Стихи́:

Ма́ло что вма́ле удали́вшися Макри́но:

В ми́ре себе́ сама́ вмени́ла еси́ Го́сподеви.

Сия́ свята́я Макри́на, сестра́ бе Вели́каго Васи́лия и Григо́рия (Ни́сскаго), бра́та его́, добро́тою теле́сною и нра́вы благи́ми украша́ющи себе́. Та́же удо́бному сопряжена́ бысть жениху́. Бра́ку же и еще́ лежа́щу во обруче́нии, и внегда́ у́бо такова́я соде́лав, во отхожде́нии лю́те быв и у́мер. И изы́де от челове́к блаже́нная Макри́на. Други́м же мно́гим теша́щим ю́, и привести́ хотя́ще ей му́жа. Она́ же о вдовстве́ и о про́чих прилежа́ше, внегда́ о бра́чной красо́те нерадя́щи, вся́кого приме́са мирска́го себе́ отча́явши, бя́ше же с ма́терию к боже́ственым кни́гам упражня́ющися. И уче́ние вторы́я ма́тере, и и́же с не́ю роди́вшимся воспита́тися. Десяти́м су́щим отроко́м сия́ наказа́тельница бы́вши. Посто́м же и преподо́бствием пожи́вши. И бра́ту Григо́рию о души́ побесе́довавши, и в таковы́х кра́йних доброде́телех отъи́де ко Го́споду, Его́же возлюби́.

Стихи́:

Прие́м кончи́ну и ты, блаже́нне Ди́е,

Сла́вный де́йствием бо́лее:

В девятьна́десятый приведе́н у́мре Ди́е.

Сей бя́ше во времена́ Феодо́сия вели́каго во Антиохи́и Си́рстей. Мно́гое показа́в поще́ние, на вели́кое пода́ние доброде́телей проше́д. Прише́д же в Константи́нь град, открове́нием Бо́жиим обре́те место, иде́же ны́не благочести́вый его́ поста́влен бысть монасты́рь, и очи́стив его́, и своего́ же́зла су́ха су́ща на том ме́сте водрузи́, и́же и нарече́нием Святы́я Тро́ицы вкорени́ся, бысть в дуб вели́к, я́ко и досе́ле стоя́ и принося́ плоды́ гобзова́нны. Прииде же к нему́ царь Феодо́сий, и почуди́ся ему́, и дово́льно богатство подав ему́, от него́же и соста́в монасты́рский бысть. Но блаженный патриа́рх Атти́к пону́див его́, и презви́тера поста́ви. Мно́га же чудеса́ си́лою и соде́йствием Христо́вым соде́ла. И от боку́ землено́ю по вели́кому Моисе́ю во́ду изведе́, и в ней по неве́рию утопившагося воскреси́в. И внегда́ хотя́ше умре́ти, уже безду́шен и недви́жимь ви́димь бя́ше приходя́щым, и слеза́ми пригро́бными омыва́ющым себе́, и е́же к погребе́нию его́ гото́вающым: Во́ньже прише́д и святе́йший патриа́рх Атти́к, и антиохи́йский Алекса́ндр. И воспомяну́вся я́ко от сна преподо́бный рече́: Дарова́л ми есть Бог и еще́ пятьна́десять лет. И воста́в и препроводи́в их отъи́де ко Го́споду.

Подража́тели убо будем святым, я́коже они́ приидо́ша во а́лчбе и жа́жде, в зиме́ и наготе́, огне́м и мече́м, и вся́кими скорбьми́ усе́рдно: Та́ко и мы до сме́рти уподо́бимся им. А́ще хо́щете, при́сно безсра́мно проси́те: се бо есть во́ля Бо́жия, непреста́нно моли́тися, без гне́ва и помышле́ния. Всяк бо по́мысл отлуча́ет ум от Бо́га. Весь бо есть по́двиг диа́волу, отлучи́ти и отри́нути ум от Бо́га, и совокупля́тися и соглаша́ти со скве́рными по́мыслы: Ни внима́ти яже напису́ет внутрь в се́рдцы. Ко всем бо скомра́х творя́ся ве́тхий писе́ц диа́вол, овогда́ у́бо бле́ски, овогда́ же зра́ки, и ли́ца неле́потна, и ве́щи. По сих же всех диа́вол, я́ко же есть вообража́ется, и окая́нный челове́к на еди́ном ме́сте стоя́ мнит и́нде не́где бы́ти прельща́емь, и наде́ется зре́ти не́кия и к лице́м бесе́довати, и управля́ти ве́щи, я́же суть вся пре́лесть диа́воля. До́лжно у́бо есть утвержа́ти и опа́совати ум, и обуздова́ти его́, и всяк по́мысл, и вся́ко де́лание истяза́ти и́менем Го́спода на́шего Иису́са Христа́, взе́млющаго грехи́ ми́ра. Да иде́же те́ло стоит, ту и ум есть. Да посреде́ се́рдца и Бо́га, ничто́же и́но да обрета́ется, я́коже средогра́дие или́ плоть помрача́ющи се́рдце: но ко еди́ному да бесе́дует то́кмо Го́сподеви. А́ще ли же восхища́ется ум, несть до́лжно укоснева́ти в по́мыслех, да не слог мы́слей в де́ло вмени́тся ему́ пред Го́сподем в день су́дный, егда́ су́дит Бог та́йнам челове́ческим, и егда помышле́ние челове́ческое испове́стся. Не возмо́жно бо есть кому́ получи́ти Ца́рствие небе́сное, а́ще не пре́жде отве́ржется во́ли своея́, и повеле́нная ему́ сотвори́м со стра́хом Бо́жиим. Я́коже Христо́с глаго́лет: не приидо́х твори́ти во́лю Мою́, но во́лю посла́вшаго Мя Отца́. Ему́же кто жела́ет и стра́ждет, стерпева́ет, распя́тие ему́ вменя́ется, и быва́ет ча́до воскресе́ния, и жи́зни ве́чныя. Блаже́н бо есть челове́к и́же претерпи́т напа́сть, я́ко искуше́н быв, прии́мет неувядаемый венец сла́вы. Такова́я у́бо слы́шавше обетова́ния, упраздни́теся при́сно, и прилежи́те Го́сподеви Бо́гу на́шему, до́ндеже уще́дрит ны. И ничто́же и́но проси́те, то́кмо ми́лость от Го́спода сла́вы, и довле́ет нам. И́щуще же ми́лости смире́нным се́рдцем проси́те. Про́чее вопи́йте от у́тра да́же до ве́чера, а́ще ли есть мо́щно и всю нощь глаго́лати непреста́нно: Го́споди Иису́се Христе́ Сы́не Бо́жий, поми́луй мя.