Стихи́:

Полие́вкт, ему́же страсть посече́ние Сло́во,

Мно́го моли́твы ра́ди и́маше твою́ страсть:

В девя́тый посече́ние прия́т моли́твою.

Сей бе́яше при Де́кии и Валериа́не царе́ма, в Меле́нтии арме́нстии воева́я, первей в такове́й стране́ Христа́ ра́ди пострада́в. Изше́дшу же повеле́нию злочести́вому, е́же отрица́тися Христа́, не покаря́ющим же ся сме́ртию отщети́тися, сий же ника́коже устраши́вся, дерзнове́нием Христа́ пропове́да, и де́рзости испо́лнився, е́же от неве́рных что́мая ка́пища сокруши́. Тем, ни жесто́чествы, и уте́хи, и ласка́нием поко́рся, ниже́ своея́ жены́ бие́нию и пла́чу смили́вся, му́ченику же не́кто Неа́рх, любо́вен ему́ сый, обеща́ния ему́ известву́я, мня, я́ко от ве́ры Христо́вы уклони́ти его́, но святы́й небоя́знено во испове́дании стоя́, и ме́чную восприя́т кончи́ну. Соверша́ет же ся собо́р его́ в муче́нии во святы́х апо́стол вели́ких.

Стихи́:

А́ще и поне́ Евстра́тию дух прие́млет возду́х,

Те́ло же земли́ и чудесе́м точа́ благода́ть.

Сей бя́ше от страны́ Тарси́йския, дань даю́щия по зако́ну оптима́том, коми́с глаго́лемый Вициниа́нский. Роди́телей благочести́вых сын, и в дово́льстве живу́щих, Гео́ргия, и Меге́фы: до́бре бо от них воспита́н. И испо́лнив два́десятое ле́то во́зраста, боже́ственному рече́нию повину́вся, оста́вив бо роди́тели бежа́, и и́де ко Оли́мбстей стране́, ко оби́тели Авга́рове, иде́же просвети́шася, Григо́рий, и Васи́лий, ма́тере его́ стры́еве, в поще́нии и во вся́кой доброде́тели. И си́ми у́бо прия́т быв, и власы́ постри́г, тру́днаго и мона́шескаго правле́ния ше́ствоваше житие́. Такова́го же получи́в желания, я́ко всей бра́тии возжеле́нным се́рдцем, и смиреномудрием любо́вь подава́ше. И ника́коже о сем ве́це пеки́йся, ниже́ что стяжа́в, то́чию еди́ну власяни́цу, и ми́лоть на не́йже возлега́ше. Иде́же бо ему́ случа́шеся, ма́ло поко́я приима́ше, не бя́ше тому́ ме́ста отлу́чна зна́ти. Глаго́лаша же о нем: я́ко никогда́же тому́ просте́рту полещи́, отне́леже всех отрече́ся: и не лежа́ на ле́вей стране́ телес́е своего́, во всех седми́десяти и пяти́ ле́тех, отне́леже поще́ния его́ по́двиг показа́ся. И предвари́вшым преподо́бным житие́ сконча́вшым, вели́кий сей бра́тняго настоя́ния вруче́н бысть, и повину́ся тех умоле́нию. Да внегда́ же Лев звероимени́тый до́йде от болга́рския ра́ти, воста́ на ца́рство Михаи́ла благочести́ваго царя́, и с ми́ром того́ восприи́мшым. Жены́ же и дете́й того́ лиши́в, та́же связа́в и остри́г, изгна́ к проти́вному о́строву отсла́. И па́ки пога́сшую иконобо́рную е́ресь подви́гнути тща́шеся, тогда́ всем своя́ до́мы оставля́ющым. Та́коже и сей вели́кому Иоанни́кию повеле́вшу, ко оста́вльшей горе́ па́ки отъи́де. Да внегда́ па́ки Це́рковь восприя́т свою́ красоту́, е́же святы́х ико́н воображе́ние и покланя́ние: и знаменоно́снии отцы́ к свои́м домо́м доше́дше. И боже́ственный Евстра́тий к свое́й оби́тели до́йде, во всех днех теле́сными де́лы без ле́ности с бра́тиею тружда́яся: но́щию же стоя́нием и безсо́нием, и коленопреклоне́нием провожда́я. Не то́чию же сие́, но и в само́м кано́нстем пе́нии внутрь свята́го же́ртвеника стоя́, и от нача́ла да́же и до соверше́ния, Го́споди поми́луй в себе́ глаго́лаше. А я́же от него́ бы́вшая чудеса́ мно́гая мно́жества суть, невозмо́жно есть писа́нию преда́ти, е́же к богоугожде́нию зна́мение, и е́же от него́ твори́мое бя́ше. И поне́же от зде́шних хотя́ше отъити́, око́льних призва́в бра́тию, и рече́: Вре́мя моего́ жития́ к концу́ приспе́. Тем ча́да люби́мая, я́же прия́ли есте́, по преда́нию сохрани́те, ве́дуще я́ко мимоходи́ма суть вре́менная, ве́чна же бу́дущая. Потщи́теся у́бо во спаса́ющихся ча́сти бы́ти. Сия́ рек помоли́ся, и зна́менав их, и на не́бо о́чи возве́д, рече́: В ру́це Твои́ Го́споди дух мой предлага́ю. И поко́я сном у́спе. Жив лет, де́вятдесять и пять.

Святы́й проро́к Сами́я бя́ше от Сило́ма гра́да, иде́же киво́т жидо́веск по дре́внему сотворе́н. Той же проро́к о Соломо́не царе́ прорече́, я́ко согреши́ти и́мать и прирази́тися к Бо́гу. Да е́же рече́, та́ко и бысть. Обличи́ же Иеровоа́ма, я́ко с лука́вством хо́дит пред Бо́гом. Сей ви́де во сне супру́г воло́в, я́ко попира́ше лю́ди, и скака́ше, и жреца́ гна́ше. Се же проро́чествовавше, я́ко лю́ди иуде́йстии от язы́к в плен попра́ни и́мут быти, и гла́дом, и жа́ждею растл́ети, и жреце́м от стра́ха бежа́ти, и мно́го томле́ным бы́ти. Си же проро́чествовав, и и́на мно́га, преста́вися ко Го́споду.