Стихи́:

Злато́е соверше́ние я́ко честне́й Деви́це

Всего́ го́да твой положи́х исполне́нию поя́с:

Е́же в ра́це положе́ние по́ясу Всечестны́я в три́десять пе́рвый.

Егда́ Пресла́вная Влады́чица на́ша Де́вая и Мари́я ко е́же от Нея́ Ро́ждьшемуся Го́споду хотя́ше отъити́, повеле́ е́же да́тися обои́м Ея́ ри́зам, двема́ жена́ма вдови́цама и ни́щема. По преставле́нии же Ея́ взе́мше оне́ о́бе жене́ ри́зе, храня́ще ку́юждо у себе́ с честию, предава́юще по ро́ду ины́м вдови́цам тай. И́же и еди́на взе́мши по́яс, име́яше в че́сти. Но промышле́нием Бо́жиим ри́за от Капернау́ма принесена́ бысть, Га́лвием и Канди́дом, в ца́рство Льва Вели́каго, и положена́ бысть во Влахе́рне. По́яс же от епископи́и Зи́лы, та́мо обре́тен, принесе́н бысть в ца́рство Иустиниа́ново, и положе́н в Халкопра́тии. Вдана́ бы́ша ку́пно я́ко боже́ствении да́рове, тве́рдая огражде́ния лежи́мому гра́ду Богоро́дичну.

Вели́каго Феодо́сия сын Арка́дий, во дни ца́рствия своего́, честна́го по́яса Пресвяты́я Богоро́дицы от Иерусали́ма изне́с, и в Константи́нь град прине́с, положи́ его́ в мал ковче́г и че́стен. Его́же собра́ние нарече́. По Арка́дии же царе́ да́же и до Льва сы́на Васи́лия царя́, ле́том мимоше́дшим, четыре́м стом и десяти́м, Лев царь отве́рзе ковче́г святы́й, Зо́и ра́ди супру́жницы своея́. Зане́же бя́ше ви́дела виде́ние, е́же получи́ти ей цельбу́ и свобо́ду от стр́аждущаго ея́ неду́га, ду́ха нечи́стаго. И́же и показа́вся боже́ственный по́яс я́ко и новотка́н светя́щься. И печа́ть я́ко и спря́жу зла́ту име́я, и коне́чник повсю́ду сия́ющь. Его́же изъе́м царь и целова́в даде́ его́ тогда́ су́щему патриа́рху. Его́же патриа́рх свои́ма рука́ма верху́ цари́цы просте́р, и а́бие свободи́ся от неду́га нечи́стаго ду́ха. Прогна́ну же отту́ду нечи́стому дух, вси просла́виша Спа́са и Бо́га, и Всечестну́ю Его́ Ма́терь. Пе́сни благода́рственыя возда́вше, положи́вше святы́й по́яс во святе́м ковче́зе, иде́же пе́рвее бя́ше во славу Бо́гу.

Бе не́кто челове́к во Иерусали́ме Созо́мон и́менем: И́же идя́ше сквозе́ град, и усре́те ни́ща скорбяща, и совлеќ с него́ одея́ние его́, и даде́ ему́ свое́, и ид́е в путь свой. Бе же в день жа́твы, и преклони́лся уже́ день к ве́черу, и ма́ло усну́в, быв в восто́рзе, и обре́теся в не́коем дому́ чу́дне, в не́мже бя́ше свет пречи́ст, и сады́ вся́цы, и разли́чны, овощи́ иму́ща благово́нны, и ве́тви до земли́ преклоня́ющыяся: И пти́цы многообра́зни поя́ху в версе́х тех прекра́сныя пе́сни, и молча́ния не иму́ще, я́ко слы́шану бы́ти гла́су их от земли́ и до небесе́. Садо́вие же колеба́хуся в сла́ве вели́це. Се же ему́ ви́дящу, прии́де к нему́ ка́женик не́кто, и глаго́ла ему́: Иди́ во след мене́. И приидо́ста к столпу́ зла́том покрове́ну, и сква́жнею узре и́ны две́ри, и пала́ты зело́ пресла́вны, и многоце́нными би́серы утворены́. И зря́щу Созо́мону та́мо, и се изыдо́ша му́жи крилати от пала́т тех, светя́щеся я́ко со́лнце, нося́ще ковче́ги четыре. Егда́ же чу́дныя тыя двери минова́ху а́нгели, и разуме́ Созо́мон я́ко к нему́ иду́ще бяху, и проти́ву ему́ ста́вше поста́виша ларцы́ ты́я, и жда́ху некоего вельмо́жи приити́ к ним. И ви́де Созо́мон, и се муж красе́н изы́де от пала́т тех, и прии́де ко а́нгелом держа́щым ларцы́ ты́я, и рече́ им: «Покажи́те челове́ку сему́, что ся ему́ храни́т сви́та, поне́же поми́лова ни́щаго». И откры́ша еди́н от златы́х ларцо́в, и нача́ша излага́ти срачи́цы, и сви́ты ца́рския, и простира́ху я́ глаго́люще: «Господи́не Созо́моне, уго́дно ли ти суть пред очи́ма твоима сия́?». Он же рече́: «Недосто́ин есмь и на стень их воззре́ти». И показа́ша ему́ пе́стрыя и златы́я, и иныя многоце́нныя, разли́чными ле́потами, и бысть их я́ко до ты́сящи число́м. И глаго́лаше ему́: «Дая́й ни́щему, стори́цею прии́мет, и живо́т ве́чный насле́дует». Глаго́ла ему́ повелева́яй а́нгелом: «Тебе́ глаго́лю Созо́моне, сели́ко ти угото́вах благи́х за еди́ну сви́ту, е́юже Мя оде́л еси́ на́га су́ща ви́дев: Иди́ у́бо и твори́ та́коже, и возда́стся ти стори́цею». И отвеща́ Созо́мон стра́хом и ра́достию одержи́мь: «Го́споди мой, тако ли есть и́же творя́т ми́лостыню ни́щым». И рече́: «Ей, всяк бо у́бо творя́й ми́лостыню, стори́цею прии́мет, и жизнь ве́чную насле́дит. Се же ти глаго́лю: Не раска́йся о ми́лостыни, ни поноси́ ни́щему, яко дав ему́ что, еда́ бо во мзды ме́сто сугу́бу тщету́ прии́меши». И се сл́ышав Созо́мон, воспря́нув от сна, и дивля́шеся в себе виде́нию бы́вшему стра́шному. И воста́в от ло́жа, рече́: «А́ще та́ко ми глаго́ла Госпо́дь мой, то и дру́гу сви́ту дам ни́щему». И в другу́ю нощь то́йже сон ви́де. И у́тре воста́в раздая́ име́ние свое ни́щым, и отве́ржеся ми́ра, и бысть чернори́зец чу́ден.

Пове́даше не́кто христолю́бец о Кириа́це разбо́йнице: я́ко разбо́й творя́ше в страна́х Еммау́са, иде́же есть град Никопо́ль: и тако́в бе лют зело́, я́ко и Во́лком зва́ху его́. Име́яше же с собо́ю и други́я разбо́йники, я́ко не то́кмо христиа́ны, но и жиды́ и самаря́ны. Еди́ною же ше́дшым лю́дем от Никопо́ля из домо́в свои́х, во святы́х град Иеросали́м в вели́кую Неде́лю, на просвеще́ние чад свои́х, и яже просвети́вше обраща́хуся на се́ла своя́, да творя́т святы́й Воскресе́ния день. И усрето́ша их разбо́йницы, не су́щу ту старе́йшине разбо́йником: Му́жи же бежа́ша, жены́ же е́мше, новопросвеще́нныя младе́нцы поверго́ша на земли́. Жи́дове же и самаря́не бы́ша с ними. И я́ко му́жие бежа́ша, и сре́те я́ разбо́йником старе́йшина, и вопроси́ я́: «Что бе́гаете?». Они́ же пове́даша ему́ прилучи́вшееся: и пое́м их Кириа́к старе́йшина разбо́йником, и приведе́ к дружи́не свое́й, и обре́те де́ти пове́ржены на земли́, и уве́дев я́коже сотвори́ша они́, и а́бие усе́кну сотво́ршаго скве́рну. И повеле́ муже́м взя́ти де́ти, и не отлучи́тися от жен свои́х, прикоснове́ния ра́ди скве́рнаго. Проводи́в же их и до села́ своего́. Ма́ло же поме́длив, ят бысть и сам старе́йшина разбо́йником, и пребы́в в темни́це де́сять лет, и никто́же от князь уби́ его́. Последи́ же испуще́н бысть из темни́цы, и ска́зоваше сам о себе́ на по́льзу слы́шащым: я́ко дете́й о́нех ра́ди я́же изба́вих, го́рькия сме́рти избежа́х: Ви́дех бо я́ мно́гащи глаго́люща ми: «Не бо́йся уже́, мы за тя отвеща́ем». Бесе́довах же рече́, аз с ним а́вва Иоа́нн поп о́бщаго жития́, и сия́ нам пове́даше, сла́вя Бо́га о всех быва́ющих от Него́ пресла́вных, я́ко не забве́нны суть доброде́тели вся́каго челове́ка пред Бо́гом. И́хже ра́ди изба́влен бысть от уз и темни́цы и от го́рькия сме́рти и сий разбо́йник, о Христе́ Иису́се Го́споде на́шем. Ему́же сла́ва, честь и держа́ва, со Отце́м, и со Святы́м Ду́хом, ны́не и при́сно, и во ве́ки веко́в. Ами́нь.