Стихи́:

Изя́щный в преподо́бстве Гео́ргие да восхва́лится:

Чу́днаго же в доброде́телех похвали́ти вси потщи́мся!

Похва́льный бо в вы́шних о на́шем недосто́инстве мо́лит Христа́.

Стихи́:

Оста́вльши зе́млю, небому́дреная Домни́ка

На небеса́ взы́де, и́хже возлюби́:

Домни́ку в осмы́й сме́ртная пости́же нощь.

Сия́ бя́ше при Феодо́сии вели́цем цари́, и доспе́вши да́же до Льва и Зино́на царе́ма. Бя́ше же от гра́да Карфаге́нска, по не́коему же разсмотре́нию, со други́ми четы́рьми деви́цами в Константи́нь град доше́дши. Некта́рие же, тогда́ архиепи́скоп, открове́нием боже́ственным сию́ восприя́т, и свято́му креще́нию сподо́би. Обыше́дши же и́ноческая жития́ преподо́бная, и му́жескими труды́ подвиза́вшися, и к верхо́вному поще́нию прише́дши, и чудеса́ соде́лати сподо́бльшися, и ко Го́споду отъи́де.

Стихи́:

Иулиа́ну мно́гая и Васили́сы,

Воздая́ния прилежа́т от меча́ лежа́щим:

Отсещи́ главу́ мече́м Келси́еву,

Со главо́ю и Анто́ниевою.

Святы́й му́ченик Иулиа́н, бя́ше во времена́ Диоклитиа́нова, и Маркиа́на иге́мона, во Антино́не гра́де Еги́петстем. И́же по зако́ном пои́мшу ему́ свою́ жену́ Васили́су и́менем, и сотвори́в ю́ в чистоте́ пребыва́ти, я́коже и себе́. Ю́же и постри́г, и в монасты́рь же́нский введ, сам же в друго́м и́ночествова: и бя́ше с му́жи яко с двою́ на́десять ты́сящь. Ят же быв во́и, и Христа́ не отве́ржеся, но укори́в и́долы: и тем на гнев и я́рость иге́мона подви́же, я́ко внеза́пу и монасты́рь зажже́. И та́ко сгоре́ша вси су́щии та́мо, епи́скопи, и свяще́нницы, и про́чии кли́рицы стра́нстии. И та́мо соверши́ся муче́ние их. Святы́й же Иулиа́н просте́рт бысть по земли́, и бие́н желе́зными у́жи, и сокруши́ша ему́ ко́сти: имже еди́н от слуг слеп еди́нем оќом бе, исцеле́н бысть му́чеником, и главу́ его́ отсеко́ша. И Келси́й и́же иге́монов сын, со два́десятию ве́рова во Христа́. Елма́ же ви́дев ме́ртва воскре́сша моли́твами свята́го, сего́ ра́ди повеле́нием иге́моновым пе́рвее вве́ржен бысть в темни́цу. Та́же в коно́б разжже́ный вве́ржени бы́ша, ку́пно с седмию́ о́троки кня́зя, уже́ ве́ровавшими: и с ста́рцем Анто́нием, из ме́ртвых воскре́сшим Анаста́сием. И зане́же невреди́ми изыдо́ша благода́тию Христо́вою, мно́зи ве́роваша с ма́терию Келси́евою. Предста́вшым же святы́м пред иге́моном, а́бие моли́твами их, и́же в це́ркви и́долы сотро́шася, и це́рковь с шу́мом паде́ся. Приведе́ни же бы́ша святи́и, и папи́рными венцы́ напое́ными ма́слом, на пе́рстех ручны́х и ножны́х навяза́вше запали́ша. И поне́же не сожже́ их огнь, свято́му Иулиану и де́тищу Келси́ю ко́жу со главы́ одра́вше. О́чи же ста́рца Анто́ния у́дицами извлеко́ша: ма́терь же Келси́еву уби́ша. Посе́м други́х звере́м преда́ша, поне́же и от сих блаже́ннии сохране́ни бы́ша: и мече́м главы́ их отсеко́ша. Соверша́ется же сих собо́р во святе́м их муче́нии, су́щем при Форо́се.

Стихи́:

Бори́ся, Карте́рие, ко огню́ и копию́:

Терпели́вое свое́ к борьба́м показа́еши обои́м.

Сей бя́ше при Диоклитиа́не царе́, и Урва́не иге́моне, Кесари́и Каппадоки́йския, иере́й и учи́тель христиа́нский. И дом церко́вный созда́в, и мно́го мно́жество христиа́н собра́в: уча́ше чести́ Христа́ су́ща И́стиннаго Бо́га со Отце́м и Ду́хом, и па́че Того́ не бы́ти. И обо́лган бысть ко иге́мону, и скры́ся. Госпо́дь же яв́ися ему́, и рече́: Иди́ Карте́рие, и покажи́ себе́ иге́мону, Аз же бу́ду с тобо́ю. Подоба́ет бо тебе́ мно́го пострада́ти и́мене Моего́ ради, и мно́зи ве́ровавшии тобо́ю спасе́ни бу́дут. Святы́й же ра́дости испо́лнися, и благодаре́ние Бо́гу возсла́в, себе́ же пове́да иге́мону. И пе́рвее в темни́це того́ затвори́ша. Та́же предста́в иге́мону, и повеле́ ему́ пожре́ти Серапи́ю. Он же моли́твою того́ низложи́в: и шестию́ на́десять во́ин бие́н бысть па́лицами, четы́рем слуга́м на нем лежа́щым. Та́же пове́шен быв на дре́ве, и бри́твою но́гти ручны́я и ножны́я отре́заша ему́: и желе́зными у́дицами все те́ло его́ расте́рзано бысть. То́йже явле́нием а́нгела прев́ыше мук быв, и здрав изше́д. И па́ки у́бо повеле́нием иге́моновым сведе́н быв, и проверте́ша желе́зы но́зе его́, и леме́ш разжже́н на пе́рсех его́ положи́ша. Посе́м повеле́но ему́ бысть се́сти на стол желе́зен, зело́ разжже́н, и рожны́ желе́зны разже́гше, но́зе ему́ сбодо́ша: и по сих в темни́цу вве́ржен. Ве́черу же бы́вшу, яви́ся ему́ Спас, и отреши́ его́ от уз, и свободи́ его́: и от врат темни́чных того́ вон изве́д поста́ви. Тем мно́зи ви́девше его́ здра́ва, приходя́ще к нему́ креща́хуся: и от боле́зней я́же име́яху устрабля́хуся. Посе́м пове́сивше ка́мением тя́жкое и ве́лие на ру́це и на но́зе его́, и по чре́ву па́лицами бие́н бысть, и свеща́ми жгомь, излива́юще се́ру и смолу́: и я́звам просажа́ющымся. И о́лово клоко́чущее во уста́ его́ влия́ша, и шлем разжже́н зело́ на главу́ его́ положи́ша. Коне́чное же во огнь вве́ржен бысть, пе́сни благода́рныя возсыла́я Бо́гу, от него́же невреди́мь изше́д. Иуде́анин же не́который от предстоя́щих зря на свята́го зело́ опусне́в, похвати́в копие́, и ре́бра свята́го пробо́дь, смерть ем́у нанесе́. И пе́рвее же истече́ вода́ мно́га, я́ко пога́снути о́гненному огни́щу. Пото́м же кро́ви изше́дши, ду́шу преложи́ в ру́це Бо́гу.