Стихи́:

К боже́ственным пре́йде Кассиа́н мы́слем,

Боже́ственных мы́сленне уха́ния возды́шет:

Оста́вив земна́я, к небе́сным пре́йде,

Оста́вив нам своя́ доброде́тели,

Я́коже Илия́ Елессе́еви ми́лоть свою́:

От послуша́ния к разсужде́нию дости́же,

От того́же ко смире́нию,

Та́же и на верх доброде́телем взы́де,

Любви́ прилепи́ся, е́же есть Бог,

Отню́дуже я́ко досто́ин вверя́ется пасти́ стадо́

И возведе́н бысть я́коже други́й Моисе́й на нача́льственное свети́ло,

И́хже упасе́ в преподо́бии и пра́вде,

О́браз и прописа́ние доброде́телей тем себе́ предложи́в:

И ны́не на небесе́х предстои́т Престо́лу всех Царя́ Христа́,

Сий же, от ве́ка Ему́ благоугоди́вшими, того́ чи́сте зря

И наслажда́яся того́ добро́ты и красоты́, его́же возлюби́,

И́же есть весь Сла́дость, и Жела́ние, и Любо́вь вои́стинну ненасыща́емая:

И я́же отту́ду све́том осия́емь,

Ку́пно же и о нас моля́ся,

Прине́с Тому́ да́ры: душа́, честне́йши па́че перси́дских царе́й,

И со дерзнове́нием вопия́ и глаго́ля:

Се аз и де́ти, я́же ми дал еси́.

Сей бя́ше от Ри́ма от роди́телей сла́вных и све́тлых, и́же в нача́ле живота́ своего́ имя́ше вели́кую любо́вь о тща́нии и словесе́х. И про́чее тща́нием свои́м и острото́ю естества́ своего пройде вся́кое е́ллинское наказа́ние, поуча́яйся соверше́нно о филосо́фии и звездозако́нии. Навы́к же до́бре и боже́ственному писа́нию, и позна́в опа́сно и кра́йней, и украша́яй живо́т свой де́вством и чистото́ю, отше́д от оте́чества своего,́ и прише́д в скит быва́ет мних. И дая́ себе́ во еди́ном монастыре́, обуча́яйся во вся́ком послуша́нии, и навыка́яй отту́ду вся́кому жестокожи́тию, и дости́г от мно́гаго послуша́ния в кра́йней разсужде́ние, прихо́дит в безмо́лвие. И творя́ та́мо мно́га ле́та, и изнури́в себе́ вся́ким бе́дством, пре́йде в вя́щшее искуше́ние и обуче́ние. Отше́д у́бо от безмо́лвия, прехо́дит вся монастыри́ всего́ Еги́пта, и Фиваи́ды, и го́ру Нитри́йскую, и Аси́и, и По́нта и Каппадоки́и, и всея́ Анато́лии. От ни́хже собра́ жития́ всех отце́м, и о́бразы, и пребыва́ния, и обуче́ния, вя́щше не́жели собира́ет воск о́бразы пе́рстенныя. И сие́ явля́ют изображе́ния я́же писа́шася от него́, я́же суть испо́лнена вся́каго опа́сства, и прему́дрости, и по́льзы. Списа́шася же от него́ и ина́я подо́бная уче́ния, я́же а́ще чтет кто со смотре́нием и прилежан́ием, уплоди́тся от сих, и во́змет мно́гую по́льзу, и позна́ет от сих и житие́ и обы́чай списа́теля. Си́це у́бо пожи́в чу́дный сей муж, и си́це жи́тельствовав, к та́мошним пре́йде оби́телем.

Стихи́:

Испо́лнив зе́млю пе́сньми подзе́млеными Иоа́нн,

А́ще и на не́бо восхо́дит, спасти́ся хотя́:

Иоа́нн преподо́бный ро́дом бе палести́нянин, крести́ся же сый лет осмина́десяти, и бысть мних. И за мно́гую его́ доброде́тель бысть архиепи́скоп в Дама́сце. И ма́ло вре́мя пребы́в, и разсмотри́ я́ко погуби́ по́льзу мона́шескаго жития́, оста́вль епи́скопию утаи́вся всех, и́де во Александри́ю. И отту́ду в Нитри́йскую прии́де го́ру, яко еди́н от убо́гих сиро́т, и поклони́ся игу́мену, да прии́мет его́ на служе́ние ста́рцем. И той прии́м его́, даде́ ему́ мни́шеский образ. И бе служа́ во дни на бра́тию, а в нощь без сна на моли́тве пребыва́ше. По у́треницы же взе́мля во всех мона́шеских ке́ллиях ты́квы и корча́ги, и ходя́ к реце́ почерпа́ше, и к коего́ждо ста́рца ке́ллии принося́ поставля́ше. Еди́н же мних несоверше́н умо́м, мно́ги па́кости де́яше ему́, и укори́зненными именова́ньми нарица́я его́, и помо́ями облива́ше его. Еще́ же от науче́ния диа́воля проверте́ сте́ну ке́ллии его́, и испуща́ше водны́й исхо́д в рого́зину его, и бя́ше всегда́ смердя́. И сия́ уве́дев игу́мен, призва́ злоде́йца брата, хотя ́казни́ти его́. Варсоно́фий же пад моча́ше но́зе игу́мену слеза́ми, на ся вину́ возлага́я глаго́лаше: Аз у́бо вопреки́ хожу́ бра́ту, отда́ждь ему́ Го́спода ра́ди – и та́ко изба́ви его́ от вины́. Уве́ден же бысть от преподо́бнаго Фео́дора Нитри́йскаго, остави го́ру, и бежа́ во Еги́пет. И та́мо прия́т дар прозорли́вый, я́ко и по́мыслы челове́ческия ве́дати. Свободи́ же це́рковь от ерети́к, и мно́ги душеполе́зныя написа́в кни́ги. И с ми́ром у́спе о Го́споде.