Стихи́:

О ка́ко сконча́ся Феопе́мт, да рече́м:

Стра́нно сконча́ся, главе́ отсе́чене мече́м:

Положи́ша мя, взыва́ше псалты́рски,

В рве, Фео́на му́ченик, преиспо́днем.

Сей святы́й му́ченик Феопе́мт епи́скоп бя́ше при Диоклитиа́не цари́. Внегда́ же от него́ подви́гшуся гоне́нию, пе́рвее Христа́ Бога пропове́дав, и венце́м побе́дным увязе́ся. Ят же быв и приведе́н царе́ви, и обличи́в пре́лесть его́, в пещь о́гненую вве́ржен бысть, и здрав от нея́ изы́де. Та́же о́ко ему́ избодо́ша. По сих же обая́ния бы́льная напои́ша его́, и я́ко невреди́м от сих пребы́в, и приведе́ ко Христо́ве ве́ре напои́вшаго его́ волхва́, Фео́ну нарица́емаго. И ина́я же к сим не́кая пострада́в, отсеко́ша главу́ ему́. Фео́на же разсе́лине кото́рей бы́вши изобре́тене, и та́мо вве́ржен с горы́, пе́рьстию низ главу́ посы́пан, ко Го́споду отъи́де.

Стихи́:

Сигклитики́я оста́вльши красоту́ жите́йскую,

Зва́ным Бо́жиим рабо́м на небеси́ сопричте́ся.

Та бя́ше ро́да че́стна, бога́тство и благоче́стие наро́чито име́ющих. И цвету́щаго ра́ди ея́ взо́ра, и бога́тства стяжа́ния, мно́гим хотящым к бра́ку поя́ти ю́. Она́ же па́че ко Го́споду свою́ любо́вь издава́ше. Тем коне́чное от молв жите́йских пресе́льшися, и тща́ние посту́ доброде́тельному и труду́ пода́вши. [Тем] низложи́ подви́жника ра́тнаго, к теле́сному спряже́нию. Ум к Бо́гу впери́вши, и к концу́ жите́йскому, от искуша́ющаго проси́ма бы́вши. И́бо вели́кому И́ову лю́тыми и теле́сными неду́ги уподо́бльшися, и стру́пными и теле́сными неду́ги объя́та бы́вши, и я́звами и червьми́ все те́ло ея́ издолбле́но и изъяде́но бысть. И осми́десятим ле́том бы́вши, и труда́ доброде́тельнаго ника́коже оста́вльши, в страда́льческих по́двизех ко Го́споду отъи́де.

Стихи́:

Григо́рие в доброде́телех просия́ вельми́,

Светле́е преста́вися и вели́кую прие́млет сла́ву.

Сей бя́ше ро́дом от того́ преди́внаго о́строва Кри́тскаго. Роди́теля его́ благочести́ва бе́ста, Феофа́н, и Иулиани́я нар́ичема. Пребы́сть же мн́ога ле́та в кни́жнем уче́нии, роди́телема си воспита́н. И пасти́ тому́ роди́тельми повеле́но бысть скоты́. И не́когда ре́вностию боже́ственною распали́вся, прине́сшую к нему́ ядь взем, и в Селевки́ю по́йде: и та́мо вре́менем не ма́лым походи́, хле́бом ма́лым и водо́ю живя́ше. И в двадеся́тое лето во́зраста своего, внегда́ Лев иконобо́рец живота́ лиши́ся, и правосла́вие наста́, во Иерусали́м отъи́де, всем святы́м ме́стом та́мо поклони́тися. Ели́ка же у́бо зла от ага́рян, и от евре́й за двана́десять лет подъя́т, немо́щно есть писа́нию преда́ти. Та́же отту́ду воста́в, по́йде в Рим, и а́нгельскую воприя́т схи́му: бя́ше же друча́ свою́ плоть воздержа́нием. Внегда́ же ца́рствие по уме́ртвии Ставрики́еве, сы́на Ники́форова Ге́ника, Михаи́л Рагкаве́й восприя́т, Ники́фору и́же во святы́х корми́ла пра́вящу церко́вная, по́слан бысть Михаи́л испове́дник епи́скоп Сина́дский ко свято́му па́пе. И блаже́ннаго сего́ Григо́рия получи́в, в Константи́нь град иды́й, с собо́ю соврати его́. И в благочести́вей оби́тели, и́же во Акри́те, приве́д предаде́ и́, и та́мо су́щым совокупи́. И пребыва́ше ходя́ в еди́ной ри́зе и бос, и на рого́зине возлега́я: ма́ло хле́ба и воды́, за два или́ за три дни вкуша́ше. И в ров глубо́кий себе́ ври́нув, и о бы́вшей молве́ в це́рквах за мно́гая времена́ бя́ше пла́чася. И отту́ду изше́д, зело́ в те́сне ке́ллии себе́ затвори́в, в еди́ной то́чию ко́жней ри́зе оде́ян. И скуде́льнциу при огра́де стоя́щу, и ту́ю воды́ наполня́я, и ри́зу ве́чер совлача́ вхожда́ше внутрь, и соверша́ше Псалти́рь, и та́ко а́бие исхожда́ше. И та́ко до́брым по́двигом подвиза́вся, в ру́це Го́сподеви ду́шу свою́ преложи́.

Да бу́дите ве́дуще бра́тие, я́ко днесь есть пост пред Креще́нием Госпо́дним, да того́ ра́ди собери́теся в це́рковь в шесты́й час на славосло́вие. Той бо есть день на́шего ра́ди спасе́ния, во́ньже Госпо́дь Бог на во́ды Иорда́нския прии́де, и потопля́ет в воде́ обетша́вший грехо́м род наш, и главу́ Свою́ рабу́ преклоня́ет, очи́стити хотя́ пло́ти на́ша.

Те́мже бра́тие и мы такова́го иму́ще Ми́лостиваго Влады́ку, да не лени́мся по вся дни моля́щеся Ему́ за вся грехи́ я́же есмы сотвори́ли, о́во в пия́нстве и во лжи, ово в ла́комствех и хище́ниих. О всем бо том отвеща́ти нам есть пред Бо́гом на стра́шнем Суди́щи Христо́ве, или́ рабу́, или́ свобо́дну, и бога́ту, и убо́гу, та́мо бо несть по мзде сужде́ние, ни на лице́. Никто́же мо́жет никому́же помощи́, ни оте́ц сы́ну, ни ма́ти дще́ри, ни брат бра́ту, ни раб господи́ну - но своя́ дела́ кого́ждо или опра́вят, или́ осу́дят.

Те́мже бр́атие, не таи́м согреше́ний на́ших, но испове́давшеся духо́вным отце́м, пока́емся о них чи́стым испове́данием. А́ще бо я́ утаи́м зде, то ра́дость твори́м бо́льшую неприя́зни. А́ще ли я́ испове́мы, то плачь неприя́зни сотвори́м, а Бо́гу ра́дость. Ра́дость бо быва́ет на небесе́х, рече́ Госпо́дь, о еди́нем гре́шнице ка́ющемся, па́че, не́жели девяти́десяти ра́ди и девяти́ пра́ведник, и́же не тре́буют покая́ния.

Мы же бра́тие, не хо́щем еди́ною впа́дше в грех пока́ятися, но и до сме́рти в нем живе́м, и про́чия притворя́юще грехи́: но возскочи́вше от него́, очи́стимся испове́дающе и́, и вопию́ще к Бо́гу, и глаго́люще: «Влады́ко, согреши́хом на не́бо и пред Тобо́ю, и не́смы досто́йни нарещи́ся сы́нове Твои́, но сотвори́ ны я́ко еди́наго от нае́мник Твои́х, и прости́ ны согреше́ний на́ших, я́ко и мы проща́ем согре́щших нам».

И да не помышля́ет никтоже нам в се́рдце: Я́ко есть ли кому́ от ме́ртвых воста́ти или́ отвеща́ти о де́лех? Ей бра́тие, всем воста́ти, и отвеща́ти о соде́янных, и помы́слех, и за словеса́. Того́ ра́ди прии́де к нам Сын Бо́жий, да разруши́т дела́ неприя́зненная, и показа́ нам путь спасе́ния покая́нием: и разруши́ смерть сме́ртию Свое́ю, и при́сно зове́т ны святы́ми кни́гами в Свое́ Ца́рство.

Да не лиши́мся у́бо Его́ за ма́лую по́хоть: приити́ бо и́мать па́ки с небесе́ во сла́ве Свое́й суди́ти живы́м и ме́ртвым, и возда́ти кому́ждо по дело́м его́. Да не не ве́руем у́бо, я́ко по́зде бу́дет. Рече́ бо о дни том Госпо́дь Бог, глаго́ля: «Я́ко никто́же весть его́ когда́ прии́дет, ни а́нгели небе́снии, то́кмо Оте́ц Еди́н». Те́мже рече́: «Всегда́ гото́ви бу́дите ко отве́ту Его́», да возмо́жете избе́гнути в день зол и ста́ти пред Сы́ном Бо́жиим непосты́дни, сла́вяще Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.