Стихи́:

Андреа́ну отсеко́ша ру́це и но́зе:

Ру́кы от лука́вых:

И́мже уби́йствено теку́щи но́зе:

В житии́ сожи́тельница,

На небеси́ же Андреа́ну Ната́лия свита́тельница:

Андреа́ну отсе́чени быша ру́це и но́зе в два́десять шесты́й.

Му́ченик Андреа́н и Ната́лия жена́ его́, бя́ше от гра́да Никомиди́йскаго. Во обхожде́ние второ́е Максимиа́ново, я́ти бы́ша му́жи христиа́не число́м два́десять три. И́же кры́яхуся в верте́пех, и мно́гими томле́ньми му́чени бы́ша. И́хже вопроси́ прежде муче́ния святы́й Андреа́н: «Вску́ю прие́млете непостоя́нныя сия́ и таковы́я му́ки?». Оне́м же отвеща́вшым: «Д́а восприи́мем от Бо́га угото́ванных благ, е́же за Него́ стра́ждущим быва́ет, ни слух вмести́ти мо́жет, ниже́ ум, ни сло́во изглаго́лати». А́бие блаже́нный Андреа́н боже́ственною благода́тию прекло́нься, скоропи́сцем рече́: «Учини́те и мене́ с христиа́ны, хощу́ бо рече́ с ни́ми умре́ти». Оне́м же написа́вшым его́ и желе́зы окова́ша его́. Такова́я же уве́девши Ната́лия, бы́вши с жа́лостию ра́да. Све́тлою оде́ждею и мони́сты себе́ украси́вши, ко узи́льницы потща́вшися до́йде. И вше́дши облобыза́ желе́за и око́вы Андреа́новы, и того́ жалостолю́бно ублажа́ше, и непоколеби́ма к на́шествию му́кам терпе́ти кротя́ше. И е́же с ним святы́я моля́ше моли́твовати о нем. И по утеше́нии возврати́ся Ната́лия в дом свой. Пома́ле же слы́ша от стра́жник Андреа́н я́ко хо́щет мучи́тель извести́ их на испы́тное истяза́ние, даде́ стра́жником обеща́ние, и всем су́щым с ним в темни́це святы́м, по́йде пове́дати Ната́лии, да предста́нет кончи́не его́. Она́ же мне́вши я́ко отре́клся Иису́са Христа́, убоя́ся му́ки, и изы́де от уз, затвори́ врата́ от него́, поноша́ше ему́ отверже́ние за Христа́, и душелю́бца и страшли́ва того́ нари́чущи, и стра́шнаго преще́ния тому́ воспомина́ющи. И́же Христо́с того́ мета́ющихся запрети́, и себе́ стра́стну имену́ющи, я́ко не сподо́бихся рече́ му́ченикова жена́ нарещи́ся. Но наде́жду блаже́нную неза́пно погреши́ти ми. Отку́ду рече́ прия́л еси́ таково́е безсла́вие? Он же гласи́ ей изы́ти и поити́ с ним на муче́ние. Она́ же с ра́достию врата́ отве́рзши, и нань напа́дши ве́село облобыза́ше. И а́бие с ним к мучи́телю ше́ствие творя́ше. И внегда́ у́бо достиго́ша иде́же подоба́ше ему́ поити́, введо́ша его́ к царю́. Бие́н бысть же́злием пребыва́я во испове́дании. И па́ки обраще́н и бие́н по чре́ву, я́ко яви́тися вну́треним его́. Бя́ше же внегда́ такова́я стражда́ лет два́десяти и осми́. Та́же повеле́ отсещи́ ему́ ру́це и но́зе, та́ко и с про́чими все́ми му́ченики, пе́рвее Андреа́н подъя́т сече́ние. Ната́лии полага́ющи по руце́ и по но́зе на накова́льне, и сечца́ моля́щи вельми́ секи́ру надноси́ти, да не устраши́вся преметне́тся Христо́ва ра́ди страда́ния. В сих же сконча́вшуся свято́му и блаже́нному Андреа́ну, взе́мши Ната́лия удеса́ его́, и че́стне спря́тавши со ине́ми жена́ми после́дствующим ему́, и ма́жущим себе́ от теку́щия их кро́ве. Евсе́вий же не́кто ве́рен сый, взем телеса́ святы́х му́ченик, и погребе́ их в че́стне и наро́чите ме́сте. Соверша́ет же ся собо́р их во святе́м их муче́нии об он пол Аргиропо́ля.

Бысть у́бо сие́ пресла́вное чу́до в ле́то 6903 во дни благове́рнаго и христолюби́ваго вели́каго кня́зя Васи́лия сы́на Дми́триева самоде́ржца Ру́сския земли́, вну́ка вели́каго кня́зя Ива́нна, пра́внука же благове́рнаго и христолюби́ваго самоде́ржца и собра́теля Ру́сския земли́, вели́каго кня́зя Ива́нна сы́на вели́каго кня́зя Дани́ла. При боголюби́вом архиепи́скопе Киприа́не и́же и митрополи́т быв Ки́евский и всея́ Руси́и. В 15 ле́то ца́рства Тактамы́шева. В седмо́е же ле́то княже́ния вели́каго кня́зя Васи́лия. Инди́кта тре́тияго.

Бысть смяте́ние вели́ко во орде́. Прии́де не́который царь и́менем Теми́рь‐Акса́к, с восто́чныя страны́, от Си́ния орды́, от Самахи́рския земли́, от за́ецких тата́р, и вели́ку брань сотвори́. И мног мяте́жь воздви́же во орде́ и в Руси́ свои́м прихо́дом. О сем Теми́рь‐Акса́це не́цыи пове́дают, я́ко не царь бе ро́дом ни князь, ни боля́рска ро́да, но от худы́х люде́й от за́ецких тата́р, от Самахи́рския земли́ от Си́ния орды́, и́же бе за желез́ными враты́. Ремество́ же его́ бя́ше, ко́вачь желе́зу, и всем злым дело́м бя́ше нача́льник. И па́ки рабо́таше у не́коего господи́на, и злонра́вия ра́ди его́ отве́ржеся господи́н его́, бив отсла́ его́ от себе́. Он же нача́ кра́сти, и у не́коего украде́ о́вцу. Они́ же а́бие ощути́ша его́ и я́ша, и би́ша и́ неми́лостивно. И преби́вше ему́ но́гу и бе́дру на́полы, и поверго́ша его́ на земли́ я́ко ме́ртва псом на снеде́ние и отъидо́ша. И посе́м едва́ уздра́вися, и прекова́ себе́ но́гу желе́зом и храмля́ше. И того́ ра́ди про́зван бысть Теми́рь‐Акса́к.

И посе́м нача́ша к нему́ зли́и челове́цы сообща́тися. И я́ко бысть их сто, и нареко́ша его́ старе́йшиною разбо́йником. И па́ки бысть их до ты́сящи, и прозва́ху его́ кня́зем. И егда́ бысть бо́ле, тогда́ и царе́м именова́ша его́ у себе́. Сей же окая́нный Теми́рь‐Акса́к царь, мно́гия зе́мли поплени́, и мно́гия гра́ды и страны́ и ца́рства поима́л бе под себе́, и да́ни и обро́ки с тех градо́в и с царств имя́ше. И посе́м безбо́жный Теми́рь‐Акса́к прии́де на Ру́сскую зе́млю, и помышля́ше разори́ти христиа́нство, и град Москву́, и вся гра́ды Русския под ся покори́ти.

И се слы́шав вели́кий князь Васи́лий сын Дми́триев, собра́в своя́ во́я мно́ги, и по́йде с Москвы́ к Коло́мне, проти́ву безбо́жнаго. И прише́д с ра́тию ста на брегу́ Оки́ реки́. Теми́рь‐Акса́ку же стоя́щу на еди́ном ме́сте 15 дний. Князь же вели́кий Васи́лий, и все христолюби́вое во́инство слы́шавше безбо́жнаго ва́рвара помышле́ние, и вси возде́вше ру́це на не́бо, и нача́ша со слеза́ми моли́тися Бо́гу и Пречи́стей Богоро́дице о избавле́нии свое́м от безбо́жнаго царя́. И посе́м вели́кий князь посла́ к Москве́ ко отцу́ своему́ духо́вному Киприа́ну митрополи́ту, да наро́ду повели́т прия́ти пост и моли́тву со слеза́ми. И повеле́ взя́ти ико́ну Бо́жия Ма́тере из Влади́мира. Святи́тель же повеле́ наро́ду пости́тися, и всему́ освяще́нному собо́ру. Та́коже и сам сотвори́. И мно́га моле́бная пе́ния сотвори́. И посла́ по ико́ну Бо́жия Ма́тере, ю́же Лука́ апо́стол написа́. И принесо́ша из Влади́мира с вели́кою че́стию во град Москву́. И срето́ша ю́ со кресты́ за гра́дом со мно́жеством наро́да. И вси наро́ди нача́ша пла́катися Пречи́стей Богоро́дице со слеза́ми о избавлен́ии свое́м. Принесена́ же бысть честна́я ико́на из Влади́мира ме́сяца а́вгуста в 15 день, на са́мый пра́здник честна́го Ея́ Успе́ния.

И та́ко Бо́жиею благода́тию и моли́твами святы́я Богоро́дицы, и их уго́дника и чудотво́рца Петра́ митрополи́та Ру́сския земли́ сохранена́ бысть от безбо́жнаго ва́рвара. И а́бие ико́на в той день егда́ принесена́ [бысть] Пресвяты́я Богоро́дицы из Влади́мира в Москву́, тогда́ Теми́рь‐Акса́к безбо́жный убоя́ся и смути́ся, гони́мь гне́вом Бо́жиим, и побежа́ вспять во свою́ зе́млю, не получи́в жела́ния своего́ злый, и та́ко исчезе́ моли́твами и по́мощию Святы́я Богоро́дицы.

Ея́же моли́твами Христе́ Бо́же поми́луй нас ны́не и при́сно и во ве́ки веко́в. [Ами́нь.]