Стихи́:

Иусти́на быстросло́вие потреби́ от жития́,

Я́коже обычай к пе́рвым твори́т вда́нным:

В пе́рвый ию́ния за́вистию побие́н бысть Иусти́н.

Иусти́н Христо́в му́ченик до́блий, бе от Но́ваго гра́да Cи́рскаго. Филосо́ф прему́др зело́, и мужь ра́зума име́я мног. Любя́ же Христа́ и ненави́дящих Его́ отвраща́яся и боже́ственною ре́вностию по вся дни разгара́шеся. И того́ ра́ди шед в Рим во ца́рство Антони́на, написа́ сви́ток на и́дольскую лесть, побара́я по христиа́нстей ве́ре [и] дасть его́ царе́ви. И почуди́вся царь прему́дрости его́ и хи́трости. Не то́чию не уби́ его́, но и похвали́ его́ пре́до все́ми, поне́же идолослужи́телем посрамля́ше ли́ца, и служе́ние и́дольское ле́стно явля́ше: христиа́нское же изве́стно держа́ти и утвержда́ти написании и слове́сными показа́нии. И зави́дев ему́ Кри́ксент филосо́ф, и за́висти ра́ди убие́н бысть от него́.

Слы́шите Па́вла апо́стола глаго́люща: «Бра́тие, покоря́йтетеся старе́йшинам ва́шим, ти́и бо бдят о душа́х ва́ших, я́ко сло́во возда́ти им [в день Су́дный о вас]». И сего́ ра́ди изли́ше чти́те их. [О́ бра́тие, от злых дел очища́йтеся!]

Ты бо от свои́х грех пече́шися, а́ще устро́иши житие́ свое́ до́бре, о ино́м же не ради́ши. А иере́й а́ще устро́ит свою́ жизнь, а о тебе́ не ради́т и не до́бре упра́вит, то со злы́ми осу́дится. А́щели зако́н има́ть непра́в, то не послу́шай его́. А́щели пра́во есть учи́т, не жития́ его́ смотри́, но слове́с его́ слу́шай. И не глаго́ли: «Ка́ко мне глаго́лет, а сам того́ не твори́т?». Не то ему́ есть де́ло не лени́тся, но глаго́лати ко всем: а не глаго́лавшу, Христо́в ему́ суд прия́ти. Да а́ще не послу́шаеши того́, осу́дишися. Глаго́лет Госпо́дь: Слу́шаяй вас, и Мене́ слу́шает. А отмета́яйся вас, Мене́ отмета́ется. А и́же вас ху́лит, то Мене́ ху́лит. Ни, бра́тие, не подоба́ет овца́м па́стыря ху́лити: сей бо иере́й по вся дни за тя и за твою́ бра́тию и за вся слу́жбу прино́сит, зау́тра и ве́чер Бо́га мо́лит, в це́ркви и вне це́ркве, кресты́ нося́, и ту за тя моли́тва есть. Да та вся помы́сливше, вся́чески до́бре снабди́м его́ я́ко отца́. А́ще ли еще́ глаго́леши: «Скве́рнен есть и зол», то что есть тебе́? А́ще и до́брый за тя Бо́га мо́лит, то что успе́ет, а́ще ты еси́ неве́рен? А́ще ли и скве́рнен, то тебе́ скве́рна его́ не вреди́т, а́ще ты ве́рен: зане́же вся благода́ть от Бо́га есть. Иере́й бо то́чию уста́ своя́ отверза́ет, а все Бог твори́т. Ему́же сла́ва, ны́не и при́сно, и во ве́ки веко́в. Ами́нь.