По шестой песни:
И поется кондак и икос (или мученичен, аще несть).Стихи́:
Прикоснове́нии невеще́ствеными
Прикаса́ется Тебе́ Христе́ Мой:
Е́же пе́рвее рекл еси́, не прикаса́йся Мне Мари́е
Сия́ свята́я Мари́я, прише́дши после́дова Христу́ бя́ше же от Магдалы́нских гор Сири́йских, стра́ждущи от седми́ бесо́в. И Христо́вою благода́тию свободи́ся от них, и после́довавши Ему́, бя́ше служа́щи Ему́ да́же и до стра́сти Его́, и мироно́сица бы́вши. И пе́рвая Воскресе́ние ку́пно с друго́ю Мари́ею Богоро́дицею извести́, внегда́ ве́чер в субо́ту ви́де а́нгела. На у́трия же два а́нгелы в бе́лых ри́зах седя́ща. И па́ки Самого́ Го́спода, Его́же и вертогра́даря вмени́вши, слы́ша «Не прикаса́йся Мне». По боже́ственем же и святе́м Спа́сове Вознесе́нии, прише́дши во Ефе́с ко свято́му Иоа́нну Богосло́ву и апо́столу, и та́мо преподо́бне у́спе. И положена́ бысть ко вхо́ду верте́пному, иде́же святи́и блаже́ннии седмь о́троцы успо́ша. Пото́м же при Льве приснопомина́емем и блаже́ннем царе́, пренесено́ бысть те́ло ея́ свято́е, и положено́ бысть в созда́нней его́ оби́тели свята́го Ла́заря, иде́же моле́бно собра́ние ея́ соверша́ется, в Марке́лине курато́рии.
В то́йже день страсть священному́ченика Фо́ки, и́же от Сино́па
Стихи́:
Но́вый ковче́г Изра́иль но́вый обре́те,
Фо́ку ме́ртва несы́й я́коже и скрижа́ли други́я.
Святы́й священному́ченик Фо́ка, бе при Трая́не царе́, презви́тер са́ном, непоро́чен житие́м, и вся́кими доброде́тельми сия́я. Приведе́н же бысть ко Африка́ну кня́зю, и вопроше́н бысть от него́. Он же не обину́яся испове́да Христа́, и уча́ше ве́ровати в него́. Нача́ же Африка́н на Христа́ хулу́ глаго́лати, и свята́го озлобля́ти, трус бысть внеза́пу, и пад князь с во́ины и иже с ним, и безду́шны лежа́ху: но того́ самого́ воскреси́ святы́й, помоли́вшися жене́ его́. И приведе́н бысть к Трая́ну царю́, и пропове́да Христа́: пове́шен бысть и стро́ган. И по сих пребыва́ше во испове́дании. Посе́м во и́звесть вве́ржен бысть, и изы́де отту́ду без вре́да. Та́же в ба́ню зело́ разжже́ну всажде́н бысть: И помоли́вся Бо́гу, и рек Ами́нь, и дух Бо́гови предаде́.
В то́йже день чу́до того́же свята́го Фо́ки
Пове́даше се Претиа́н: я́ко Зино́н кре́пкий ят бысть от срацы́н при Масалми́и, и око́ван и свя́зан наза́д рука́ма, и лежа́ше на земли́. Помоли́ся же глаго́ля: «Святы́й му́чениче Фо́ко поми́луй мя, изба́ви от належа́щия ну́жди и уз», и в печа́ли а́бие усну́. И ви́де свята́го Фо́ку прикосну́вшася, и рек ему́: «Проща́ет тя Иису́с Христо́с». А́бие же возбну́в, и обре́теся разреше́н от уз железных, и изы́де неврежде́н. И прише́д в дом свой и бе творя́ па́мять свята́го Фо́ки. Но и ны́не святы́й Фо́ка дар и́мать от Бо́га, заступа́ти вся призыва́ющыя его́ с ве́рою в напа́стех и беда́х, на земли́ и на мо́ри. Прославля́ет бо Христо́с Бог наш прославля́ющих Его́.
Евангелие на Литургии:
Ин. 64
11 [Заⷱ҇ 64] Марі́а же стоѧ́ше ᲂу҆ гро́ба внѣ̀ пла́чꙋщи: ꙗ҆́коже пла́кашесѧ, прини́че во гро́бъ 12 и҆ ви́дѣ два̀ а҆́гг҃ла въ бѣ́лыхъ (ри́захъ) сѣдѧ̑ща, є҆ди́наго ᲂу҆ главы̀ и҆ є҆ди́наго ᲂу҆ ногꙋ̀, и҆дѣ́же бѣ̀ лежа́ло тѣ́ло і҆и҃сово. 13 И҆ глаго́ласта є҆́й ѡ҆́на: же́но, что̀ пла́чешисѧ; Глаго́ла и҆́ма: ꙗ҆́кѡ взѧ́ша гдⷭ҇а моего̀, и҆ не вѣ́мъ, гдѣ̀ положи́ша є҆го̀. 14 И҆ сїѧ̑ ре́кши ѡ҆брати́сѧ вспѧ́ть и҆ ви́дѣ і҆и҃са стоѧ́ща, и҆ не вѣ́дѧше, ꙗ҆́кѡ і҆и҃съ є҆́сть. 15 Гл҃а є҆́й і҆и҃съ: же́но, что̀ пла́чеши; кого̀ и҆́щеши; Ѻ҆на́ (же) мнѧ́щи, ꙗ҆́кѡ вертогра́дарь є҆́сть, глаго́ла є҆мꙋ̀: го́споди, а҆́ще ты̀ є҆сѝ взѧ́лъ є҆го̀, повѣ́ждь мѝ, гдѣ̀ є҆сѝ положи́лъ є҆го̀, и҆ а҆́зъ возмꙋ̀ є҆го̀. 16 Гл҃а є҆́й і҆и҃съ: марі́е. Ѻ҆на́ (же) ѡ҆бра́щшисѧ глаго́ла є҆мꙋ̀: раввꙋні̀, є҆́же глаго́летсѧ, ᲂу҆чт҃лю. 17 Гл҃а є҆́й і҆и҃съ: не прикаса́йсѧ мнѣ̀, не ᲂу҆̀ бо взыдо́хъ ко ѻ҆ц҃ꙋ̀ моемꙋ̀: и҆ди́ же ко бра́тїи мое́й и҆ рцы̀ и҆̀мъ: восхождꙋ̀ ко ѻ҆ц҃ꙋ̀ моемꙋ̀ и҆ ѻ҆ц҃ꙋ̀ ва́шемꙋ, и҆ бг҃ꙋ моемꙋ̀ и҆ бг҃ꙋ ва́шемꙋ. 18 Прїи́де (же) марі́а магдали́на повѣ́дающи ᲂу҆чн҃кѡ́мъ, ꙗ҆́кѡ ви́дѣ гдⷭ҇а, и҆ сїѧ̑ речѐ є҆́й.