Стихи́:

Мече́м худи́и ма́тернии младе́нцы

Побие́ни бы́ша враго́м ра́ди Младе́нца Творца́:

Младе́нцы в два́десять девя́тый сме́ртию изомро́ша.

Запове́да И́род, царь Иуде́йский, волхво́м возврати́тися и пове́дати ему́ е́же о Ро́ждьшемся Царе́, Его́же звезда́ после́дующе, я́ко да с ни́ми покло́нится Ему́. И а́нгелу ре́кшу к ним, е́же не возврати́тися ко И́роду, но ине́м путе́м отъидо́ша во страну́ свою́. И сие́ сотво́ршим, в́иде И́род, я́ко поруга́ся от них, огорчи́ся, и сложи́в испы́тно ле́то я́вльшееся звезды́, и посла́в во́ины, и уби́ вся отроча́та во Вифлее́ме, от двою́ ле́ту и нижа́йшее. Сие́ положи́ во свое́м по́мысле, я́ко а́ще вся о́троки избие́т, ве́де, я́ко умре́ти и́мать и хотя́й бы́ти Царь, и не сбы́сться сове́т его́. Но всу́е труди́ся безу́мный и не ве́дый, я́ко челове́к Бо́жия сове́та запя́ти не мо́жет. Тем о́нем исхода́та Ца́рство небе́сное, себе́ же му́ку ве́чную.

Стихи́:

Безсо́ние пода́вый всего́ вре́мени жи́зни,

Марке́лле, усни́ ма́ло и поспи́ во гро́бе.

Сей преподо́бный оте́ц наш Марке́лл, бысть от гра́да Апами́и Си́рския, сла́вна р́ода и бога́та. Тем и все наказа́ние слове́сное про́йде, и сия́ разсмотри́в, оста́ви своя́. И по́йде во Ефе́с. И прия́т быв не́которыми благочести́выми челове́ки. И в не́кий та́мошний монасты́рь вшед, и до́бре пости́ся: и отъи́де ко свят́ому Алекса́ндру. Та́же во оби́тель неусыпа́ющих. И ви́дев о боже́ственнем, и высо́цем его́ житии, и в его́ оби́тели прибы́ток сотвори́, всех превозше́д и́же по вся дни доброде́тельми преуспея́нии. По успе́нии же Алекса́ндра и Иа́кова, по о́нех прорече́нию, игу́мен оби́тели поставляе́тся. Мно́гая чудеса́ Христо́вою благода́тию показа́ и си́лы. И в той оби́тели с ми́ром почи́.

Сей святы́й оте́ц наш Фадде́й, слуга́ бя́ше Фео́дора оби́тели Студи́йския, и́же от царя́ прие́мшу, и кинови́ю сотвори́вшу. И той постри́г власы́ главны́я, в той оби́тели бысть монах: и житие́ стяжа́в богоуго́дно, возлю́бен бысть все́ми. Пост бо и бде́ние мно́го имы́й, и язы́ку воздержа́ние, и внима́ние боже́ственных слове́с, до́лу лега́ние, послуша́ние ко всем. Ни кое ино что име́я, то́чию и́мже бя́ше оде́ян. Злочести́вым же тогда́ царе́м иконобо́рцем, Михаи́лу реку́ Тра́влому, и Фео́филу сы́ну его, держа́щым по Бо́жию попуще́нию, вся благочести́выя епи́скопы, и игу́мены. И о́вех в темни́цах затворя́ху, ине́х же прогоня́ху. В ни́хже бя́ше и вели́кий Фео́дор, сего́ наста́вник. С сим не́когда в пала́ту вшед, и богоно́сный Фадде́й ре́вностию Бо́жиею разжже́гся, обличи́ нечести́ваго о́ного царя́ пред всем сигкли́том. Он же повеле́ ико́ну Спа́са на́шего принести́, и положи́ти ю́ на зе́млю. Свята́го же сего́ му́жа поста́вити верху́ ико́ны, и нево́лею повлече́н кре́пкими мужи́ тве́рдо. О́ному же вельми́ откланя́ющуся, е́же не наступи́ти, и не хотя́ возвлече́н наступи́. И царь к нему́ рече́: Се своего́ Христа́ ико́ну потопта́л еси́, и про́чее подложи́ себе́ и на про́чая. Просвеще́нный же душе́ю отвеща́в к нему́: Аз прокля́тче и злочести́вый, и вся́кия нечистоты́ испо́лнене, не от своея́ со́вести сие́ сотвори́х, да не бу́ди ми то: но твои́м кова́рством, и непр́аведным судо́м возвлече́н, и сие показа́ся: аз же па́че покланя́юся, и целу́ю святу́ю ико́ну Христа́ Бо́га моего́, и о ней возжеле́нно хощу́ умре́ти. Си́ми словесы́ сей окая́нный постыде́ся, яко неве́ждею и препро́стием всесоверше́нне опсова́н бысть и поруга́н. И повеле́ пред собо́ю того́ на земли́ поврещи́, и без ми́лости би́ти. И толи́ко бие́н бысть па́лицами, доне́леже не наде́ятися уже́ тому́ и дыха́ти. Та́же у́бо мне́вше того́ уме́рша, и извлеко́ша того́ за но́зе вон. И та́мо не́цыи от предстоя́щих связа́вше его́ за но́зе, влача́ху я́ко уме́рша посреде́ то́ржища, и поверго́ша его́ близ стены́ к стране́ Пиги́и. И не́кими измове́н быв от нечистот́ы влаче́ния. Блаженный же Фадде́й благода́рственно, и до́блественно вся подъя́т, и три дни пожи́в, отъи́де ко Го́споду.

Прекосло́вие и безсту́дие и́гом зло́бы затяза́ется. Прекосло́вец бо ра́вен есть презо́ривому. Хо́щет бо всегда́ одолева́ти и́стине, ча́сто проти́вится, хотя́й старе́й быти, не помы́сля пи́санаго в Зако́не, яко противишася Моисе́ови Коре́й, и Дафа́н, и Авиро́н. И разгне́вася Бог на ня, и отве́рзеся земля́, и пожре́ я́ и сове́тники их. Прие́млющии бо власть о свое́й си́ле без Боѓа, и проти́вящися су́щи от Бо́га вла́сти, таце́м ка́знем пови́нни суть. Пи́шет же и Па́вел о е́терех прекосло́вцех си́це: «Я́коже Ианни́й и Иамври́й проти́вистася Моисе́ю, та́ко и си́и проти́вятся и́стине, челове́цы растле́вшии умом, неискуше́ни о ве́ре». Та́ко и в Дея́ниих Апо́стольских Ели́ма волхв проти́вяшеся Па́влу и Варна́ве, ища́ разврати́ти анфипа́та от ве́ры, и а́бие ослепе́. И па́ки, присыла́я к Тимофе́ю, рече́: «Алекса́ндр ко́вач мно́го ми зла сотвори́: да возда́ст ему́ Госпо́дь. Его́же и ты храни́ся: зело́ же проти́вится на́шим словесе́м». И се прия́ прекосло́вия возда́ние. И проро́к Михе́я, рыда́я прекосло́вия лю́дска, глаго́лет: «Ох мне, ду́ше, поги́бе от земли́ гове́ин». И: «Прекосло́вцы все злом воздвиго́ша». И: «Язы́к их вознесе́ся во усте́х их». И: «Се Госпо́дь а́нгела неми́лостива послет». И па́ки: «Му́дрость челове́ку просвеща́ет лице́ его́, а безсту́дный лице́м возненави́ден будет». И: «Веща́ния непра́ведная никто́же утаи́тся». «Злый же себе́, кому́ добр бу́дет?». Та́коже и Соломо́н: «Зли́и с досажде́нием бесе́дуют, а разуми́вии о себе́ прему́дри суть».

Возбои́мся, бра́тие, боже́ственаго Писа́ния, не восхо́щем бы́ти прекосло́вцы и безсту́дницы, да не и к нам рече́ проро́к: «Лекова́х Вавило́на, и не исцеле́», но внима́й Иса́ии, глаго́люща: «А́ще послу́шаете мене́: блага́я земна́я сне́сте». Мы же молча́нием ся утверди́м, после́дующе свята́го Писа́ния, повину́имся старе́йшинам, уставля́юще прекосло́вие. Вели́ко бо есть ору́жие души́ к челове́ком молча́ние, а к Бо́гу многоглаго́лание. На всяк день сме́рти ожида́ем. Да не уподо́бимся иере́ом жидо́вским, ти́и бо навы́кли бя́ху при́сно проти́витися Бо́гу: «Приступиша бо, рече́, иере́и ко Го́споду: глаго́люще: ко́ею вла́стию се твори́ши или́ кто Ти дасть власть сию́?». Долготерпели́вый же Госпо́дь отвеща́ им, глаго́ля: «Вопрошу́ аз еди́ного словесе́, е́же а́ще пове́сте ми, и реку́ вам». Ему́же и мы помо́лимся, да изба́вит ны от прекосло́вия, Христо́с Бог наш.

Ви́де преподо́бный Ни́фонт два а́нгела вознося́ща ду́шу на не́бо. И я́коже прибли́жишася ко мздои́мству и блуже́нию, и ко ины́м грехо́вным си́лам, нача́ша кня́зи мытои́мцы гне́ватися, и возмуща́ти, глаго́люще: Ка́ко вы дерза́ете нести́ ду́шу сию́ ми́мо ны, а на́ша су́ща? Глаго́лаша а́нгели к ним: Ка́ко есть ва́ша, и кое зна́мение на ней, рцыте нам? Глаго́лаша они́: До сме́рти зло́е все сотвори́, и несть греха́, его́же не сотвори. И се есть душа́ сия́ страстьми́ порабощена́, и без покая́ния есть умерла́, и ника́коже ни к сме́рти оста́ся греха́: да́же и у́мре раб сый греху́, и се есть наш де́латель, и досе́ле. И тогда́ глаго́ла еди́н от а́нгел Бо́жиих к ним: Пои́стинне мы, ни вам, ни отцу́ ва́шему диа́волу ве́ры име́ем, вся́кия бо лжи испо́лнени есте́ лука́вии. Но да будет призва́н а́нгел, и́же во свято́м креще́нии дан бысть ему́ на соблюде́ние, и той пове́сть и́стину. И призва́н бысть ту. И глаго́лаша ему́ а́нгели: Рцы нам, душа́ сия́ пока́ялалися беззако́ний свои́х, или́ во гресе́х у́мре? Отвеща́ а́нгел и рече́: Аз несмь челове́к, ни дух лука́в, и не хощу́ лжу рещи́, я́коже и вси бе́си: но по сла́ве Го́спода на́шего Иису́са Христа́, глаго́лю вм: я́ко во́ньже час нача́т боле́ти, тогда́ нача́ слези́ти, испове́дая грехи́ своя́, просте́р ру́ку свою́ на не́бо к Бо́гу моля́шеся. И а́ще у́бо прости́ и есть, Бог владе́ет, и сла́ва пра́ведному суду́ Его́. И слы́шаша светоно́снии а́нгели, наруга́шася диа́волу и бесо́м его́. Бе́си же отвеща́ша глаго́люще ко а́нгелом: А́ще досто́ит сему́ спасе́ну бы́ти, то прии́мет весь мир спасе́ние, и вси гре́шнии, и всу́е мы труди́мся. И тогда́ реко́ша святи́и ангели: Внемли́те окая́ннии, я́ко ели́ко же их есть и́же от ю́ности согреши́ли, то всего́ того́ прости́л я́ есть Бог. И а́ще у́бо во что лука́во па́дше, то ско́ро и прии́мше просты́ню, стоня́ще убо, и слезя́ще, и творя́ще ми́лостыню ко убо́гим. Да что ся вам мнит окая́ннии зве́рие ди́вии, ле́по ли есть души́ сей спасе́ние получи́ти, или́ ни? Бог тем судия́, и́же к нему́ с покая́нием прири́щут. Сия́ же на́ма покая́нием на свет изы́де, и все явля́емое свет есть е́же о Бо́зе. Те́мже ели́цы испове́дают со слеза́ми челове́цы грехи́ своя́ к Бо́гу во смире́нии мно́зе и стона́нии, и престаю́т от зла́го де́ла, Ми́лостивый Бог отдае́т им грехи́. А в ни́хже беззако́ннии умру́т утаи́вше от Бо́га, тем су́дит Бог, и облича́ет в безконе́чныя ве́ки. Сия ре́кше а́нгела, посрами́ста ду́хи лука́выя. И та́ко отъидо́ша ко врато́м небе́сным. И спасена́ бысть душа́ та. Бо́гу на́шему сла́ва, ны́не и при́сно, и во ве́ки веко́в. Ами́нь.