысть. Да и таково́е мо́ре и́мже про́йде, освяти́тся их ра́ди. И ме́ста, а́може коего́ждо боже́ственая благода́ть раздели́, да благослови́тся. В вели́кия не́дра пучи́ны отплы́в апо́стол, и в те́сная Елиспо́нтских ми́мо тек глуби́н. Егеа́тскую же и Адриа́тскую дости́г пучи́ну. И Сикели́йский сла́вный же и вели́кий о́стров ошу́ю оста́вив, име́я после́дствующих е́же в про́чих ра́ках добропобе́дныя му́ченики: Папиа́на, Лукиа́на, Григо́рия, Ака́кия. И во о́стров нарица́емый Липа́рь устреми́ся. Я́ко чу́дна дела́ твоя́ Го́споди, и ко́е сло́во дово́льно есть к пе́снем чуде́с твои́х. И́бо добропобе́днии му́ченицы я́ко не́кая ца́рствия иде́же то изво́ли почива́ти, вели́каго оста́вльше апо́стола, а́бие раздели́шася, иде́же коего́ждо боже́ственое повеле́ние благоизво́ли всели́ти. Папиа́на во Ами́лу гра́да Сикели́йскаго. Лукиа́на же в Месили́й. Григо́рия в Колими́ю гра́да Калаври́йскаго. Ака́кия же во Асха́льский град. Е́же епи́скопствовати в Липа́рех пра́вити боже́ственый того́ посла́ апо́стол. И а́бие епи́скоп потща́вся, я́ко ви́де вели́кое и стра́шное де́йствие у́жаса испо́лнься нача́т веща́ти, отку́ду тебе́ о́ Липа́ре таково́е и мно́гое до́йдет бога́тство. Вои́стинну возвели́чился еси́, па́че просла́вился еси́. Лику́й, взыгра́й, приими́ свои́ма рука́ма, и возопи́й к нему́, до́бре прии́де Господе́нь апо́столе. Сицева́я и и́на нема́ла епи́скоп изре́к и похвали́в апо́стола, и о́стров сло́вом обогати́в. Да я́ко подоба́ше боже́ственую ра́ку поста́вити на наро́чите ме́сте, иде́же и боже́ственая це́рковь прилежа́ше бы́ти, в сла́ву всехва́льнаго апо́стола. И о́вии мно́зи влеку́ще, и ника́коже и слу́шая бя́ше, до́ндеже открове́нием боже́ственым блаже́нный Агафо́н супру́г приве́де ю́нчий, и то́нкими ю́жи обви́в всевели́кую ра́ку. И си́лою и́же в ней су́щаго удо́бно повезе́, иде́же бя́ше во́ля апо́столу. Чудеси́ же чу́до пребыва́ше велича́йшее, и мно́гое сравне́ние от ненавы́кших от боже́ственых чудоде́лий неве́рующих. О́стровец бо Пихра́нь нари́чемый, име́я исто́чник кипя́щь дни́ю и но́щию. Да я́ко апо́столово прише́ствие ощути́, и в не́ приближе́нием Липа́рскому дости́же, боже́ственою си́лою воспяти́ся, и седмь по́прищь дале́че нача́т тещи́. Я́коже тече́нию тоя́ реки́ да́же и до днесь, чу́до пропове́дающи. О́ле пресла́вному чудеси́, где такова́я по всему́ подсо́лнечию пове́дати. Егда́ же воздви́же епи́скоп прекра́сну це́рковь апо́столу, и в ней яко многоце́нное сокро́вище, боже́ственое о́но и всечестно́е те́ло, с боже́ственою ра́кою положи́. Кто же изрещи́ мо́жет, я́же и до днесь быва́емая чудеса́, от мно́гих у́бо мимоше́дших после́дних време́н. Во дни Фео́фила Фриги́и царя́, иде́же святы́й апо́стол лежа́ше, за е́же умно́житися беззако́нием на́шым, от ага́рян всему́ Липа́рскому о́строву плене́ну, князь гра́да Мене́вда, апо́стольская чудеса́ уве́дев, ве́рою те́плою ко свято́му подви́гся, от Амалфи́нскаго гра́да му́жи не́кия пловцы́ призва́в, и сим име́ния дово́льная да́ти обеща́вся, и умоли́в их ити́, и многоце́нное о́но сокро́вище к нему́ принести́, е́же и сбы́сться. Князь же уве́дев прише́ствие свята́го, ме́ста же того́ епи́скопа, и мно́жество кли́рик, и людски́й собо́р подви́г корабльми́ по мо́рю, изыдо́ша на сре́тение апо́стольскаго телесе́. Иже во град Мене́вд внес, в че́стнем ме́сте положи́, иде́же мно́ги цельбы́ творя́ апо́стол вели́кий, всем к нему́ притека́ющым во сла́ву Христа́ Бо́га на́шего.

Стихи́:

Бя́ше и в нас что ма́лый Тит,

Сего́ кончи́ну и́же и в нас принося́:

На небеса́ пойти́ прилучи́ся в два́десять пя́тый.

Тит бла́женный Ми́нона царя́ бя́ше кри́тскаго сро́дник, я́коже глаго́лют. Зинамини́к же, и житие́ его́ списа́вый, его́же воспомина́ет святы́й апо́стол Па́вел. Сей у́бо блаже́нный изнача́ла жития́, мно́гу показа́в тщету́, и́же в е́ллинех на дивя́щееся наказа́ние. И уже два́десяти ле́том быв, слы́ша глас с небесе́ зову́щь: «Ти́те, подоба́ет ти отзде́ отъити́, и ду́шу свою́ спасти́: и́бо не довле́ет ти наказа́ние таково́е». Еще́ же слы́ша такова́го гласа, хотя бо е́же от треб гла́сы преле́стныя исходя́щих не приима́ти. Прижи́в же еди́наче еди́но ле́то, повеле́но ему́ бысть сном евре́йскую кни́гу прочести́. И прие́м кни́гу Иса́ии проро́ка, и на прек разгну́в обре́те: «Обновля́йтеся ко Мне о́строви дре́внии, и спасе́н бысть Го́сподем, спасе́нием ве́чным», и про́чая. Анфипа́т же кри́тский, слы́ша Влады́ки Христа́ спаси́тельно рожде́ние, и чу́до дея́ния, я́же творя́ше во Иерусали́ме, и во ины́х ме́стех, сове́ты нра́ву в Кри́те сотво́рь. Посла́ Ти́та во Иерусали́м я́ко дово́льна послу́шати же и рещи,́ и пове́дати слы́шимая. То́йже шед, и ви́дев и поклони́ся Влады́це Христу́: Пребы́сть во Иерусали́ме, и чудесе́м Спа́совым ви́дец быв, ви́дяше и спаси́тельныя Его́ стра́сти, и погребе́ние и воскресен́ие, и боже́ственное вознесе́ние, и Всесвята́го Ду́ха на святы́я апо́столы прише́ствие же, и на коего́ждо седе́ние, и ве́ровав: причта́ся и той двана́десятим ве́ровавшым Го́сподеви, поуче́нием верхо́внаго ап́остола Петра. Та́же свяще́н быв, и по́слан с Па́влом учи́ти и освяща́ти. Прише́д с ним во Антиохи́ю Писиди́йску, и во Икони́ю, и во Онисофо́р дом. Та́же в Ли́стру и Де́рвию. И по вся́ких ме́стех со апо́столом Па́влом, Бо́жие слово пропове́дая. Рости́лу же сестру́ водя́щу Ти́ту с собо́ю, е́йже во второ́е ле́то ше́дши в Кри́тскую о́бласть, иде́же бяше Па́вел и Тит. И изыдо́ша от Кри́та, преидо́ша во Аси́ю. И отту́ду обше́дше с Па́влом, да́же и до Ри́ма. И убие́н бысть Па́вел Неро́ном. Тит же возврати́вся в Крит, и та́мо епи́скопы и попы́ поставль почи о Господе. Бя́ше бо ле́том два́десятим, внегда́ от Кри́та до́йде во Иерусали́м, и до вознесе́ния соверши́в лето еди́но. Пото́м походи́в де́сять лет, поста́влен бысть апо́стол от верхо́вных учени́к Христо́вых. Пре́йде пропове́дая Ева́нгелие за осмьна́десять лет. И в Кри́те и в прочих о́стровех, шесть лет. И во оте́чествии три́десять шесть. Всех же лет его жития́, де́вятьдесять четы́ре. Соверша́ется же собо́р его́ во святе́й Вели́цей це́ркви.

Послу́шайте па́ки о сей душеполе́зней по́вести, бы́вшей при Арка́дии архиепи́скопе Царя́ гра́да, пре́жде пяти́десяти лет. Весь есть и́менем Трахиа́дь, пятьна́десять по́прищь от Константи́ня гра́да. В той ве́си поп бысть чароде́й и зело́ нечи́ст, я́ко со блудники́ и со блудни́цами от де́йства неприя́знена прельще́н бысть, и в честны́х святы́х сосу́дех я́сти и пи́ти со блудни́цами. И уве́дан бысть и ят и свя́зан. И вопроша́ше его́ приста́вник кня́зя по истяза́нии глаго́ля: «Рцы ми окая́нне вся́кого человеколю́бия недостойне, се у́бо стра́шное Суди́ще преоби́дел еси́, ка́ко не устраши́лся еси́ стра́шнаго вхо́да о́ного олта́рнаго, егда́ еси́ вноси́л стра́шную о́ну и безкро́вную же́ртву, не помышля́я егда́ сни́де огнь с небесе́ и сожже́т тя». Чароде́й же отвеща́ глаго́ля к нему́: «Та́ко Бо́га му́чащаго мя ны́не рука́ми ва́шими, и хотя́щаго мя та́мо му́чити свои́ма рука́ма, я́ко не приноша́х ни раздая́х лю́дем, отне́леже отступи́х от Бо́га и бых чароде́й, но а́нгел Бо́жий прихожда́ше принося́ издая́ше лю́дем. А аз в то вре́мя свя́зан лежа́х за свято́ю трапе́зою. И егда́ рече́ а́нгел: «С ми́ром изы́де», тогда́ разреша́ше мя и исхожда́х. Та́йны же тоя́ никто́же от люде́й ви́дяше то́кмо аз еди́н. Лю́дие же мня́ху я́ко аз есмь принося́ и раздава́я им». Бо́гу на́шему сла́ва, ны́не и при́сно и во ве́ки веко́в. Ами́нь.