Стихи́:

Седми́десяте число́ апо́стольское

Седмоты́сящнаго вре́мене просвети́телие показа́шася,

Осма́го же насле́дницы бы́ша.

Сей предрече́нный и соверше́нный муж, писа́ния разли́чна оста́ви нам, гре́ческа же и ри́мска о святы́х апо́столех, зане́же обе́ма язы́ком извы́кл бе и соверше́н в ра́зуме. По уме́ртвии же Диоклитиа́на и Ликини́я, до́йде своего́ жили́ща, и бе прави́тель Ти́рския це́ркве до Иулиа́на мучи́теля: зане́же не я́ве, но тай свои́ми кня́зи Иулиа́н убива́ше христиа́ны. Па́ки Дорофе́й до́йде У́дска гра́да, в не́мже и ят быв Иулиа́новыми кня́зи, мно́ги ра́ны прие́мь в вели́цей ста́рости, Христо́ва ра́ди испове́дания, муче́нием сконча́ся, сый лет ста седми́.

Сей святы́й Дорофе́й о седми́десятих апо́столех и ученице́х Христо́вых глаго́лет: От ни́хже мно́жайшии епи́скопи в разли́чных язы́цех бы́ша, ини́и же в слу́жбех сло́ва, и́хже боже́ственный Па́вел, в посла́ниих целу́я помина́ет. По воскресе́нии бо из ме́ртвых Го́спода Бо́га и Спа́са на́шего Иису́са Христа́, по мно́зех ле́тех всех их обре́т, и написа́, и́хже имена́ суть сия́:

1. Иа́ков, брат Госпо́день и пе́рвый епископ Иерусалимский, Саме́м Го́сподем поста́влен бысть: древом белильным главу ему сокруши́ша, и сконча́ся. 2. Клео́па, и́же и Симео́н брат Госпо́день быв, вторы́й епи́скоп Иерусали́му, и́же ви́де Го́спода по Воскресе́нии, Доментиа́ном царе́м ра́спят сконча́ся. [3. Матфе́й, напо́лнивый число́ двана́десяти апо́стол.] 4. Фадде́й, и́же донесе́ еписто́лию А́вгарю во Еде́с, сей исцели́в ему́ неду́г. 5. Ана́ния, и́же крести́вый свята́го апо́стола Па́вла, в Дама́сце бысть епи́скоп. 6. Стефа́н первому́ченик, от иуде́й ка́мением побие́н сконча́ся. 7. Фили́пп еди́н от седми́, и́же крести́вый Си́мона волхва́, и ка́женика Кандаки́ина, в Тра́лии Аси́йстей бысть епи́скоп. 8. Про́хор и той еди́н от седми́ же, в Никомиди́и Вифини́йстей бысть епи́скоп. 9. Никано́р еди́н от седми́ в то́йже день у́мре, во́ньже и святы́й Стефа́н со двема́ ты́сящема ве́ровавшими во Христа́. 10. Ти́мон еди́н от седми́ во о́строве Ара́всте бысть епи́скоп, сожже́н е́ллины сконча́ся. 11. Парме́на и той еди́н от седми́, и́же пред очи́ма апо́стол у́мре во свое́й слу́жбе. 11*. Никола́й и той еди́н от седми́, в Самари́и бысть епи́скоп: но от ве́ры уклони́ся с Си́моном. [11а. Тимофей, и́же с Па́влом Сло́во пропове́дав, во Ефе́се поста́влен бысть епи́скоп.] 12. Варна́ва, и́же с Па́влом послужи́в Сло́ву, и в ми́ре Христа́ пропове́да, в Медиола́не бысть епи́скоп. 13. Ма́рко евангели́ст, Петро́м апо́столом во Александри́и поста́влен бысть епи́скопом. 14. Лука́ же евангели́ст бя́ше ро́дом от Антиохи́и Си́рския, шед в Фи́ву Македо́нскую при Трая́не царе́, врачу́яй: написа́ же пе́рвее свято́е ева́нгелие к Фео́филу не́коему иге́мону ве́ровавшу во Христа́. И па́ки по ле́тех мно́зех страсте́й Госпо́дних, повеле́вшу свято́му апо́столу Петру́ изложи́ти ему́ дея́ния святы́х апо́стол. И посе́м изложи́ святы́й Лука́ дея́ния святы́х апо́стол к сему́ же Фео́филу, и сия́ соверши́в, с ми́ром ду́шу свою́ Го́сподеви отдаде́, и та́ко почи́ в Фи́ве. Святы́я же мо́щи его́ от Фи́вы принесены́ бы́ша в це́рковь святы́х апо́стол, и под свято́ю Трапе́зою положе́ни. [15. Епафра́с, и́же от коло́сс, его́же апо́стол в посла́нии колосса́ем помина́ет, поста́влен бысть пе́рвым епи́скопом в Коло́ссех, иде́же и му́ченическую кончи́ну прят, положи́в ду́шу свою́ за о́вцы своя́. 16. Архи́ппа, и́же от коло́сс, его́же апо́стол Па́вел помина́ет, и́же му́ченически пострада́ от Андро́кла епа́рха с апо́столом Филимо́ном и равноапо́стольной Апфи́ей.] 17. Си́ла, и́же с Па́влом Сло́во пропове́дав, в Кори́нфе бысть епи́скоп. 18. Силуа́н, и́же с Па́влом сло́во пропове́да, в Солу́не бысть епи́скоп. 19. Кри́скент, его́же апо́стол помина́ет, в Тимофе́ове второ́м посла́нии. В Халкидо́не Галиле́йстем бысть епи́скоп. 20. Епене́т, его́же апо́стол в Ри́мстей еписто́лии помина́ет, в Карфаге́не бысть епи́скоп. 21. Андрони́к, его́же апо́стол в Ри́мстей еписто́лии помина́ет, в Паноне бысть епи́скоп. 22. Ампли́й, его́же апо́стол в Ри́мстей еписто́лии помина́ет, в У́дьсе бысть епи́скоп. 23. Урва́н, его́же апо́стол в Ри́мстей еписто́лии помина́ет, в Македо́нии бысть епи́скоп. 24. Стахи́й, его́же апо́стол в Ри́мстей еписто́лии помина́ет; Андре́й апо́стол, По́нтское мо́ре препла́вая, и доше́д Агрикопо́ля, епи́скопа его́ в Византи́и устро́и. 25. Апе́ллий, его́же апо́стол в Ри́мстей еписто́лии помина́ет, во Иракли́и бысть епи́скоп. 26*. Фи́ггел, во Ефе́се бысть епи́скоп, последи́ же Си́моново уче́ние прия́т. [26а. Тит, и́же бысть причи́слен к седми́десяти, ближа́йший учени́к апо́стола Па́вла, и́же от Кри́та и бысть поста́влен та́мо епи́скопом.] 27. Ермоге́н, в Мега́ре Фра́честей бысть епи́скоп. 28*. Дима́с, его́же апо́стол в Тимофе́ове еписто́лии второ́й помина́ет, я́ко Фи́ггелл и Ермоге́н проти́вистася уче́нию Бо́жию, а Дима́с возлюби́ ны́нешний век, в Солу́не иере́й бысть и́долом, о не́мже апо́стол Иоа́нн пи́шет: от нас изыдо́ша, но не бы́ша от нас. [28а. Кодра́т, и́же во Афи́нех и Магниси́и бысть епи́скоп.] 29. Аристову́л, его́же апо́стол в Ри́мстей еписто́лии помина́ет, во Брита́нии бысть епи́скоп. 30. Нарки́сс, его́же апо́стол в Ри́мстей еписто́лии помина́ет, во Афи́не бысть епи́скоп. 31. Иродио́н, его́же апо́стол в Ри́мстей еписто́лии помина́ет, в Па́тре бысть епи́скоп. 32. Ага́в, его́же дея́ния апо́стольская помина́ют, и́же и дар проро́ческий прия́т. 33. Руф, его́же апо́стол в Ри́мстей еписто́лии помина́ет, в Фи́ве бысть епи́скоп. 34. Асигкри́т, его́же апо́стол в Ри́мстей еписто́лии помина́ет, во Арка́не бысть епи́скоп. 35. Фле́гонт, его́же апо́стол к колосса́ем в еписто́лии помина́ет, в Марато́не бысть епи́скоп. 36. Ерми́н, его́же апо́стол в Ри́мстей еписто́лии помина́ет, в Далма́тии бысть епи́скоп. 37. Патро́в, его́же апо́стол в Ри́мстей еписто́лии помина́ет, в Потиоле бысть епи́скоп. 38. Ерма́, его́же апо́стол в Ри́мстей еписто́лии помина́ет, в Филиппопо́ли бысть епи́скоп. 39. Лин, его́же апо́стол в Ри́мстей еписто́лии помина́ет, по свято́м Пе́тре апо́столе, в Ри́ме бысть епи́скоп. 40. Га́ий, его́же апо́стол в Ри́мстей еписто́лии помина́ет, по Тимофе́и апо́столе, во Ефе́се бысть епи́скоп. 41. Филоло́г, его́же апо́стол помина́ет, Андре́ем апо́столом в Синопи́и поста́влен бысть епи́скоп. 42. [Оли́мп], его́же апо́стол помина́ет, сий в Ри́ме со святы́м апо́столом [Иродио́ном при кре́стной сме́рти апо́стола Петра́], Неро́ном усекнове́ни бы́ста. 43. Луки́й, его́же апо́стол поминает в Ри́мстей еписто́лии, в Лаодики́и Си́рстей бысть епи́скоп. 44. Иа́ссон, его́же апо́стол в Ри́мстей еписто́лии помина́ет, в Та́рсе бысть епи́скоп. 45. Сосипа́тр, его́же апо́стол в Ри́мстей еписто́лии помина́ет, во Икони́и бысть епи́скоп. 46. Те́ртий, написа́вый к ри́мляном посла́ние, вторы́й епи́скоп бысть во Икони́и. 47. Ера́ст, его́же апо́стол помина́ет, иконо́м бысть Иерусали́мския це́ркве, пото́м Панеа́ду бысть епи́скоп. 48. Аполло́с, его́же апо́стол к кори́нфом помина́ет, в Кесари́и бысть епи́скоп, [ини́и глаго́лют, я́ко в Сми́рне]. 49. Ки́фа*, его́же апо́стол Па́вел во Антиохи́и обличи́, во Икони́и бысть епи́скоп. 50. Сосфе́н, его́же апо́стол помина́ет, в Колофо́не бысть епи́скоп. 51. Ти́хик, его́же апо́стол помина́ет, и той в Колофо́не же бысть епископ [последи́ Сосфе́на, ини́и глаго́лют, я́ко в Халкидо́не Вифини́и пе́рвый бысть епи́скоп]. 52. Епафроди́т, его́же апо́стол помина́ет, во Андриаки́и бысть епи́скоп. 53. Ке́сарь, его́же апо́стол помина́ет, в Дра́чии бысть епи́скоп. 54. Ма́рко сыно́вец Варна́вль, его́же апо́стол помина́ет, во Аполониа́де бысть епи́скоп. 55. Иису́с, реко́мый Иу́ст, его́же апо́стол помина́ет в Дея́ниих, во Елевферопо́ли бысть епи́скоп. 56. Арфе́ма, его́же апо́стол помина́ет, в Ли́стре бысть епи́скоп. 57. Кли́мент, его́же апо́стол помина́я глаго́лет: И со Кли́ментом, и с про́чими поспе́шники мои́ми, в Средце́ бысть епи́скоп. 58. Ониси́фор, его́же апо́стол помина́ет, в Кирини́и бысть епи́скоп. 59. Куа́рт, его́же апо́стол помина́ет, в Ви́футе бысть епи́скоп. 60. Карп, его́же апо́стол помина́ет, в Бе́ре Фра́честем бысть епи́скоп. 61. Ево́д, и́же по святе́м Петре́, во Антиохи́и бысть епи́скоп. 62. Ариста́рх, его́же апо́стол помина́ет, во Амаси́и Си́рстей бысть епи́скоп. 63. Ма́рко, нарица́емый Иоа́нн, его́же Лука́ в Дея́ниях помина́ет, в Би́бле бысть епи́скоп. 64. Зи́на зако́нник, его́же апо́стол помина́ет, в Диоспо́ле бысть епи́скоп. 65. Филимо́н, к нему́же апо́стол Па́вел написа́ еписто́лию, в Га́зе бысть епи́скоп. 66. Ариста́рх други́й, 67. Пуд, 68. И Трофи́м: Си́и трие́ во всех гоне́ниях со апо́столом Па́влом пострада́ша: на коне́ц в Ри́ме от Неро́на царя́ усекнове́ни бы́ша. 79. Они́сим сконча́ся в Потио́ле, Те́ртилом епа́рхом Ри́мским. 70. С ни́ми же и Фуртуна́т.

О ни́хже блаже́нный Дорофе́й написа́в ри́мским язы́ком и преда́сть це́ркви в па́мять святы́х апо́стол, от него́ же и мы избра́вше свои́м язы́ком написа́хом седми́десяти ученик, о ни́хже Па́вел вели́кий пиша́, глаго́лаше: «и́же пре́жде нас бы́ша о Го́споде». И не мни ни́ктоже неве́рно су́ще се.

* - изнача́льно апо́столы от седми́десяти по спи́ску Дорофе́я, отпа́вшие от христиа́нства и уше́дшии в е́ресь. В [] допи́саны не́которые апо́столы, не упомя́нутые Дорофе́ем, но входя́щие в чи́сло 70.

Стихи́:

Феокти́ст преподо́бный во и́стинне жи́тельстве просла́вися,

О́браз ве́рным житие́м си чи́стым бысть,

От всех сих на небесе́х сугу́бо от Бо́га венча́ся.

Сей преподо́бный оте́ц наш Феокти́ст, бысть от Ерапо́ля Арме́нскаго. Возлюби́в же Бо́га, и ми́ра отве́ржеся, и в не́кий монасты́рь скры́ся. И пома́ле уве́ден бысть роди́телема, и та ше́дша ну́ждею извлеко́ша его́, и в дому посади́вше. О́во ласка́нием, о́во же преще́нием ну́дяста его́ причта́тися жене́: и не побежде́н бысть, отъи́де во Иерусали́м поклони́тися це́ркви Воскресе́ния Христа́ Бо́га на́шего. И отъи́де в пусты́ню Ме́ртваго мо́ря, и всели́ся в пеще́ру, и прии́м от вели́каго Евфи́мия а́нгельский о́браз, и бысть ему́ учени́к: и тому́ ревну́я, по вся но́щи стоя́ше в пеще́ре на моли́тве. Труды́ же его́, и поще́ния кто мо́жет сказа́ти. Мно́гажды бо и четы́редесять дний не вкуша́я ничто́же бра́шна, и того́ ра́ди покори́ ему́ Бог нечи́стыя ду́хи. Мно́ги па́кости бе́си ему́ творя́ху. Не то́кмо же от ме́ста, в не́мже жи́тельствуя отгоня́ше их, но и от всего́ преде́ла Иерусали́мскаго. Вся же приводи́мыя к нему́ челове́ки, и скоты́ от наси́лия диа́воля избавля́я. И совокупи́ же в том ме́сте, се́дмьдесять и четы́ре мона́хи. И к сему́ блаже́нный Са́вва шед, и мона́шествоваше. Мно́ги же доброде́тели в жити́и свое́м показа́, зна́емь же бе и царе́м. И о всех к Бо́гу моли́твы приноси́в, и потружа́вся лет о́смьдесять и четы́ри. В ста́рости до́бре в ру́це Бо́гу ду́шу свою́ предаде́.

Стихи́:

Афана́сие у́мре с Зоси́мою,

Внутрь на ка́мень соше́дше, и си́и житие́ и́муть*.

Сей святы́й Зоси́ма, бя́ше от Килики́и, со зверьми́ живы́й. И ят быв Дометиа́ном кня́зем, и Христа́ Бо́га бы́ти испове́дав, разжже́нными желе́зы у́ши ему́ сожго́ша: и в коно́б врящь испо́лнен скве́рны вве́ржен быв. Та́же стремгла́в пове́шен, и пресла́вно от всех сохран́ен быв: я́вльшуся на позо́рищи льву, и челове́ческим гла́сом веща́ющу. И приведе́ к ве́ре Афана́сия коментари́сия. Отпуще́н же быв мучи́телем, и в гора́х иде́же пре́жде бе хожда́ше. И огласи́в и крести́ коментари́сия Афана́сия, иде́же ка́мени вели́ку разсе́дшуся, и ку́пно вше́дша преда́ста ду́шы своя́ Го́сподеви.

* Внутрь ка́мени и́мать прия́тнейшее сожитие́.

Днесь спасе́ние сбыва́ется проро́чеством Иса́ии, глаго́люща: «Да возвесели́тся пусты́ня, да процвете́т я́ко крин, да вельми́ ублажи́тся пусты́ня Иорда́нова», ви́дящи Христа́ гряду́ща ко Иорда́ну, да водно́е освяти́т естество́. Иорда́н испо́лньшеся вод, и мно́жество наро́да схожда́ше к нему́. Иоа́нн велегла́сно глаго́лаше, облича́я жидо́вское злоде́йство: Исча́дия ехи́днова, сотвори́те плоды́ покая́нию, да егда́ прибли́жится Крестя́й огне́м и Ду́хом, послу́шествуемь Сый от Отца́ с небесе́ и Ду́хом Святы́м показу́емь Сы́н Бо́жий ‐ Тому́ ве́руйте, и со мно́ю просла́вите, и я́ко Бо́гу поклони́теся. Бо́гу на́шему сла́ва, ны́не и при́сно, и во ве́ки веко́в. Ами́нь.