Стихи́:

Я́ко испече́на, Спа́се, Тебе́ приноше́ния,

О́бе тме посреде́ це́ркви лежа́т:

В два́десять осмы́й пожже́ две тме огнь.

Максимиа́ну царю́ возврати́вшуся с побе́дою, е́же от Ефио́пския ра́ти, и хотя́щу ему́ одоле́ния ради пожрет́и и́долом, пи́смена посла́ повсюд́у, еже сни́тися всем в Никомиди́ю на поклоне́ние бого́м его́. Святы́й Анфи́м, епи́скоп гра́да того́, собра́в е́же от свое́й ц́еркви Христо́вы лю́ди, - бя́ше бо тогда́ пра́здник Христо́ва Рождества́, - и сим пра́здновати Христо́ве и́стинней ве́ре наказа́в их. Уве́дев же се Максимиа́н, повеле́в о́крест це́ркви положи́ти хвра́стие и дрова́, и зажещи́, и изжещи́ христиа́ны. И се уви́дев епи́скоп Анфи́м, потща́ся, крести́ оглаше́ных, и святу́ю и боже́ственую соверши́в слу́жбу, и причасти́тися всех сподо́би святы́х Та́ин: и та́ко вже́гшуся хвра́стию со дровы́, и сгоре́ша вси. Святы́й же Анфи́м Христо́вою благода́тию сохране́н бысть, да и про́чих поспеши́т, и креще́нием приведе́т Христу́, и многими му́ками к самому́ приведе́т Ца́рствию небе́сному восприя́тия ра́ди ве́чных благ.

Стихи́:

Инди́я слы́шу, е́же житию́ прия́ти кончи́ну,

Верха́ дости́гшу, е́же ко глубине́ концу́.

Глубина́ погружа́ет Горго́ния и Петра́,

Па́мять не погружа́ет вре́мя.

По повеле́нию скве́рнаго Максимиа́на, е́же сожещи́ святы́х две тме в це́ркви. И повеле́ и́же извне́ у́ду це́ркве, оста́вшыя христиа́ны изби́ти. И побие́н бысть Инди́с, и Горго́ний, и Петр, ка́мение навяза́ша на вы́я их, и в мо́ре вве́ржени бы́ша. Страти́гу же Зино́ну сокруше́но бысть лице́ его́ и зубы ка́мением: и с Дорофе́ем препоси́том главы́ их отсеко́ша. Мардо́ний же огне́м сожже́н быв. Мигдо́ний в ров вве́ржен. Глике́рий презви́тер огне́м сконча́ся. Фео́филу диа́кону язы́к уре́заша, и на по́ли ка́мением побие́н бысть. И ини́и про́чии в той день муче́ния венцы́ прия́ша. Сих всех святы́я мо́щи, свята́я До́мна собира́ше. И оклевета́на бысть к Максимиа́ну: и повеле́нием его́ главу́ ея́ отсеко́ша.

Стихи́:

Шесту́ю мню́ мудрым де́вам,

Ложь бу́йственую Домни́ною посече́нною*.

* Шесту́ю меню́ мудрым де́вам

Лжебу́йственную Домни́ну посече́нную

Свята́я До́мна бя́ше при Максимиа́не царе́ во гра́де Никомиди́йстем, жри́ца двуна́десятим бого́м и́же в пала́те. И обре́тши дея́ния святы́х апо́стол, и еписто́лию Па́вла апо́стола, и от сих просве́щшися душе́ю, и и́стинную ве́ру навы́кши, ве́рова Христу. И крещена́ бысть Кири́ллом епи́скопом Никомиди́йским, ку́по со И́ндом ка́жеником, и со ины́ми про́чими. И от тогда́ а́ще что взима́ше в пала́те, дая́ше ни́щым. Уве́дена же бы́вши от старе́йшины ка́жеников, и хотя́щи му́чена бы́ти и ходи́вши с проумышле́нием. Послана́ бысть к епи́скопу, да устра́блена бу́дет: и бя́ше со христиа́ны. Максимиа́н же возврати́ся от войск, иска́ше До́мны, и не обре́т ея́ огорчи́ся, и повеле́ вся христиа́ны убив́ати, е́же и бысть. Тогда́ же свята́я До́мна в му́жескую оде́жду обо́лкшися, и взима́ше святы́х телеса́, и погреба́ше. И уве́дена бы́вши, отсеко́ша главу́ ея́.

Стихи́:

Мре́жею твое́ю, Никано́р, Бо́жие Сло́во,

Мно́гих улови́в, изба́ви конца́ житийска́го.

Пове́даху о отце́ Иоа́нне Ко́лове: я́ко шед к фиве́янину отцу́ в ски́те седя́щу в пусты́ни. Взем же оте́ц его́, всади́ дре́во су́хо, и рече́ ему́: По вся дни напая́й се корча́гом воды́, до́ндеже плод сотвори́т. Бе же дале́че от них вода́, у́тре ити́, и приити́ ве́чер. И в тре́тие лето оживе́ дре́во, и плод сотвори́. И взем оте́ц плод его́, и принесе́ его́ в це́рковь, глаго́ля бра́тии: Прииди́те и яди́те плод сей послуша́ния.

Суть мно́зи глаго́лющии: Чему́ есть алчба́ чи́сто живу́щим? Но то есть изве́т сла́бых. Кто бе чи́стее Ада́ма? Но и того́ Бог не лиши́ поста́, е́же бо рече́ от всего́ дре́ва, су́щаго в раи́, я́сти, «от дре́ва, е́же ве́дети добро́ и зло, да не я́ста, рече́, от него́». О́браз же есть поста́. Да е́ ли то в раи́ бысть пост, то кольми́ па́че вне рая́? А́ще пре́жде я́звы тре́бе бысть зе́лие, то кольми́ па́че при я́зве? А́ще не уже́ на ны наше́дши бра́ни по́хотней тре́бе бысть ору́жие, кольми́ па́че ны́не, посреде́ ра́тий по́хотных нам стоя́щим? Разуме́йте же, кольми́ гне́вается Бог, похуля́ему посту́, кольми́ па́че лю́бит, посту́ че́стну быва́ющу. Не почте́ Ада́м поста́, те́мже услы́ша глас Госпо́день, реку́щь: «Земля́ еси́, и в з́емлю по́йдеши». Да разуме́ете, и ка́ко негоду́ет Бог, поста́ похуля́ет: но а́бие смерть нанесе́ на небре́гшая его́. Да разуме́йте си́лу по́стную. Пост бо научи́т ны обраща́тися, а́ки о по́лу пути́ иду́щими на смерть. И се же указа́ние не о двою́, ни о трие́х, но наро́д цел Ниневи́теск, град вели́кий, ма́ло у́бо не поги́бнущу ему́, обрати́шася на покая́ние, и чи́стый пост па́ки от самою́ руку́ поги́бельною изъя́т я́, и на живо́т я́ обрати́. Они́ же, не иму́ще зако́на, ни ведуще, са́ми себе́ бы́ша зако́н. Мы же ка́ко отме́щемся, о не́мже нам тма́ми указа́ния суть? Моисе́й бо проро́к, и Илия́, егда́ хотя́ста приступи́ти к Бо́гу бесе́довати, к посту́ прибе́гнуста пе́рвее, и рукама по́стными пригвожде́на бы́ста ему́. Алка́ же и Сам Госпо́дь Бог наш четы́редесять дний: не тре́буя поста́, но о́браз нам дая́ и побе́ду на всю си́лу диа́волю. Бо́гу на́шему сл́ава, ны́не и при́сно и во ве́ки веко́в. Ами́нь.