Стихи́:

И́же от пе́рвие нарече́ннаго Ники́фора

Посе́ченнаго познавай и де́тельнаго победоно́сца:

Ме́чным острие́м в девя́тый Ники́фору вы́ю пресеко́ша.

Сей святы́й му́ченик бя́ше во времена́ Уаллериа́на и Галии́на царе́й, препро́ст обы́чаем. Я́ту же бы́вшу Сапри́кию пресви́теру церко́вному на истяза́ние, и́бо имя́ху ку́пно любо́вь Ники́фор же и Сапри́кий. И не́которым вра́жиим наве́том вниде вражда между́ их, и многими му́ками Сапри́кий му́чен быв, и близ венца быв, и возда́ния угото́ванных, внегда́ же хотя́ше посе́чен быти, обнажи́ся по́мощи Бо́жия, и плещи́ враго́в вдав, бесо́м пожре́. Внегда́ же тому́ веде́ну быти на посече́ние, и венцу сподо́битися, предте́кшу Ники́фору, и два́жды, и три́жды, и мно́гажды, припа́дая и прося́ просты́ню, и Христо́в зако́н тому́ воспомина́я преложе́ния деля. Он же не покори́ся, и досто́йно я́ко недосто́йно свиде́тельству и любви́ разсуди́ бы́ти, и испаде́ стра́стный и окая́нный от таковы́я Бо́жия благода́ти. Ви́дев же Ники́фор окая́нство его́, я́ко ма́лыя ра́ди ми́лости от такова́го са́на испа́дша, предаде́ себе́, и Христа́ со дерзнове́нием испове́дая: и повеле́нием мучи́теля отсеко́ша главу́ его́, и сугу́б вене́ц от Бо́га восприя́т.

Стихи́:

Отреши́вшеся му́жие три от плотски́х крове́й,

Еде́мстей пи́щи причасти́вшеся.

Стихи́:

Си́и ученицы́ бы́вше свята́го апо́стола Петра́, еще́ Христу́ ходя́щу теле́сно по земли́, и чудоде́йствующу. Марке́лл же слы́шав, прии́де от Антиохи́и в Иерусали́м с Пагкра́тием ви́дети его́, и от тогда́ у́бо Пагкра́тий позна́ся со святы́м Петро́м. И по воскресе́нии Христо́ве после́дствоваше ему́, и поста́влен бысть от него епи́скоп Тавромени́йский, и бя́ше служа́ о и́мени Христове, и убие́н бысть тай от е́ллин. Та́коже и Марке́лл поста́влен бысть Сикели́йский епи́скоп, и мно́жество неве́рных обрати́ ко Го́споду, и сконча́ся. Та́коже и Филагри́й в Ки́пре архиере́йствоав, уча́ и той о и́мени Христо́ве. И мно́ги напа́сти претерпе́в о и́стинней ве́ре, ко Го́споду отъи́де.

Брат не́кий востанли́в бе в ски́те, и вложи́ ему́ враг па́мять не́кия жены прекра́сны, и оскорбля́шеся зело. И шед от Еги́пта в скит ин брат, и прии́де к нему́. И по смотре́нию Бо́жию глаго́лющема и́ма, рече́ та́ко: Я́ко жена́ сего́ му́жа у́мре, не ве́дый же я́ко ея́ ра́ди брат востанлив́ый приима́ше брань от неприя́зни. Он же слы́шав, и прия́ ле́нтий свой, и но́щию изше́д, и отве́рзе гроб ея́, и потре́ гной ея́ ле́нтием и возврати́ся, имы́й его́ в ке́ллии свое́й, и полага́я смрад той пред собо́ю, и боря́шеся с мы́слию глаго́ля: се по́хоть ю́же иска́л еси́, и́маши е́ю насы́титися, и насы́тися ея́, и та́ко смра́дом му́чашеся, до́ндеже преста́ брань от него́.

Я́ко два разбо́я еста́: еди́н, и́же совлачи́т со убо́гаго, а други́й, и́же не оде́ждет убо́гаго, а име́ет име́ние, той есть и́стинный разбо́йник. Я́ко да напису́ется в твое́й мы́сли всегда́ второ́е прише́ствие, и стра́шная о́на та́йна, Судия́ стра́шен на престо́ле седи́т, и кни́ги разверза́емы, дело́м та́йным облича́емым: блуже́ния, любодея́ния, татьбы́, грабле́ния, лихоима́ния, хулы́, клеветы́, за́висти, разбо́я, безче́стия. Сия́ вся помы́сли, и к сим огня́ негаси́маго клоко́чуща, и тмы а́нгел о́крест престо́ла предстоя́щих, и челове́ческий весь род испыта́емь, и сло́во о сотворе́нных отдаю́щь, от пра́ведных гре́шницы разлуча́емы, и вся внеза́пу гре́шником случа́ющаяся. И я́ко кро́тость, и пра́вда, и му́дрость, ми́лостыня же, и ти́хость, и е́же в беда́х терпе́ние, и про́чыя до́брыя де́тели, иму́щыя их в небе́сное вво́дят Ца́рствие. Ко́рень же всех благи́х зна́ется алчба́: я́коже ко́рень всех до́брых алчба́ есть, та́ко путь есть всех злых пи́ща. Я́ко не досто́ит злосло́вити му́жа пра́ведна, клеве́щущии бо и ненави́дящии Бо́жия рабы́, во Христа́ согреша́ют. Я́ко душа́ угожда́ющая челове́ком, и тех сла́вы жела́ющая, не у́зрит Ца́рства небе́снаго, а́ще и до́брыя де́тели вся твори́т. Я́ко треми́ вина́ми вся́ка душа́ слове́сная Бо́гу прилепи́тися мо́жет: или́ теплото́ю ве́ры, или́ стра́хом, или́ наказа́нием Госпо́дним. Я́ко смире́ния верх есть, е́же терпе́ти ло́жныя клеветы́, и напра́сныя глаго́лы с ра́достию. Я́ко пои́стинне смиреному́дрый оби́димь не смуща́ется, ни веща́ет у́тро, зане́ оби́ден бысть: но прие́млет на ся клевету́ я́ко и́стину, и не пече́тся препре́ти челове́ки, я́ко оклевета́н есть, но проще́ния про́сит. Не́цыи бо имя хул́ьно на ся наложи́ша, а не су́ще такови́. Ве́домо есть, яко и́нако врачу́ется блудни́к, и́нако уби́йца, и́нако же чароде́й, и́нако лихои́мец. И́нако врачу́ются та́тие, и́нако любоде́йцы ле́чатся, и́нако пия́ницы. Сего́ рад́и мно́гия хи́трости потре́ба есть стро́ящему слове́сныя о́вцы, я́ко подо́бная стру́пом прилага́ти бы́лия. Бо́гу на́шему сла́ва, всегда́, ны́не и при́сно и во ве́ки веко́в. Ами́нь.