Стихи́:

Пости́вся ку́пно и спострада́в Проко́пию,

Вопие́т: Сла́ва Тебе́, Христе́ Бо́же!

Сей бысть в ца́рство Льва иконобо́рца, оста́вль же мир, и я́же в ми́ре, и бысть мних. До́бре пе́рвее пости́вся, и о изверже́нии святы́х ико́н со тща́нием сопроти́вися иконобо́рцем. Тем и ят быв, и мно́го му́чен, и не покори́ся им: но и́стину пропове́даше да́же и до сме́рти, побо́рника име́я боже́ственнаго Проко́пия. Стро́ган же бысть святы́й Васи́лий по всему́ те́лу, и по вы́и, и темни́це пре́дан быв. Мучи́телю же уме́ршу, пуще́н бысть, и изы́де из темни́цы, подо́бному прилежа́ше житию́, и к доброде́тели мно́гих наставля́я, и к правосла́вней ве́ре приводя́. В разли́чных вре́менех до́бре ше́ствуя к Бо́гу, Его́же измла́да возлюби́, ра́дуяся и благодаря́ отъи́де.

Стихи́:

Проте́рие тро́стием закла́н быв,

Скоропи́сец трость сый на пре́лесть:

В два́десять осмы́й закла́н бысть Проте́рие тро́стием.

Сей блаже́нный презви́тер бя́ше Александри́йския це́ркве. И до́йде в Константи́нь град со алекса́ндряны. И святы́м отце́м сше́дшымся на злочести́выя еретики́, и той сподвиза́вся, епи́скоп собо́ром поставля́емь. Крамоля́щымся же ели́цем Евти́хиева му́дрствующым случа́ющымся, и житопосла́ние преще́нием запрети́вшым. Благочести́вый же царь Маркиа́н, не во Александри́ю жи́ту поити́ оста́вль, но в Нилуси́ю завести́ Ни́лом повеле́но бысть. Сим алекса́ндряне загла́дневше, хода́тая архиере́я мольбу́ слы́шав, па́ки во Александри́ю поити́ жи́ту повеле́. По сме́рти же благочести́ваго царя́ Маркиа́на, Тимофе́й не́который порекло́м Елу́р, безлу́нную не́кую нощь смотри́в, мона́шестующих ке́ллии обшед безвре́менно, а́нгела себе́ наре́к, и́же и отступи́ти приобще́ния Проте́риева снабде́. Они́ же я́ко у́жастию прельще́ни бы́вше, крамолу́ на архиере́я подвиго́ша. Он же бежа́, и ви́де боже́ственнаго проро́ка Иса́ию глаго́люща ему́: возврати́ся, аз жду восприя́ти тебе́. Се же являше ему́ ну́жную кончи́ну. Возврати́вся же у́бо, и во святу́ю купель вшед, та́мо от о́нех о́стрыми тростьми́ закла́н быв. И та́ко сей архиере́й Бо́жий таково́ю сме́ртию обложе́н, взы́де на небеса́: вене́ц восприи́м от страстополо́жника Бога. Егда́ же в его́ ме́сто поста́виша прельсти́вшаго их Тимофе́я, недосто́йна су́ща на архиере́йский престо́л, уве́дев и́же по Маркиа́не ца́рствуяй Лео́н, того Тимофе́я епи́скопом повеле́ по пра́вилом суди́ти, его́же со архиере́йства обнажи́вше. Та́же в Га́нгру прогна́вше. Люди́ны же приобщи́вшыяся уби́йству Проте́риеву, бие́нием и пха́нием, и отсече́нием уде́с царь наказа́в. Друга́го Тимофе́я Салофакиоли́я нари́чему, му́дра правосла́внейша, святи́в во Александри́ю посла́. Тому́ же бы́вшу, и крамола́ коне́ц прия́т.

Пове́даше Иулиа́н мона́х о себе́, я́ко седя́щу ми во стране́ свята́го Иорда́на в верте́пе мое́м: Во еди́н же от дней полу́дне зно́ю су́щу вели́ку, возклепа́ не́кто в верте́п мой, и изше́д ви́дех жену́, и рех ей: Что ты зде еси? Она́ же отвеща́вши рече́ ми: Го́споди о́тче и аз в пусты́ни сей жи́ву, я́ко по́прище еди́но от верте́па твоего́, иму́щи верте́п мал. Показа́ же ми и ме́сто на юг, и рече́ ми: Я́ко преходя́щи сию́ пусты́ню возжада́хся от лю́таго зно́я, сотвори́ любо́вь о́тче, даждь ми ма́ло воды́. И изне́с ты́квицу воды́ дах ей, и пи́вши ей, отпусти́х ю́. И по отше́ствии ея́, нача́ диа́вол подстрека́ти мя на мысль блу́дную, и одоле́н быв, не мого́х терпе́ти разжже́ния: и взем жезл мой, изыдо́х из верте́па в зной, и поидо́х к ней по́хоть свою́ хотя́ сконча́ти. Бы́вши же ми на до́лзе по́хоти и паля́щи мя, бых в восто́рзе, и в́идех зе́млю отве́рзшуся, и ви́дех ту тлю слежа́щу мертве́ц изгни́вших, и смра́да многа испо́лнены. И ви́дех не́коего во иере́йстем оде́жди, показу́юща ми телеса́ и глаго́люща: сие́ те́ло же́нское, а сие́ му́жеское, насы́тися у́бо по́хоти твоея́ от них: Ти́и бо вси та́же сотво́рше умро́ша, и телеса́ их разсы́пашася при а́де, и ду́шы их в гее́нне му́чимы суть. Да такова́го ли ра́ди вожделе́ния толи́ки труды́ хо́щеши погуби́ти, и греха́ сего де́ля сам ся хо́щеши Царства небе́снаго лиши́ти, и о сем окая́нне му́чен быти? О́ лю́те сла́бости челове́чи, еди́наго ра́ди часа́ веч́ных благ лиша́ются! Аз же от смра́да падо́х на зе́млю. И присту́пль яви́выйся мне, воздви́же мя, и брань вра́жию утоли́ ми. И идо́х на ме́сто свое́, хваля́ Бо́га спа́сшаго мя от греха́ и от го́рькия му́ки, ю́же ви́дех угото́ванную блуднико́м: и сия́ пове́даю вам.