Стихи́:

Не бе́ла тя рука́, Мела́ние, ни черна́,

Бог же, а́ще умерла́ еси́, в живы́х тя пи́шет:

В три́десять пе́рвый оста́ви Мела́ние житие́.

Сия́ бя́ше в ца́рство Ону́риево, ро́да пресла́вна и све́тла. От всея́ же души́ Го́спода возлюби́вши, де́вствовати изво́ливши: но тоя́ роди́телие му́жа ей сопряго́ша, и двои́м отроча́тем ма́ти бы́вши. Та́же роди́телие ея́ и ча́да с супру́гом от жития́ отше́дшим, и она́ град оста́вльши, к вы́шним обхожда́ющи бя́ше, и вся́кий пост показа́ющи, и неду́жных врачу́ющи, и странноприходя́щих прие́млющи, и́же в темни́цах и во изгна́нии посеща́ющи. Посе́мже мно́гое стяжа́ние прода́вши, и двана́десять зла́тниц собра́вши, к монастыре́м и к це́рквам и к ни́щим истощеваше, и обои́ми де́ньми пи́щу вкуша́ше во всем свое́м житии́: в субо́ту и в неде́лю то́чию вкуша́ти. Зело́ благохудо́жне и благоуве́тливе живу́щи во Африки́и лет седмь, и мно́гое отложи́вши бога́тство, во Александри́ю идя́ше, и отту́ду во Иерусали́м, и в ке́лии себе́ затвори́вши, девяно́сто деви́ц собра́вши, вся́кая я́же на потре́бу им неоску́дно пода́вши. Одержи́ма же бя́ше и ре́бреною болез́нию, и зело́ немоществова́вши, и призвав́ши епи́скопа Елевфоропо́льскаго и прии́мши от него́ боже́ственое Причаще́ние, и поклони́вшися се́страм, последи́ изпусти́ глас: «Я́ко Го́споду изво́льшу, та́ко и бысть». И а́бие преда́сть Бо́гу дух свой.

Стихи́:

Верте́пом влеку́щим , Зо́тик ве́село тече́т.

Вод земля́ бе́рный же путь ше́ствую .

Сий бя́ше от ста́раго Ри́ма, ро́да че́стна и сла́вна. Из млады́х ногте́й всякой прему́дрости научи́ся, от е́же во царе́х у вели́каго Константи́на. В Константи́нь же град я́ко бли́жник преселя́ется, и маги́стр поста́влен бысть: с ним же и ини́и от про́чих Ри́ма сше́ствовавше, и и́же ору́жием иску́снии во бра́нех магистриа́н, и Павли́н его́ анепсе́й. Еще́ же и О́мврий, и Вир, Севи́р, и Каллистра́т, Флоре́нтий, Ариа́н, Анфи́мий, и Уврики́й, и Иси́дор, Евку́л, и Сампсо́н, Студи́й, и Феспе́сий. Зо́тик же и сей имени́т во благочести́вых до́мех их быв, да́же и до днесь нари́чется. Глаголется же, во дни ты́я, напа́сти неду́гу во гра́де бы́вшу: и повеление царю́ запове́давшу, я́ко и́же в таковы́й, и прокази́вый недуг впады́й, в мо́ре да вве́ржен бу́дет. И сие́ нетерпя́щу зрети, или́ слы́шати честно́му му́жу, но любо́вию боже́ственною ражже́гся, е́же доити́ до царя́ и рещи́ ему́: Даждь мне царю́ твоему́ рабу́ зла́та мно́го, е́же купи́ти тебе́ би́серы, и ка́мение честно́е, и све́тлое, в сла́ву и честь твое́й держа́ве, я́ко мно́го иску́сен есмь в сих. Царь же повеле́, а́бие та́ко тому́ бы́ти. Боголюбе́зный же он, и Бо́жий де́латель иску́снейший, взем зла́то изы́де с весе́лием и ра́достию: и е́же от епа́рха слуга́м предава́емых к поги́бели смертоно́снаго удавле́ния, избавл́яя бя́ше, зла́то слуга́м вдава́я, и искупу́я от сме́рти. И об он пол Византи́и в го́ру н́екую, я́же тогда́ Елео́ния нари́чема, та́мо о́нех отводя́ше: И се́ницы потче́, та́мо тех препокоива́ше. Сию́ Бо́гу приобрета́тельную ку́плю, во мно́зех не утаи́вшу, умноже́ния ра́ди их, е́же по вся дни подава́я бя́ше: И сему́ бы́вшу, гла́ду не ма́лу во гра́де бы́ти начина́ющуся. По преставле́нии же вели́каго, и присновоспомина́емаго царя́ Константи́на: Конста́нтий сын его́ все ца́рство неблагочести́вне содержа́, име́я в себе́ ариа́нство, мно́гих и́же от благочести́вых гла́дом измори́. Той и блаже́ннаго Зо́тика православна су́ща отвраща́шеся, и е́же к блаже́нному и преподо́бному любви́ свята́го Константи́на отца́ его́ оша́яся. При́тчу же не́коему вре́мени обре́т, укаря́ше его́ гне́вом неду́га де́ля боле́зненыя прока́зы, и посеще́ния ра́ди его́ мно́гаго исцеле́ния. Прилучи́жеся и царе́ве дще́ри в таковы́й неду́г впа́сти, я́же и предана́ бы́вши епа́рху своим ея́ отце́м, е́же погрузи́ти ю́ в мо́ре. Честны́й же Зотик дав по обы́чаю слуга́м и́скуп, и прии́м отрокови́цу, и заве́д к про́чым прокаже́нным причте́. Належи́мому же гладу бы́вшу, по попуще́нию Бо́жию, и о умале́нии потре́б Царя́ гра́да лю́дем оскуде́вшым: и царь окуша́шеся уве́дети гла́да вину́. Клеветницы́ же и врази́ и́стины, изобре́тше вре́мя, оболга́ша преподо́бнаго, и того́ пови́нника гла́ду бы́ти изве́ствоваху, я́ко прокаже́нным теле́сныя потре́бы подава́ющу ему́, мно́жеству без числа́ су́щым. Царь же сия́ слы́шав, ма́ло я́рость свою́ скрыв, доне́леже преподо́бнаго приведе́т, да не би́сер ра́ди, и честно́е ка́мение в разнь изгуби́т, оба́че науще́н быв от злово́льных муже́й, я́ти того́ повеле́. Преподо́бный же сие́ уве́дев, явлен́но прии́де к царю́. Царь же ми́рно к нему́ рече: Прише́л еси́ магистриа́не, и́же би́сери и све́тлое ка́мение принесы́й. Он же рече́: Дойде царю́ кора́бль, и́же таково́е бога́тство яково́ име́я: да а́ще во́лиши изы́ти с рабо́м твои́м, е́же ви́дети его́. Царь же не разложи́в, ше́ствие нача́т твори́ти. Блаже́нный же Зо́тик предвари́в в Елео́нию, и Христо́ве бра́тии повеле́ от коли́б изыти со дще́рию царе́вою, в сря́щу ему́ со свеща́ми све́тлыми. Царь же до ме́ста доше́д, и ви́дев прокаже́нныя свещы́ нося́ща, и почуди́вся мно́жеству, и рече́: Что си́и суть? Он же пе́рстом показа́в, си́и суть царю́ честно́е ка́мение, и пресве́тлии би́сери, ихже искупи́х с трудо́м и придобы́х. И царь игру́, и поруга́ние вещь вмени́в, и я́ростию распали́вся, повеле того́ привяза́ти к ди́виим мскам, и гони́ти мски, я́ко да от ка́мения та́мо су́щаго удесе́м его́ ну́ждею расте́рзаным бы́ти, и живота́ лиши́тися. Сим же вско́ре бы́вшым, и мскам от слуг остны́ бодо́мым, ну́жно свята́го с горы́ совлеко́ша. Те́мже и удеса́ его́ на соста́вы растерза́шася, и о́чи изъя́ты бы́ша, иде́же и ко́сти его́ разсы́пашся. И исто́чник искипе́ воды́ чи́сты и сла́дки, и́же и цельбу́ творя́т е́ю на вся́ку я́зю и боле́знь, в хвалу́ и сла́ву Щедролю́бца Бо́га, и Его́ уго́дника. Да внегда́ расто́ргнуту бы́вшу блаже́нному, ду́шу свою́ Го́сподеви предаде́, и а́бие мски ника́може поступи́ша: и мно́го от слуг бие́мы и бодо́мы, челове́ческим гла́сом в слух всем, царе́во суровство́, и безслове́сие облича́ху: сле́па того́ и нечу́вствена нареко́ша. Преподо́бнаго же на том ме́сте погребсти́ повеле́ша. Сия́ царь ви́дев и слышав, и у́жасом ду́шу испо́лнив, слеза́ми го́рькими Бо́гу мил ся де́яше, и ве́лия благодаре́ния Бо́гу о чудесе́х вопия́, я́же от него́ соде́лавшымся. И а́бие повеле́ с прилежа́нием мно́гим, преизящною че́стию те́ло погребсти́ му́ченичо. И ско́рым тща́нием воздви́гнути прокаже́нным дом, от ца́рских пала́т бога́тство мноѓо дав, и прехо́ды и врата́, и подтверже́ния вся́кая упра́вив, и огради́в со вся́кою тверды́нею. Честны́й же Зо́тик от тогда́ и досе́ле, благода́тию Человеколю́бца Бо́га, неоску́дно де́йствуя чудеса́ не престае́т. Соверша́ется же собра́ние его́ в честне́м апо́стольстве свята́го апо́стола Па́вла, су́щаго в нищепит́ательстве.

И́бо той Нафа́н проро́к рече́ при́тчею ино́ю к Дави́ду, от нея́же учи́т, я́ко по вели́цей напа́сти ключи́ся Дави́ду согреше́ние. Предста́вити же сло́во, я́ко не в лице́ и́но, ни пред все́ми людми́ обличи́ его́, но вшед рече́ к нему́. Не то́кмо е́же о нем испове́дает согреше́ние, но и и́же по нем челове́ком псало́м написа́в, рече́, «внегда́ вни́де к Вирсави́и». Егда́ же вни́де к нему́ Нафа́н проро́к, его́же ра́ди сему́ лука́вому о́тдану бы́ти ему́, еди́наго ра́ди гла́са о́наго, е́же рече́: «Аз рех во оби́лии мое́м, не подви́жуся во ве́ки». И се у́бо велему́друя таково́е изнесе́ сло́во, я́ко никогда́же подвижа́тися, пребыва́ти же непрело́жно, и безстра́стно во оби́лии его́. Претя́жко быти и величав́у, и неподо́бну: е́же «а́ще не Госпо́дь сози́ждет дом, всу́е труди́шася зи́ждущии». Но у́бо святы́й апо́стол сия́ све́дый, не дерзну́ рещи́: Не подви́жуся во ве́ки. Печа́шежеся глаго́ля: «Да не ка́ко ины́м пропове́дав, сам неиску́сен бу́ду». И поуча́ет, глаго́ля: «Никто́же да похва́лится в челове́цех». Хваля́йжеся, о Го́споде да хва́лится. И мнит себе́ стоя́й, да блюде́тся, да не паде́т. Разуме́ем же у́бо бра́тие, ка́ко Дави́д еди́нем сло́вом похвали́вся, согреши́: того́ ра́ди и диа́вол пропя́ ему́ сеть согреши́ти с Вирсави́ею: но оба́че возне́сся, смири́ся, и пост взя.

Кольми́ нам бра́тие подоба́ет смири́тися пред Бо́гом, ни тщесла́вием возноси́тися, да не напо́лним собо́ю гее́нны. Помяне́м а́лчныя, и́же хо́дят в нищете́, ка́ко скитающеся, и ка́ко мр́азом скляче́ни, и померза́еми, и гла́дом, и нагото́ю томи́ми, покро́ва же не иму́ще - ктому́ же и от нас презира́еми бе́яху. Но а́ще хо́щет Бо́га ми́лостива себе́ сотвори́ти, введе́м в до́мы своя́ таковы́я, положи́м на них любо́вь вели́ку, и не отча́ем своего́ спасе́ния, да тем улучи́м ми́лость в день су́дный Го́спода на́шего Иису́с Христа́.