Стихи́:

Иезеки́иле глаго́ли поне́ евре́йски на небеси́:

Адонаи́ Го́споди, Тебе́ ви́жду

Иезеки́иль проро́к бе от Сари́ра, от жрец, сын Вузи́ев. Мно́го проро́чествовав су́щим в жидо́встве. Сей проро́к чу́до да́де лю́дем, е́же внима́ти реце́ Хова́рстей, егда́ изся́кнет, серп и́мать приити́, и запусте́ние на кончи́ну земли́. Егда́ же наводни́тся, возвраще́ние бу́дет лю́дем во Иерусали́м. Ту бо живя́ше Иезеки́иль, и мно́зи у него́ собира́хуся. Не́когда же у́бо мно́жеству лю́дем собра́вшимся к нему́, и убоя́шася халде́и жидо́в, да не проти́вятся им, и наидо́ша на ня убие́нием. И сотвори́ проро́к раздели́тися воде́, да побе́гнут на он пол. И сме́вшии от враг гна́ти по них, потопле́на бы́ша. Сей же проро́к моли́твою пи́щу от Бо́га подаде́ лю́дем свои́м дово́льну. Я́ко мно́гим и уме́ршим, моли́ Бо́га, и подаде́ им живо́т поги́бшим лю́дем от язы́к. Прии́де же к воево́дам и зна́мения сотвори́ с небе́с, уста́ви проти́вныя, и устраши́в я́. И егда́ глаго́лаше изра́ильтяне, разгласи́шася: «Поги́бе наде́жда на́ша». Препре́ же я́ чудесы́ косте́й ме́ртвых, я́ко бу́дет наде́жда Изра́илю. Сей в пле́не сый, ска́зоваше лю́дем Изра́илевым быва́ющая во Иерусали́ме, и в лю́дех. И та́ко восхи́щен бысть от та́мо, и до́йде во Иерусали́м в той час, и облича́ше отступа́ющия от Бо́га. Сей я́коже Моисе́й ви́де о́браз церко́вный, и сте́ну широку́, и врата́ и́миже и́мать Госпо́дь вни́ти, и изы́ти. Бу́дут рече́ врата́ та затворе́на, и к Нему́ упова́ют вся страны́. Сей суди́ в Вавило́не, коле́ну Да́нову и́ Га́дову, я́ко не чтя́ху Го́спода, и гоня́ху храня́щия зако́н Госпо́день. И сотвори́ чу́до вели́ко, я́ко зми́еве уяда́ху младе́нцы их, и весь скот их, безче́стия де́ля их. И про́чее я́ко их де́ля, не обратя́тся лю́дие в зе́млю свою́, но в Миди́и бу́дут до кончи́ны льсти их. Тем и убие́н бысть от старе́йшины изра́ильтеска, супроти́вяше бо ся ему́ во вся дни живота́ своего́. И погребо́ша его́ лю́дие во гро́бе на селе́ Фурь, и́же бя́ше Арфара́кс. Бя́ше же о́бразом долг гла́вою и непокорли́в, и луна́в лице́м, браду́ разсоха́ту име́я и до́лгу.

Стихи́:

Мудр сый ты и уро́див, и́же житие́ се игра́в, о́тче,

Зми́я мудря́щагося утаи́вся да́же и до конца́:

Мир тебе́ тле́емый уро́да бы́ти мня́ше,

Ему́же подсмея́вся, во свои́х живе́ши о́тче.

Сия́ бы́ста от гра́да Еде́са, в ца́рство Иусти́на. И совеща́стася и идо́ста во Иерусали́м, поклони́тися честно́му дре́ву. И отто́ле во своя́ си не возврати́стася, но ше́дша на Иорда́н в монасты́рь свята́го Гера́сима, и бы́ста мона́ха. И от монастыря́ ше́дша всели́стася в пусты́ню, и пребы́ста лет четы́редесять вся́ко поще́ние показа́ста. Посе́м Иоа́нн в пусты́ни оста́, а Симео́н возврати́ся во святы́й град, и поклони́вся святы́м ме́стом, и́де во Ефе́с, и преложи́ся во уро́дство, и мно́га чудеса́ сотвори́ во уро́дстве. Уме́ршу же ему́, и несе́ну бы́вшу на погребе́ние, не́кий жидови́н слы́ша пе́ния а́нгельская мно́жайшая, воззре́в ви́дев то́чию два не́кая мо́щи его́ несу́ща, и разуме́ я́ко а́нгела суть пою́ща, и рече́: «Бла́жен еси́ уро́де, я́ко не име́еши челове́к провожда́ющих тя, но а́нгелы в пе́снех пою́щыя тебе́». Тогда́ же и подру́г его́ Иоанн преста́вися. И посеще́нием не́ких погребе́н бысть, в той же пусты́ни в сла́ву Бо́жию.