Стихи́:

Фео́дор сый саном стратилат,

Изво́ли посе́чен бы́ти, Бо́жий воево́да:

Точа́щу вы́ю Феодорову во осмы́й отсеко́ша.

Сей бя́ше во времена́ Ликини́я царя́, ро́дом сый от Евхаи́т. Житие́ же име́я проти́ву По́нта Иракли́йскаго. Доброду́шен и красе́н ви́дом теле́сным, и кре́пок сый в словесе́х, и вси любоче́ствоваху его́, хотя́щии любве́ его́ бесе́довати. О сем и Ликини́й мно́го тща́шеся с ним бесе́довати. И зане́же слы́шав христиани́на того́ бы́ти, и глаго́лемых бого́в гнушатися, те́мже и не́кия от Никомиди́и того́же чи́на посла́в, с честию му́ченика привести́ повеле́. Возврати́ же их блаже́нный Фео́дор, рек к ним: я́ко паче подоба́ет царю́ самому́ приити́ с бо́льшими свои́ми. Царь же слы́шав, а́бие во Ира́клию по́йде. Святы́й же Фео́дор нощны́ми явле́нии, от Бога тому по́сланым бы́вшым, к дерзнове́нию и безстра́шию уготовля́шеся, и подтвержа́шеся. Вне́гда же уве́де, я́ко прибли́жися Ликини́й, всед на коня́, сре́те его́, и подо́бне почте́ его́ ца́рски. Царь же вшед во град моля́ше святаго пожре́ти бого́м. Он же испроси́ е́же учреди́ти я́ пе́рвее в дому свое́м, и прии́м сокруши́ их, и разда́ ни́щым: сего́ ра́ди мно́го му́чен быв. Последи́ же отсекоша главу́ его́. Честно́е же те́ло его́ прине́сше по повеле́нию свята́го, и положи́ша во Евхаи́тех.

Стихи́:

Коня́ сматря́ше небе́сныя, мы́сли Заха́рия,

И́миже к высоте́ небе́сней возше́л еси́ при́сно.

Сей толку́ется «Па́мять Бо́жия», и́же бя́ше от ро́да Изра́илева, пле́мене Леви́ина. Роди́ся же в Галаа́де, прии́де же в зе́млю Халде́йскую уже́ стар сый: и та́мо сый мно́гая лю́дем проро́чествова, и мно́га в явле́ная пода́в. Сей рече́ Иоседе́ку: я́ко роди́ши сы́на, и во Иерусали́ме святи́тельствовати и́мать Го́сподеви. Сей и Салафи́иля благослови́ о сы́не глаго́ля: я́ко роди́ши сы́на, и нарече́ши и́мя ему́ Зороваве́ль. И о Ки́ре царе́ Пе́рсстем зна́мение даде́, и о поруче́нии Иерусали́мове, и о сконча́нии Изра́илеве, и о зача́ле и конце́ язы́честем, и о церко́внем развраще́нии, да́же и до конца́, и о закосне́нии проро́честем, и иере́йских суббо́тах, и о сугу́бнем суде́ изложи́. И и́ная мно́гая проро́чествоав, у́спе в глубо́цей ста́рости.

Глаго́лаху о отце́ Зино́не, я́ко живы́й в ски́те, и изыде но́щию из ке́ллии своея к бра́ту, и заблуди́вся сотвори́ три дни и три но́щи ходя́, и от труда́ пад изнемо́г, и умре́ти хотя́ше. И се отроча́ ста пред ним имы́й хлеб и ча́шу воды́, и глаго́ла ему́: воста́ни, и яждь, и пий. Он же воста́в помоли́ся, и мнев я́ко привиде́ние есть. Отроча́ же рече́ ему́: до́бре сотвори́л еси́. И па́ки второ́е помоли́вся, и тре́тие. И рече́ ему́: до́бре сотвори́л еси́. Он же взем хлеб и яде́. И по сих рече́ ему́: ели́ко ходил еси, толи́ко дале́че от хи́жи твоея́, но воста́в после́дуй ми, и а́бие обре́теся в хи́жи свое́й. И рече́ ему́ ста́рец: прииди́, и вле́зи, и сотвори́ моли́тву нам. И вле́зшу ста́рцу, он же отъи́де неви́димо.

Держи́ бога́тство е́же тебе́ Бог даде́, а не храни́ его́ неви́димо. А́ще ли ти возмо́жно и жела́еши безпеча́лия, Христа́ же еди́наго держа́ти, то отве́рзи име́ние, и бу́ди без печа́ли вы́ну. А́ще ли та́ко, то и в миру́ не бу́деши лише́н ми́лости Бо́жия. Но рцы к Бо́гу: По ми́лости Твое́й спаси́ мя. И он отвеща́ет ти: По ми́лости твое́й спасу́ тя. Не рцы, име́ние мое́ есть: но глаго́ли: поруче́но ми есть на ма́ло дний. И я́ко ключа́рь порученое раздава́й, а́може ти повелел́ Поручи́вый ти. Те́мже еже ти есть дал Вы́шний, то Вы́шняго повеле́ние твори́ в нем. Не оставля́й послед́нему ро́ду твоему́, но де́ти твоя́ и жену́ твою́, поручи́ Бо́гу до́брому Блюсти́телю, Его́же ми́лость вели́ка, и бога́тство неcве́домо ни издае́мо. Име́ние све́та сего́ реце́ подо́бно есть, сю́ду отъи́дет в низ, и па́ки с верху́ прихо́дит. Те́мже еда́ вы́шнии гра́ждане от реки́ сосу́д свои́х не наполня́ют ли, и скота́ своего́ не напоя́ют ли, реку́ще: я́ко ни́жним гра́жданом оста́вим, и са́ми ма́ло прии́мем? Ни у́бо, но до избы́тка че́рплют, а ни́жними не пеку́тся: та́же бо река́ мину́ет я́. Та́коже и о име́нии не пецы́теся после́дними сы́ны, и вну́ки, и дще́рьми: тем бо и́нако вре́мя ключа́ется, или́ напа́сть, или́ татьба́, или́ мяте́жь усо́бичный, и тогда́ изгу́бленое име́ние не оста́нет помога́я житию́ в напа́сти той. Ны́не же тебе́ тре́бе есть Христа́ хвали́ти да́вшаго тебе́. Та́ко и тем к Бо́гу подо́бно есть взира́ти, я́ко да препита́ет я́ в глад. Те́мже в животе́ твое́м о твое́й души́ размышля́й, и то́ю кре́пко пецы́ся, я́ко еди́на ти есть душа́, еди́но вре́мя живота́, и еди́на смерть. Те́мже собо́ю поболи́, собо́ю поскорби́. И зде проще́ния грехо́в проси́, а на исхо́д провожде́ния, еже изба́витися от бесо́в. И та́мо прише́дшу, ка́ко бы во угото́ванное приити́ Ца́рствие Бо́жие от ве́ка, и в пала́ты Его́ учине́ны све́тлы су́ща, а́ще зде купи́л я́ бу́деши. А́ще бо бога́тством ми́ра сего́ купи́ти, еди́ну от ме́ньших хи́зин Вы́шняго Иерусали́ма, то ни всего́ ми́ра бога́тство со́бранное, недосто́йно есть цены́: ми́лостынею же ку́пится Ца́рство Небе́сное. Ми́лостыня же ни в вели́цем, ни в ма́лем дая́нии лежи́т, но по си́ле даю́щаго всем се́рдцем. Дая́ние бо тре́бующым, то есть ми́лостыня блаже́нная она́, ея́же бе́ша по́лни сосу́ди о́нех пяти́ дев мудрых, и́мже Ца́рство отве́рзеся. Ту же ми́лость и ты приими́ неотсту́пно, и навяжи́ ю́ на твое́й вы́и, да бу́дет вы́ну с тобо́ю. Глаго́лют бо кни́ги: Милостыня му́жу, а́ки печа́ть с ним. Тем а́ще ту приимеши, ни еди́н же от сопроти́вных востя́гнет тя, ни рече́т ти: Ка́мо и́деши? Ви́дя тя я́ко Царя́ небе́снаго печа́ть но́сиши, и к Тому́ и́деши. Ему́же сла́ва, ны́не и при́сно, и во ве́ки веко́в. Ами́нь.