Стихи́:

Емилиа́н среди́ огня́ вве́ржен,

Его́же Иса́ия ви́де у́глие зря:

В осемьна́десятый огне́м сожже́н Емилиа́н.

Емилиа́н Христо́в му́ченик бе от гра́да Родосто́ла Амаси́йския епа́рхии, при Юлиа́не престу́пнице, раб не́коего е́ллина. Сам же бе христиани́н. И обре́тши вре́мя, взе́мши млат, и и́де в храм и́дольский, и сокруши́ вся ка́пища и же́ртвы разсы́па. Не ве́дуще же идолослужи́тели, я́ша не́коего ра́тая, и нача́ша его́ би́ти, влеку́ще его́ к иге́мону. Тогда́ святы́й ви́дев се, предаде́ себе́ глаго́ля: «Аз есмь сотвори́л сие́». И приведо́ша и́ к иге́мону и обличи́ его́ безу́мие, я́ко на су́етныя и́долы упова́юща, бие́н бысть зле жи́лами говя́жими. И до́бре му́ки прии́м, во огнь вве́ржен бысть, и неопали́мь пребы́сть. И в ру́це Бо́жии дух свой предаде́.

Стихи́:

Я́ко уха́ние си́няго* цве́та, Сло́ве,

Приими́ Иаки́нфа [сего́ тростника́]**.

* Иакинф (лат. Гиацинт) – цветок синего цвета.

** в славянском оригинале – «Самого Христа», но по падежам и с греческим оригиналом не сходится.

Сий прозябе́ от роди́телю благочести́ву Феокли́та и Феони́лы. Иракли́ду же во Енамастриди́и це́рковь составля́ющу, тогда́ явле́нием а́нгельским и́мя восприя́т. И триле́тен быв, призва́нием Христо́вым отроча́ уме́ршее воскреси́. Сопребыва́ющи ему́, и совозраста́ющи доброде́тели. Да внегда́ к ста́рости дости́же, мно́гим чудесе́м соде́лования сотвори́в. Ви́де идолослужи́тели не разу́мичны, дре́ву брестову служа́ща, и́же бя́ше оби́т и хралу́п. И́же свято́му дре́ва того́ посе́кшу, ят быв и приведе́н к Кавстриси́ю иге́мону. И доше́д до Амастри́нскаго гра́да, бие́н бысть вельми́, и искорени́ша зу́бы его́, и у́жи влачи́мь, и в темни́цу всажде́н. Бо́гу дух предаде́.

Не отча́йся челове́че, ни отступа́й моли́твы, но прииди́ к це́ркви. Гре́шен сый со воздыха́нием помоли́ся Бо́гу, и даст ти человеколю́бие Свое́, и просты́ню грехо́в твои́х. А́ще отча́явся у́бо не хо́щеши приити́, то во о́бласть сатане́ дае́ши себе́. А́ще ли сумня́ся не́йдеши, то спо́ну твори́ши Бо́жией благода́ти, хотя́щей тя поми́ловати, и вся приходя́щыя к Нему́ покая́нием. Ны́не избери́ у́ньшее. А́ще бо добро грех, то храни́ его́, и пребыва́й в нем до конца́. А́ще ли разуме́еши от него́ му́ку, то почто́ пребыва́еши в па́губных де́лех? Пи́сано бо есть: «В чем тя заста́ну, в том и сужду́».